Matyiu 12
12
1O egombe těyeně Jisus a pudunganakindi ja mwanga mwa poti, o buhwa bwa iyâjâ; ndi beyokwedi beaju be diyakindi bya yoka nja ka bâ‐ba yalě ibuka ja poti ba ka jaka. 2Ndi o Farisi ba yěněkidi, ba vâkindi na ju, na, Umbwakiyate, beyokwedi beâvě be hakandi e ha ibě hohonganěngo na iha o buhwa boa Iyâjâ. 3Ka Mâ‐a vâ na bâ, na, O ha langeteni ya Devid e hakidi, o mâ‐a yokaki nja na ba diyaki na ju; 4o mâ‐a e ngakiyedi o ndabo ya Anyambě, na jaka pěmbě ya ilevudwě e ha diyakidi hohonganěngo na mâ‐a jaka, na ba diyakidi na ju, kabo prist dipâ? 5Ipě, o ha langeteni o belekanako nyanga ya prist, o hwi j‘ Iyâjâ, e jongolakidě buhwa boa Iyâjâ o těmpěl, ndi ba diye na njěnji? 6Ndi Mbi vâki n‘ inyěni, na, Okava, o na A di boněně wa na těmpěl. 7Ndi o jaka o yowakěni nyanga ya ekae e weyakě, Mbi vahakandi ngěbě ndi hanga benambo, wa diye o kwehěni a ha ’bě kobango. 8Ikabojana Mwana moto A te Upangiyi tombe mua buhwa boa Iyâjâ.
9O Mâ‐a běkidi valango oviya omě, A kěkindi o sinegâgi ’abu. 10Omě o diyakindi na momo enâ eyomi vivilaniyango. Ka bâ‐ba uwa Mâ, na, E te hohonganěngo na o yongě o hwi ja Iyâjâ? na ovaně ndi o bâ‐ba ka hěnjě Mâ. 11Ka Mâ‐a vâ na bâ, na, A lě nja moto ě a didi ’nyěni o jadi ovaně a ka bě udâmbě ’mbâkâ, oningě mua kwa o epududu o buhwa boa Iyâjâ aa bweye mâ, na mâ‐a hoduwa mâ? 12Na kumbakidě moto a di wa n‘ udâmbě? Ovaně nd‘ o yâ e di hohonganěngo na iha ja bwamu o hwi ja Iyâjâ. 13Jâ ndi ’jaju ja vâ na momo tě, na, Hambakidě enâ ’avě. Ka mâ‐a hambidě: ka yâ‐ya timba upeha panika epâkwě. 14Jâ ndi ja Farisi ja puma ka lata ehoka ya nyanga ’bu e ka weyaně Mâ.
15O Jisus a yowakidě, ka Mâ‐a věngěmě omě: ka bebimba beněně bea vitě Mâ, ka Mâ‐a yongě běhěpi: 16ka Mâ‐a pakuwa bâ, na, ba pangake Mâ‐a yowanakě, 17ovaně nd‘ o yâ e ka timě ya usâki Iseas e kalakidi, na,
18Umbwakiya uhayi muamě, uamě a di pânângo, uamě a tândâkě, na wa Ilina jamě i tândânâkě: Mbi ka vaměndi Ilina jamě o Mâ‐a jadi, na Mâ‐a ka leviděndi Betomba yěkě.
19Aa sâje, na Mâ‐aa yame; na moto aa yoke tepě joyi jaju o mehěngě.
20Aa buke tuka ya nyingiyango, na Mâ‐aa dime tepě bevudi be tutakě, kabo A loma yěkě o ibala.
21Dina jaju ndi ja Betomba i ka pitidě.
