If you have would like a copy of this version please contact info@davaraudiobibles.org

Lowa New Testament

धा होदुरु फारुसीपाक्‍याने, नेकोदेम ॱनागीन याहुदापे क्षो़पो़न च्‍यीक हो़तालाक। खो छेन च्‍यीक येशुचारु होरी खोङबाला श्‍यी़वालाक, “राब्‍बी, खेराङ को़न्‍क्षोकने फेप्‍पा ॱलोपो़न च्‍यीक लाक ॱनेरी, हेक्‍याला स्‍येयेहो़क घीझ्‍येरी ॱनाना को़न्‍क्षोक खेराङमुला मेना, खेराङगी जेजा दे ताकक्‍या श्‍येम्‍मा सी़या झ्‍यी ॱमीथुक्‍कीलाक।”
येशुगी खोला सुवालाक, “ङा ख्‍यो़ला धेन्‍पा धेनक्‍याङ ॱनाहीन, मी च्‍यीक धाब्‍ले ॱमेकेना, खी़ को़न्‍क्षोकगी ग्‍यासी थोङ ॱमीथुक्‍कीलाक।”
नेकोदेमगी खोङबाला श्‍यी़वालाक, “मी च्‍यीक खा घेसारती, घाङगी झ्‍येरी केथुक्‍कीले? खो खोरी आमे फोवा नाङदु, थेङ ॱङीवा जुरी के थुक्‍वाले?”
येशुगी सुवालाक, “ङा ख्‍यो़ला धेन्‍पा धेनक्‍याङ ॱनाहीन, मी च्‍यीक क्षु धाङ थुक्‍ङीगी गोने ॱमाकेना, खो को़न्‍क्षोकगी ग्‍यासी नाङदु जु ॱमीथुक्‍कीलाक। स्‍याठाकने केक्‍यागो स्‍याठाक लाक धेनी थुक्‍ङीने केक्‍यागो सेम्‍ङी लाक। ङी ख्‍यो़ला, ‘धाब्‍ले के घोवालाक’ ॱनागीन देला, ख्‍यो़ ॱहाङ ॱमासा। ॱलुङ दे राङगी थेछो़ला ग्‍यावालाक धेनी होदेगी केकगो घोरालाक हीना होदे घाने हुङगीन धाङ घारु डुगीनगो, ख्‍यी़ ॱमेस्‍येलालाक। धेनी थुक्‍ङीने केगीन घीरीलाः देरेराङ झ्‍युङालाक।”
नेकोदेमगी, “दे घाङगी झ्‍येरी झ्‍युङ थुक्‍कीले?” ॱनेरी, खोङबाला श्‍यी़वालाक।
येशुगी खोला लेन सुवालाक, “ख्‍यो़ ईस्‍राएल्‍पाक्‍याई ॱलोपो़न च्‍यीक झ्‍येरीया, दो़न देक्‍या ॱहामेघोराले? ङा ख्‍यो़ला धेन्‍पा धेनक्‍याङ ॱनाहीन, हीकी घी स्‍येगीनगो हेक्‍या ॱनालाक धेनी हीकी घी थोङगीनगो, हेक्‍या पाङपो झ्‍यीदालाक हीना खेक्‍या हीकी धेन्‍पाङला खेमेलेन्‍दालाक। ङी खेक्‍याला जीक्‍तेनगी तामक्‍या स्‍येदी खेक्‍या यी मीझ्‍यीना, नाम्‍खे श्‍यीङखामगी तामक्‍या स्‍येना, खेक्‍या घाङगी झ्‍येरी यी झ्‍यीये? धेनी नाम्‍खे श्‍यीङखामदु सुवा फेप्‍ती, लोक माङ्युङ हीना मी-भु नाम्‍खे श्‍यीङखामने माला फेप्‍पालाक। धेनी रीतोङदु मोशेगी डुलगो याला क्‍याक्‍कीन च्‍योक्‍रे, मी-भुगोवा याला क्‍याक घोगुलाक। होझ्‍येरी खोङबाला धेपा झ्‍यीगीन घीरीला, थामेपे छेसोक थोप्‍कीलाक।”
“घीझ्‍येरी ॱनाना को़न्‍क्षोकगी जीक्‍तेनगी मीक्‍याला देरे झाम्‍पा जेदी, खोङगी राङगी से च्‍यीक्‍पोगो ॱनावालाक। धेनी होझ्‍येरी खोङबाला धेपा झ्‍यीगीन सुवा, मेताला डोगीमालाक हीना थामेपे छेसोक थोप्‍कीलाक। को़न्‍क्षोकगी राङगी से जीक्‍तेनदु क्‍यो़न च्‍युक्‍तु मेन्‍दा, हीना जीक्‍तेनगी मी घीरी खोङबागी थोक्‍ने, क्‍योप्‍येगी क्षीला ॱङाक्‍पालाक। खोङबाला धेपा झ्‍यीगीनला ठीम ॱमेफोक्‍कीलाक हीना खोङबाला धेपा मीझ्‍यीगीनगोला, एन्‍दुरु ठीम फोक्‍सालाक घीझ्‍येरी ॱनाना खी़ को़न्‍क्षोकगी से च्‍यीक्‍पोगी छेनला धेपा माझ्‍येवालाक। धा ठीम्‍चो़गी दो़न्‍दाकगो देराङ लाक; हो़गो जीक्‍तेनदु फेप्‍सालाक हीना मीक्‍याई ले ङेन्‍पागी झ्‍येरी खुङक्‍याई हो़ले मी़नाकला घावालाक। घीझ्‍येरी ॱनाना ले ङेन्‍पा झ्‍यीगीन घीरीगी हो़ला मेघालाक धेनी राङगी लेगाक्‍या ॱङो़न्‍दु च्‍युक्‍कीलाक साम्‍दी हो़दु मेयोङालाक। हीना धेन्‍पे लाक्‍लेन झ्‍यीगीनक्‍याई लेगाक्‍या, को़न्‍क्षोकला तेन्‍दी झ्‍यीगीनगो सावो थोङयेगी क्षीला, खुङक्‍या हो़दु हुङालाक।”

