Matiu 2

U tson atei i lama i lehana temi tara menaien e Iesu

1-2E Iesu i poseia i Betlehem i Judia tara pöata te king ia e Herot. Na tara pöata ti posa hakapeia e Iesu, ba palair u tson atei tara pala te butu nama a pitala e la uarima i Jerusalem memi rangatar, “Ime te kana a pien ti posa sile ii ega kingir u Jiu? Alam u tarema a pitopito i tanen tara makum te roron butu nama a pitala, ba lam e la sile muma tegomi hatsunono uu lam i tanen.”#2:1-2 A pitopito e harötein a king e poselila.

3Pöata te hengo naia e King Herot u ranga teka, ba nonei e toku koruna. Na u katuun hobotor i Jerusalem i toku koru has. 4Be Herot e ngö gögono hoboto rena u pris pan, na u tson hihatutsura tara Lo#2:4 A Lo tere Mosis. me rangata ranen, “Ime tegi poseia e Mesaia, a katuun te hopö kapiin e Sunahan?”

5Ba nori e hateieren, “Tara taun i Betlehem i Judia, temar koloto has uu a propet i manasa:

6‘Alimiou u katunura i Betlehem, turu tsiktsikina i Judia,

alimiou e ka tala memou a solo a kapan i gusuna a pal tsunono i Judia.

Taraha, a töa tsunono pan e butuna romana i Betlehem,

ba nonei te tarakap ranou u katuun i tar a tei Israel.’”

7Be Herot e ngö momous tuun rena u tson atei. Ba nonei e rangrangata raneien a saha pöata te butuia a pitopito teka. 8Ba nonei e tula mera neien i Betlehem tegina sake menaien nonei a pien teka. “Pöata te sabie mumen romana limiou, ba limiou temi hatei poutse moulia. Ba lia tena hatsunono hase gouen.”

9Ba nori e hengoer u raranga tere king ba nori e lar. Na pitopito ti röto mam me len tara pala te roron butu nama a pitala e mam raien, mena ka hamatianan töana tara makum te kaia a pien. 10Ba nori e tareier a pitopito me sasaala korur. 11Ba nori e tasur iahana luma te kaia a pien na e tsinanen e Maria, mena hatukunur me hatsunono uar tara pien. Ba nori e kalater a man pora i taren me luer a manka a man niga me halerien a pien: a goul na u insens te haatser bate soka hamasi hanigan töana, na u uapi u soksoka.

12Nori i hakopis pouts uala i han i taren me sila lila tara tana maroro. Taraha, turu sinasoho i taren e Sunahan e ranga meraien, nori gima tatei la pouts uai tere Herot.

E Josep mere Maria na e Iesu i la uu i Itsip

13Pöata ti la hakapaia u tson atei, ba töa angelo tara Tsunono e butuna turu sinasoho tere Josep me poeiena i tanen, “Alö go takei ba lö te lu rem u mun tsinana, ba limiou te bus uamiou tara han i Itsip. Ba limiou tena ka möa i Itsip e antunana tara pöata te ranga lel goa lia i tamölö. Taraha, e King Herot e sake la nanou a pien bate atung hamatie nouen.”

14Be Josep e takei noa mena a bong me lu rena u mun tsinana ba nori e la uar i Itsip. 15Ba nori ena ka ria i Itsip e antunaia tara pöata tega mateia e Herot. A ka teka e butu sil tego kato hamana menaien u raranga te ranga naia a Tsunono tara propet i manasa: “Alia u ngö ba namei a pien tson i tar a han i Itsip.”

E Herot e rangein tegi atung hamate merai a galapien tson

16Pöata te atei sil hamanaseia e Herot u tson atei tara pala te roron butu nama a pitala i gamoeien, ba torinen e raharaha koruna. Ba nonei e hala meranei u soldia i Betlehem, na tara man han i sukusuku, ba nori ena atung hamate rer a galapien tson hoboto ti kamei u huol u hiningal,#2:16 A ka teka e salo hoboto hasir a galapien ti kukutema i muriren. temar bobo uen tara pöata ti hateien u tson atei.

17Nonei a mar maroro teka e hatara hamana nena u raranga te ranga naia e Sunahan tere propet Jeremaia. 18Nonei e mar ranga uu teka,

“A nitaatagi pan e butuna tara han i Rama.

U katuun e ku hapan koru mer te tabe hataatagi uaren.

E Retsel e tabe hataatagi sil koru reiena a galapien i tanen.

Na nonei ema ngilenei tegi hasokolei menaien.

Taraha, a galapien i tanen i mate hakapa nitöa.”

E Josep na u mun tsinana i la poutsuma

19I murina te mate hakapaia e Herot, ba töa angelo tara Tsunono e butuna turu sinasoho tere Josep i Itsip. 20Ba nonei e poeiena, “Alö go takei, ba lö te lu rem u mun tsinana, ba limiou te la pouts miou tara han i Israel. A katuun te katsin atung hamati a pien e mate hakapa.” 21Be Josep e takeina me lu rena u mun tsinana, ba nori e la poutsur tara han i Israel. 22Kaba e Josep e hengoen te lu menai e Akelaus a makum tere tamanen e Herot, me king nena a provins i Judia. Be Josep e matout koruna. Na turu tana u sinasoho e Sunahan e hateien nonei goma la uai i Judia, ba nonei e la uana tara provins i Galili. 23Ba nonei ena kana tara töa taun te ngöeri i Nasaret. A ka teka e butu sil hasi tego hatara hamana menaien u raranga ti habulunganein u propet. Nori i mar ranga uu teka, “Nonei e ngöe roi a toun Nasaret.”

Valgt i Øjeblikket:

Matiu 2: HLA 2020

Markering

Del

Kopiér