ଲୁକ 21
21
ଗଟେକ୍ ଗ୍ରିବ୍ ରାଣ୍ତି ମାଇଜି ଦାନ୍ଦିଲା କ୍ତା
(ମାର୍କ ୧୨:୪୧-୪୪)
1ତାର୍ ହ୍ଚେ ଯୀଶୁ ମନ୍ଦିରେ ଦାନ୍ ହ୍କାଉତା ହେଳି ଲ୍ଗେ ବ୍ସିକ୍ରି ଦନୀ ଲକ୍ମ୍ନ୍ ସେତି ତାକାର୍ ଦାନ୍ ହ୍କାଉତି ରିଲାର୍ ସେ ବ୍ଲ୍କ୍ରି ଦ୍କ୍ତିରିଲା। 2ଆର୍ ସେ ଗଟେକ୍ ଗ୍ରିବ୍ ରାଣ୍ଡି ମାଇଜି ହେଁ ସେତି ଜଳେକ୍ ସାନ୍ ତାମ୍ବା ଅଦ୍ଲି ଦାନ୍ ହ୍କାଉତାର୍ ଦ୍କି କଇଲା, 3“ମୁଇ ତୁମୁକ୍ମ୍ନ୍ ସ୍ତ୍ କ୍ମ୍ଲେ, ଇ ଗ୍ରିବ୍ ରାଣ୍ତି ମାଇଜି ସ୍ବୁଲକାର୍ ତ୍ଇହ୍ଣି ଅଦିକ୍ ଦାନ୍ ଦିଲି ଆଚେ, 4କାଇତାକ୍ ବିନ୍ସ୍ବୁ ଦନୀ ଲକ୍ମ୍ନ୍ ନିଜାର୍ ନିଜାର୍ ଉବ୍ରା ଡାବୁ ଲ୍ଗେ ହ୍ଣି କମ୍ କମ୍ ହ୍କାଇଲାଇ, ମ୍ତର୍ ଗ୍ରିବ୍ ରାଣ୍ଡି ମାଇଜି ନିଜାର୍ ଅବାବ୍ ବ୍ଳ୍ ନିଜାର୍ ଜୀବନ୍ ବାଚାମ୍କେ ତାର୍ ଲ୍ଗେ ଜାଇରି ରିଲି, ସେରି ସ୍ବୁ ହ୍କାଇଲି।”
ଯୀଶୁ ଯିରୁଶାଲମ୍ ମନ୍ଦିର୍ ନ୍ଷ୍ଟ ଅଉତା ବିଷୟେ ଆଗେ ଜଣାଇଲା
(ମାଥି. ୨୪:୧,୨; ମାର୍କ ୧୩:୧,୨)
5ଆର୍ ସେମ୍ନ୍କାର୍ ବିତ୍ରେ କ୍ତେକ୍ ଚେଲାମ୍ନ୍ ମନ୍ଦିରାର୍ ସୁନ୍ଦୁର୍ ସୁନ୍ଦୁର୍ ଟେଳାମ୍ନ୍ ଆର୍ ଇଶ୍ଵର୍କେ ଦାନ୍ଦିଲା ଜିନିଷ୍ ସେମ୍ନ୍ ସ୍ଜାଇ ଆଚେ ଆର୍ ଦାନ୍ ଦେତା ଟେଡା ହେଁ ସ୍ଜାଇ ଆଚେ ବ୍ଲି କଇଲାକ୍, 6ଯୀଶୁ ସେମ୍ନ୍କେ କଇଲା, “ତୁମିମ୍ନ୍ ଜୁଇସ୍ବୁ ସୁନ୍ଦୁର୍ ଟେଳାମ୍ନ୍ ଦ୍କୁଲାସ୍, ସ୍ମୟ୍ ଆସେଦ୍ ଜ୍ଡେବ୍ଳ୍ ଗଟେକ୍ ଟେଡା ଆର୍ଗଟେ ଟେଳାର୍ ଉହ୍ରେ ରେମ୍ ନାହାରେ, ସ୍ବୁ ମାଟି ସ୍ଙ୍ଗ୍ ମିସେଦ୍।”
