JOHAN 3

Jisu tüsho Nikodema

1Pharisirü mihtsürü, Jihudarü yakzanshuhrü amung Nikodema lakheah. 2Ha mihtsürünü azhing ching Jisu ki arübah tha, “Rabbi, nü a Thrünpuh kilimnü arükhi thsangyurü ah de isanü mükheahlah; tümütüsho api lung Thrünpuh müladüa nünü arhimokhi harü khinthiyinbebo shenü mürhimokhuk.” 3Jisunü alo tüsho api ki tha, “Atsütsü inü nü ki thachoh, api müzübephulosho shenü she Thrünpuh kiulongthsü müngü.” 4Nikodemanü api ki tha, “Mihtsürü khülang azorü kambah küde thsah azübepü? Apinü mahne kipü abe buk ching wutubah azübeba shi?” 5Jisunü alo, “Khide tsükjide inü nü ki thachoh, shepü ke tüsho me ching müzübephulobanü apinü Thrünpuh kiulongthsü ching müyüzahkhuk. 6Shihnü zübekhi ju shih, tüsho menü zübekhi ju me. 7Nü zübephulobah de inü nü ki thakhi dümüyinsah. 8Apungnü külimpeang yünnelanü yünchoh, tüsho nünü ju düsheak sochoh, tüshe küchingnü arücho tüsho külim yüchonü nünü mümükheah, me ching zübekhi aban junangde lah.” 9Nikodemanü alo tüsho api ki tha, “Ha küde alapü?” 10Jisunü api ki alo, “Nü Israelrü thsangyurü thsübah harü mümükheah de? 11Atsütsü inü nü ki thachoh, isanü tümü mükheahlanü ju asukchoh tüsho tümü ngüdünü thiyumütsan thsüchoh, tüshe nünü isa thiyumütsan müleangkhichoh. 12Inü nü ki alomi dünkheak thabah nünü mükinsho, nü ki yinmi dünkheak thakhi küde akinpü? 13Mihtsürü Tsührü yinmi chingnü akikhi kheak hode shenü she yinmi ching müyükihyi. 14Tüsho Mosanü sunglo ching phuruto shuhkihkhi nangde, Mihtsürü Tsührü she ashuhkihbah, 15junangde shepünü api kheak kinbanü müdükheak tüshe akheam müla rhangdung labah.

16“Tümütüsho Thrünpuhnü alomiküp muzhokhinü api tsührü lapkhiung jih, junangde shepünü api kheak kinbanü müdükheak tüshe akheam müla rhangdung labah. 17Tümüde Thrünpuhnü alomiküp bahyukshihpü atsührü arüshihkhi yung, tüshe api hode alomiküp khümkhitpü thsungkheak ah. 18Shepü api kheak kinchonü mübahyuk; tüshe shepünü mükinnü bahyukabahdo, tümütüsho apinü Thrünpuh tsührü lapkhiung mung ching mükin. 19Tüsho abahyukkhi ha lakhi ju, alomiküp ching ayin arü tüsho mihtsürübonü ayin kheaknü amiting muzho tümütüsho arü rhimobo amütsü lakheah. 20Tümüde amütsü rhimorü abannü ayin thraneanchoh tüsho ayin lim marü, jude yungsho api rhimobo lahkhitbah. 21Tüshe shepünü thiyuro rhimochonü ayin lim arüchoh, junangde Thrünpuh ki mihyuanide arhimokhi api rhimobo mütsande angübah.”

Jisu tüsho Johan

22Ju dunglim Jisu tüsho api jingyanrübo Judea lomi ching arü, tüsho ju ching arü lung api la tüsho bapti. 23Kheakü Johan she Salim phüni Aenon ching baptide alakheah, tümütüsho ju ching ke suhde alakheah. 24#Mt 14.3; Mk 6.17; Lk 3.19,20Tümüde Johan ju rihyam ching muyukyide alakheah. 25Judüki Johan jingyanrü khürü le Jihudarü dükeak atsangkhitkhi dünkheak marüpachih akhiuk. 26Arünü Johan ki arübah tha, “Thsangyurü, Jordan hobah nü lung labuh nünü thiyumütsan jihbuh thsü kheahang, apinü baptichoh, tüsho alala api kilim arüchoh!” 27Johannü alo, “Yinmi chingnü api ki müjih-a lasho mihtsürünü tümü leangkhikhukpü.” 28#Jhn 1.20Nüsa thiyumütsan lah, junangde inü tha, “ ‘I Khrista yung,’ tüshe ‘l api müngüh thiyikheah.’ 29Yamkhün-kambe ju yamkhünkambuh yo ah; tüshe yamkhünkambuh müyamrü, shepünü zhipbah api ki anichonü yamkhün-kambuh düsheak hode tode asühachihchoh. Jumonü ha I asühkhi dünjido. 30Api ato kambah, tüshe I a aninibe kambah.”

Shepü Yinmi chingnü Arücho

31Shepü akulimnü arüchonü alala kheaknü akube; shepü alomi kilimnü lanü alomi yo ah tüsho alomi dünkheak asukchoh. Shepü yinmi chingnü arüchonü alala kheaknü akube ah. 32Apinü tümü ngükhea tüsho asokheanü asukchoh, tütüshe shenü she api yusheak müleangkhi. 33Shepünü api yusheak leangkhichonü Thrünpuh ju thiyuro de junü adüngakhi thsüchoh. 34Tümüde shepü Thrünpuhnü athiyikheanü Thrünpuh yubo asukchoh, tümütüsho Thrünpuhnü me ju adünbah müjihchoh. 35#Mt 11.27; Lk 10.22Abuhnü atsührü muzhochoh, tüsho lüpdükhi api khah ching jihdo. 36Shepünü atsührü kheak kinchonü akheam müla rhangdung lah; tüsho shepünü atsührü mükinnü rhangdung müngü, tüshe api kheak Thrünpuh bukakhiukkhi lah.

Zur Zeit ausgewählt:

JOHAN 3: YIMCBSI

Markierung

Kopieren