22Jâ nd‘ ijaju ja vanwě moto a bweyakwě na děvil ya emukumuku na pâgu: ka Mâ‐a yongě mâ, ka emukumuku ya kala, na pâgu ya yěně. 23Ka ebumbu yěhěpi ya mama, na, A ibě Mwana Devid ekaně? 24Ndi Farisi na yokakidi, ba vâkindi, na, Ekaně aa věngěkidě děvil, ndi kabo na Biělsibub upolo mua děvil. 25Ka Jisus a yowě mapikiliya mabu, ka Mâ‐a vâ na bâ, na, Ipangiya jěhěpi i pěhěkě na jâ mětě i ka jiliyandi; na ba mboka na ba ndabo yěhěpi e pěhěkě na yâ mětě, yaa těme. 26Ndi oningě Setan a věngěkidě Setan, vâkâna a pěhěkěndi na mâ mětě: nandi ipangiya jaju i ka těmě lě na e? 27Ndi oningě na Mbi věngěkiděndi děvil na Biělsibub, nja ua bana banyu a věngěněkidě? ovaně nd‘ o bâ‐ba ka diyě bayěkidi banyu. 28Ndi oningě Mbi věngěkidě děvil na Ilina j‘ Anyambě, vâkâna ipangiya j‘ Anyambě i pândi o inyěni o jadi. 29Moto a ka yâlě lě o ngiya o ndabo ya moto ukolo ka jongolidě jumba jaju na‐e, kabo a ta kata ukolo katango? běngě a jongolakidě ndabo ’aju. 30A ha ’bě n‘ Umba, a ’bě o pěl‘ ’amě: na a ha yolakě n‘ Umba, a pajanganakěndi. 31Ovaně ndi Umba‐Mbi vâkě n‘ inyěni, na, Mabe měhěpi na ikila j‘ Anyambě be te be iyakudwě bato; ndi ikila ja Ilina Iyamu jaa yidwě bato. 32Uěhěpi a ka kalě ndaga o pělě ya Mwana moto, e ka yidwi mâ: ndi a ka kalě o pělě ya Ilina Iyamu uěhěpi, ya yidwě, mâ, tombete o eměnâ těkae, tombete na o e vakě. 33Nyěvěkidě ele, na bebuma beaju; tombe wa bevě ele na bebuma beaju: ikabojana ele a yowanakěndi beaju na bebuma. 34A! igona ja mbamba, o lě o kalakani belombo beyamu na e, inyěni o jadini babe? ikabojana o bwinge boa ’bumulema ndi boa udumbu bo kalakě. 35Mot‘ uyam‘ o ngumba eyamu ya ebumulema a běkěkiděndi beyamu; na mot‘ ube o ngumba ebe a běkěkiděndi bebe. 36Ndi Mbi vâki n‘ inyěni, na, Bato ba ka vi tango o buhwa boa yěkě o ndaga yěhěpi eabu e ka kalě e diye n‘ itinga. 37Ikabojana ndaga jâvě t‘ ijâvě i ka huwanudwě, na ndaga jâvě te ijâvě i ka kwehanwě.
38Jâ ndi ja Balěndi bâkâ na Farisi ba yavwana, na, Uyokwidi, ho vahakandi o yěně ndembo o âvě‐o jadi. 39Ndi a yavwanaki bâ, na, Igona j‘ ihonde na bobe i vahakandi ndembo; nd‘ o ’bě na ndembo e ka věwě jâ kabo ndembo ya usâki Jonas: 40Panika Jonas a diyakidi meehe melalo na mebulu melalo o ihuhu ja nyambimbi, nonaně tepě o Mwana moto a ka diyě meehe melalo na mebulu melalo o ulema mua he. 41Bato ba Niniva ba ka muwandi na igona těkadi o yěkě na bâ‐ba ka kwehi jâ: ikabojana ba ulwakindi n‘ ipakuwedi ja Jonas: ndi, umbwakiyate, uněně wa na Jonas a nd‘ okava. 42Konde ya diko a ka těměndi n‘ igona těkadi o yěkě, ka kwehě jâ; ’kabojana a vakiyendi o mahuku ma he ka yoka iyowě ja Sâlâmân: ndi, umbwakiyate, uněně wa na Sâlâmân a nd‘ okava. 43Oningě ilina ibe ja věngěmě na moto, a tamwakand‘ o loboko la yaheyahe, a vahaka iyâjâ, nd‘ a duwe. 44Jâ nd‘ ijaju ja vâ, na, Mbi ka timband‘ o ndabo ’amě o umb‘ ’i vakiyedi: o mâ‐a pâdi, ka mâ‐a kâbidě yâ ebobolo viyâwěngo, na kembwěngo. 45Jâ nd‘ ijaju ja vala ka nângâ na mâ mětě malina mapâkwě hěmbwědi bobe wa na mâ mětě, ka mâ‐ma ngiya ka diya omě: madikanido ma moto těně ma bobe wa na bohoboho. Nonaně tepě o yâ e ka diyě n‘ igona tě ibe ekadi.
46O Mâ‐a diyakidi A kalaka na ebimba, bana ba nyangwě na nyangwě ba těměkindi o bwebwe, ba vahaka o kala na ju. 47Jâ ndi ja moto n‘ uhuhu ja vâ na ju, na, Umbwakiyate, nyângwě na bana ba nyângwě ba nd‘ o bwebwe těmetěme, ba vahakandi o kala na nâvě. 48Nd‘ A yavwakindi ka Mâ‐a vâ na a langwakiya Mâ, na, Jaie a lě nja? na bana bina lě ba nja? 49Ka Mâ‐a hambid‘ enâ ’aju o beyokwedi beaju be jadi, na, Yěněkěte jaie na bana bina. 50Ikabojana uěhěpi a ka hayě upango mua Paia a jad‘ o Hěvěn, mâ tepě mwan‘ ina, n‘ iluku, na jaie.
Valgt i Øjeblikket:
Matyiu 12: BNG1895
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Published by the American Bible Society in 1895.