ଯୁଗ୍ ଶେସ୍ ଅଉତା ଦିନାର୍ ଚିନ୍
(ମାଥି. ୨୪:୩-୧୪; ମାର୍କ ୧୩:୩-୧୩)
7ଚେଲାମ୍ନ୍ ଯୀଶୁକେ ହ୍ଚାର୍ଲାଇ, “ଏଗୁରୁ, ତ୍ବେ କ୍ବେ ଇ ସୁବ୍ ଗଟ୍ଣା ଗଟେଦ୍? ଇ ସ୍ବୁ କ୍ବେ ଗଟେଦ୍, ଆରେକ୍ ଇରିସ୍ବୁ ଗଟ୍ଣା କ୍ବେ ଗଟେଦ୍ ବ୍ଲି ଅମି କାଇରି ଦ୍କିକ୍ରି ଜାଣୁନ୍ଦ୍?” 8ତ୍ବେ ଯୀଶୁ କଇଲା, “ଜାଗ୍ରତ୍ ଅଇରିଆ କାଇତାକ୍ ତୁମିମ୍ନ୍ ଜ୍ନ୍କ୍ରି ଟକି ନ୍ଉଆସ୍, ବେସିଲକ୍ ମର୍ ନାଉଁଏ ଆସି, ‘ମୁଇ ଖ୍ରୀଷ୍ଟ ବ୍ଲି କ୍ଉତି ଆର୍ ଯୁଗ୍ ଶେସ୍ଦିନ୍ ଲ୍ଗେ ଆଇଲି ବ୍ଲି କ୍ଉତି। ସେମ୍ନ୍କାର୍ କ୍ତା ଶୁଣାନାଇ କି ସେମ୍ନ୍କାର୍ ହ୍ଚେ ହ୍ଚେ ଯାହା ନାଇ।’ 9ମ୍ତର୍ ତୁମିମ୍ନ୍ ଜ୍ଡେବ୍ଳ୍ ଆର୍ ଡଙ୍ଗାର୍ ବିଷୟେ ଶୁଣାସ୍ ସ୍ଡେବ୍ଳ୍ ତୁମିମ୍ନ୍ ଡିରାନାଇ, ଇରିସ୍ବୁ ଜ୍ନ୍କ୍ଲେକ୍ ହେଁ ଗଟେଦ୍, ମ୍ତର୍ ସେ ଦାହ୍ରେ ଯୁଗ୍ ଶେସ୍ ନଅଇ।”
10ତାର୍ ହ୍ଚେ ଯୀଶୁ ସେମ୍ନ୍କେ କଇଲା, “ଜାତିର୍ ବିରୁଦେ ଜାତି ଆର୍ ରାଇଜାର୍ ବିରୁଦେ ରାଇଜ୍ ଉଟେଦ୍, 11ଆର୍ ବୂମିକ୍ମ୍ପ ଅଇଦ୍, ଆର୍ ଜାଗାଇ ଜାଗାଇ ମ୍ର୍ଡି ଅଇଦ୍ ଆର୍ କାମ୍କେ କ୍ତାର୍ ଅଇଦ୍, ଆର୍, ଇଶ୍ୱର୍ ଆକାଶେ ବ୍ୟଂକାର୍ ଚିନାମ୍ନ୍ ଡିସେଦ୍। ଏ ଚିନ୍ ଲକ୍ମ୍ନ୍ ଦ୍ରିକ୍ରି ବେସି ଡିର୍ତି।
