Байбихьи 4
4
Гьабилги Къабилги
1Адам жиндирго лъади ХӀавада аскӀов вегана. Гьелъул ургьибе лъимер ккана ва Къабил#4:1 Къабил (קַיִן) – жугьутӀ мацӀалда гьеб цӀар релълъуна «щвараб» яги «босараб» абурал рагӀабазда. абурав вас гьавуна.
Гьелъ абуна:
«БЕТӀЕРГЬАНАСУЛ кумекалдалъун дие инсан щвана», – ян.
2Хадув гьелъие гьавуна Къабилил вац Гьабил.
Гьабил гӀиявехьлъун лъугьана, Къабилин абуни, векьарухъанлъун вахъана. 3Цо заманалдасан Къабилица БЕТӀЕРГЬАНАСЕ хурул бачӀиналда тӀаса хирияб садакъа кьуна. 4Гьабилицаги, жиндирго рехъалъа тӀоцере гьарурал хухалги хъун, тӀаса рищарал кьари-кьариял гьанал кескал БЕТӀЕРГЬАНАСЕ къурбан гьаруна. Гьабилидаги гьесул къурбан-садакъаялдаги разилъана БЕТӀЕРГЬАН. 5Къабилихъги гьесул хирияб садакъаялъухъгиян абуни, Гьев валагьизецин валагьичӀо. Гьебмехалъ ццидаца кьерхинабуна Къабилил гьумер.
6БЕТӀЕРГЬАНАС Къабилида абуна:
«Щай дур ццин бахъараб? Щай дур гьумер кьерхараб? 7Дуца битӀараб гьабулеб бугони, гьумер битӀун валагьиларищ мун? Амма дуца битӀараб гьабулеб гьечӀони, мунагь буго дур нуцӀихъ бахчун чӀун. Дуда тӀад кверщел гьабизе бокьун буго мунагьалъе, амма мунагьалда тӀад ханлъи гьабизе ккола дуца».
8Къабилица жиндирго вац Гьабилида абуна:
«Рилълъа цо магъилъе тира-сверизе#4:8 Къабилица Гьабилида абурал гьал рагӀаби жугьутӀ мацӀалъул тексталда хутӀун гьечӀо, гьел руго некӀсиял тӀахьазда.», – ян.
Гьенире щваралго, Къабилица, тохлъукье тӀадги речӀчӀун, жиндирго вац Гьабил чӀвана.
9«Дур вац Гьабил кив вугев?» – ин гьикъана БЕТӀЕРГЬАНАС Къабилида.
«Дида лъаларо, – ян жаваб кьуна гьес. – Дун гьесда тӀад тарав хъаравулищ?»
10«Дуца гьабураб жо щиб? – ин абуна БЕТӀЕРГЬАНАС. – Дур вацасул гӀодобе тӀураб би буго ракьулъан Диде ахӀи балеб. 11Гьанже абадиялъул нагӀана буго дуе: дур вацасул дуца гӀодобе тӀураб би гьекъараб ракьалъ мунги нахъ чӀвана гьанже. 12КигӀан цӀикӀкӀун мун хӀалтӀаниги, тӀокӀалъ хьихьиларо гьелъ мун. Гьанжеялдаса хадув мун апараглъуда ракьалда тирулев хутӀила».
13«Дида баччизе кӀолареб тамихӀ-жаза буго гьеб, – ин абуна Къабилица БЕТӀЕРГЬАНАСДА. 14– Гьале Дуца ракьалдаса нахъе къотӀулев вуго дун, Дур берда цевеса нахъе гьавулев вуго. Апараглъуда, бакӀ-бакӀалде гочун, ракьалда тирулев хутӀарав дун цеве ккарав чияс чӀван рехиларищ?»
15«Лъицаниги Къабил чӀвани, гьесдаса анкьцӀулго къисас босизе буго», – ян абуна БЕТӀЕРГЬАНАС.
Цинги БЕТӀЕРГЬАНАС Къабилида хасаб гӀуж лъуна, гьев кив ватаниги, лъицаго чӀвачӀого вукӀине. 16Цинги Къабил БЕТӀЕРГЬАНАСДА аскӀоса нахъе ана ва Эдемалъул бакъбаккул рахъалда бугеб Нод улкаялда чӀана.
17Къабил жиндирго чӀужуялда аскӀов вегана, гьелъул ургьибе лъимер лъугьана ва гьесие вас гьавуна, Енох абун цӀарги лъуна. Къабилица гьеб заманалда шагьар балеб букӀана – гьеб шагьаралдаги лъуна гьес жиндирго васасул цӀар Енох.
18Енохие гьавуна вас ГӀирад, ГӀирадие гьавуна МехӀуяэл, МехӀуяэлие гьавуна Метушаэл, Метушаэлие гьавуна Ламех. 19Ламехица ячана кӀиго лъади: цоялда цӀар букӀана ГӀада, цогидалда – Цилла. 20ГӀадаца гьавуна вас Явал. Гьесдасан лъугьана чадразухъ яшав гьабулел ва гӀи-боцӀи хьихьулел гӀадамал. 21Гьесул вац Ювалидасан лъугьана лираялда ва щвантӀихалда бакънал рачине лъалел чагӀи. 22Циллаца гьавуна вас Тувал-Къабил – мазгарул ва маххул тӀагӀелал гьарулев устар. Тувал-Къабилил йикӀана НагӀамайин абулей яц.
23Ламехица жиндирго лъудбузда абуна:
«Дихъ гӀенеккея нуж, ГӀада ва Цилла!
Дица бицунелъухъ гӀинтӀаме, Ламехил лъудби!
Дица бихьинчи чӀвана гьес дун лъукъаралъухъ,
ГьитӀинав гӀолохъанчиги чӀвана гьес дида кьабуралъухъ!
24Къабил чӀварасдаса къисас анкьго нухалъ цӀикӀкӀун босула,
амма Ламех чӀварасдаса къисас лъабкъоялда анцӀила анкьго нухалъ цӀикӀкӀун босила!»
25Адам нахъеги чӀужуялда аскӀов вегана. Гьелъ вас гьавуна ва гьесда цӀар Шет лъуна. Гьелъ абуна: «Къабилица чӀварав Гьабилил бакӀалда Аллагьас дие цоги лъимер кьуна#4:25 Шет – гьаб цӀар релълъуна «лъуна (кьуна)» абураб рагӀуда.», – ян. 26Шетиеги вас гьавуна ва гьесда цӀар Эношилан#4:26 Энош (אֱנוֹשׁ) – «адам» абураб рагӀулго гӀадин, «инсан» абураб магӀна буго гьаб рагӀул. лъуна.
Гьелдаса нахъе гӀадамаз байбихьана БЕТӀЕРГЬАНАСЕ тӀагӀат-гӀибадат гьабизе.
Valgt i Øjeblikket:
Байбихьи 4: АварАК
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© Институт перевода Библии, 2005-2023