Luki 16

Kagemi yateʼmo hosu kava huno yagaiʼniya vekaeʼmo huʼniya gemae

1Yesuʼa geʼamo neʼafiya vayaʼaifeʼmo hapa painoʼaeʼmo, mago alopa kagemi yaʼamo haneʼniya vekamo maiʼnigeno ani kagemi yateʼmo yagaino neʼateya vekamo maiʼniye. Maiʼnigeʼapaeʼmo mago vayaʼmogi eʼa huʼapaeʼmo, kagemi yakaleʼmo yagaino nekateya vekamoʼmo kagemi yakamo fikumo alino neʼatale, huʼa ha paiʼnagenoʼaeʼmo 2agaefeʼmo ge huʼnigeno eʼnigenoʼaeʼmo, na agufa kavaʼmo huʼnana kavafeʼmo kava gemo afiʼnove. Huʼnisana kavafeʼmo kagesamo afika avoʼmo kaeka namiyo. Kagemi yaʼnileʼmo magoʼe huka yagaika oʼnategane, huno ha paiʼnigeno 3kagemi yaʼaleʼmo yagaino neʼateya vekamoʼmo hunoʼaeʼmo, na agufa kavaʼmo huguve. Aliʼyaʼmo afoʼamoʼmo naha faino natalesiyafeʼmo huʼniye. Nayamufa vekamo oʼmaiʼnovaʼmofeʼmo hoya aliʼyaʼmo afaʼa oʼaliguve. Mago vayaʼmogi neʼyatefeʼmo aukaya hisuvafeʼmo navagagemo hugiye. 4Hisuva kavaʼmo hemenimo ago ageʼnove. Aliʼyaʼmo afoʼamoʼmo naha faitalesigeʼapaeʼmo mago vayaʼmogi nagaefeʼmo huʼapaeʼmo, lagae nopiʼmo eka maiyo, huʼa naha paisageʼnaeʼmo hisuva kavafeʼmo nagesamo afiʼnove, huno aipafiʼmo agesamo afiʼniye. 5Ala vekaʼapimoʼmo anonaʼapimo haneʼniya vayaʼaifeʼmo ge huʼnigeʼa magoke magoke vayaʼmo ete ete huʼnagenoʼaeʼmo hogoteno eʼniya vekaeʼmo hunoʼaeʼmo, anonakamo na magi haneʼniye, huno ge huno afi geʼnigenoʼaeʼmo, 6vani hataleti kalisi talamumo haneʼniye, huno ha paiʼnigenoʼaeʼmo, anonakalefeʼmo malage huka apepaleʼmo fifitiʼae huka avoʼmo kao, huno ha paiʼniye. 7Alu vekaeʼmo hunoʼaeʼmo, anonakamo na magi haneʼniye, huno ge huno afi geʼnigenoʼaeʼmo, vani hataletiʼa falaova kuʼmo haneʼniye, huno ha paiʼnigenoʼaeʼmo, anonakalefeʼmo malage huka apepaleʼmo eitiʼae huka avoʼmo kao, huno ha paiʼniye. 8#Ef 5:8; 1 Te 5:5Aliʼyaʼmo afoʼamoʼmo kagemi yaʼaleʼmo hosu kavaʼmo huno yagaino ateʼniya vekamo agiʼaleʼmo alino asaga huno atetenoʼaeʼmo, agufaeʼmo alagepa huno agesamo afiʼniye, huno huʼniye. Ma mopafi vayaʼmogimo ma mopafi vayaʼaitegamo alu kava alu kavaʼmo hisayafeʼmo alagepa huʼa apakesamo afiteʼa hale yateʼmo neʼmaiya vayaʼmo aeʼa apaka seʼa maiʼnae. 