12ମ୍ତର୍ ଇ ସ୍ବୁ ଗଟ୍ଣା ଗଟ୍ତା ଆଗେ, ଲକ୍ମ୍ନ୍ ତୁମୁକେ ଦ୍ରି ପାର୍ତେନା ଗ୍ରେ ଆର୍ ଜେଇଲ୍ ଗ୍ରେ ସ୍ହ୍ରି ଦେଇ ଲିନ୍ଦା ତାଳ୍ନା କ୍ର୍ତି, ଆର୍ ମର୍ ଚେଲା ଅଇଲାର୍ ଗିନେ ତୁମୁକ୍ ଲକ୍ମ୍ନ୍ ର୍ଜା ଆର୍ ଶାସନ୍କ୍ର୍ତା ଲକ୍ମ୍ନ୍କାର୍ ଲ୍ଗେ ନେତି। 13ସେଡେବ୍ଳ୍ ତୁମୁକ୍ ମାପ୍ରୁର୍ ସୁବ୍କ୍ବର୍ ପର୍ଚାର୍ କ୍ରୁକେ ତୁମୁକ୍ ଗଟେକ୍ ସୁଜଗ୍ ମିଳେଦ୍।
14ସେଡେବ୍ଳ୍ ତୁମିମ୍ନ୍ ନିଜ୍କେ ଉଦାର୍ କ୍ରୁକେ କାଇରି କଇନ୍ଦ୍ ଆର୍ କାଇରି ନ୍କ୍ଇ, ଇ ସ୍ବୁ ବିଷଇ ଚିନ୍ତା କ୍ରାନାଇ। 15କାଇତାକ୍ ସେଡେବ୍ଳ୍ ମୁଇ ତୁମୁକ୍ ଅନ୍କ୍ରି କ୍ମ୍କେ କ୍ତା ଆର୍ ବୁଦି ଦେଇନ୍ଦ୍ ଯେ, ତୁମାର୍ ଶ୍ତ୍ରୁମ୍ନ୍ ସେ ସ୍ବୁକ୍ତା ଶୁଣିକ୍ରି ତୁମୁକ୍ କାଇରି ହ୍ଚାରୁ ନ୍ହାର୍ତି।
16ମ୍ତର୍ ତୁମାର୍ ଉବାଦି, ଆଇଦି, ବାଇଦି, ବେଣ୍ଦି ଆର୍ ତୁମାର୍ ନିଜାର୍ ସ୍ଙ୍ଗ୍ମ୍ନ୍ ତୁମୁକେ ଶ୍ତ୍ରୁର୍ ଆତେ ସ୍ହ୍ରିଦେତି, ଆର୍ ସେମ୍ନ୍ ତୁମୁକ୍ମ୍ନ୍ ସ୍ବୁ ଜାତିର୍ ଗିନେ ଗିଣ୍ କ୍ର୍ତି, 17ଆର୍, ମକେ ବିଶ୍ବାସ୍ କ୍ଲାର୍ ଗିନେ ସ୍ବୁ ଲକ୍ମ୍ନ୍ ତୁମୁକ୍ ଲିନ୍ଦା ତାଳ୍ନା କ୍ର୍ତି। 18ମ୍ତର୍ ତୁମାର୍ ମୁଣ୍ତାର୍ ଗଟେକ୍ ହେଁ ବାଳ୍ ନ୍ଷ୍ଟ ନଅଇ। 19ତୁମିମ୍ନ୍ ବିଶ୍ବାସ୍ ତ୍ଇ ତିର୍ଅଇ ରିଲେକ୍ ତୁମି ନ୍ସେର୍ତା ଜୀବନ୍ ହାଉଆସ୍।”
ଯୀଶୁ ଯିରୁଶାଲମ୍ ସ୍ହର୍ ନ୍ଷ୍ଟ ଅଉତା ବିଷୟେ ଆଗ୍ତୁ ଜଣାଇଲା
(ମାଥି. ୨୪:୧୫-୨୧; ମାର୍କ ୧୩:୧୪-୧୯)
