John 3

Jesus Talk To Nicodemus

(Teacha 11:5; Smart Guys 30:4; Census 21:9)

1Had one Pharisee guy Nicodemus, an he one leada fo da Jew guys. 2One nite he go by Jesus an tell um, “Teacha, us guys know dat you one teacha dat come from God, cuz nobody can show us da kine awesome stuff you stay do, if God no stay wit him.”

3Jesus tell him, “Dass right! An I tell you dis too: Whoeva not born one mo time God new way, dey no goin get God fo dea king.”

4Nicodemus tell him, “How one ol guy can get born one mo time? No way he can go inside his muddah one mo time an get born!”

5Jesus tell him, “Dass right! An I tell you dis too: Whoeva not born one mo time from watta an from God Spirit, dey no can get God fo dea king. 6Peopo born from peopo, an peopo spirit born one mo time from God Spirit. 7Eh, no come shock jus cuz I tell you, ‘You guys gotta born one mo time God new way.’ 8Da wind blow hea an dea. You can hear um, but you donno wea da wind come from o wea stay go. Dass jalike erybody dat born one mo time from God Spirit.”

9Nicodemus tell um, “How can be?”

10Jesus tell him, “You da main teacha fo da Israel peopo, an you no undastan dis stuff? 11Fo shua, I tell you dis too: I know wat I stay talking bout. I wen see da stuff I stay tell. But you guys, you still no like trus wat I tell you. 12Wen I tell you guys bout stuff down hea inside dis world, you guys no stay shua wat I tell you az fo real kine. Den how you guys goin stay shua if I tell you guys bout da stuff up dea wea God stay inside da sky? 13Nobody eva wen go up inside da sky. Ony me, da Fo Real Kine Guy, I wen come down from da sky.

14 # Census 21:9 “You know, long time befo time inside da boonies, Moses put one snake on top one pos fo erybody look um an come good. Da same ting gotta happen to me, da Fo Real Kine Guy. Dey goin put me on top one cross, 15fo erybody dat stay trus me get da real kine life dat goin stay to da max foeva!

16“God get plenny love an aloha fo da peopo inside da world. Dass why he sen me, his one an ony Boy. Cuz a dat, erybody dat trus me no goin get cut off from God foeva! Dey goin get da real kine life dat goin stay to da max foeva! 17You know, wen God sen me, his Boy, inside da world, he neva do dat fo punish da peopo. He sen me fo get da peopo outa da bad kine stuff dey stay do. 18Whoeva stay trus me, God no goin punish dem. But whoeva no trus me, garans God goin punish dem, cuz dey neva trus me, God ony Boy.

19“God wen sen da light inside da world. Da light show erybody how dey stay inside. But da peopo like stick wit da dark an dey hate da light, cuz dey stay do bad kine stuff. Dass why God goin punish da peopo. 20Erybody dat stay do bad kine stuff hate da light, an no like let da light shine on top dem. Cuz dey no like nobody know bout da bad kine stuff dey stay do. 21But whoeva stay do wat da true stuff tell fo do, dass jalike dey like fo da light shine on top dem, fo show erybody dat eryting dey do, dass wat God tell um fo do.”

Jesus An John Da Baptiza Guy

22Afta dat, Jesus an da guys he teach go Judea side. He stay wit dem ova dea an baptize peopo. 23Da same time John stay baptize da peopo Enon side, nea Salim, cuz get plenny watta ova dea. Da peopo stay come by John an he stay baptize dem. 24#Matt 14:3; Mark 6:17; Luke 3:19-20All dis happen befo dey throw John in prison.

25Had one Jew guy make argue wit da guys John stay teach. Dey make argue bout how dey gotta wash befo dey can pray. 26So dey go by John an tell um, “Teacha, you know da guy dat wen stay by you ova dea, da odda side a da Jordan Riva, an you tell us bout him? Look! Erybody stay go ova dea, an he stay baptize um.”

27John tell um, “No can get notting, ony wat God in da sky give. 28#John 1:20You guys, you hear me tell, ‘I not da Christ, da Spesho Guy God Goin Sen, but God wen sen me firs, befo him.’

29“Da groom, he da guy dat get da bride. Da bes man, he stay standing dea, an he stay real good inside wen he hear da groom stay talking. I jalike da bes man, an Jesus, jalike da groom. Dass why I stay real good inside. 30He gotta come mo importan den me, cuz I not dat importan.”

Da Guy From Up Dea Come Down

31Da One dat come from up dea wea God stay inside da sky, he mo importan den anybody. Da guy dat come from down hea on top da earth, he jalike all da odda peopo hea on top da earth, an he talk bout da kine stuff from down hea. Da guy from up dea wea God stay inside da sky, fo shua he mo importan den all da odda peopo. 32He tell wat he wen see an hear, but nobody trus wat he tell. 33But whoeva take wat da One from up dea tell, dat guy show dat God tell da trut. 34Da Guy God Wen Sen tell wat God tell, cuz God no hold back wen God give him his Spirit. 35#Matt 11:27; Luke 10:22Da Faddah get plenny love an aloha fo his Boy. He give him da powa ova eryting. 36Whoeva trus God Boy, dey get da real kine life dat goin stay to da max foeva! But whoeva no trus God Boy, an no do wat he tell um fo do, dey no goin get dat kine life, cuz God tell “Laytas” to wat dey do.

Valgt i Øjeblikket:

John 3: HPB

Markering

Del

Kopiér