Matta 4
4
Ƙǝƙǝrang Sheetan Yeeso
(Markus 1:12-13; Luka 4:1-13)
1Tǝrgha Sǝsǝna tǝ Peɗǝnda ɗǝgha tǝ Yeeso a kaheerha ɗǝ ka a ƙǝƙǝrangga sheetan. #Ibraniyaya 2:18; 4:15 2Yeeso karɗǝ aama yi ɓeena kumnggit faɗa nda fǝɗigrha tǝ yan fara. Akwasamdghǝn ƙǝsgha miirha ndǝn. 3Tǝrgha sheetan ɓagha thlǝmadghǝn ɓa ndanggǝn, “Ana Wan Faara ni sa, tsawang feryini ya ka mburodi.”
4Amma nggǝmangga Yeeso ndanggǝn, “Nǝghǝn chichirethlee hai hu ɗeleewar Faara:
‘Mbǝ tǝ mburodi kee na niifa ƙǝra sǝ wa,
amma tǝ laɓaara na kyarha ɓa a mii Faara.’#Ɗeleewar nggǝr ngwa kumaarha 8:3 ”
5Tǝrgha sheetan tǝranggǝn Urshelima ɗǝ wupǝri tǝ Peɗǝnda, tǝranggǝn ten Ƙǝn Faara sǝ na a Urshelima. 6Ndanggǝn, “Ana Wan Faara ni sa, puru hweeɗe hai, ƙǝsǝr nǝghǝn chichirethlee hai hu ɗeleewar Faara,
‘Nǝn a ndang fathlǝnggighǝn a nggawo wa nda sǝ,
tǝ haryindan na nda a nggawo sǝ,
amana ɗǝghang sarwa feera fa.’ ”
7Nggǝmangga Yeeso, “Nǝghǝn chichireethlee hai, ‘a ƙǝƙǝrangna Chinǝm Faarwa wa.’ ” #Ɗeleewar nggǝr ngwa kumaarha 6:16
8Nggǝrgha Sheetan tǝrang nda a ten wumnda sǝ na nzang kyaɗang kutǝryid ƙǝshiirha nǝn heu tǝ mamnggitghǝn. 9Ndanggǝn, “Ənggini heu ya niya furo ƙǝn, a ɓǝrna hai fǝree mamnggirha na.”
10Ndangga Yeeso, “Kalu kwamanna hai, Sheetan! Ƙǝsǝr nǝghǝn chichirethlee hai hu ɗeleewar Faara:
‘Tǝtani a ɗǝfang shilee na Chinǝm Faarwa in,
ndǝghǝn katenggǝn na fǝrang mamnggirha.’ ”
11Tǝrgha Sheetan mal Yeeso nǝn. Ɓagha fa thlǝngya Faara ɓa ƙǝlaghǝn ndaha.
Ƙatǝrang Yeeso targhǝn hai a Nggalili
(Markus 1:14-15; Luka 4:14-15)
12Sǝkna Yeeso muwang nda Yahaya hu porsǝna ɗǝ, mal Yahudiya nǝn ɗǝgha Nggalili ɗǝ. #Matta 14:3; Markus 6:17; Luka 3:19-20 13ˈWa ɗǝrha nǝn Nadzarat ɗǝ a wudgha Kafarnahum ɗǝ na a mii wuri aama tǝ tsaurha, na a chehwed Dzebulu tǝ Naftali. #Yahaya 2:12 14Ƙǝsǝr a lǝɗang ngganda ˈya ndana annabi Ishaya tǝ ndaarha:
15“Chehwed Dzebuluna tǝ chehwed Naftali,
kunna a kwaman wuri aama, tǝ ƙǝsǝr kufad Urdun,
tǝ ƙǝm chehwed Nggalili yi fingya mbuwa wa Yahudaya.
16Nafiya na tsaurha a wula nanda kukwaryirha kaan,
Fingya na tsaurha a mishim mǝrra kyad kukwaryirha ɓa.”#Ishaya 9:1
17Ka a farɗi ndǝn katǝrangna Yeeso pǝr laɓar Faara hai, nagha a ndaarha, “Malaman ɗimiyid nun, ƙǝsǝr Kutǝryid Talara nduwusɗa ɓa.” #Matta 3:2
Katǝrang Yeeso wur fatsahayighǝn hai
(Markus 1:16-20; Luka 5:1-11)
18Nana Yeeso a wiirha hai a mii wuri aam Nggalili, na nafiya nǝn sǝri a wanmanggi nda Siman na nda aarha Mbiturus tǝ wanman Andǝrawus. Na nda a ƙǝs tǝngya tǝ panggamnggi ndan a hu wuri aamɗi ƙǝsǝr fa ƙǝs tǝngya ni.
19Tǝrgha Yeeso ndanggǝn kanda, “Mbuwama samadna, niya tsawang kun fa ƙǝs fiya ɓa.” 20Tsu a mbǝɗi kee malangganda panggamnggi ndan mbu samadghǝn nda.
21Chik nǝn ɗǝrha mbeeɗǝ, nggǝrghǝn na nafiya sǝri a wanmanggi, Yakubu wan Dzabadi tǝ wanman na Yahaya. Kanda a hu kombuwol chii ndan Dzabadi, a tangsang panggamnggi ndan ɗǝ, aagha Yeeso kanda. 22Tsu a mbǝɗi kee malangganda kombuwol ndan tǝ chii ndan mbu samadghǝn nda.
Tsahad Yeeso ha tǝ ƙǝm ƙǝnang ɗǝ fiya
(Luka 6:17-19)
23Yeeso wengɗǝ chehwed Nggalili kahad nagha a tsahang fiya ha hu ƙǝn tsahad Yahudaya nagha a pǝr Laɓara na Mbǝnggǝn yi kutǝryid Faara, tǝ ƙǝnang nda fiya natǝ wanhaya ɗǝɗamǝn tǝ ɓeerha farha. 24Laɓarghǝn ɗǝɗa ɗǝ inggun ta Suriya ɗǝ. Ɓang haya nda ɓa, heu tǝ fingya natǝ wanhaya fa ɗǝɗamǝn-ɗǝɗamǝn, fingya ƙǝnangna ǝnkaheeya kanda hai, tǝ kachelya tǝ fingya mǝrna fandan hai, ƙǝnanggǝn kanda heu. 25Fiya hangga mbuwa samadghǝn, fingya a Nggalili ɓa, fingya hu chehweerha ɓa na nda aarha talya kum, fingya a Urshelima ɓa tǝ Yahudiya tǝ fingya ƙǝm a pǝm kufad Urdun ɓa.
Valgt i Øjeblikket:
Matta 4: HWO
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
©2023 Seed Company in collaboration with Language Developers and Bible Translators Association
