ลามูลา 1
1
ตูฮัด เดะ อาตัซ บือฌาดี ดือนียา.
1ลามูลา_ ตูฮัด เดะ อาตัซ เตอ_ ญา บือฌาดี ลาแงะ ฌางัน ดือนียา. 2ดือนียา โปด_ ญา ฮอย รูปา นู นะ ตือตู_ ฮอย บารัก นามา ลาฆี โปด. อาดา ซา ลาฆู กือลับ_ เดะ อาตัซ อาเย. อาดา ซือมืองัจ นะ ตูฮัด_ ญา ตือมะ ฌาฆา ลีฮัจ_ โซะ อาตัซ อาเย.
3กะฆีเตอ_ ตูฮัด มือเลา จะ_ “บรี อาดา ลาฆู จรัฮ เลอ.”_ กะฆีเตอ_ อาดา ลาฆู จรัฮ ดัฮ. 4ตูฮัด ญา ลีฮัจ จะ_ ลาฆู จรัฮ อีตู บาฌิ ดัฮ. กะฆีเตอ_ ตูฮัด ญา ปาฮาฆิ_ บรี อาดา ลาฆู จรัฮ_ อาดา ลาฆู กือลับ. 5โซะ จรัฮ อีตู_ ตูฮัด ญา บลาโลก จะ_ ซียัก. โซะ กือลับ อีตู_ ญา บลาโลก จะ_ มาลับ. อาดา วะตู ปะฮือญา_ อาดา วะตู ปาฆี_ ฌาดี อารี ลามูลา.
6กะฆีเตอ_ ตูฮัด มือเลา จะ_ “บรี อาดา ตือปัจ เดะ อาตัซ_ เดะ ตืองัฮ อาเย_ นะ ปาฮาฆิ อาเย_ บรี ดูโดะ ดูวา บือลัฮ.” 7กะฆีเตอ_ ตูฮัด ญา บือฌาดี ตือปัจ อีตู_ นะ ปาฮาฆิ อาเย_ เดะ บาวัฮ ตือปัจ อีตู_ ฌางัน อาเย เดะ อาตัซ. ฌาดี กะฆีเตอ ดัฮ. 8ตือปัจ อีตู เตอ_ ตูฮัด ญา บลาโลก จะ_ ลาแงะ. อาดา วะตู ปะฮือญา_ อาดา วะตู ปาฆี_ ฌาดี อารี นู ดูวา.
9กะฆีเตอ_ ตูฮัด มือเลา จะ_ “บรี อาเย เดะ บาวัฮ ลาแงะ_ บือมุน ฌาดี ซือตือปัจ_ บรี ตือปัจ ตานัฮ กริก บือฆารี.” ฌาดี บือกะฆีเตอ ดัฮ. 10ตานัฮ นู กริก อีตู เตอ_ ตูฮัด บลาโลก จะ_ ตานัฮ ฮูตัด. อาเย นู บือมุน ฌาดี ซือตือปัจ เตอ_ ตูฮัด บลาโลก จะ_ ลาโวจ. กะฆีเตอ_ ตูฮัด ญา ลีฮัจ จะ_ บาฌิ ดัฮ.
11กะฆีเตอ_ ตูฮัด มือเลา จะ_ “บรี กะ ฮูตัด บือฌาดี โกะ ปูโฮด บือตูโมฮ เดะ ตานัฮ_ ฌาดี โกะ ตาโระ นู อาดา บีฌี เตอ_ โกะ ปูโฮด นู บูวัฮ อาดา บีฌี เดะ ดาลับ เตอ_ บือกะ บือแนฮ นะ ญา”_ ญา จะ. ฌาดี บือกะฆีเตอ ดัฮ. 12กะฆีเตอ_ ดือนียา โปด_ บือตูโมฮ โกะ ตาโระ แนฮฌือแนฮ_ โกะ ตาโระ นู อาดา บีฌี_ บือกะ บือแนฮ นะ ญา_ ฌางัน โกะ ปูโฮด นู บูวัฮ อาดา บีฌี เดะ ดาลับ เตอ_ บือกะ บือแนฮ นะ ญา. กะฆีเตอ_ ตูฮัด ลีฮัจ จะ_ บาฌิ ดัฮ. 13อาดา วะตู ปะฮือญา_ อาดา วะตู ปาฆี_ ฌาดี อารี นู ตีฆา.
