2 RÊNGHAI 12
12
Juda rêng Joasa
(2 Tsn 24.1-16)
1Israel rama Jehua kum sari an lal kuma khan Joasa khom Judai rama an lala, Jerusalema kum sômminli an lala. A nu chu Berseba khuaa mi Zibi a ni. 2Ochai Jehoiada ikaihruai ngai a ni sikin a dam sûng chu Rengpa nuam lam tho ngai mi a ni. 3Khannisian nam danghai pathian biakna hmunhai chu masan thei loiin a oma, mihaiin thil an la inhlan thei mai a ni.
4 #
Fes 30.11-16
Jehoiada’n ochaihai chu a koi bukhaia, tempila thilinhlan balamin thil pêk an hong chôi ngai a ni, senkhat chu thilinhlana khan pe ngêt hranga hril a ni sikin, lômna thilpêkhai chu sataka se hranga hril an ni. 5An sinthotuhaiin kha sumhai kha a chôitu chu ochai sinthotuhaiin dong an ta, tempil siam insatna’n an ihmang ngai a ni.
6Kum sômhni inthum Joasa an lal zoi khomin tempil chu siam insat loiin a om maia. 7Jehoiada le ochai danghai chu a koihaia, “Itina mo tempil nin la isiam insat mai loi hi? Atûn ata chu nin poisa dôn ngai kha dôn ta no roi, a siana nin isia ngêt hrang a ni ta; khan kêng tempil siam insat a ini ta hrang,” a tia. 8Ochaihaiin mihai kuang ata tangka la ta loi le tempil siat siamtu ni loi chu a sa an tia. 9Ochai liantak Jehoiada’n bôm a siama, a sîng a’r-ôngtira, maichâm kôla tempil lûtna chang tiang a siaa. Tempil lûtna bula ochai lei ompu khan Pathian kuanga thilpêkhai lâk ngaitu khan a lei lâka, bôm sûnga khan a thona. 10Bôm sûnga sum a tam tena chu rêng lekha irziaktu le ochai Jehoiada chu an honga, tangka sum chu an hâl inzôia, irkhîsiarin an siaa. 11An irkhî zoiin chu tempil siam insatna sin enkoltuhai kuang an pêka, annihaiin sinthotu mistirihai hlo an pêka. 12Lungtukhai le a sintuhaiin tempil siam insatna hrang thing le lung an irchôka, poisa hmangna hrang hmuna poisa an pêkhaia. 13Tholôm poisa chu tangka ru le berbu hai, bekul le meiser enkolna hmangrua hai, sumru le rângachak thil chi dang dang siamna’n chu hmang nuam viat mahai. 14Sin thotuhai hlo le neinun irchôkna vaiin an hmang a ni. 15#2 Rng 22.7 Sin thotuhai chu mi diktak an nia, an poisa hmang lam khom ite enpui nang mahai. 16#Lev 7.7 Sual irbôlna le siatna man thilinhlan balama an thilpêkhai chu sia sa ni maka, ochaihai dongtum pial a ni.
17Kha laia khan, Suria rêng Hazaela’n Gath khua a rûna, an hnêa, Jerusalem khom rûn a tuma. 18Juda rêng Joasa’n a matona rêng Jehosafata hai, Jehorama hai le Ahazia haiin Rengpa ta hranga an thilpêkhai chu a lâka, ama ipêk khom belsain; tempil le rêng in sum bôma rângachak murdi chu a rêngin rêng Hazaela chu thilpêkin a pêk tâka, a sipaihai chu Jerusalem ata a hruai suakhai ta. 19Reng Joasa thiltho dang murdi chu Juda rênghai thurchi irziakna lekhabua a chuang; 20Joasa chu a rualhai inhni leh an khitphiarhaia. 21A thattuhai chu Simeata nâipa Jozakara le Somera nâipa Jehozabada an ni. A thia, Davida khopuia rêng thâna an phûma, a nâipa Amazia chu a’rthûlin an lal nôk ta.
Zur Zeit ausgewählt:
2 RÊNGHAI 12: HRACLBSI
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.