JOHAN 12

Bethany khua ah Jesu Sathau Kinilh

(Mat 26:6-13; Mrk 14:3-9)

1Paisan Pawi hun a tun ding ni guk in a sap ni-in sihna panin a thawhsak Lazaras a teenna Bethany khua ah va tung hi. 2Amaute in nitak an na vak uh a, Lazaras ahihleh Jesu tawh an ne-in tukhawmin, Martha pen an pia-in a manlah hi. 3Tua laitakin Mary in a manpha mahmah nard sathau namtui thawl khat hong paipih a, Jesuʼ khe a nuh khit ciangin a sam tawh a nulsak hi. Tua inn sung khempeuh sathau namtui gim hong nam hi.#Luk 7:37-38 4Tua laitakin Jesuʼ nungzuite sung panin amah a lehhek ding Judas Iskariot in, 5“Bang hangin hih sathau namtui ngun peek za thumin kizuakin a sumte mizawngte tungah kipia zaw lo ahi hiam?” a ci hi. 6Hih bangin kam a pauna pen mizawngte a khualna hang hi lo a, amah sumkem ahih manin a sumte gu-in a ututin a zang zel pa ahihna hang hizaw hi. 7Tua ahih manin Jesu in, “Bangmah cih se dah un! Ama neih laite zong ka kivui cianga dingin kemsak hoh un. 8Mizawngte pen note tawh hong om khawm niloh dinga, kei ka hih leh note tawh ka hong om khawm tawntung kei ding hi,” a ci hi.#Thkna 15:11

Lazaras Thah A Kisawmna

9Bethany khua ah Jesu a omna thu a zak uh ciangin mihon tampi hong pai uh hi. Jesu a mu nuamin hong pai hi bek lo uh a, Jesu in sihna panin a thawhsakkik Lazaras zong a mu nuam kawm uh ahi hi. 10-11Lazarasʼ hangin Jew mi tampite in amauʼ makaite taisanin Jesu um uh ahih manin siampi liante in Lazaras zong thah a sawm uh hi.

Gualzawhna tawh Jerusalem-a Lutna

(Mat 21:1-11; Mrk 11:1-11; Luk 19:28-40)

12A zing ciangin Paisan Pawi a siim mihonpite in Jerusalem khua ah Jesu hong pai nading thu a za uh hi. 13Tua ahih manin amah a dawn dingin Jerusalem panin mihonpi pai khia-in nisuh hiangte tawi kawmin, “Pasian phat un! Pasian in Topaʼ min tawh hong pai pa thupha pia tahen! Pasian in Israel Kumpipa thupha pia tahen!” ci-in a kiko uh hi.#La 118:25-26 14-15Lai Siangtho sungah,

“Zion khua mite aw, lau kei un.

En un, na kumpipa uh hong pai a,

la no tungah hong tuang hi,”

ci-in a kigelh mah bangin Jesu in la no khat mu ahih manin tua la no tungah a tuang hi.#Zek 9:9 16Tua hun laitakin a nungzuite in hih thu a khiatna thei lo uh hi. Ahi zongin Pasianʼ pianzia nei-in Jesu a thawhkik khit ciangin Lai Siangtho in amah a gen ahihna le ama adingin hih bangin a piang ahihna thu a nung phawk uh hi.

17Jesu in han sung panin Lazaras samin, sihna panin a thawhsakkik a mu mihonte in tua thu mah gen belin a nei uh hi. 18Jesu in tua bang nalamdang lian a bawlna thu mihonte in za khin uh ahih manin amah a dawn dingin a pai uh hi. 19Tua ciangin Farisi mite khatlekhat kiho uh a, “Bangmah i cih zo het kei hi. En un, mi khempeuh in amah a zui khinta uh ahi hi,” a kici uh hi.

Grik Mi Pawl khat in Jesu Zong

20Pawi hun sungin Pasian bia dingin Jerusalem khua ah a hong pai mite lakah Grik mi pawl khat a om uh hi. 21Galilee gam Bethsaida khuami Filip kiangah amaute hong pai-in, “Sia aw, kote in zong Jesu ka mu nuam uh hi,” ci-in a gen uh ciangin 22Filip in Andru kiangah a gen hi. Tua ciangin Andru le Filip pai khawmin Jesu kiangah a gen uh hi. 23Tua ciangin Jesu in, “Mihing Tapa in Pasianʼ pianzia a ngah ding hun hong tung ta hi. 24A mantakin ci lehang, mangbuh hum tang khat leilak ah kituhin si masa kei leh tang khat bek mah hi ngitnget hi; ahi zongin si masa leh tang tampi tak hong nei thei hi. 25Tua ahih manin hih leitung nuntakna a itte in a nuntakna taktak taanlawh dinga, hih leitung nuntakna a it lote in nuntakna taktak nei tawntung ding hi.#Mat 10:39; 16:25; Mrk 8:35; Luk 9:24; 17:33 26Ka nasemte keima omna ah a om theih nadingin ka na a sem nuam peuhmah in kei hong zui ding uh a, ka Pa in ka na a sem mite a pahtawi ding hi,” a ci hi.