20“ଜ୍ଡେବ୍ଳ୍ ଶଇନ୍ମ୍ନ୍ ଆସି ଯିରୁଶାଲମାର୍ ଚାରିହାକ୍ ରୁଣ୍ତ୍ତାର୍ ତୁମିମ୍ନ୍ ଦ୍କାସ୍, ସେଡେବ୍ଳ୍ ତୁମି ଯିରୁଶାଲମ୍ ସ୍ହରାର୍ ନ୍ଷ୍ଟ ଅଉତାଦିନ୍ ଲ୍ଗେ ଆଇଲି ବ୍ଲି ଜାଣା। 21ସ୍ଡେବ୍ଳ୍ ଜୁଇଲକ୍ ଯିହୁଦା ଜିଲାଇ ଆଚାସ୍, ସେମ୍ନ୍ ଡଙ୍ଗୁର୍ ଚିରାକେ ହ୍ଳାଇ ଜାହା, ଆର୍ ଜୁଇ ଲକ୍ମ୍ନ୍ ସ୍ହରେ ଆଚାସ୍ ସେମ୍ନ୍ ସ୍ହର୍ ବାହାର୍କେ ହ୍ଳାଇ ଜାହା, ଆର୍ ଜୁଇ ଲକ୍ମ୍ନ୍ ଗାମେ ଆଚାସ୍ ସେମ୍ନ୍ ସ୍ହର୍କେ ଜାହାନାଇ। 22କାଇତାକ୍ ଦ୍ର୍ମ୍ ଶାସ୍ତର୍ ତ୍ଇ ଲେକା ଅଇରିଲା ସ୍ବୁ ବିଷଇ ସେଦିନ୍ ହୁରା ଅଇ ଦୁକାର୍ ସ୍ମୟ୍ ଅଇଦ୍।
23ସ୍ଡେବ୍ଳ୍ ଗ୍ଗାଳେ ରିଲା ମାଇଜି ଆର୍ ହିଲା ହାର୍ନି ମାଇଜି ମ୍ନ୍କାର୍ ଗିନେ ଇରି ବେସି କ୍ଷ୍ଟର୍ ସ୍ମୟ୍, ସେମ୍ନ୍ ହ୍ଳାଇ ତାକାର୍ ଜୀବନ୍ ବାଚାଉତାର୍ ଗିନେ ବେସି କ୍ଷ୍ଟ, କାଇତାକ୍ ଇଦେଶେ ବିପଦ୍ ଆର୍ ଅବାର୍ ଲକ୍ମ୍ନ୍ ବେସି ଡ୍ଣ୍ଡ୍ ହାଉତି, 24କ୍ତେକ୍ ଲକ୍ମ୍ନ୍କେ କ୍ଣ୍ତାଇ ମ୍ର୍ନେ ମାର୍ତି, ଆର୍ କ୍ତେକ୍ ଲକ୍ମ୍ନ୍କେ ଜ୍ଇଲେ ନେତି ଆର୍ ବନ୍ଦିକ୍ରି ଯିହୁଦି ଚାଡି ବିନ୍ଜାତି ଲକ୍ମ୍ନ୍କାର୍ ଲ୍ଗେ ନେତି, ଆର୍ ଶାସନ୍କ୍ର୍ତା ସ୍ମୟ୍ ନ୍ସେର୍ତା ହ୍ତେକ୍ ଯିରୁଶାଲମ୍ ସ୍ହରାର୍ ଲକ୍ମ୍ନ୍ ଡ୍ଣ୍ତ୍ ବଗ୍ତି।”
ମାନାଇ ହିଲା ଆରେକ୍ ଆସେଦ୍
(ମାଥି. ୨୪:୨୯-୩୧; ମାର୍କ ୧୩:୨୪-୨୭)
