KECHENG 13
13
Abram Lapen Lot Kechekak
1Ijip adet anihang anat Abram barlo ha Kanaan arlo anitur anat apiso lapen alangli kechepahemphu amar asontin ta cheponlo, Lot ta alanglilong dunlo. 2Abram ke inut keplangpik amonit-lo, abiresak, abi, lapen achainong lapen ser, rup ta do. 3Anke alangli hadak osi adim adim dambomlo, ha Bethel anat damlo. Alangli Bethel lapen Ai angbong adim lelo, hadak alangli aphrangta mukam chekimlo, 4lapen dovan ta isi builo. Hadak alangli Hemphu aphan archolo.
5Lot ta biresak, bi, chainong do lapen ahem asor lapen aban atum ta do. 6Lasi hadak banghini kedorrappetji aphan kepa chopan alongle dorphlup ave, pima latum pi ongpik. 7Lasonsi Abram api kevi amonit atum pen Lot api kevi amonit atum kechebohong nangdolo. (Halaso ahut Kanaan aso atum lapen Perizzi aso atum det arlosi dobomlang.)
8Anke Lot aphan Abram pulo, “Etum ke don, lapen nangmonit lapen nemonit atum pachebohong nangne. 9Lasi eli chekak lonang. Nang nangning kehang aling alongle chongvainon. Nang ehin anat damnon lapen ne ta ahin kaprek anat dampo.”
10Lot adung-arei lang-lo, lapen Jordan Arlok kedo-an, Zoar atovar anat an, dorphlup alang do, Hemphu aberi#Eden aberi aphansi kepudamlo ason mate Ijip adet ason.#Kech 2.10 (Lake Hemphu Sodom lapen Gomorrah arongsopi kepavir aphrang-lo.) 11Lasi Lot amethang aphan Jordan Arlok bithe kedo-an cherailo, lapen nihang anat cheterek-lo. Lasonsi banghini amonit atum chekak-lo. 12Abram ke Kanaan adetsi dolo, lapen Lot ke arlok arongsopi-heihei angbong dosi Sodom adung mukam chekimlo, 13hadak amonit atum hingnopik lapen Hemphu aphan langplotsi pap klemlo.
Abram Hebron Anat Kecheterek
14Lot otekangdet aphi, Abram aphan Hemphu pulo, “Nang kedo adim pen bithe-bitha lang pamenon. 15Nang lapen nangso-nangsu aphan nang kethek-long an alongle nangpidetpo, lapen lake nangphan kaike aphan chepahemphu longpo.#Akam 7.5 16Ne nangphan lapu-an ke-ongdung nangso-nangsu nangpiji latum aphan baduta lakha un-e detji; pirthe athak asangti aduksi kelakha kejoithuji! 17Non damra longle adang bithe langdamnon, pima la kedo-an Ne nangphan nangpi detpo.” 18Lasi Abram amukam cheterek-lo lapen Hebron along Mamre athengpi kangthir adung si dolo, lapen hadak alangli Hemphu aphan isi adovan builo.
Valgt i Øjeblikket:
KECHENG 13: KARBIBSI
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Karbi Holy Bible © Bible Society of India, 2010.
Used by permission. All rights reserved worldwide.