NASEPTE 16
16
Listra ah Timothi in Paul azui
1Tuachi’n Derbe khuo leh Listra khuo ah ahing tung hi. Tualeh Ngai vawi, Listra khuo ah Timothi kichi nuazui khat a um a, ama khu gingtu Juda numei khat tapa ahi a, apa pen Greek mi ahi. 2Ama pen Listra leh Ikonium khuo a um sanggamten agen phat mama uh ahi. 3Paul in ama khu akhuolzinna a zawpi a ut a, tuachi’n azawpi a, tua gam a Judaten apa Greek mi ahi chi athei zieh un, atep atanpieh hi. 4Amaun khopi atotna teng uah, Jerusalem a sawltahte leh upaten zui dinga anamdet uh thupuasahte akung uah apekhe zel uhi. 5Tuachi’n hattuomte khu ginna lam ah ahatsah ua, tualeh ni chinin apung deudeu uhi.
Paul Masidonia gam a hatna
6Tuin Paul leh alawmten Phrigia gam leh Galatia gam atotsuoh zou un, Hagau Siengthou in Asia gam a thugen akhamta hi. 7Misia gam ahing tun nua un, Bithinia gam a pei atum ua, hinanleh Hagau in aphal sih hi. 8Tuachi’n Misia gam pel in Troas khuo atungsuhta uhi. 9Tualeh zanlai in Paul in mengmu khat anei a, Masidonia gam a mi khat dingin, “Masidonia gam ah hing galkai unlen, koute hing panpi un chi a ngen in amu hi.” 10Paul in mengmu amu zouin, Masidonia gam a pei dingin ka kisa pai ua, akung ua khantan hoi gen dingin Pasian in ahing hat ahi chi dihtahin ka thei uhi.
Lidia pienthana
11Tuachi’n Troas khuo apat kuongin ka pei ua, tangtahin Samothrase ah ka pei ua, azing niin Niapolis khuo ah ka tung uhi. 12Tuana kipat in Philippi khuo ah ka tung uhi; tua khu Masidonia gam a Rome mite pemkhawmna khopi lienpen ahi. Tua khuo ah ni tam kuomtah ka taam uhi. 13Tualeh khawlni in khopi pulam a luipi gei ah ka pei ua, tua luigei khu thungetna mun ahi a, tualeh ka tou ua, numei hing peikhawmte kungah thu ka genta uhi.#Philippi khuo khu Rom gam in a uh/aluo ahiziehin kikhopna inn (synagogue) a um sih hi. 14Tualeh numei khat amin Lidia, puonsandup zua a summet bawl, Thiatira khuo a teng Pasian be mi khat in ka thugen uh aza a, Paul thugen zui ding in Mangpa’n alungtang ahon pieh hi. 15Tualeh ama leh a innkuonpite’n baptisma atan zou un, “Mangpa a ginum a na hing ngaisut u’leh hing pei unlen ka inn ah hing tung un” chi’n ahing chiel hi. Tuachi’n koute ahing houtaangta hi.
Dawi aisiem nungah sunga dawi deldohna
16Tualeh thungetna mun a ka pei lai un, dawi lawmnei aisan siem suoh nungah khat in ahing kituohpi hi. Amanu’n aisan a vang gen in apute sum tampipi amusah zel hi. 17Tua nungahin Paul leh koute ahing zui a, akikou a, “Tam mite Tungnungpen Pasian suohte ahi ua, eite kunga hundamna lampi kitangkoupite ahi uh,” achi hi. 18Tambangin ni tampi abawl hi. Hinanleh Paul in azada a, akihei a, dawi kungah, amanu sunga kipat hing pawtdoh dingin Jesu “Khrist min in thu ka hing pie hi,” achi hi. Tuachi’n tua hun mama in apawtdoh pai ngal hi.