14กะฆีเตอ_ ตูฮัด มือเลา จะ_ “บรี อาดา ตือปัจ จรัฮ_ เดะ อาตัซ ลาแงะ_ บีดา นะ ปาฮาฆิ บรี อาดา วะตู ซียัก_ วะตู มาลับ_ นะ บรี ฌาดี ปือนานา_ ลีฮัจ จะ_ มูเซด นามา_ อารี นามา_ ตาโฮด นามา_ 15นะ บรี ฌาดี ตือปัจ จรัฮ_ เดะ อาตัซ ลาแงะ_ บีดา นะ ซูโลฮ บรี กะ ดือนียา จรัฮ” ญา จะ. ฌาดี บือกะฆีเตอ ดัฮ.
16กะฆีเตอ_ ตูฮัด ญา บือฌาดี ตือปัจ จรัฮ นู บือซัยํ_ ดูวา ตือปัจ. นู บือซัยํ โตระ_ ปือบือลา โซะ ซียัก_ นู ดือมิ ดีกิ_ ปือบือลา โซะ มาลับ. ญา บือฌาดี โกะ ลูมอฮ บีตัก ซามา เลอ. 17กะฆีเตอ_ ตูฮัด เตอ_ ญา ตืองะ ตือปัจ จรัฮ อีตู_ เดะ อาตัซ ลาแงะ_ บรี ซูโลฮ จรัฮ อาตัซ ดือนียา_ 18บรี ปือบือลา โซะ ซียัก_ โซะ มาลับ_ บรี ปาฮาฆิ โซะ จรัฮ_ ฌางัน โซะ กือลับ. กะฆีเตอ_ ตูฮัด ลีฮัจ จะ_ บาฌิ ดัฮ. 19อาดา วะตู ปะฮือญา_ อาดา วะตู ปาฆี_ ฌาดี อารี นู ปัจ.
20กะฆีเตอ_ ตูฮัด มือเลา จะ_ “บรี โกะ อาเย บือฌาดี บรี ปือนอฮ_ ฌางัน บือนา นู ฮีโดะ เดะ อาเย_ บือกาวัดกาวัด. บรี อาดา โกะ บูโรก ตรือบัก ปี มาแรฮ เดะ อาตัซ ดือนียา_ เดะ โซะ ลาแงะ” ญา จะ. 21กะฆีเตอ_ ตูฮัด บือฌาดี โกะ บือนาตัก บือซัยํ เดะ ลาโวจ_ ฌางัน บือนาตัก ราตา_ นู ฮีโดะ บือดือนัง เดะ อาเย_ บือกาวัดกาวัด_ บือกะ บือแนฮ นะ ญา. ญา บือฌาดี บูโรก อาดา ซายะ ราตา_ บือกะ บือแนฮ นะ ญา. กะฆีเตอ_ ตูฮัด ญา ลีฮัจ จะ_ บาฌิ ดัฮ.
22กะฆีเตอ_ ตูฮัด เดะ อาตัซ_ ญา บรี ซือลามัจ กะ บือนา ซือมูฮา จะ_ “บรี อาดา อานะ ลือบัจ_ พรัด บาญะ_ ปือนอฮ เดะ ลาโวจ เลอ. บรี โกะ บูโรก พรัด บาญะ_ เดะ อาตัซ ดือนียา เลอ” ญา จะ. 23อาดา วะตู ปะฮือญา_ อาดา วะตู ปาฆี_ ฌาดี อารี นู ลีมา.