25“ସେଡେବ୍ଳ୍, ବେଳ୍, ଜନ୍ ଆର୍ ତାରା ମ୍ନ୍କାର୍ ତ୍ଇ ବିନ୍ବିନ୍ ଚିନ୍ ଡିସେଦ୍, ଆର୍ ହୁର୍ତିବିର୍ ସ୍ବୁ ଜାତିର୍ ଲକ୍ମ୍ନ୍କାର୍ ବିତ୍ରେ ବ୍ଡେ ଦୁକ୍କ୍ଷ୍ଟ ଗଟେଦ୍। ସ୍ମ୍ଦୁର୍ ଆର୍ ତାର୍ ଉଲ୍କିର୍ ଶ୍ବ୍ଦ ଶୁଣିକ୍ରି ସେମ୍ନ୍ କାବା କାବା ଅଉତି, 26ଆର୍, ହୁର୍ତିବି ତ୍ଇ ଗଟୁକ୍ ଜାତିରିଲା ଗଟ୍ଣା ସ୍ବୁ ଦ୍କିକ୍ରି ଲକ୍ମ୍ନ୍ ଚାନିଆ ଅଇଯାତି, ଆରେକ୍, ବେଳ୍, ଜନ୍ ଆର୍ ତାରା ସ୍ର୍ଗେ ହ୍ଣି ଅଦୁର୍ତି ଆର୍ ଆକାଶାର୍ ସ୍ବୁ ସ୍ଡେବ୍ଳ୍ ଦ୍କ୍ତି। 27ସେଡେବ୍ଳ୍ ମୁଇ ମାନାଇ ହିଲାକେ ବେଳ୍ ଶ୍କ୍ତିର୍ ଆର୍ ମଇମାର୍ ସ୍ଙ୍ଗ୍ ମେଗ୍ମାଳାଇ ଆସ୍ତାର୍ ଦ୍କାସ୍। 28ଇ ସ୍ବୁ ଗଟ୍ଣା ଜ୍ଡେବ୍ଳ୍ ଗଟୁକେ ଆରମ୍ ଅୟଦ୍ ସେଡେବ୍ଳ୍ ତୁମିମ୍ନ୍ ସାହାସ୍ ଦ୍ରା ଆର୍ ତୁମି ଉଦାର୍ ହାଉତା ଦିନ୍ ଲ୍ଗେ ଆଇଲିବେ ଦ୍କା।”
ଯୀଶୁ ଡୁମ୍ବୁର୍ ଗ୍ଚାର୍ ଶିକ୍ୟା ଦିଲା
(ମାଥି. ୨୪:୩୨-୩୫; ମାର୍କ ୧୩:୨୮-୩୧)
29ଆରେକ୍ ଯୀଶୁ ସେମ୍ନ୍କେ ଇ ଦ୍କାଇକ୍ରି କ୍ଉତା କ୍ତା କଇଲା, “ଡୁମ୍ବୁର୍ ଗ୍ଚ୍ ଆର୍ ବିନ୍ସ୍ବୁ ଗ୍ଚାର୍ କ୍ତା ବାବିଦ୍କା। 30ଜ୍ଡେବ୍ଳ୍ ତୁମି ଗ୍ଚ୍ ମ୍ନ୍କେ ହିଲ୍କା ମେଲ୍ତାର୍ ଦ୍କାସ୍, ସେଡେବ୍ଳ୍ ତୁମିମ୍ନ୍ କ୍ରା ମାସ୍ ଲ୍ଗେ ଅଇ ଆସୁଲି ବ୍ଲି ନିଜେ ନିଜେ ଜାଣାସ୍। 31ସେନ୍କ୍ରି ତୁମିମ୍ନ୍ ହେଁ ଇ ସ୍ବୁ ଦ୍କ୍ଲେକ୍ ସେଡେବ୍ଳ୍ ତୁମି ଇଶ୍ଵରାର୍ ରାଇଜ୍ ଲ୍ଗେ ଆଇଲି ବ୍ଲି ଇରି ଜାଣାସ୍। 32ମୁଇ ତୁମୁକ୍ମ୍ନ୍ ସ୍ତ୍ କ୍ମ୍ଲେ, ଅବେ ଜୀବନ୍ ରେତା ସ୍ବୁ ଲକ୍ମ୍ନ୍ ସେ ଗଟ୍ଣା ମ୍ନ୍ ଗଟ୍ତା ହ୍ତେକ୍ ନ୍ମ୍ର୍ତି। 33ଆକାଶ୍ ଆର୍ ହୁର୍ତିବି ନାସ୍ ଅଇଦ୍, ମ୍ତର୍ ମର୍କ୍ତା କ୍ବେହେଁ ନାସ୍ ନଇ।”