19Hinanleh tua suohnu putein asum muna uh abeita chi athei tahun, Paul leh Sailas aman ua, vanzuona mun lah ah akai ua, thuneite mai ah alutpita uhi. 20Tualeh thukhenpa mai ah amaute ahing pui ua, “Tam mite Judami ahi ua, ka khopi uh asubuoi mama uhi. 21Tualeh ei Rome miten izui leh ichiin sienglou tawndan khat ahing hil uhi,” achi uhi. 22Tuachi’n mipi tampite zong Paul leh Sailas dou in apangkhawm uhi, tualeh thukhenten apuonte uh ahawhkhiet pieh ua, chiengpum a jep dingin thu apie uhi. 23Tam veipi ajep nua un suongkul ah akhum ua, bittah a veng dingin avengmipa kungah thu apie uhi. 24Tambanga thupieh khautah muin, tangvengpa’n suongkul dantan sungnung ah amauh akhum a, akeng uah siakol abunsah hi.
Paul leh Sailas suohtatna leh suongkul vengpa pienthana
25Hinanleh zankim lai in Paul leh Sailas in thu angen ua, Pasian kungah phatna la asa ua, suongkul tangten angai uhi. 26Thakhat in zil nasatahin ahing kilinga tuachi’n suongkul suongphumte nangawn akiling gawp a, tualeh suongkul kotkhate zousie ahing kihong pai a, michin kolbu zousie ahing kitol siengta hi. 27Tuachi’n suongkul vengpa imu lai ahing khanglou a, suongkul kotkhate kihongsa a um amu tahin, suongkul taangte taimang sieng uh hitava achi a, anamsau adoh a ama leh ama akitha tum hi. 28Hinanleh Paul aw ngaitah a kikou in, “Bangma kilaw sin, ka bawn un tanah ka umkim uhi,” achi hi. 29Tuachi’n mitangte vengpain, meivah angen a, atai lut a, chitun kawm in Paul leh Sailas mai ah akhupboh ta hi. 30Tualeh amaute ahing puidoh a, “Pute hundam a ka umna dingin bang ahiei ka bawl ding” achi hi.
31Tuachi’n amaun “Mangpa Jesu Khrist gingtain, tuachi’n hundamin na um ding hi, nang leh na innkuonpite toh achi uhi. 32Tuachi’n amauten ama kungah leh a inn a um zousiete kungah Mangpa thu agenta uhi. 33Tuami zanlai mama in aman amaute apui a ajepna huoltaite uh asawpsieng pieh a, tualeh ama leh aiinkuonpite zousie in baptisma atang pai ngal uhi. 34Aman amaute a inn sungah apuilut a, amasang uoh ann neh ding alui a, ama leh a innkuonpiten Pasian thu a gintat zieh un akipah mama hi.
Suongkul apat Paul kihakhietna
35Zingmawng khuo ahing vahtahin, thukhenten, Suongkul vengpa kunga, tua mite ha in, chi dingin “Miman galkapte asawl uhi.” 36Tuachi’n suongkul vengpa’n Paul kungah, “Thukhenmiten nang leh Sailas ha na ding thu ahing pie ua, tuaziehin tuin pawt unlen ha muongtahin peita un,” achi hi. 37Hinanleh Paul in akung uah, “Rome mi ka hi ngal ua, mawpaina umlou a, vantang mitmu in ahing jep ua suongkul ah ahing khum ua, tuin hing dap hakhiet sawm uh hiven izaw? hi thei ngailou ding hi, amaute mama hing pei u’henlen, hing puidoh uheh,” achi hi.
38Tua miman galkap lamkaiten, tua thute thukhenmite kungah ahil ua, Romemite ahi uh chi azah tahun azauta uhi. 39Tuachi’n amaute ahing pei ua, azawl ua, apuidoh ua, khopi nuasie dingin angen uhi. 40Tuachi’n amaute suongkul apat ahing pawtdoh ua, Lidia inn ah ahaw ua, unaute amu tah un, ahantawh ua, apeita uhi.
Zur Zeit ausgewählt:
NASEPTE 16: ZOUBSI
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Zou CL Bible - LAISIENGTHOU
Copyright © 1992 by The Bible Society of India
Used by permission. All rights reserved worldwide.
