If you have would like a copy of this version please contact info@davaraudiobibles.org

Lowa New Testament

धा योहान्‍नालेः येशुगी ङेने माङा शोगीन धाङ ठी़सो़ ॱनाङगीनगो, फारुसीपाक्‍याई घोरदुक ॱनेरी, येशुगी खेन्‍दा जेपालाक। (ॱङोन्‍ने झ्‍यीना, येशुराङगी ठी़सो़ जेदा मेन्‍दा, खोङबागी ङेनेक्‍याई ठी़सो़ तेरालाक।) होझ्‍येरी खोङबा युदेया युने, खा डारी याङ गालील यु स्‍योकला फेप्‍पालाक। धेनी खोङबा सामारीया युने फेप घोलालाक। धेनी याकोबगी खोरी भु योसेफला तेरता सागी ङ्येरु हो़गीन सीकार ॱनागीन, सामारीयागी ढोङखेर च्‍यीकला खोङबा फेप्‍पालाक। होदुरु याकोबगी क्षुदोङ हो़तालाक। धेनी येशु राङगी डुने कु ङ्यारी होदे क्षुदोङगी डामदु श्‍युक्‍पालाक। होदे घाङला ङीङमो हो़तालाक।
धेनी सामारीपा केमी च्‍यीक होदेरु क्षु छुरु होवालाक। येशुगी मोला सुवालाक, “ङाला थुङयेला क्षु तेरोझ्‍यी।” खोङबागी ङेनेक्‍या शामा ङ्योरु ग्‍याजा स्‍योकला सो हो़तालाक।
सामारीपा केमीगी खोङबाला श्‍यी़वालाक, “खेराङ याहुदापा च्‍यीक झ्‍येरी, ङा सामारीपा केमी च्‍यीकला, घाङगी झ्‍येरी क्षु थुङयेला ॱलाङाले?” (याहुदापाक्‍या सामारीपाक्‍यामुला ढेवा मेश्‍यालाक।)
येशुगी मोला सुवालाक, “ख्‍यी़ को़न्‍क्षोकगी ॱनाङज्‍यीन धाङ ख्‍यो़ला ‘क्षु तेरोझ्‍यी’ ॱनागीनगो सु हीन्‍गीनगो स्‍येहो़ना, ख्‍यी़ खोङला श्‍यी़ हो़टो धेनी खोङगी ख्‍यो़ला सो़न्‍पो क्षुगो ॱनाङ हो़टो।”
धेनी केमीगी़ खोङबाला श्‍यी़वालाक, “ॱलोपो़न ला, क्षुदोङ दे तीङ रीङा दुक धेनी खेराङला क्षु छुयेला ॱनो़ च्‍यीया मीदुक। धा खेराङगी होदे सो़न्‍पो क्षु घाने खेरती हुङये? हीकी धाङबी मेमे याकोबगी दे क्षुदोङ दे, हेला ॱनावालाक धेनी खोङबा खोराङ धाङ खोङगी टुवाक्‍या धाङ खुङक्‍याई धी़डोक्‍यागी देनेराङ थुवालाक। धा खोङलाः खेराङ क्षे हीने?”
येशुगी मोला सुवालाक, “दे क्षुने थुङगीन घीरी धाब्‍ले कोम्‍गीलाक, हीना ङी तेरकीन क्षुने थुङगीनक्‍या, नामा धाब्‍ले कोम्‍गी मालाक। ङी तेरकीन क्षु दे, खोला थामेपे छेसोक तेरयेला क्षु थो़न्‍गीन क्षुमीक च्‍यीकला ग्‍युरकीलाक।”
धेनी केमी दी खोङबाला श्‍यी़वालाक, “चोवो, ङा ॱमेकोम्‍ये धाङ दुरु क्षु छुरु हुङ मेघोयेगी क्षीला, ङाला दे क्षु दे ॱनाङरोनाङ।”
येशुगी मोला सुवालाक, “सोरी, ख्‍यो़री ख्‍योवाला भो़री स्‍योक।”
होदे केमीगी, “ङाला ख्‍योवा मेक।” ॱनेरी ॱनेवालाक।