Mihing Tapa Kikhai Ding

27Tua khit ciangin Jesu in, “Tu-in ka lunggim mahmah hi. Bang cih ding ka hi hiam? ‘Pa aw, hih hun tawh hong kipelhsak in,’ ci ding ka hi hiam? Tua bang cih ding lah hih bang a thuak ding mahin a hong pai ka hi hi. 28Pa aw, nangma min thangsak ta in,” a ci hi. Tua ciangin vantung panin aw khat hong ging a, “Ka thangsak zo a, khatvei ka thangsakkik ding hi,” a ci hi. 29Tua kiim a ding mihonte in a awging za uh a, “Van ging bang hi,” a ci uh hi. Pawl khatte in, “Vantungmi in amah hopih hi,” a ci uh hi. 30Tua ciangin Jesu in, “Hih awging pen keima ading ngaihsutna hi lo a, note ading ngaihsutna-in hong ging hizaw hi. 31Tu-in leitung thukhen ding hun hong tung ta a, hih leitung a ukpa kilawn khia ding hi. 32Leilak panin kei hong kikhai toh ciangin ka kiangah mi khempeuh ka kai ding hi,” a ci hi. 33(Hih bangin a gen ciangin ama sihna ding zia a genna ahi hi.) 34Tua ciangin mihonte in, “Khris nungta tawntung ding hi, ci-in Thukham sungah kigen hi. Bang hangin Mihing Tapa kikhai to ding ci na hi hiam? Hih Mihing Tapa kua ahi hiam?” a cih uh ciangin#La 110:4; Isa 9:7; Ezk 37:25; Dan 7:14 35Jesu in, “Note kiangah tawmvei sung khuavak hong om lai ding hi. Khuamial sungah a pai mi in a paina mun thei lo ahih manin khuamial in note hong phak loh nadingin khuavak na neih sungun na gamtat ngei uh zom paisuak un. 36Khuavak mite na suah theih nadingun khuavak na neih hun sungun tua khuavak um un,” a ci hi.

Jew Miteʼ Up lohna

Jesu in hih thu teng a gen khit ciangin pai khia-in amaute kiang panin a bu hi. 37Amauteʼ muhin Jesu in hih nalamdang khempeuh a bawl hangin amaute in um lo uh hi. 38Kamsang Isaiah in,

“Topa aw,

kua in ka thugente um a,

Topaʼ vangliatna

kua tungah kilak ahi hiam?”

ci-in a genna thu a tun nading ahi hi.#Isa 53:1 39Tua ahih manin amaute in um nuam lo uh hi. Bang hang hiam cih leh Isaiah mah in,

40“Amauteʼ natna

ka damsak loh nadingin

a mit un mu loin,

a lungsim un

a theihtheih loh nadingun

amauteʼ mit ka tawsak a,

a lungsim uh ka mawlsak hi,

Pasian in ci hi,”

ci-in zong na gen lai hi.#Isa 6:10 41Isaiah in Jesuʼ neih Pasianʼ pianzia mu ahih manin hih bangin thu a gen ahi hi. 42Tua bang hitaseleh Jew mi ulian tampi in Jesu a um uh hi. Ahi zongin Farisi mite in kikhopna inn panin a hawlkhiat ding lau uh ahih manin a kilangin gen khia ngam lo uh hi. 43Pasianʼ pahtak ding sangin miteʼ pahtak ding ut zaw uh ahih manin a tua ci om ahi uh hi.

Jesuʼ Thugente Thukhen Hi Ding

44Tua ciangin Jesu nakpi takin kiko a, “Kei hong um khempeuh in kei bek hong um hi loin kei hong sawl pa zong a um ahi hi. 45Kei hong mu khempeuh in kei hong sawl pa zong a mu ahi hi. 46Kei hong um mi khempeuh, khuamial sungah a om nawn loh nadingun leitung khuavak bangin ka hong pai hi. 47Ka thugenna za napi-in a zui lo mite tungah thu ka khen kei ding hi. Leitung mite mawhsakin thukhen dingin a hong pai ka hi kei a, a hon khia dingin a hong pai ka hizaw hi. 48Kei hong nialin ka thugen a sang lo mite in thukhen ding khat nei uh hi. Nitawp ni ciangin keima thugente pen amauteʼ thukhen ding ahi hi. 49Bang hang hiam cih leh keima utthu tawh thu a mawk gen ka hi kei a, kei hong sawl Pa Pasian in ka gen ding thu teng a hong piak ahi hi. 50Gen dingin a hong sawl thute in nuntak tawntung a piangsak thei ahihna thu ka thei hi. Tua ahih manin Pa in gen dingin a hong sawl teng bek a gen ka hi hi,” a ci hi.

Valgt i Øjeblikket:

JOHAN 12: TBR17

Markering

Del

Kopiér