SAWLTAK 1
1
Kha Siangtho Kikham
1-2Lawm Theofilas aw, Lai ka hong gelh masakna sungah Jesu in nasep a kipat tung a kipanin vantungah amah a kilaktoh hun ciang dong, a thuhilhna le a septe khempeuh cing takin ka gelh hi. Ama sawltak dingin a teel sa mite, Kha Siangtho tungtawnin thu a vaikhak khit ciangin vantungah amah kila to hi. #Luk 1:1-4 3Ama sih khit zawh ni sawm li sung amaute tungah tam veipi kilang a, amah a nungta taktak ahihna teltakin a kithei ahi hi. Amaute in amah mu uh a, Pasianʼ Ukna thu amaute tungah a gen hi. 4Amaute tawh a om khawm laitakin amah in amaute kiangah, “Jerusalem khua panin paikhia kei unla, note kiangah ka hong gen sa ka Paʼ hong kamciam thu na ngak un.#Luk 24:49 5Johan in tui sungah mite phum a, ahi zongin a sawt loin Pasian in Kha Siangtho tawh note hong kidimsak ding hi,” ci-in thu a pia hi.#Mat 3:11; Mrk 1:8; Luk 3:16; Joh 1:33
Vankahna
6Tua bangin Jesu tawh a om khawm laitakun sawltakte in Jesu kiangah, “Topa aw, tutungin Israel minamte tungah ukna aana na piakik ding hiam?” ci-in a dot uh ciangin 7Jesu in, “Ka Pa in ama thu tawh a seh sa hun le nite, cik ciangin hong tung ding cih thu noteʼ theih ding thu hi lo hi. 8Ahi zongin note tungah Kha Siangtho hong tun ciangin vangliatna tawh na kidim ding uh a, Jerusalem khua sung, Judea gam sung, Samaria gam sung le leimong dongin note in keima thu na gen ding uh hi,” ci-in a dawng hi.#Mat 28:19; Mrk 16:15; Luk 24:47-48 9Hih thu a gen khit ciangin amauteʼ muh tangpi mahin vanah Jesu kila to a, meiipi in liah ahih manin amah mu thei nawn lo uh hi.#Mrk 16:19; Luk 24:50-51
10Tua bangin Jesu a kilaktoh ciangin amaute in vantung lam enenin a om laitakun amaute kiangah puan pak a silh mi nih hong ding vat a, 11“Galilee mite aw, bang hangin vantung lam enin ding niloh na hi uh hiam? Note kiang panin vantungah a kila to hih Jesu pen, vantungah a pai toh na muh uh bang teekteek mahin khatvei hong pai sukkik ding hi,” a ci uh hi.
Judas A Laih Ding pa Kiteel
12Tua ciangin Jerusalem pan tai lang bang a gamla tua Oliv Mual tung panin Jerusalem ah sawltakte a ciahkik uh hi. 13Jerusalem a tun uh ciangin amauteng, Peter, Johan, James le Andru, Filip le Thomas, Bartholomew le Matthai, Alfeasʼ tapa James, Simon (gam khual pa) le Jamesʼ tapa Judas a tunna uh inn dei ah a kah to uh hi.#Mat 10:2-4; Mrk 3:16-19; Luk 6:14-16 14Numeite, Jesuʼ nu Mary le Jesuʼ naute tawh thungen khawm dingin a kikhawm zelzel uh hi.
15Tua khit a sawt loin thu um mi za khat le sawm nih bang a kikhop khawm laitakun Peter hong dingin thu hong gen a, 16“Lawmte aw, Jesu a mante lam a lak Judas thu, Kha Siangtho in Davidʼ kam panin a gen kholhna Lai Siangtho sung thu a tun ding kisam hi. 17Judas pen eite tawh na a sem khawm dingin a kiteel khia ahih manin eima pawl mi ahi hi.
18(“Tu-in hih mipa in a gitloh gamtatna thamanin a ngah sum tawh amah in lo khat lei a, tua lo sungah kia-in a si hi. Amah kitamzan a, a sungkua khempeuh kitheh kek hi. 19Jerusalem khua sunga teeng mi khempeuh in hih thu za uh a, amauʼ pau-in tua lo pen ‘Akeldama,’ ci uh hi. Akeldama a khiatna in, ‘Mi Thahna Lo,’ a cihna ahi hi.) #Mat 27:3-8
20“Bang hang hiam cih leh Late Laibu sungah,
‘Ama teenna mun gamdai henla,
tua munah kuamah teeng kei hen,’
kici a, tua banah,
‘Ama nasep
midang khat in sem tahen,’
ci-in kigelh hi.#La 69:25; 109:8
21-22“Tua ahih ciangin Topa Jesuʼ thawhkikna thu teci pangin a hong genpih dingin Judas tangin mi khat i lak ding kisam hi. Tua mipa pen Johanʼ tuiphum kipat hun a kipanin Jesu vanah a kilaktoh hun ciang dong, Jesuʼ nasepna khempeuh ah eite tawh a om khawm mi khat ahih ding kisam hi,” a ci hi.#Mat 3:16; Mrk 1:9; 16:19; Luk 3:21; 24:51
23Tua ciangin amaute in Josef (min dang nih a nei, Barsabbas le Justas zong a kici pa) le Matthias a pulak uh hi. 24-25Tua ciangin amaute in thu ngen uh a, “Mihing khempeuhʼ lungsim sung thu a thei Topa aw, ama om nadingin a kilawm munah a om dingin sawltak nasep panin a hong paisan Judas tang dingin, hih mi nih sung panin na teel penpen hong hilh in,” a ci uh hi. 26Tua ciangin a teel nadingun lai ai san uh a, Matthias in ngah ahih manin sawltak sawm le khatte tawh a kisim khawm pah hi.
Valgt i Øjeblikket:
SAWLTAK 1: TBR17
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Tedim Bible © Bible Society of Myanmar, 2017.