Matiye 10

Masləŋɗe klaw kiyit sula

(Markus 3.13-19 / Luka 6.12-26)

1Zezu ayek gewleɗ nan klaw kiyit sula, azoŋko zani. Apsitik sembe narɓə tuyeŋɗe na mbəlgit məs gbəgbaɗe gəm na mbəlgit məs dəmbərsiti. 2Iya net masləŋɗe klaw kiyit sula van yeŋki. Simoŋ məs adawyaŋ na Piyer, gəm məlmən Andre, Zak məlmən Zaŋ kirtin Zebede. 3Filip gəm Bartolomi gəm Tomas gəm Matiye, mətaf zomorgol, Zak wətən Alfa, gəm Tadde. 4Gəm Simoŋ an naweleŋgit ɗii məs dədaw ngəlaŋ wəgil gitin ɗii net səka balam, gəm Zudas Iskariyot, məs dəzəm ki Zezu.

Wəza net Masləŋɗe

(Markus 6.7-13 / Luka 9.1-6)

5Zezu aslinik gewleɗ klaw kiyit sula neki, aɗi sitik wənna: Kədadoŋ atəki net əlfaɗe meɓɓet ɓa, kədadoŋ azet Samariyeɗ ɓa'e. 6Amma məduwaŋ azet Israyelɗe məs tahəŋ məzet va timeŋgiɗi. 7Mərban sit Məlĩ na Maŋgəlva, go'oy aza ərban zəni. 8Məmbəlgit məs gbəgbaɗe, məsilgit ɗii məmtiti, məmbəlgit məskokoleɗi, mərɓih tuyeŋɗe. Mekeleŋ kərəhəni, məpsit mekeleŋ tamə. 9Kədawkaŋ meleŋge avokum ɓa walla təbəs net suleyɗe ɓa, walla deleɗ a ziba nokum ɓa. 10Kədawkaŋ zəga adəv gabal nawzəm aka tive ɓa, walla lukut sula ɓa, kədawgəmaŋ hensekɗe ɓa, walla sulegere ɓa. Vi məgəɗ wəza agapək narəh zəga nawzəm nani.

11An kəgapaŋgək awlaŋ gəla metiŋ walla awalaŋ gəla muzliya, məkay ɗəf an na tafkum annanda, məsuwaŋ annanda ha gap wəmbat nokum. 12An munokum tatə toŋgoŋ adəv gəla nani mənahsit ɗii na dak na: Zam anokumda. 13An ɗii nadəv gəla nan atafkumənko, as na agapaŋgək narəh zam vani, amma an dətafkumən annet da ɓa, mətoŋ də zam nokum. 14An kətoŋgoŋko adəv gəla walla awalaŋ gəla, aɓoŋgoŋgək daw tafkuməni walla dapprəm wən nokum, məgil suwalaŋ gəla nani, məttu' hologudum səza tulkum. 15Gesiŋ nədawnah sukum pay wəgrak dəlva, kita net waday ki kita net ɗii na Sodoma də Gomorra.

Wəzəm saha an dədazani

(Markus 13.9-13 / Luka 21.12-17)

16Yaŋ, əntatə slən kum va timeŋgiɗ aweleŋgit kərɗe munya. Vi vaski məsoŋ də kuket va dohoŋɗe, məza mbrayen akokum ɓa va məŋgərwiɗe#10.16 Kaɗawayɗe Averin məkuɗuŋgulo na vi aɗɗa mambray anet grekɗe da ɓa. . 17Amma məga zukum, vi wakukumən aba kita wavərkumən adəv gəla nawpel wənneti. 18Wakukumən abet ɗii gugiriɗe dit məlyeŋge vi wənnawa, vi kəɗɗanən gən saydawa nokum abeti də abet ɗiiyen məza Yahudiyenɗeŋ ɓa. 19Payan adaw kukumən aba kita, kədaɗumoŋ an kəl peleŋ sitin ɓa walla kuket an kəl nahsitin ɓa. Wəpel an kəl pelsitini wade amokum dəpaska. 20Wəpel nan ade na səzokum ɓa, amma Əmpəs na Affən dədawpelin amokum.

