San Mateo 20
20
Ánchetpiri enga sési maiampejka
1“Auandarhu anapu irechekua, xáxesti eska achamasï enga echerini ma kángorhejka enga úba jukaka, ka tsípku uérasti ánchekorherichani jirinhaani engaksï jima ánchekorhepiringa enga úba jukaka. 2Ka pakatperasptiksï eska xáni maiamuapiringa eska ma jurhiatekua na andanhajka, ka axaspti ánchekorheni jima enga úba jukaka. 3Ka ménderu sáni ióndakuarhu uérasti, ka kópekuarhu exeaspti máru engaksï ísku jápka, 4ka arhiaspti: ‘Ni je chájtu ánchekorheni ka jíksïni maiamuaka na enga xántku sésku jauaka.’ Ka imaksï niraspti. 5Ka ménderu teruxutini uéraspti, ka téjkamatiru isï ménderu, ka májkueni úspti. 6Ka inchatirujtu máteru exeantaaspti engaksï ísku jámani jápka ka arhiaspti: ‘¿Andijtsïsï ísku chúskuta?’ 7Ka imaksï arhintaspti: ‘Jimbokajtsïni nónema ánchetaska.’ Ka ima arhiaspti: ‘Ni je chájtu ánchekorheni ka maiamuakaksïni na enga xáni sésku jauaka.’”
8“Chúrekua, ima tata enga ánchekorherichani káani jápka, arhispti imani enga ánchekorherichani urhekuani jápka: ‘Imechani urheta uandajpaa ka maiamua engaksï inchatiru inchaakuka, ka xásïri imani maiamuauaka engaksï tsípku ichaakuka.’ 9Ka andarherasptiksï ima engaksï inchatiru ichaakupka ka mándani arhinksï ma jurhiatekueri maiamunhaspti. 10Ka niáranchasptiksï ima engaksï tsípku uénapka ánchekorheni, eratseparinksï eskaksï sánderu kánhachani p'ipiringa, k'óruksï imajtu ma jurhiatekuerijku maiamunhaspti. 11Engaksï maiamunhapka, imani achetini engaksï ánchekorhekuni jápka mámaru ambeksï uandatsespti, 12ka arhisptiksï: ‘Ima engaksï iásï sáni janoka nóksï ióni ánchekorhesti, ka májkueniri maiamuaska eskajtsïni juchantsïni engachi xáni tsándu chúskutaka ánchekorheni.’ 13Ka ima acheti ima ma ísïni mókukuspti: ‘Pámpiri, nómbemakini nósesi ambe úchexaka. ¿Andi nóchi pakatperaspki eskaksïni xántku maiamupiringa eska ma jurhiatekua na andanhajka? 14P'i na enga xáni chétika ka janharia níntani. Ji maiamuauaka imani engaksï iásï sáni janoka eskakini t'úngeni náxani maiamuka. 15¿Andi ji no sésekua jatsiski jucheti tuminani úrani, ambe engani ji uékaaka úrani? ¿Órini epurhexaki engani ji jarhojpeni jaka?’ 16Ísï jimbo, engaksï iásï urhetika, xásïksï tátsepani péranhaati ka engaksï tátsepani jaka, xásïksï urhetiuati, jimbokaksï uánekua ióarhinhaska ka namuntkuksïsï erakukateti.”
Jesusi ménderu uandanukukorhesti
(Mc 10.32-34; Lc 18.31-34)
17Enga Jesusi Jerusaleni karhamani jápka, xanhari jimbo jurhengorheri jémbechani támu páaspti ka arhiaspti: 18“Iásïchi Jerusaleni karhamaxaka, Acheti Uájpanksï k'éri tátechani ka juramukua jurhentpirichani intsïnharhitaati, ka imaksï uándikutarkorheati, 19ka uérakua anapuechanksï intsïnharhitaati ka imaksï teresmarhuati ka k'uikirheatiksï ka cháparhataatiksï; k'óru ima tanimu jurhiatekua jimbo tsíntaati.”
Auandarhu Táte juramusïndi
(Mc 10.35-45)
20Jesusini andarheraspti Sebedeo temba uájpecha jinguni, ka t'inguixurhikutini ma ambe kurhakuspti. 21Ka Jesusi arhispti: “¿Amberisï uéjki?”
Ka uarhiti arhintaspti: “Ekari t'u chéti irechekuarhu jauakia, juramu eskaksïni jucheti uátsïticha, ma jurhijkandani ka máteru uikixkandani uaxakachetini jauaka.” 22Ka Jesusi arhiantaaspti: “Nójtsï míteska ambe engajtsï kurhajkorheni jaka. ¿Andi itsïmajtsï imani engani ji itsïmaaka? ¿Andi itsï atajtsïkunhajtsï imani jimbo engani ji itsï atajtsïkunhaaka?” Imaksï arhintaspti: “Jo, jucha úaka.” 23Ka Jesusi arhiaspti: “Sési jimbo imani engani ji itsïmaaka, chájtujtsï itsïmaaka, ka imani jimbo engani ji itsï atajtsïaka, chájtujtsï itsï atajtsïkunhaaka, k'óru no jucheti jimbo jarhasti jucheti jurhijkandani o uikixkandanksïni uaxastani, jimboka imaksï jima uaxastanhaaka enga jucheti Táte eratsekata jatsiaka.”
24Máteruksï témbeni jurhengorhericha kurhajchaatini erachichanksï ikiakuaspti. 25Ka Jesusi uandajpaaspti ka arhiaaspti: “Mítetixakajtsï eskaksï juramuti no jakajkuticha uinhamarhetspesïnga juramuni, ka eskaksï k'érati achecha úinhamarhetspesïnga juramuni. 26Ka chánksïni jinguni no ísïuati, ima enga k'éri ambenhchajka, marhuacheksïni, 27ka ima enga urhetinhchajka, jatsistiksïni marhuacheni; 28ísï eska Acheti Uájpa na juka marhuatspeni, ka uánekuechani jimbo imeri tsípekua íntspeni ka no jurhasti eska marhuamenhaaka.”
Jesusi tsimani pátenharhichani ambakerantaasti
(Mc 10.46-52; Lc 18.35-43)
29Engaksï Jeriko uéakuntapka, uánekuaksï chúxapaxapti. 30Ka tsimani pátenharhichaksï engaksï xanharu uaxarupka, Jesusinksï kurharini enga jimesï nitamani jápka uandasptiksï: “¡Tata, Dabi Uájpa, p'amojkujtsïni!” 31Ka xukaasïremptiksï nónaksï pínasku jatsiani, k'óruksï ima sánderu uinhachaspti: “¡Tata, Dabi Uájpa p'amojkujtsïni!” 32Jesusi anhaxurhispti ka uandajpaaspti ka arhiaspti: “¿Ambejtsïsï uéjki eskaksïni úcheaka?” 33Imaksï uandaspti: “Tata, uékasïngachi exeni.” 34Jesusi p'amojkuaspti, p'ánharhikuaspti ka imaksï úspti exeni ka chúxapasptiksï.
Valgt i Øjeblikket:
San Mateo 20: DKPJ
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Biblia en P´urhépecha, Michoacán, México © Sociedad Bíblica de México, A.C.
