HINI UWASI-BIADRCIMOWA ya-sfadoci MAFIYO 15
15
1Hina uwa ’n’tvsi utfr-wrli Jesiseli Culosalame uci Pala-seki chena yr-ivwigacki, 2Gociwa gi kvgahgimrfvki u lr-lfwrci ludr-nrwv ini u gahtv-rcimowa-nwv nihki gigi-laneki? xvga mvtv gr-gifi-lajrki iah meci-wrci tvkuwhv, isiwaki. 3Macimi ud rpvf-tv-wvhi chena, Gociwa gelvwv nahfrpi ki lr-lfwrci ludr-nrwv ini u tapigamowa Mvnatu xvga ki gahtv-rcimowa-nwv uci? u talvhi. 4Xvga Mvnatu, Hutvga-lami g’uhfv chena gi giv : macimi, Inv ma-mv-ci-kvlo-lrtv ufimrli walr ugali, welrni inv napaga ini nabowa, iwv. 5Wakv gelvwv, Goqa-nafv-grci wa hilrli u fvli walr u gali, Hini mviahci manvwvhga naiahkv udwrfe-ivni nelv uci ini me-lofu Mvnatu; 6tagi inv wa hutvga-lamrli u fvli, ki dr-iupwv. Macimi ki mvtv wiyafa-gisihdo-nrwv ini u kvlvwewa Mvnatu xvga ki gah-tv-rcimowa-nwv uci. 7Gelvwv naluhci-lvwiwah-feki, g’uwasi mo-sigesqrci-makuwv Visviv, ya-iuci,
8Yrmv lanvwa n’utvga-lamaqv u sgisrwv uci;
Waku u tahiwv paluwr-mvtwi neiv uci.
9Pvyaqv naluhci ni wr-usvsilvwaha-goki,
Pami kvgahgimi-waki gigamuh-grki nili ilaneki u gigamowa-nwv.
10Chena u tah wihku-mvhi nihi mahsa-lalici, Nodr-gaku, macimi nanuh-saku : 11Mvtv ini udonagi ya-sfrgi u mr-myrshaku ilani; ini udonagi waci-frgi wakv, yomv inv ilani u mr-myrshaku, u ta-lvhi. 12Hina uwa biaki nihki kvgahgimrfvki, macimi, Hv gi wr-kutv yasi nihki Palaseki gisfofuwrci, iah notvmu-wrci yomv iyo-wa? u talr-wrli. 13Pvyaqv rpvfsa, Jrgi si vhcikv buryr vhdoci wafapvh-kvmigigi n’Uhfv, wapuqvhgi-jabhota. 14Welrni nihki : nihgeni kvgabeqawi nrgrnecki. Macimi inv gagabeqatv negrni-walrta nili gagabe-qalici, nayeswi wrsrlv-kugi wah si pansinoki, iwv. 15Chena Betv rpvfsa, Tapi-wetvmvwi-nrga ini pamrtuwawa, u talrli. 16Hvlvh nahfrpi weginrqi gelvwv mvtv gawvgi ki notkufi-pww na-nuhsawa? Hv mvtv ki nanr-nrwv yasi goqa-nahi-grci ini udonigi ha-yrgi ini upahqv-drgi si pamfaiv, macimi ini si luhfaskv wv uci luhfasgrgi? 18Wakv nili wiahi ini udoni wa-moyrgi ini uta-higi uci biaci luhfaiv; macimi nileni u myrsha-kunv inv ilani. 19Xvga ini utahigi uci biaci luhfaiv mvci-mamagini-tahawanv, nfa-dewanv, wrpvsiphigawanv, wabalade-wanv, gimodowanv, nrnhrci-jegi-nga-mowanv, lsgimadewanv : 20yoloni nili wiahi mr-myrsha-kuci inv ilani; wakv wvhsi wihfanici bur gifila-jrta, mvtv u myrshaku inv ilani, iwv.