धेनी येशुगी मोला सुवालाक, “ख्‍यी़ ‘ङाला ख्‍योवा मेक’ ॱनेरी धेन्‍पा ॱनेजुङ। घीझ्‍येरी ॱनाना ख्‍यो़ला ख्‍योवा ॱङा झ्‍युसालाक धेनी धान्‍दा, ख्‍यी़मुला हो़गीनगो ख्‍यी़ ख्‍योवा मालाक। ख्‍यी़ दे धेन्‍पा ॱनेजुङ।”
होदे केमीगी खोङबाला श्‍यी़वालाक, “ॱलोपो़न ला, खेराङ ॱङो़नस्‍येखेन च्‍यीक हीन्‍गीनगो ङी स्‍येजुङ। हीकी धाङबी फामाक्‍याई दे रीदु क्षाक्‍क्षो़पा पुवालाक हीना खेराङक्‍या नी, क्षाक्‍क्षो़पा पुघोये साजागो येरुसालेम लाक सुरी सुङी।”
येशुगी मोला सुवालाक, “भोमो, ङाला यीच्‍चे झ्‍यी, दे री धाङ येरुसालेम ॱङीगाराला याप को़न्‍क्षोकगी क्षाक्‍क्षो़पा ॱमीपुगीन धी़गो स्‍यारी। खेक्‍याई सुला क्षाक्‍क्षो़पा पुगीनगो ॱमेस्‍येलालाक धेनी हेक्‍याई सुला क्षाक्‍क्षो़पा पुगीनगो स्‍येलालाक घीझ्‍येरी ॱनाना थारपा याहुदापाक्‍याने झ्‍युङगीलाक। क्षाक्‍क्षो़पा ढाङपो झ्‍येरी झ्‍यीगीनक्‍याई, यापला सेम्‍ङी धाङ धेन्‍पा ॱङीगी गोने क्षाक्‍क्षो़पा पुगीन, धी़गो स्‍यारी धेनी धी़गो धान्‍दाराङ लाक। घीझ्‍येरी ॱनाना यापगी देरे क्षाक्‍क्षो़पा पुगीनक्‍याराङ चालालाक। को़न्‍क्षोक थुक्‍ङी लाक धेनी खोङबाला क्षाक्‍क्षो़पा पुगीनक्‍या सेम्‍ङी धाङ धेन्‍पा ॱङीगी गोने क्षाक्‍क्षो़पा पु घोलालाक।”
धेनी केमी देगी खोङबाला श्‍यी़वालाक, “मास्‍यीकागो फेप्‍कीलाक (खोङला खीरीस्‍तो ॱनालाक।) धेनी खोङबा फेप्‍ती दे दो़न घीरी टोवा जेगीलाक ॱनेरी, ङाला स्‍येयेहो़क।”
येशुगी मोला सुवालाक, “ख्‍यी़मुला लाब ताङगीन, ङा खोराङ हीन।”
होदे घाङलाराङ खोङबागी ङेनेक्‍या लोक्‍ती होवालाक। धेनी खोङबा भोमो च्‍यीकमुला, कामो़न सुङी जेगीनगो थोरी खुङक्‍या ॱहालेवालाक हीना सी़या खोङबाला “खेराङगी घोङपा घी हेतो?” याङना “खेराङ मी़मुला घीझ्‍येरी कामो़न सुङा जेदाले?” ॱनेरी माश्‍यी़वालाक।
धेनी होदे केमीगी़ मोरी जामागो भोरती, यु स्‍योकला सोरी मीक्‍याला ॱनेवालाक, “ङी झ्‍येजा घीरी ङाला सुङगीन मी देला तारु स्‍योक। मास्‍यीकागो खोङबाराङ मेन्‍डी़?” होझ्‍येरी खुङक्‍या युने थो़न्‍दी, खोङबाचारु होवालाक।
देरे झ्‍युङी घाङला खोङबागी ङेनेक्‍याई खोङबाला, “राब्‍बी, श्‍येलाक श्‍येरोनाङ।” ॱनेरी ॱनी हो़तालाक।
हीना खोङबागी खुङक्‍याला सुवालाक, “खेक्‍याई स्‍येये मेगीन शामा, ङाला शायेला हो़क।”
होझ्‍येरी ङेनेक्‍याई च्‍यीकगी च्‍यीकला ॱनेवालाक, “खोङबाला मी च्‍यीकगी श्‍येलाक पुवा हीन्‍ढी़?”
