John 5

Jesus Make One Guy Come Good By One Watta Place

1Laytas Jesus go Jerusalem, cuz da Jew guys get one spesho religious kine ceremony ova dea. 2Inside Jerusalem get one big watta place nea da Gate Fo Da Sheeps. Get five lanai dea. Da peopo call um “Betzata” in da local language. 3Inside da lanai plenny sick peopo stay lay down: blind peopo, peopo dat no can walk, an peopo dat no can move. [Dey stay wait fo weneva da watta move. 4Cuz you know, sometimes one angel guy from Da One In Charge go down inside da watta an make um move. Afta dat, da firs guy dat go inside da watta, he come good from wateva kine sick he get.]

5Had one guy dea dat was sick thirty-eight year. 6Jesus see him stay lay dea. He know dat da guy stay sick long time awready. So he tell him, “You like come good?”

7Da sick guy tell um, “Mista, I no mo nobody fo put me inside wen da watta start fo move. Cuz wen I try fo go inside, some odda guy go inside firs.”

8Jesus tell him, “Stan up! Take yoa mat an walk!” 9Right den an dea da guy come good. He take his mat an walk.

Was da Res Day wen dat happen. 10#Neh 13:19; Jer 17:21So da Jew leada guys tell da guy dat come good, “Eh, dis da Res Day! Dass agains da Rules fo you fo carry yoa mat!”

11He tell, “Da guy dat make me come good, he tell me, ‘Take yoa mat an walk.’ ”

12Dey tell him, “Who da guy dat tell you fo take yoa mat an walk?”

13But da guy dat come good neva know who Jesus, cuz had plenny peopo dea, an Jesus gone awready.

14Bumbye Jesus find da guy inside da open lanai fo da Temple. He tell, “Eh, you stay good now. No go do da bad kine stuff no moa, o mo worse ting goin happen to you.”

15Den da guy go way an tell da Jew leada guys dat was Jesus wen make him come good. 16Dass why dem guys start fo make Jesus suffa, cuz he make da guy come good on da Res Day.

17So Jesus tell dem, “My Faddah still yet stay do da kine good tings, an I do da same ting too.”

God Boy Get Da Right Fo Make Like God

(Daniel 7:13)

18Dass why da Jew leada guys try mo hard fo find Jesus an kill um, cuz he broke da Rules bout da Res Day. An even mo worse, he tell dat God his Faddah. Dat mean he make jalike he God.

19Az why Jesus tell dem, “You guys get um fo shua! An I tell you guys dis: Wen I do someting, dass not me, cuz I no can do notting. I God Boy, an I ony do da stuff I see my Faddah stay do. Wateva my Faddah do, I do da same ting. 20My Faddah get love an aloha fo me, his Boy. An he show me eryting dat he stay do. He goin show me even mo betta tings den dis, an dat goin blow yoa mind! 21My Faddah bring back da mahke guys an make um live. Same ting, me, cuz I his Boy, I can make anybody I like come back fo live one mo time. 22My Faddah not da judge fo nobody, but he make me da judge fo erybody, cuz I his Boy. I da one dat suppose to tell if dey do good tings o bad tings. 23My Faddah like erybody get respeck fo me, cuz I his Boy, jalike dey get respeck fo him. Whoeva no mo respeck fo me, cuz I his Boy, dey no mo respeck fo my Faddah dat wen sen me hea.

24“Dass right! An I tell you guys dis: Whoeva hear wat I tell, an trus God dat wen sen me, dey get da real kine life dat goin stay to da max foeva! God no goin punish dem. Dey no stay mahke inside no moa. Dey stay alive now fo real kine. 25An if you guys undastan dat, I like tell you guys dis too: I God Boy. Da time goin come, an awready stay hea now, wen da mahke guys goin hear wat I tell. An da peopo dat hear me, an lissen wat I tell, dey goin live fo real kine. 26Jalike my Faddah, he can make da peopo come alive fo real kine, same ting, cuz I his Boy he give me da powa fo make um come alive too. 27My Faddah give me da right fo be da judge fo erybody, cuz I his Boy, da Fo Real Kine Guy. 28No let dis blow yoa mind, cuz da time goin come wen all da mahke guys goin hear my voice. 29#Dan 12:2An dey goin come outa dea graves. Da peopo dat wen do da good kine stuff goin come back fo live one mo time fo real kine, an da peopo dat wen do da bad kine stuff goin come back fo get punish.

Da One Dat Tell Bout Jesus

30“Wen I do someting, dass not me, cuz I no can do notting. I da judge, but wen I tell who do good o bad, dat come from wat my Faddah tell me. Dass how come I can judge um right, cuz I no try fo do wat I like do, but ony wat my Faddah like fo me do. He da One dat wen sen me.

31“If I da ony guy stay tell bout me, dat no show proof dat wat I tell stay true. 32Get anodda One dat tell wat he know bout me. An fo shua eryting he tell bout me stay true. 33#John 1:19-27; 3:27-30You guys wen sen messenja guys to John, an he tell eryting he know bout da trut bout me. 34I no need peopo fo tell wat dey know bout me. But I stay tell dis stuff fo you guys get outa da bad kine stuff you stay do. 35Wat John tell stay jalike one lamp dat stay shine bright. Fo short time you guys wen like wat John tell, cuz make you guys stay good inside.

36“But I get odda stuff dat tell bout me, an dass mo betta den wat John tell. Da Faddah give me stuff fo do, an I do um. Da tings I do show who me, an show proof dat da Faddah wen sen me. 37#Matt 3:17; Mark 1:11; Luke 3:22An da Faddah, dat wen sen me, he anodda One dat tell wat he know bout me. But you guys neva hear him o see him. 38You guys no tink az true wat God tell, cuz you guys no trus me, an I da guy he wen sen. 39You guys go check out da Bible erytime, cuz you guys figga you goin find da real kine life dat goin stay to da max foeva, inside da Bible from befo time. But wen da Bible talk bout how fo get da real kine life, dass me he stay talk bout. 40An you guys, you no like come by me an be my guys fo you guys get da real kine life dat goin stay to da max foeva!

41“I no need peopo fo tell me I awesome. 42But I know you guys fo real kine. I know fo shua you guys no mo love an aloha fo God inside you. 43I wen come dis world cuz my Faddah give me da right fo come fo him. But you guys neva like trus me o lissen me. If some odda guy come, jus him, jus cuz he like, you guys goin trus dat guy. 44You guys like talk good bout each odda, but you guys no do notting fo make da ony God dass fo real talk good bout you guys. Den how you guys goin trus wat I tell? No ways!

45“No figga I goin poin finga you guys fo tell da Faddah how you stay. But get one guy dat stay poin finga you guys. Dass Moses, da guy you trus, cuz he wen give you guys da Rules From God. 46But if you guys wen trus Moses fo real kine, den you guys fo shua trus me too, cuz he write bout me. 47But you guys neva trus wat Moses wen write, so how you guys goin trus wat I tell? No ways!”

Valgt i Øjeblikket:

John 5: HPB

Markering

Del

Kopiér