साल्तेङ दिङगिल्का 3
3
पत्रुस नेङगाराहेङ एल्पाका
1एनि पत्रुस रो युहन्ना नितिमाको सुम बजेभारि थानता पुकार पालि हानेदोङघाखे। 2थानलिअ्ता दुलकालाइदोफा र्हेलि जोलोमसोङ एमि नेङगाराहेङ द्याङगेलाइ फुतेङ चुमाघाखे रो दिनाङ थानको रेम्का मिङहिका फिनुता ताअ्पिघाखे। 3पत्रुस रो युहन्नाहेङ थानलिअ्ता दुल्लि तोम्का तिङतेङ इङको र्हेतेङ। 4एम्बालाइ वासेहेङ रेम्फा खाङतेङ पत्रुस दोअ्हि, “केलाइभारि खाङ!” 5पत्रुस रो युहन्नासो हाइदोङ निङका आस पातेङ इङको एम्बालाइहेङ रेम्फा खाङहि। 6कोलाउ पत्रुस दोअ्हि, “सोना रुपा कादोसा मान्थु। कुलाउ जेदोङ कादोसा हि, इङकोङ का नासेहेङ प्याङका। नासरतको इसु ख्रिस्टको मिङता ते।” 7एसा दोअ्तेङ पत्रुस इङकोको दाम्पाहा खुर चातेङ इङकोहेङ ल्होपाहि। ओदोङघरि इङकोको खोकोइगेलाइता रो तिर्होगेलाइता सुर लोहि। 8कालाउ इङको ठिङगापा जाअ्हि रो तेलि तेङहि। इङको तेतेङ रो तोङतेङ परमेस्वरहेङ बाखिन्तेङ एम्बालाइदोफा थानता दुल्हि। 9कोलाउ झाराङ द्याङगेलाइ वासेहेङ तेतेङहिका रो परमेस्वरहेङ बाखिन्तेङ हिका तिङहि। 10एम्बालाइ वासेहेङ थानको रेम्का दोअ्का फिनुता र्हेलि योम्तेङहिका या दोङ एइ दोअ्तेङ नाल्हि। कोलाउ त्यो हेसापा तेलि दोहि दोअ्तेङ एम्बालाइ झाराङ भारभुसाइहि।
थानता पत्रुसको आर्ति
11इङको द्याङ पत्रुस रो युहन्नाको न्हुअ्न्हुअ् हानेका तिङतेङ झाराङ द्याङगेलाइ भारभुसाइतेङ सोलोमन मिङहिका धाअ्ता दोसाङ एम्बालाइकोता धाअ्तेङ लोहि। 12इदोइ तिङतेङ पत्रुस द्याङगेलाइहेङ दोअ्हि, “इस्राएलको द्याङगेलाइ, इदोइ काथाता नेलाइ हाइपालि भारभुसाइ सुखेना? केलाइको ताइको सरबङ रो भक्तिसो यासेहेङ तेलि दोका बान्हाइन्हाहि दोअ्तेङ नेलाइ फोमपासुखेना? 13एन्सा माको, केलाइको पितापुर्खा आब्राहाम, इसहाक रो याकुबको परमेस्वर दोङ ताइको सेबक इसुहेङ प्रतापि बान्हाइहि। जाइहेङ नेलाइ रिम्तेङ पिलातसको खुर्ता पिसुन्हा। कालाउ पिलातस वासेहेङ लाअ्पिलि भोलाउ बुङ नेलाइ वाकोङ आगाता माकिअ्सुन्हा।#दामालाअ्का ३:१५ 14वा पुनित रो दुस मान्थुका हिघाहि। कालाउ बुङ नेलाइ वाको थामेता एमि जिउसेअ्काहेङ लाअ्पिलि र्हेसुन्हा।#मत्ति २७:१५-२३; मर्कुस १५:६-१४; लुका २३:१३-२३; युहन्ना १९:१२-१५ 15एसापा नेलाइ ज्यान पिकाहेङ सेअ्सुन्हा। जाइहेङ परमेस्वर सिकासो सिन्हुपाहि, केलाइ याको दासि हिन्हाहि। 16इसुको मिङता खान्धुर पानाङसिङ वाकोङ मिङहोइ नेलाइ तिङका रो गेका इदोइ द्याङहेङ बोल्याका बान्हाइहि। वासो निङका इङकोङ खान्धुरसो इदोइ द्याङ नेलाइ झाराङको आगाता पुराङ एल्का तिङदोङसुखेना।
17“ओइ काङको दादाओनेगेलाइ, का गेखा, नेलाइ मागेसिङ एन्सा पासुन्हा रो नेलाइको हाकिमगेलाइ बुङ एन्साङ पाहि। 18ख्रिस्ट पिर भोगेलि गोयाङ दोअ्तेङ परमेस्वर झाराङ आगाधुइकाको नुइसो दोअ्का काथा वा एसापा पोङघा पाहि। 19इदोइखातिर ताताइको कुकरम मानेसु रो परमेस्वरकोता घुरिसु रो नेलाइको कुकरम माअ्ताको। एसापा परमप्रभुसो आत्माता सुबिस्ता सरबङ निङस्वाना। 20परमेस्वर नेलाइको भाअ्सिङ साल्का ख्रिस्ट इसुहेङ दिङगिलप्यावा। 21कुलाउ पुनित आगाधुइकालाइ दोअ्काभाइपाङ परमेस्वर गोताङ काथा नावा सिरजाइका पहर मालोपाधाउ इसु सादेलताङ ह्यावा। 22मोसा बुङ एसा दोअ्का हिघाखेः
‘परमप्रभु परमेस्वर कासेहेङ जाअ्पाकाभाइपाङ नेलाइको दादाओनेसो एमि आगाधुइका जाअ्पावा। वाको दोअ्का गोताङ काथा नेलाइ हिङलि गोइस्वाना।#नियम १८:१५,१८
23कुलाउ वाको काथा माहिङका द्याङगेलाइचाहिँ आगाधुइकालाइसो खेङन्हातेङ मुअ्तावा।’#नियम १८:१९
24“समुएल रो वाकोन्हुसोको झाराङ आगाधुइकालाइ बुङ आन्जि नानि जेङका इदोङ काथागेलाइको बारेता दोअ्का हिघाखे। 25नेलाइ इङकोङ आगाधुइकालाइको खाल हिसुन्हा। जेदोङ केरा परमेस्वर नेलाइको खाल आब्राहामदोफा एसा दोअ्तेङ धेउहि, नाङको खालसो सुमिङको गोताङ जात्यागेलाइ सहसाम्पा निनावा।#सिरजाइ १२:३; २२:१८; २६:४ 26नेलाइ झाराङहेङ ताइको आसातिसो घुरिपातेङ नेलाइहेङ सहसाम्पा पिलि दोअ्तेङ परमेस्वर ताइको सेबकहेङ जाअ्पाहि रो झाराङखान्तेङ लाम्फा नेलाइकोता दिङगिल्हि।”
Valgt i Øjeblikket:
साल्तेङ दिङगिल्का 3: DHIM
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© 2024 (Active), Wycliffe Bible Translators, Inc. All rights reserved.