9#Mt 6:20; Lu 14:14Nagaemo lapa nepauve, huno, ma mopafi hosu moniletiʼmo alita lapao yaʼmo hiyo. Lapakaemo falisageʼa lapao vayaʼmogi aliʼa falu fala huʼa lapatetesagetapaeʼmo nopiʼmo hanege hanege huno hanesiya noʼapifiʼmo uta haigae. 10#Lu 19:17-26Mago vekamoʼmo aise yateʼmo alagepa huno yagaiʼnisiyaʼmoʼmo ani kavaʼmo huno alopa yateʼeʼmo alagepa huno yagaigiye. Mago vekamoʼmo aise yateʼmo alagepa huno oʼyagaiʼnisiyaʼmoʼmo ina kavaʼmo huno alopa yateʼeʼmo alagepa huno oʼyagaigiye. 11Lapakaemo ma mopafi hosu monileʼmo alagepa huta noʼyagaisayaʼmoʼmo ina laʼmo lama ge monimo lapamigiye. 12Alu vayaʼai yateʼmo alagepa huta yagaita oʼapateʼnisayana ina laʼmo lapakaitapi yaʼmo lapamigiye. 13#Mt 6:24Aliʼyaʼmo neʼaliya vekamoʼmo lole aliʼyaʼmo afoʼalaʼmogani gemo afiteno akame huno aliʼyaʼmo afaʼa oʼaligiye. Mago vekaeʼmo hauʼnisigeno alu vekaeʼmo aini hugiye. Mago vekamo geʼamo afiteno alu vekaeʼmo akameʼyamo amigiye. Goti aliʼyateʼe moni aliʼyateʼeʼmo afaʼa oʼaligae, huno hapa paiʼniye. 14#Mt 23:14Falasi vayaʼmogimo monieʼmo hapaʼye nehiya vayaʼmogi ani muki huʼniya geʼamo afiteʼapaeʼmo apaipamo leʼa ateʼnae. 15#Mt 23:28; Lu 18:9-14; Mai 6:16-17Yesuʼa apakaefeʼmo hunoʼaeʼmo, lapakaemo vayaʼmogi apaulagaleʼmo kanale vayaʼmo maisayafeʼmo muki kavaʼmo nehayaʼmonanafa Gotiʼa lapaipafiʼmo ageʼniye. Vayaʼmogimo mago kavafeʼmo agiʼaleʼmo aliʼa neʼasagayaʼmonanafa Goti aulagaleʼmo alagi hosuʼniya kavaʼmo haneʼniye. 16#Mt 11:12-13Keʼaepa geʼe Gotitegati gemo alini eʼa aeʼa hakalo huʼa hapa nepaiya vayaʼmogi geʼapiʼeʼmo haneme haneme neʼegenoʼaeʼmo Yoniʼa afole aiʼniye. Yoniʼa afole aiʼniya afinatetiʼmo Gotiʼa yagaino neʼapateya kavafeʼmo alagepa faigoko geʼamo aeta hakalo huta hapa paime hapa paime eta hemeniʼeʼmo hapa nepaunageʼapaeʼmo muki vayaʼmo afela heʼnaya vayakana huʼa apaya mukiki huʼa uʼa faleʼa nehaiye. 17#Mt 5:18Ani gemo nehuvaʼmonanafa kokuʼnaʼe ma mopaʼeʼmo hano hisiya kavaʼmo alagi kana osuʼniyaʼmonanafa keʼaepa gemoʼmo aiseʼatoʼamo hano hisiyafeʼmo lusi kava huno magoʼe huno kana huʼniye.

