LUCAS 16
16
U quet t'aanil jun túul kaakas j canan ayikalil
1Tu ya'alaj xan Jesús ti' u aj canbalo'ob: Yanji jun túul dzuule' tu dzáaj jun túul máac canantic u ayikalil, ba'ale' tzicbalta'ab ti'e' táan u xu'uxupa'al u ayikalil tumen le máaco'. 2Lela' j t'aan tumen u dzuulile' ca j a'ala'ab ti': ¿Ba'ax le cu ya'ala'al teen ta wo'olala'? Kub teen le meyaj a beetmajo', tumen bin u ca'aj xu'ulul a canantic in ayikalil. 3Le j canan ayikalil túuno' jo'op' u tucultic: Bey táan u luksa'al ti' teen le meyaj tumen in dzuulila'. ¿Ba'ax quin in beet bejela'e'? Mina'an in muuk u ti'al in meyajtic lu'um. Sublaquen xan in káat máatan. 4In wojel ba'ax quin in beet u ti'al ca yanac máaxo'ob kamiquen tu yotocho'ob quéen p'áatac mina'an teen meyaj. 5Ca jo'op' u t'anláantic jujun túulil tuláacal le máaxo'ob yaan u p'aaxo'ob ti' u dzuulilo'. Ti' yáax jun túule' tu káat chi'itaj ti': ¿Buca'aj a p'aax ti' in dzuulil? 6Leti'e' tu núucaj: Cien barrilo'ob aceite. Ca j a'ala'ab ti' tumen le j canan ayikalilo': Ch'a'a u ju'unil a p'aax. Culen tu séeblaquil ca a beet u jeel tu yo'olal chéen cincuenta. 7Cu dzo'ocole' tu káat chi'itaj ti' u láak jun túul: Cux túun teech, ¿buca'aj a p'axmaj ti'? Ca tu núucaj: Cien u p'iisil trigo. Ca túun tu ya'alaj ti': Ch'a'a u ju'unil a p'aax. Beet u jeel tu yo'olal chéen ochenta. 8Le dzuulo' tu kaj óoltaje' le kaakas j canan ayikalilo' tu beetaj le ba'alo'oba' yéetel na'at, tumen u máaquilo'ob yóokolcaabe' cu beetic u ba'aluba'ob tu baatzilo'obe' yéetel asab na'at ti' le máaxo'ob yano'ob ichil sáasilo'.
9Tene' quin kuben t'antic ti' te'exe' ca meyajnac te'ex le lu'umcabil ayikalil u ti'al a caxtique'ex amigo'ob, tu yo'olal le quéen mina'anchajac le ayikalilo' ca yanac máax kamique'ex ti' le cajtalilo'ob mina'an u xuulo'.
10Le máax chuca'an u yóol u meyajt jun p'íit ba'ale' chuca'an u yóol xan u meyajt ya'ab ba'alo'ob; le máax ma' tu chúucpajal u yóol u meyajt jun p'íit ba'ale', mix ti' u ya'abil cu chúucpajal u yóol. 11Bey túuno', wa ma' tu chúucpajal a wóole'ex a meyajtique'ex le lu'umcabil ayikalilo', ¿máax cun u dzáa a canante'ex le jaajil ayikalilo'? 12Wa xan ma' chuca'an a wóole'ex a meyajte'ex ba'al ma' a ti'ale'exe', ¿máax cun dzáic te'ex le ba'al a ti'ale'exo'?
13Mix jun túul palitzil cu páajtal u meyajtic ca'a túul dzuul; tumen wa cu p'ectic jun túule' cu yaabiltic u láak, wa cu biscubáa yéetel jun túule' cu cúulpachcuntic u láak. Ma' tu páajtal a meyajtique'ex Jajal Dios yéetel a meyajtique'ex taakin.
14Le fariseobo', tumen jach utz tu yicho'ob taakine', le ca tu yu'ubajo'ob tuláacal le ba'alo'oba', jo'op' u p'a'astico'ob Jesús. 15Ca j a'ala'ab ti'ob tumen Jesús: Te'exe' jach utz a we'esicaba'ex tu táan wíinico'ob, ba'ale' Jajal Diose' u kaj óol a pucsi'ikale'ex; tumen le ba'ax jach ya'ab u tojol u ti'al máaco'obe' mixba'al u tojol u ti'al Jajal Dios.