21Ɗii wapsitin milmiŋgiɗit vi kawbayti, affiŋgiɗit kirin bo vas adaɗɗaŋ. Kirin wasilyoŋ aket migilti, vi kawbeyti. 22Ɗii namba dələv pak wazelkuməni viwa. Amma ɗəf an dədawgan ha aza wagraka wakohu. 23An armaŋgək mama azokum awalaŋ gəla aŋka, məduwaŋ awalaŋ gəla mbərən. Gesiŋ nədawnah sukum: Kəkgrakən na walaŋ gəla net Israyelɗe pak wəmbat adak dabəŋ ki wəziya na Wətən ɗəf ɓa.

24Məzuyagan zəga aday na ki məzərbansən ɓa, məgəɗ wəza aday na ki daya nan ɓa. 25An məzuyagan zəga agapək wəsən na məzuyagansəni, an məgəɗ wəza agapək gakdak na daya nani məkki. Ya an məyani affən gəla na Belzebul, asna ɗii neŋgil ananda adayaŋ na ki as də əray ɓa sa?

Naway an dəslə na geslne sən di?

(Luka 12.2-7)

26Kədaw geslne'eŋ sit ɗii ɓa. Wən məɗamma pak wapasə an məɗamman pak kawsənənni. 27An məs nədawnah sukum ara guzli pakə, mərban amaheret ɗii pakə. An məs nədawnah sukum məɗamma pak məgil gən apaka. 28Kədaw geslne'eŋ sitin məzu bayyən gəɓa zukum ɓa, amma aɓapənna wəbay zeŋgille zukum ɓa. Amma məgeslne'sən Maŋgəlva məs nawzan gəɓa zukum də zeŋgillokum pak aka offo məza, amtə na ɓa. 29Kaw vilti biŋgeɗ sula aka suley, taka ɓa sa? Amma tay dədaw bəta ko səmbret ko taka ɓa say an Maŋgəlva dəŋgələ. 30Nokum bo denɗeke na gəɓa zukum məŋɗeti taka taka pakə. 31Vi vaski kədaw geslne'eŋ ɓa, kədayaŋgək kiyit biŋgeɗ də sləma.

Wəɗɗa saydawa aka Zezu də wəzelni

(Luka 12.8-9)

32Ko naway dənah wənnawa abet ɗiiyi, wanənah wənnan tam aba Affu na disiŋ. 33Amma məs dənah wənnaw abet ɗii ɓa, nənah na wənnan aba Affu na disiŋ ɓa'a tamə.

Zam mi ɓa say kafahi

(Luka 12.51-53; 14.26-27)

34Kədaɗumoŋ na zam nəki adəv dəlva ɓa. Nəde vi kaw ki zam adəv dələv ɓa, amma nəde na vi kawki kafahi nəde. 35Nəde na, vi kawɗakan wiyən də affəni waŋ dət mata, ɗak dət atəta. 36Ɗii na dəv gəla na ɗəffa wazel nəni.

37Ɗəf an dəŋglu affəni, walla mani daykiwa nan dəgap nawsan də in ɓa. 38Ko naway an dəgəm wəlaŋga məzliwrihe nan dəsbaw gən ɓa dəgap ɗəf naw ɓa. 39Ɗəffan dəŋgəl wəkoho gən zeŋgilleni nan wazani. Amma ɗəffan dəzan zeŋgillen viwa nan warəha.

Riba

(Markus 9.41 / Luka 10.16)

40Ko naway dətafkum ataf wəka, məs dətafwa, atafək ɗəf an də slənwa. 41Ko naway dətaf məs kleŋ vi asan məs kleŋ na Maŋgəlva warah riba va məs kleŋ. Ko naway dətaf məgəɗ goŋga vi goŋga nani, warah riba va məgəɗ goŋga. 42Gesiŋ nədawnah sukum: Ko naway dəpsən iŋkile zazay sən muzliya nambet gewleɗ nawiŋki, vi asan gawla nawa, nan warah riba.

Zur Zeit ausgewählt:

Matiye 10: GDRNT85

Markierung

Kopieren