18Haiya vayaʼmogimo aʼneʼapimo hapa faiʼa apataleteʼa alu aʼnemo neʼalisafi kumai kavaʼmo nehae. Haiya vekamoʼmo hafaino ataleʼnisiya a kanomo aliʼnisifi kumai kavaʼmo nehiye, huno hapa paiʼniye.

Kagemi yaʼamo haneʼniya vekaʼe Layosiʼefeʼmo huʼniya gemae

(Mt 5:31-32; 19:9; Mk 10:11-12)

19Yesuʼa hunoʼaeʼmo, mago kagemi yaʼamo haneʼniya vekamoʼmo muki afinaʼmo alagepa kukena yaʼmo hogote kukenaʼageʼmo vaige alagepa neʼyaʼageʼmo nege huno maiʼniye. 20Maiʼnigenoʼaeʼmo mago vekamo agiʼamo Layosiʼmo neʼyafeʼmo hauʼnigenoʼaeʼmo aukaya huʼniya vekamo lusi amuʼmo aleʼniye. Mago vayaʼmogimo ani vekamo avaleli uʼa kagemi yaʼamo haneʼniya vekamo lafi hiʼyanaʼamo malaga havaeʼa ateʼnageno havaeno maiʼnenoʼaeʼmo 21#Mt 15:27hiʼyalamutetiʼmo asagauno aisiya neʼya atupamo alino nesiyafeʼmo maiʼniye. Maiʼnigeʼapaeʼmo kalamogi eʼa amuteʼmo sagani sagani huʼa neʼnae. 22Afaʼa maiʼneno aukaya nehiya vekamo faliʼnigeʼapaeʼmo enisole vayaʼmogi emi eʼa avaleli uʼa haiʼa kokuʼnapiʼmo Emalehamu haopaleʼmo ateʼnageno maiʼniye. Ani kavaʼmo huno kagemi yaʼamo haneʼniya vekamo faliʼnigeʼapaeʼmo alini uʼa kiʼa ateʼnae. 23Ata kopiʼmo uno lamino maiʼnigeno lusi kava huno agafu kiʼnigenoʼaeʼmo alino maku huno ageyana Layosiʼmo avaleli uʼa haiʼa Emalehamu haopaleʼmo ateʼnageno Emalehamuʼeʼmo maiʼnaʼageno anakeʼniye. 24Anaketenoʼaeʼmo alopa gefatiʼmo keya aeno ge hunoʼaeʼmo, Naginagomo afo Emalehamuvo, huno, kahau huka nateteka Layosiʼmo alika ategenoʼao ati yagaina ayatetiʼmo anipiʼmo aeteno alinino emineno navenafuʼnaleʼmo malesigeno falu nahaugiye. Ata kopiʼmo maiʼnogeno lusi kava huno nagafuʼmo nekiye, huno ha paiʼnigeno 25Emalehamuʼa hunoʼaeʼmo, naginago mafaʼneo, huno, kagesamo afika ho huvo. Kagaemo ma mopafi maiʼnekaeʼmo muki afinaʼmo alagepa yaʼageʼmo alika maiʼnanageno Layosiʼa hosu yaʼageʼmo alino maiʼniyaʼmonanafa hemenimo alagepa huno maiʼnigekaeʼmo kagaemo lusi kava huno kagafu nekiye. 26Magoʼe gemo haneʼniyana Gotiʼa folagapiʼmo mago alopa kalokalopamo maleʼniyanageʼa ma koteʼmo maiʼnaya vayaʼmo lakaeʼa kagaetegamo oʼvisageʼa kagae koteʼmo maiʼnaya vayaʼmo lakaeʼa ma koteʼmo oʼmegae, huno ha paiʼnigenoʼaeʼmo 27Kagemi yaʼaʼe vekamoʼmo magoʼe huno ge hunoʼaeʼmo, naginagomo, huno, kahao ke hovanagi, Layosiʼmo alika ategenoʼao afoʼnimo notegamo uno lamino hapa paino. 28Faefuʼa konagaʼnimogi maiʼnayanageno uno lamino, ehetapiye, huno hapa paisigeʼa afiteʼapaeʼmo mani lusi kava huno apakafu kisiya koteʼmo emi oʼmegae, huno ha paiʼnigeno 29Emalehamuʼa hunoʼaeʼmo, Moseseʼa avoʼmo kae maleʼniya geʼe Gotitegati gemo alini eʼa aeʼa hakalo huʼa hapa nepaiya vayaʼmogi avoʼmo kae maleʼnaya geʼeʼmo haneʼniyanageʼa afaʼa afigae, huno ha paiʼnigenoʼaeʼmo, 30Haʼao, naginagomo, huno, oʼafigayaʼmofeʼmo mago faliʼnisiya vekamoʼmo he tinuno hapa paisigeʼapaekeʼmo afiteʼa apaipamo aliʼa afe legae, huno ha paiʼnigenoʼaeʼmo, 31#Yo 11:44-48Moseseʼa avoʼmo kae maleʼniya geʼe Gotitegati gemo alini eʼa aeʼa hakalo huʼa hapa nepaiya vayaʼmogi avoʼmo kae maleʼnaya geʼeʼmo oʼafisayana mago faliʼnisiya vekamoʼmo he tinuno hapa paisiya gemo oʼafigae, huno ha paiʼniye, huno Yesuʼa hapa paiʼniye.

Zur Zeit ausgewählt:

Luki 16: kyg2013

Markierung

Kopieren