THRÜNTAN 18
18
Alokhikhi Tsührü
1Animuro api khimyam ripit ki binde alachoki, Mamre arüngako sangdungbo thüninde Atungpuh ju Abraham ki akhiuk. 2Abrahamnü abinkih-a kheah tüsho mihtsürü 3 aphüni zhipde ngü, küyimki apinü arü ngükheanü arü shorupü apinü khimyam ripit kinü niokheamde yü tüsho alo kheak khukning, 3tüsho apinü tha, “I tungpuh, muzhobah I hode düyü. 4Muzhobah ke anikhüh lude arübah nü jing müsühshang, tüsho sangdung khüp nü sühakhimang. 5Tüsho kheakü nü I yam ching arüa lah, inü nü kilim yikhap khürü lude aranü, junangde nü mulong kinglobah. Jushu nü limro ching yüang.” Tüsho arünü tha, “Nünü athakhi nangde rhimoang.”
6Jumonü Abrahamnü Sara kilim khimyam ching niokheamde yü tüsho tha, “Nahdang, ayikangkang atsüdak atüm 3 luang tüsho neambah yikhap nunga takjang.” 7Abrahamnü moshi boto kilim alihde yü, tüsho moshi nunu atsübe lubah yamlarü kilim jih, tüsho apinü ju mozümodopü chithsa. 8Jumonü apinü mozümodokhi shihkingkung le niuhke tüsho moshi nunu lubah arü miki zojih; tüsho arü tsühde alachoki sangdung khüp arü ki api zhip.
9Judüki arünü api ki tha, “Nü niube Sara küching la?” Apinü alo, “Khimyam ching lah.” 10Tüsho apinü tha, “Tsükjide inü shikam hadüchoki kim ching nü kilim alode arübah, tüsho nü niube Sara tsührü khülang labah.” Tüsho Saranü api dunglim lakhi khimyam ripit kinü anide alakheah. 11Abraham le Sara büne shina, tüsho kam hihde alakheah, tüsho khungarü lapü thsüde Sara kam hoa lakheah. 12Jumonü Saranü lümakheahbah anihbe zangrü müne, “I tüsho I tungpuh shinabahbah shih asühkhi lanahki du?” 13Tüsho Atungpuhnü Abraham ki tha, “Tümü thsükhi Saranü münede athakhea, ‘Tümütüsho I shina lale, I tsükjide khungarü laba de?’ 14Atungpuh thsungkheaknü tümükhüh khide chakla de? Münchikhi kim ching shikam I nü kilim alode arübah, tüsho Sara tsührü khülang labah.” 15Sara trede alakheah, jumonü anihbenü arochihde tha, “Inü mümüne.” Tüshe apinü tha, “Yung, nünü münedo.”
Abrahamnü Sodom thsungkheak Mushukhi
16Judüki mihtsürübonü ju kheaknü wusu tüsho Sodom limpeang kheah, tüsho limro bea dükhepü Abraham arü lung yü. 17Tüsho Atungpuhnü tha, “Inü tümü rhimopü lanü Abraham kheaknü aramba de? 18Tümütüsho tsükjide Abraham ato tüsho sühmüh lakhi trükshih khülang kambah, tüsho lomi trükshih alala api kheaknü müngühmühibah. 19Tümüde inü api mokhit, ju hode arünü alim tüsho thiyuro rhimopü Atungpuh limro zopü api tsührübo tüsho api dunglim ayamkhün ki apinü thiyukhüm jihbah, junangde apinü anihbuh ki alokhikhi lüpdükhi Abraham thsungkheak rhimobah.” 20Tüsho Atungpuhnü tha, “Tümütüsho Sodom tüsho Gomorra azhihde azhikhi tüsho arü neak tode lah, 21arü azhihde azhikhi inü asokhi atsütsü a shi yungnü ayimkhitpü I kheakü yükibah.”
22Judüki mihtsürübo ju kheaknü rholo tüsho Sodom limpeang yü, tüshe Abraham a Atungpuh miki zhip. 23Abrahamnü thüninde arü tüsho tha, “Nünü thiyuro-lungkirü she mihbukmuyukrü lung dükheakshihba de? 24Kiuto ching ju thiyurolungkirü thünim lakhülaa; nünü ju dangpung thiyuro-lungkirü thünim dünkheaknü aningshihba shi? 25Thiyuro-lungkirü ju mihbukmuyukrü lungnü alaksahpü nü kheaknü limshuang, jude thsüsho thiyurolungkirü ju mihbukmuyukrü nangde akambah; ju nü kheaknü limshuang! Alomi alala mahkhaprünü alim mürhimobea de?” 26Tüsho Atungpuhnü tha, “Inü Sodom ching thiyuro-lungkirü thünim ngüsho, arü thsülimnü kiubüm lashihbah.” 27Abrahamnü alo tüsho tha, “Kheakü I asungthulung tüsho awahnü mulong tode Atungpuh ki asukchoh: 28Mürangkhüh thiyuro-lungkirü thünim kheaknü phüngü nükde lakhülaa; phüngü mülamonü nünü kiuto alala dükheakshihba shi?” Tüsho apinü tha, “Ju ching yirükheak phüngü ngükhülaa, inü ju müdükheakshih.” 29Judüki anihbuhnü api ki alochode tha, “Mürangkhüh ju ching yirü ngükhülaa küde?” Tüsho apinü tha, “Inü yirü thsülimnü ju mürhimo.” 30Tüsho apinü tha, “Atungpuh bukdakhiuk shi, tüsho inü asukanü: Mürangkhüh ju ching samrü ngükhülaa?” Tüsho Apinü alo, “Inü ju ching samrü ngüsho ju mürhimo.” 31Judüki apinü tha, “Kheaküshe inü mulong tode Atungpuh ki asukchoh: Mürangkhüh ju ching muku ngükhülaa küde?” Tüsho apinü alo, “Muku thsülimnü inü ju müdükheakshih.” 32Apinü tha, “Atungpuh bukdakhiuk, tüsho inü khülang ki asukbah: Mürangkhüh ju ching thürü ngükhülaa küde?” Tüsho apinü alo, “Thürü thsülimnü inü ju müdükheakshih.” 33Jumonü apinü Abraham ki asukachih kheam yanalünde Atungpuhnü api limro ching yü; tüsho Abrahamnü api lapung lim alode yü.
Zur Zeit ausgewählt:
THRÜNTAN 18: YIMCBSI
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
