THRÜNTAN 16
16
Hagar tüsho Ishmael
1Kheakü, Abram niube Sarainü api kilim tsührü müzübejih. Tüsho anihbe Ijip yamlaberü amung Hagar lakheah. 2Jumonü Sarainü Abram ki tha, “Kheahang, Atungpuhnü I kheaknü tsührü mülashih. Muzhobah I yamlabe lung nungang; khükia anihbe hode I tsührü labah.” Tüsho Abramnü Sarai yu ani. 3Judüki Abram Kanan lomi ching kam thürü la dunglim, aniube Sarainü ayamlabe Hagar bea lu tüsho aniubuh Abram kilim aniube thsüpü jih. 4Jumonü apinü Hagar kheak nung, tüsho alibe mübünkeangde kam. Tüsho küyimki alibenü anihbe mübünkeangkhi mükheahkhea, alibenü anihbe putungbe mükhemükimpü tankih.
5Judüki Sarainü Abram ki tha, “I amülim nü kheak lashang! Inü I yamlabe nü kilim jih; tüsho küyimki anihbe mübünkeangkhi alibenü mükheahkhea, alibenü I mükhemükimde kam. Atungpuhnü ike dükeak mahkhapshang.”
6Jumonü Abramnü Sarai ki tha, “Nü yamlabe nü khah ching lah; nü tsükhinü alibe ki rhimoang.” Küyimki Sarainü anihbe ki mükihmürade arhimokheanü, amikinü alibe tsoabah.
7 Atungpuh yunirünü Hagar ju sunglo ching Shur limro kenü ki ngü. 8Tüsho Apinü tha, “Sarai yamlabe Hagar, nü küchingnü arükhea, tüsho nü külim yücho?” Alibenü alo, “I putungbe Sarai kinü I tsochoh.”
9Judüki Atungpuh yunirünü alibe ki tha, “Nü putungbe kilim alode yüang tüsho anihbe bukkhüp laang.” 10Yunirünü thalo, “Inü nü tsühsoniusobo mükhekhampü thsüde hihde akamshihbah. 11Kheahang, nü khungarü lah. Nünü athrürü khülang zübebah. Nünü api mung Ishmael de ajibah, tümütüsho Atungpuhnü nü thsünükhi sojihdo. 12Api mütüm donki nangde alabah; apinü alala kheak azhihde alabah, tüsho alalanü api kheak azhihbah, tüsho api keoniorü kheaknü chamkhibah alabah.”
13Judüki alibenü anihbe ki asukbuh Atungpuh mung hade ji: “Nü a I ngübuh Thrünpuh,” tümüde alibenü tha, “Kheakü inü I kheahbuh Khülang ngüdo.” 14Jumonü kekhip ki ju Beer Lahai Roi#I ngübuh Arhang lakhi Khülang yo kekhip. de ji; ju Kadesh le Bered dükeak kheakü khiungde lah.
15Junangde Hagarnü Abram kilim tsührü khülang zübejih, tüsho Abramnü amung Ishmael de ji. 16Hagarnü api kilim Ishmael zübejihchoki Abram kam 86 azorü lakheah.
Zur Zeit ausgewählt:
THRÜNTAN 16: YIMCBSI
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