21Chena ’n’uci luhfa Jesise, ini mrlrqvhi Dryr chena Srtv-ne si srwa. 22Macimi wrpv-mahku, Ganvnewi-iqawv biaci luhfa nala sqriv uci, chena, Bonvmv-wilu gitaminrqa-ladewa, 0Dabalami-watv, gelv u qihfvli Dapide; ni drnahfv ut vhqi-patfvg-hagoli wvninahfeli, lvhotv-mwv. 23Pvyaqv mvtv nakuti kvlvwewa u ta hr-pvfvtv-wrli. Chena u kvgahgimrfhi biahi macimi u kucima-kuhi, Hr-maskvwi inv iqawv; xvga git vhkuma-kunv, u takuhi. 24Pvyaqv rpvfsa, Mvtv ni tah wrwena-gopi wakv nihki wrnewi magefvki ini Iswelv uci kvmigi, isiwa. 25Pvyaqv biali nili iqali macimi u svsilvwa-hagoli, Dabalamiwatv, nrtvmv-wilu, u tagoli. 26Chena rpvfsa, Mvtv ini uwasfanwi wvhsi mvmaiv ini u tvkuwhrna-mwa vpa-luhfvki macimi nihki wihseki ni ipvgitvmv-wrki ini, isiwa. 27Pvyaqv iwv inv iqawv, Hvnkv, Dabalamiwatv : xvga weginrqi nihki wihseki u meci-nrwv nili ba-gitahdo-daki waci panfaki ini tvh wihfa-nilici u mastalam-wvhi. 28Hina uwa Jesise rpvfsa, macimi, 0iqawv, msrwi cahi gi dapwahsawa : heni ipanvlo-fulu datapi-lvhi yasi taha-ivni, u talrli. Macimi nili u drnahfvli inv gegaho-foli ini yrtafvgi.
29Chena Jesise ’n’uci wapfa, macimi mrlrqvhi ini Galalewi msi-napi si biawv; chena ini maqvhgigi si kuqic-sinwv, macimi ’n’tvsi lamvtvpi. 30Chena ’n’tvsi utfr-wrli maci mahsa-lagiki, u pami gilagi-nrwvhi nihi ma-myrlvgigr-dalici, gagabe-qalici, br-bur kvlv-wilici, ma-myrlvkvtu-wilici, chena maci kutv-khi, chena nihki u tah pvgfanv-wvhi nihi mrlrqvhi u fitvli inv; macimi inv u gegahvhi nihi : 31waciganvhi nihki mahsa-lagiki qv-qahdrni-tahaki, iah nawr-wrci nihi br-bur kvlv-wilici pami kvlv-wihi, nihi ma-myrlvkvtu-wilici mafafihi, chena nihi ma-myrlvgigr-dalici pamfahi, chena nihi gagabe-qalici tapinv-muhi : macimi nihki u wvhfrci-makuwhr-wrli nili u Mvnado-mvli Iswelv.
32Chena Jesise u tah wihku-mvhi u kvgahgimrfhi, macimi, Cah’ ni gitaminrqa-lamrki nihki mahsa-lagiki, xvga uwa nfuku uci ni mosvtvwi weci vbe-magoki macimi mvtv wiahi u bonr-nrwv wvh meci-wrci : chena mvtv vlikv nesv laskv-wrki pami sqrlvwa-wrta, belabaga nihki ini lrqv wi hvla magihku-feki, iwv. 33Che-na Drniwa ki huci bonrpa yone si maci wapsqada-wvli tvh pvpsqvhgigi, wvhsi dabho-lvqa yone si maci mahsa-lagiki? u talr-wrli. 34Macimi, Gahfwi ki bonr-nrwv wapsqada-wvli gelvwv? u talvhi Jesise. Neswvhfwi, chena Irkufwe-mahi cvgi nvmahfe-fvki, u talr-wrli. 35Chena u tapimvhi nihi mahsa-lalici wvhsi lamvtvpi-lici ini svhgigi; 36chena u tah mvmanv nili neswvhfwi wapsqada-wvli macimi nihi nvmafhi; chena me-liwa niyrwa macimi u pusku-nrnv, chena u tah me-lvhi nihi kvgahgimrfhi, macimi nihki kvgahgimrfvki nihi mahsa-lalici. 37Chena jrivhki wihfa-neki, macim dabho-loki : chena u mrwvtunr-nrwv nihki sasqvdo-daki nili ba-xgahgrki, neswvhfwi sosoni-wvli uqihfanu. 38Chena nihki wa-wihfa-nicki nyawana-matvhfana-tabawa ilaneki, tabrna iqaki chena vpa-luhfvki. 39Chena ud rmaskv-wvhi nihi mahsa-lalici, macimi ini ulvga-lagi Ikvmwv, chena ini sqriv Magatane si biawv.
Valgt i Øjeblikket:
HINI UWASI-BIADRCIMOWA ya-sfadoci MAFIYO 15: SJW
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Published for Thomas Wildcat Alford in 1929