येशुगी खुङक्‍याला सुवालाक, “ङाला ॱङाक्‍कीनगी थुकोङगो झ्‍यीये धाङ खोङबागी क्षाक्‍ले डुप्‍ये देराङ ङी शामा लाक। ‘चेमा ॱङायेला धोराङा दावा श्‍यी दुक’ ॱनेरी खेक्‍या ॱमेनाले? हीना ङा खेक्‍याला ॱनाहीन, राङगी ॱमीक क्‍याक्‍ती, श्‍यीङ ॱङा रीङगीनगोला तो़। धा श्‍यीङ ॱङागीनगोला ॱला थोप्‍ती, थामेपे छेसोकगी क्षीला तो़न्‍थोक धी़लालाक। धेनी साङा ताप्‍कीन धाङ श्‍यीङ ॱङागीन ॱङीगारा मुला ङ्यामो घालालाक। घीझ्‍येरी ॱनाना ‘च्‍यीकगी ताप, च्‍यीकगी ॱङा’ ॱनागीन पे दे धेन्‍पा दुक। खेक्‍याई काल्‍ले माग्‍याप्‍कीन श्‍यीङने तो़न धुरु, ङी खेक्‍याला जावी। श्‍येम्‍माक्‍याई काल्‍ले ग्‍याप हो़तालाक धेनी खुङक्‍याई ढेबुगो खेक्‍याला थोप्‍पालाक।”
“ङी झ्‍येजा घीरी खोङबागी ङाला सुजुङ” ॱनागीन होदे केमीगी़ धेन्‍पाङगी झ्‍येरी, होदे युगी सामारीपा माङक्षेगी खोङबाला धेपा झ्‍येवालाक। होझ्‍येरी सामारीपाक्‍या खोङबाचारु होरी खुङक्‍यामुला श्‍युक्‍रो झ्‍यी ॱनेरी, खोङबाला श्‍यी़वालाक। धेनी खोङबा होदुरु श्‍याक्‍मो ॱङी श्‍युक्‍पालाक। धेनी खोङबागी कागी झ्‍येरी श्‍येम्‍मा ॱमीच्‍यीकी माङागी धेपा झ्‍येवालाक। धेनी खुङक्‍याई होदे केमीगोला ॱनेवालाक, “धा ख्‍यी़ ॱनागीनगोला मेन्‍दा, हीकी राङगी घोरती धेपा झ्‍यीदाहीन। धेनी ॱङोन्‍नेराङ खोङबा जीक्‍तेनगी क्‍याम्‍गो़नगो लाक ॱनेरी हेक्‍याई स्‍येजुङ।”

श्‍याक्‍मो ॱङी स्‍याम्‍ने, येशु सामारीयाने डारी गालील युदु फेप्‍पालाक। (ॱङो़नस्‍येखेन च्‍यीकला राङ युदु कुरती मेयोङालाक ॱनेरी, येशु राङगी धेन्‍पाङ जेपालाक।) येशु गालीलदु फेई घाङला, होदे युगी मीक्‍याई खोङबाला सी़याङ श्‍यी़वालाक। घीझ्‍येरी ॱनाना पेसाकगी धी़छेनला येरुसालेमदु होवा गालीलपाक्‍याई, येशुगी जेजा क्षाक्‍लेक्‍या थोहेतालाक।
होझ्‍येरी खोङबागी क्षुने घुन्‍क्षाङ जेजा गालीलगी कानारु याङ फेप्‍पालाक। धेनी काफारनाहुमदु पो़न्‍रीक च्‍यीक हो़तालाक धेनी खी़ भीजा नेपा हो़तालाक। होदे मीगी़ येशु युदेयाने गालीलदु फेप्‍दुक ॱनेरी घोरती, खी़ “ङी भीजा स्‍यीगु झ्‍यीदी, खेराङ फेप्‍ती खोला सोवा जे” ॱनेरी खोङबाला श्‍यी़वालाक।
येशुगी खोला सुवालाक, “खेक्‍या ताक धाङ याम्‍क्षेनगी क्षाक्‍लेक्‍या ॱमाथोङगीन थुक्‍पे धेपा मीझ्‍यीदालाक।”
धेनी पो़न्‍रीकगी श्‍यी़वालाक, “चोवो, ङी भु ॱमास्‍यी एन्‍ला फेया जे।”
येशुगी खोला सुवालाक, “सोङ, ख्‍यी़ भीजा सो़न्‍पो ॱनेगीलाक।” धेनी पो़न्‍रीकगी येशुगी सुङगीन काला यीच्‍चे झ्‍येरी खो लोक्‍ती सोवालाक।
खो लाम्‍गाला डी़ घाङला, खी़ ॱयोक्‍पोक्‍या खोला थुक्‍तु होरी, खी़ भीजा सो़गीनगो खोला स्‍येपालाक। धेनी धी़ घीन्‍ला खोरी भीजा घारु लाजो ॱनेरी ढीली घाङला, खुङक्‍याई खोला ॱनेवालाक, “दाङ ङीङमो छुची धाङपोला खोने छावागो दाङजुङ।” धेनी येशुगी खोला, “ख्‍यो़री भीजा सो़न्‍पो ॱनेगीलाक।” सुङगीन धी़नेराङ झ्‍युदुक ॱनेरी आकीगी़ ॱहाघोरपालाक। धेनी खो धाङ खी़ नाङमी घीरीगी धेपा झ्‍येवालाक।
धा दे, युदेयाने गालीलदु फेप्‍ती येशुगी जेजा ताक ॱङीवागो लाक।

Höre योहान्‍ना 4