होदे स्‍याम्‍ने, येशु धाङ खोङबागी ङेनेक्‍या युदेया युदु फेप्‍पालाक धेनी होदुरु खोङबागी मीक्‍याला ठी़सो़ ॱनाङी-ॱनाङी, खुङक्‍यामुला श्‍युक्‍वा जेपालाक। योहान्‍नागीयाः सालीमगी ङ्येरु हो़गीन, एनोनदु ठी़सो़ तेरी हो़तालाक घीझ्‍येरी ॱनाना होदुरु क्षु माङा हो़तालाक। होदुरु मीक्‍या होरी ठी़सो़ लेन्‍दालाक। होदे धी़ थुक्‍पे, योहान्‍ना चो़न्‍खाङदु मादाक हो़तालाक।
धा चाङमा झ्‍यीगीन ॱरोगी कोरला योहान्‍नागी ङेनेक्‍याने, रीङगा धाङ याहुदापा च्‍यीकगी घुङला ढो़लीङ स्‍योरपालाक। धेनी खुङक्‍या योहान्‍नाचारु होरी श्‍यी़वालाक, “राब्‍बी, योरदान चाङबुगी ॱहाकीनरु खेराङमुला हो़गीन, खेराङगी धेन्‍पाङ जेजा मी दी, धान्‍दा ठी़सो़ ॱनाङी धेनी मीक्‍या घीरी खी़चारु डी़।”
योहान्‍नागी लेन तेरपालाक, “नाम्‍खे श्‍यीङखामने को़न्‍क्षोकगी दे ॱमानाङगीन थुक्‍पे, मी सुलाः घीया थोप ॱमीथुप्‍कीलाक। ‘ङा नी मास्‍यीका मेन हीना मास्‍यीकाने एन्‍ला ॱङाक्‍पाहीन।’ ॱनेरी, ङी ॱनागीनगी पाङपो खेक्‍याराङ झ्‍यीदालाक। ॱनामा नी माक्‍पागी हीन। धेनी माक्‍पामुला लाङगीन धाङ खोला ङेन्‍गीन रोवागो माक्‍पागी़ केक घोरती, ॱमीच्‍यीकी ङ्यामो घालालाक। होझ्‍येरी धा ङी घाटो दे डुप्‍सुङ। खोङबा फे घो़गीलाक हीना ङा डीप घो़गीलाक।”
ताङने फेप्‍कीनगो घीरीने ॱलाना थोवालाक। धेनी साश्‍यीने हीन्‍गीनगो साश्‍यीगीराङ लाक धेनी साश्‍यीगी थोक्‍नेराङ स्‍येलालाक। नाम्‍खे श्‍यीङखामने फेप्‍कीनगो, घीरीने ॱलाना थोवालाक।
खोङबागी घी शीक्‍कीन धाङ घोरकीनगी पाङपो जेदालाक हीना सी़या खोङबागी धेन्‍पाङला खेमेलेन्‍दालाक। खोङबागी पाङपो जेगीनला खेलेन्‍गीनक्‍याई, को़न्‍क्षोक धेन्‍पा हीन्‍गीनगी पाङपो झ्‍यीदालाक। को़न्‍क्षोकगी ॱङाक्‍ङागी़ को़न्‍क्षोकगी का सुङालाक घीझ्‍येरी ॱनाना खोङबागी, खोला धाम्‍पे थुक्‍ङी छे मेग्‍या ॱनाङालाक। यापगी सेला झाम्‍पा जेदी, घीरी सेगी क्षाकदु ॱनावालाक। सेला धेपा झ्‍यीगीनला थामेपे छेसोक थोबालाक। सेला धेपा मीझ्‍यीगीनगी़ छे ॱमेथोङगीलाक हीना को़न्‍क्षोकगी थुक्‍ठो़, खी़ खाला ॱनेदी धेतालाक।

Höre योहान्‍ना 3