Le a'almaj t'aano' yéetel u ajawil Jajal Dios
16U ya'almaj t'aan Moisés yéetel u ca'ansaj le aj bóobato'obo' yanchaj tac tu kiinilo'ob Juan. Ti' le kiino'obo' jo'op' u tzicbalta'al u ma'alob péectzilil u ajawil Jajal Dios, tuláacal máaco'obe' cu mukulmuko'ob u ti'al u yooclo'obi'.
17Asab úuchac u xu'ulul ca'an yéetel lu'ume' ma' ca p'áatac ma' u dzo'ocbesa'al tuláacal le ba'alo'ob dzíiba'an ti' le a'almaj t'aano'.
Jesús cu ca'ansaj tu yo'olal le p'atbáilo'
(Mt 19.1-12; Mc 10.1-12)
18Le máax cu xúump'attic u yatan u ti'al u dzo'ocol u beel yéetel yaanal co'olele', cu nup kebanchajal; le máax cu dzo'ocol u beel yéetel le co'olel xúump'atta'ano', cu nup kebanchajal xan.
Le ayikal máaco' yéetel Lázaro
19Yaan ca'ach jun túul máac jach ayikale' cu búuquintic nooko'ob jach co'ojtac yéetel jach jadzutztac, sáamsamal xan cu dzáic noj janalo'ob. 20Yaan xan ca'ach jun túul máac jach óotzile' Lázaro u kaaba', pokchaja'an tuláacal u wíinclil yéetel yajil, cu cutal lu'um tu jool u yotoch le ayikalo'. 21Le óotzil máaco' u káat ca'ach u jaant u xe'exet'al le waaj cu lúubul yáanal u mayacche' le ayikalo'; tac le peeko'ob cu náadzalo'ob u léedzo'ob u yajilo'. 22Jun p'éel kiine' j quíim le óotzil máaco' ca j bisa'ab tumen ángelo'ob tu yicnal Abraham. J quíim xan le ayikalo' ca j mu'uqui'. 23Ca'aliquil táan u mukyaj le ayikal te j metnalo' tu líikesaj u yiche' ca tu yilaj Abraham yaan te náachilo' yéetel Lázaro tu yicnal. 24Ca tu ka'am a'alaj: Taata Abraham, ch'a'a teen óotzilil. Túuxt Lázaro u ch'ul u ni' u yaal u kab ti' ja'e', ca taalac u síiscunt in waak, tumen táan in sen mukyaj ichil le káaka'. 25Ba'ale' Abraham tu ya'alaj ti': In paal, ka'ajac teche' j bin teech utzil tuláacal u kiinil a cuxtal, Lázaroe' kaas binic ti'; leti' túune' táan u kamic utz waye', teche' táan a mukyaj. 26Tu yóokol tuláacal lela', yaan jun p'éel taamcach jóomcab lu'um jatzcuntico'on ti' te'ex; le beetique' mix jun túul ti' le yano'ob waya' cu páajtal u bino'ob te' tu'ux yane'exo' mix le yano'ob te'elo' cu páajtal u taalo'ob waye'. 27Ca túun tu ya'alaj le ayikalo': Taata Abraham, quin káat óoltic teech túune' ca a túuxt Lázaro tu yotoch in taata, 28tu'ux yaan cinco in wíidzino'ob, u ti'al t'aan yéetelo'ob tu yo'olal ma' u taalo'ob leti'ob xan way tu cúuchil le mukyaja'. 29Ba'ale' j a'ala'ab ti' tumen Abraham: Ti' leti'obe' yaan le ba'ax dzíibta'an tumen Moisés yéetel le aj bóotabo'obo'. ¡U yu'ubo'ob ba'ax cu ya'alico'ob! 30Ca tu núucaj le ayikalo': Bey, taata Abraham, ba'ale' wa jun túul máac ti' ichil le quimeno'ob ca xi'ic tu yicnalo'obe' je'el u kexic u tuuculo'obe'. 31Ba'ale' j a'ala'ab ti' tumen Abraham: Wa ma' tu yu'ubico'ob ba'ax cu ya'alic Moisés yéetel le aj bóobato'obo', ma' bíin ocsaj óolnaco'ob quex ca'a púut cuxlac jun túul máac ti' ichil le quimeno'obo'.
Valgt i Øjeblikket:
LUCAS 16: YUA04
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Maya de YucatánTumben Nupt'an NT © Sociedad Bíblica de Mexico, 2004.