ସ୍ବୁବ୍ଳ୍ ଜାଗ୍ରତ୍ ଅଇରେତା ଦ୍ର୍କାର୍
(ମାଥି. ୨୪:୩୬-୪୪; ମାର୍କ ୧୩:୩୨-୩୭)
34“ମ୍ତର୍ ତୁମିମ୍ନ୍ ନିଜାର୍ ନିଜାର୍ ବିଷୟେ ଜାଗ୍ରତ୍ ଅଇରିଆ, କେଜାଣ୍ ତୁମି ମଦ୍ କାଇକ୍ରି ମାତିରିଆ ନାଇ, ଆର୍ ଜିଉତାର୍ ଗିନେ ବେସି ଚିନ୍ତା କ୍ରାନାଇ, ଆର୍ ଇଶ୍ଵରାର୍ ବିଚାର୍ କ୍ର୍ତାଦିନ୍ କ୍ଡେବ୍ଳ୍ ଆସେଦ୍ ତୁମି ଜାଗ୍ରତ୍ ଅଇରିଆ। 35କାଇତାକ୍ ସେଦିନ୍ ଗଟେକ୍ ଗ୍ଣ୍ତ୍ ହର୍ ହୁର୍ତିବିର୍ ସ୍ବୁଲକାର୍ ଉହ୍ରେ ଆସେଦ୍।
36ମ୍ତର୍ ତୁମିମ୍ନ୍ ଜାଗ୍ରତ୍ ଅଇକ୍ରି ସ୍ବୁବ୍ଳ୍ ପାର୍ତେନା କ୍ରା, ତ୍ବେ ତୁମିମ୍ନ୍ ଆସ୍ତା ଦିନାର୍ ଦୁକ୍ କ୍ଷ୍ଟାର୍ ତ୍ଇହ୍ଣି ଉଦାର୍ ହାମ୍ ହାରାସ୍ ଆର୍ ମୁଇ ମାନାଇ ହିଲାର୍ ମୁଏ ହେଁ ଟିଆ ଅମ୍ହାରାସ୍।” 37ଯୀଶୁ ସ୍ବୁଦିନ୍ ମନ୍ଦିରେ ଶିକ୍ୟା ଦେତିରିଲା ଆର୍ ସ୍ବୁ ରାତିବ୍ଳ୍ ସେ ଜିତ୍ ଗ୍ଚ୍ ନାଉର୍ ଡଙ୍ଗ୍ରେ ଜାଇକ୍ରି ରେତିରିଲା। 38ସ୍ବୁଦିନ୍ ବର୍ ସ୍କାଳିଆ ଯୀଶୁର୍ ତ୍ଇହ୍ଣି ବାକ୍ୟ ଶୁଣୁକେ ବେସି ଲକ୍ମ୍ନ୍ ମନ୍ଦିରେ ଆସ୍ତି ରିଲାଇ।
Valgt i Øjeblikket:
ଲୁକ 21: BDVNT
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Bodo Parja Bible (ବ୍ଡ଼୍ ହ୍ର୍ଜା) by The Love Fellowship is licensed under Creative Commons Attribution-ShareAlike 4.0 License.
