मत्ती 3
3
बपतिस्मा देण वळु यूहन्ना
(मर 1:1-8; लूका 3:1-18; यूहन्ना 1:19-28)
1अर या ऊं दिनों की बात च, जब यूहन्ना नौ को एक मनखि जु की बपतिस्मा देन्दु छौ। उ यहूदिया मुलक का निर्जन जगा मा इन परचार करण लगि गै कि, 2“अपणा-अपणा पापों से पस्ताप कैरा, किलैकि परमेस्वर राज करण वळु च अर उ नजदीक ही च।” 3अर यू यूहन्ना उई च जैका बारा मा परमेस्वर का रैबर्या यशायाह न बोलि छौ कि,
“निर्जन जगा मा एक पुकरण वळे की आवाज औणी च,
प्रभु खुणि बाटु तयार कैरा वे खुणि बाटु सैणु कैरा।”
4अर यूहन्ना ऊंट का बाळो से बणयूं कपड़ा पैरदु छौ, अर अपणी कमर पर चमड़ा का पठुगा तैं बान्धि के रखदु छौ। अर खाण मा वेकू खाणुक टिड़ियां अर जंगळि शहद छौ। 5तब लोग निकळि-निकळि के यूहन्ना का पास यरूशलेम नगर बटि अर पूरा यहूदिया मुलक बटि, इख तक की यरदन गाड का आस-पास का पूरा मुलक बटि वेका पास ऐनी। 6अर ऊं लोगु न अपणा-अपणा पापों तैं कबूल कैरिके यरदन गाड मा यूहन्ना बटि बपतिस्मा ले।
7अर जब यूहन्ना न भौत सरा फरीसी दल का लोगु तैं अर सदूकियों तैं बपतिस्मा लेण कू अपणा पास औन्द देखि, त वेन ऊंकू बोलि, “हे गुरौ का बच्चों#3:7 इख मा “हे गुरौ का बच्चों” को मतलब ऊं लोगु से च जौं का मनों मा गुरौ का जन बिस भोरयूं च।, तुमतै कैन चितै की परमेस्वर का औण वळा परकोप से दूर भागा? 8इलै इन्द्रया काम कैरा, ज्यां से इन पता चलु कि तुमुन मन से पस्तावा कैरियाली। 9अर अपणा-अपणा मनों मा इन नि समझा कि, ‘हम अब्राहम का वंश मदि छां, इलै हमतै परमेस्वर दण्ड नि द्यालु।’ पर सुणा, मि तुमतै बतै देन्दु कि परमेस्वर यों ढुंगो मा बटि भि अब्राहम खुणि औलाद पैदा कैरी सकदु च। 10अर अब कुल्हाडु डाळों की जड़ पर रख्युं च, इलै जै डाळा पर अच्छा फल नि लगदिन, वेतैं काटी के आग मा ढुळै जान्दु।
11“अर मि त तुमतै पापों से माफी पौणु खुणि पाणिळ बपतिस्मा देणु छौं। पर उ मनखि औण वळु च, जु मिसे भि जादा ताकतबर च, अर मि ये लैख भि नि छौं कि वेको नौकर बणि के वेका जुता उठे सैकु अर उ तुमतै पवित्र आत्मा अर आग#3:11 इख मा “आग बटि बपतिस्मा” को मतलब यू च कि उ तुमतै पवित्र आत्मा देके तुमरा दिल तैं शुद्ध करलु। बटि बपतिस्मा द्यालु। 12अर वेको सुप्पु वेका हाथों मा च, अर उ अपणा खल्याण तैं ढंगल साफ करलु, ग्यूँ तैं अपणा कुठार मा इकट्ठा करलु, #मलाकी 4:1पर बूखा तैं वीं आग मा ढोळि द्यालु ज्वा कभि बुझि नि सकदी।”
यीशु को बपतिस्मा
(मर 1:9-11; लूका 3:21,22)
13अर ऊं दिनों मा यीशु गलील मुलक बटि ह्वेके यरदन गाड का छाला पर यूहन्ना का पास बपतिस्मा लेणु कू ऐ। 14पर यूहन्ना इन बोलि के वेतैं रुकण लगि गै कि, “मितैं तुम बटि बपतिस्मा लेण की जरुरत च, अर तुम मेरा पास अयां छाँ?” 15तब यीशु न वेतैं जबाब दिनी, “अबरि जन होणु च तू वेतैं होण दे, किलैकि हम खुणि यू जरुरी च, कि जन परमेस्वर की मनसा च हम वींतैं उन्नि पूरु कैरा।” तब यूहन्ना न वेकी बात माणी दिनी। 16अर यीशु न बपतिस्मा ले अर जन्नि उ पाणि बटि भैर निकळि ठिक उन्नि स्वर्ग खुलि गै, अर वेन परमेस्वर का आत्मा तैं कबूतर का रुप मा उतरद देखि अर अपणा मथि औन्द देखि। 17अर सुणा, स्वर्ग बटि इन आवाज ऐ कि, #यशा 11:2“यू मेरु लाडलु पुत्र च, अर मि येसे भौत खुश छौं।”
Valgt i Øjeblikket:
मत्ती 3: GBM
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© (Active) Wycliffe Bible Translators, Inc. All rights reserved.
