Éxodo 22
22
Chunocoha chatohaneein asijiauhane, nii niicha basijiahi cainaane coina rauhi
1Chunocohaniji leinjiin boey, leinjiin cabario naaonjoainiji basijiauhin, sohenihane que necoretihane, saoquii baca que, nii boey corihanete ne, jana carenero coreniha, jenaain carenero tihanete ne.
2Leinjiin asijiato, janotiin asijiauhane jana, eruhin cunaitaain sohin joaeraane, coatiha nii cha ujuaihoneein nerinaain, nii sohin joaera. 3Nete laen, jiichoo sohin jaohane, nii sohin joaera nii ujuaihonihane cureein erueraane. Chachaainti asijiae, niite coriha, nii niicha basijiahine jeeoneein coretereein. Nete laen caohachae, neniha rai coriquine, nii niicha basijiahi coretihane coina, raajenihane jaberoco que necoretihane.
4Erueraa nii basijiaunohineein nenaa leinjiin boey, chaaen cabario rijijieein nenaa asno, carenero, naaonjoainuri irihuru, jaiti ichaohine, coroata saain core amuritoheriin coretihane ne, nii bijihu siricha.
5Chunocoha rai nirihuru jianiha nocoanacuru jana cuhin, rai temule quihuruhane coina jana, leeocha ocoana jana cuhin, leeocha temule quihuruha, nii nirihurune, jataain caohachaain nocoana jana nenaa temule que corihanete ne.
6Chunocoha, mocomocone jaane, inaen tainacarai nenaa tirico, chaaen taojianohineein nenaaniji, omarojoenaaniji mocoha, nii niicha ichai mocomocone marihaquiin cuhine, nii mocomocone jaera cacha te, nii coretihane ne.
7Chunocoha, namute cacha rai, cainaane coitucuhane jaun, coriqui, rucuhele jataain coretiin nenaa tihane jana, loreri asae enohin, nii cacha basijiauha asijiatone jana eruuruhane, coroata saain core amurijiriin, coretihane ne, nii asijiato. 8Nete laen, rai bijiu eruurenihane, nii loreri erora amaain Cana Coaunera notaracae bajaauruhane caohachae, acaacha nii rucuhele, leeocha tenojoin raane coitucuuruhane coina.
9Chunocoha, boey, chaaen cabario rijijieein nenaa asno, carenero, cajione, rucuhele, naaojoainuri nitajenaa eroraneein nedanaa jerihane jana, eruhin nii siricha rai aitoha chunine, Cana Coaunera notaracae, nii coroatajaihuri amaain bajaaichene jana, esinae rauhijiriin sirihane, coroatasaain core amurijiriin coretihane ne, nii leeocha.
10Chunocoha, namute cacha rai, leinjiin cabario rijijieein nenaa asno, chaaen boey, carenero, naaonjoainuri niri tiha cainaane coitucuhane jaune jana, chatohaneein nucunaitaain oha, coaraelanaala basijiaunohinihane, nii cacha te 11Cana Coaunera notaracae, esinae rauhijiriin, nii chatohaneein sohin joaenihane que aitoha nii tera raine caohachae. Nii te, nere esenetaa, nii nerora terane, inaen cha coretenere, nii raera. 12Nete laen, coaraane notaracae nii iri basijiaauruhane, nerora rai coretihane ne, nii bajaain siricha. 13Jana, nunaanau nenaa ataibinaeniji, nii iri ateinaane, nii iri bucu amaain neroraque coaaratihane caohachae, nabana ohane coretihane coataa.
14Chunocoha, leinjiin iri bajaane jana, bijihu netiin nucunaitaain oha, nii iri ecu neein coaraeniha nerorane janane, nerora coretihane ne, nii bajaain siricha. 15Jana coarajiha nerorane jana aihane, nii ohane coretelanaala, nechu jataain amiharatihaneecha coretiha, nii bajaeranete caohachae.
Caohachaain suujua coaraain, Cana Coauneraacha jerei ichajeein ichaoha cachane coina rauhi
16Chunocoha, chariji bana quicha aina ichoaelanaala nenaa ene mucuhin rerohecaain, que turuhanete, nii que turuhane coretiha cureein, nitohaniha inara ichaone jaun. Chaaen aina ita raanerai te ne. 17Rai comasainu que raane coina tenaa jereniha rai inaca nihanatiinte, nitohaneein chariji bana quicha aina ichoaelanaala nenaa ene mucuhin que turuhane coretihane rai nereein.
18Jiaonrihachu chunijiun, chunocoha benane ichaolaaichene.
19Chachaainti leinjiin iri mucuhiniji, que niicha jerei ichae, niite atinanohinereein.
20Chachaainti, Cana Coaunera rai chaalai mocohin telanaala, nii leeocha chosichuru ichanohinchuru raaicha, chaelai mocohin te, niite ateinanohiniha cureein.
21Jiaonrihachu, nii chatohaneein, nii nejelau atene caje unacaauru baasoneein teein, cairichanaa coaauquichene, inara netonai nejelau atane caje turuhin neeichelu Egiptoone jaun.
22Jiaonrihachu, nii chatohaneein baasoneein autanaauru tenaa coacuhin, nii ujuatejeeuru nihanatiin chatohaneein baasoneein tenaa coaauquichene. 23Baasoneein tenajaaichene jana, acaauru coroatajanichaaunne coina, aitocuruha caraine, 24jataain inara aina obajeein, sabere que inara ichao itajereeunni. Nii bana te, ujuatejeneein nedaauruha inara bereecurune jana, autana necurureein inara comasaihuru netonai.
25Chunocoha canu cacha cairicheinejeein ii roha nenaa coriqui bajaane, jiaonriha jelai amuritoheriin cainaane jereei aihuruha coriqui coina ainacaaurune tocohaneein, jelai amuritoheriin ichei cainaane coacuelanaala rai teeu. 26Ichei coretihane reentiaain, rai cajione tiha nii cachane, enoto sitonae jana rai jelaiha cainaaun, 27acaihaniji jelaronaa acateraniha raine jaun. Ainihane chaa ichoaete nelorare. Coroatajanichaaunne coina carai aitohanena, coroatajanereeunni, canu laen itolere bana cairichaaojoaain cacha coaracaaune jaun.
28Jiaonriha tonaain Cana Coaunera baijiaain, nii ii curuaanacuru que nihanatiin, tonaain baasoneein ereeine.
29Inaen itemule taojiaa nunuheteein, carajaelanaala carai jitariin uhaau, satiin ichei bino nijihanai. Chaaen jauriaanejeein nenaa ii calaohi te, carai teriquiin, 30jerichanejeein techu, jauriaanejeein nenaa ii baca calaohi aina, carenero calaohi teriquiin carai. Caaunsi janonejeeinchate nainere neba aina neeuruhane, fosa janoniha nejanoacuruhane cuhanete nainereein carai uhanajaaine.
31Inara te, canu cachaneein nenaa tocohaneein, quiicha jerei ichaaechajeein neeinchene caohachae. Jiaonrihachu janolariicha sonojoin irihuru quiichene, raujiaaincha remaaecuru rai teeuche.
Valgt i Øjeblikket:
Éxodo 22: URA
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© 2005, 2024, Wycliffe Bible Translators, Inc.