24กะฆีเตอ_ ตูฮัด มือเลา จะ_ “บรี กะ ตานัฮ บือกรือฌา_ บรี อาดา โกะ บือนา นู ฮีโดะ_ บือกะ บือแนฮ นะ ญา เตอ_ ฌาดี บือนาตัก บือเลฮ ซูโรฮ_ บือนาตัก มือรากะ เตอ_ บือนาตัก โซะ ฮูตัด โปด_ บือกะ บือแนฮ นะ ญา”_ ญา จะ. ฌาดี บือกะฆีเตอ ดัฮ เลอ. 25กะฆีเตอ_ ตูฮัด บือฌาดี โกะ บือนาตัก เดะ ฮูตัด_ บือกะ บือแนฮ นะ ญา เตอ_ โกะ บือนาตัก บือเลฮ ซูโรฮ_ บือกะ บือแนฮ นะ ญา_ ราตา บือนาตัก มือรากะ บือฌาลัด เดะ ตานัฮ_ บือกะ บือแนฮ นะ ญา. กะฆีเตอ_ ตูฮัด ลีฮัจ จะ_ บาฌิ ดัฮ.
26กะฆีเตอ_ ตูฮัด มือเลา จะ_ “บรี กามี บูวัจ ซือมียา_ บือกะ รูปา นะ กามี_ บรี บือกะ ซือรูปา กามี. บรี ลูมอฮ ซือมียา ปือบือลา โกะ อีกัด เดะ ลาโวจ_ โกะ บูโรก เดะ ลาแงะ_ โกะ บือนาตัก บือเลฮ ซูโรฮ. บรี ปือบือลา_ ดือนียา ซือมูฮา_ ฌางัน โกะ บือนาตัก มือรากะ เดะ ตานัฮ ซือมูฮา”_ ญา จะ.
27กะฆีเตอ_ ตูฮัด ญา บือฌาดี ซือมียา_ บือกะ รูปา นะ ญา. ญา บือฌาดี ซือมียา_ บือกะ ตูฮัด. ญา บือฌาดี ซือมียา_ บรี ฌาดี กีลากี ฌางัน นีบีนี. 28กะฆีเตอ_ ตูฮัด บรี ซือลามัจ กะ กูญา_ มือเลา ฌางัน กูญา จะ_ “บรี อาดา นานะ บาญะ_ บือตามัฮ บาญะ_ ฌู ปือนอฮ เดะ ดือนียา. บรี อาดา มือฆัฮ ฮูโกบ ดือนียา_ บรี ปือบือลา โกะ อีกัด เดะ ลาโวจ_ โกะ บูโรก เดะ ลาแงะ_ โกะ บือนาตัก ซือมูฮา_ นู ฮีโดะ บือฌาลัด เดะ ตานัฮ”_ ญา จะ.
29กะฆีเตอ_ ตูฮัด มือเลา จะ_ “นี เลอ_ กู บรี โกะ ปูโฮด ตาโระ ราตา ฌือแนฮ กะ กาเญา_ เตด จะ โกะ ตาโระ นู อาดา บีฌี_ นู อาดา เดะ อาตัซ ตือปัจ ตานัฮ_ เฆอ จะ_ โกะ ปูโฮด กายู_ นู อาดา บีฌี เดะ ดาลับ บูวัฮ. บือนา อีนี ซือมูฮา_ ฌาดี บารัก มากัด นะ กาเญา เลอ. 30โซะ โกะ บือนาตัก เดะ ตานัฮ ซือมูฮา โปด_ โกะ บูโรก เดะ ลาแงะ ซือมูฮา_ โกะ บือนาตัก มือรากะ เดะ ตานัฮ ฌูฆา_ ฌางัน บือนา ซือมูฮา นู ฮีโดะ บือญาวา เตอ_ กู บรี โกะ ตาโระ นู ฮีเฌา อีตู_ ฌาดี บารัก มากัด นะ กูญา”_ ญา จะ. ฌาดี บือกะฆีเตอ ดัฮ เลอ.
31ตูฮัด เดะ อาตัซ เตอ_ ญา ลีฮัจ บือนา ซือมูฮา_ นู ญา บือฌาดี ดัฮ_ ลีฮัจ จะ_ บาฌิ ซูโงฮ ดัฮ. อาดา วะตู ปะฮือญา_ อาดา วะตู ปาฆี_ ฌาดี อารี นู นัม.
Valgt i Øjeblikket:
ลามูลา 1: ULBIBLE
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind