João 4
4
Nai Jesus koalia ho feto ida iha Samaria
1-2Se kompara João ho Jesus, Jesus nia eskolante sira sarani ema barak liu ema nebee tuir Nia. Jesus rasik la sarani ema, so Nia eskolante sira mak sarani. I bainhira Jesus hatene dehan, ema hosi grupu relijiaun Farizeu rona ona dehan sira sarani ema barak liu, 3entaun Nia ho Nia eskolante sira husik tiha rejiaun Judeia, hodi fila fali ba provinsia Galileia. 4Maibee sira tenki lao liu provinsia Samaria hodi too iha Galileia. 5Sira lao too sidade ida iha Samaria, naran Sikar, besik rai ida nebee Jaco foo ba nia oan José.#Jenesis 33:19; Josué 24:32 6-8Iha nebaa iha bee posu ida, naran ‘posu Jaco’. Iha meiudia, Jesus sira too iha nebaa. Nia senti kolen durante sira nia viajen, i Nia tuur deskansa iha bee posu nee. Nia eskolante sira husik hela Nia mesak iha nebaa, hodi baa sosa hahaan iha sidade.
Depois feto ida hosi sidade Samaria nee baa kuru bee iha bee posu nee. Jesus husu ba nia dehan, “Mana, ita bele foo bee ituan mai hau hemu, ka?”
9Maibee feto nee hakfodak, tanba ema Judeu baibain la iha relasaun diak ho ema Samaria sira. I nia husu fali ba Jesus, dehan, “Senhor, ita ema Judeu, hau ema Samaria. Senhor husu bee ba hau, nee la sala, ka?”#Esdras 4:1-5; Neemias 4:1-2
10Jesus hatete, “Se mana hatene saida mak Nai Maromak hakarak foo ba ema hotu, no mos hatene see mak Hau nebee husu bee nee, maka mana sei husu fila fali bee mai Hau. Nunee Hau sei foo bee nebee lori moris ba ema.”#Jeremias 2:13; Zacarias 14:8; Ezequiel 47:9
11Feto nee dehan, “Senhor, ita la iha kanaba hodi dada bee. I bee posu nee mos klean. Hosi nebee Senhor hetan bee nebee lori moris nee? 12Oinsaa? Senhor boot liu fali ami nia bei-ala Jaco? Nia mak husik hela posu nee mai ami. I nia rasik mos hemu bee hosi posu nee. Nia oan sira ho nia animal sira mos hanesan.”
13Jesus hataan, “Keta haluha! Ema nebee hemu bee iha bee posu nee, sei hamrook fali. 14Maibee ema nebee hemu bee nebee Hau foo nee, sei la hamrook tan ona. Tanba bee nebee Hau foo nee, hanesan bee matan ida iha nia laran, nebee fakar sai mai. Bee nee, lori moris loloos nebee rohan laek.”
15Feto nee dehan, “Se nunee, Senhor, foo ona bee nee mai hau, para hau keta hamrook tan ona. Nunee, hau lalika mai bebeik kuru bee iha nee.”
16Jesus dehan, “Ita baa bolu ita nia laen mai iha nee.”
17-18Feto nee hataan, “Maibee hau la iha laen.”
Jesus dehan, “O koalia loos duni, dehan o la iha laen. Afinal o iha laen nain lima ona. I mane ida nebee moris hamutuk ho o agora nee, mos laos o nia laen.”
19Feto nee hataan, “Agora hau hatene ona, Senhor nee Maromak nia profeta ida. 20Hau atu husu. Ami ema Samaria nia bei-ala sira adora Nai Maromak iha foho Gerizim.#4:20:Foho Gerizim nee, besik aldeia Sikem iha provinsia Samaria. Iha lian Gregu, so hakerek deit dehan, “iha foho nee”. Maibee ema matenek nain sira hotu dehan, foho nee nia naran, mak “Gerizim”. Maibee imi ema Judeu dehan, se hakarak adora Nai Maromak, ema hotu tenki baa Jerusalem. Tuir Ita Boot, ida nebee mak loos?”
21Jesus hataan, “Ita fiar ba Hau Nia koalia, tanba Hau koalia loos. Sei too nia tempu, imi adora Maromak iha foho nee, ka iha Jerusalem, fatin rua nee la iha folin tan ona. 22Imi ema Samaria la hatene adora ba see. Maibee ami ema Judeu hatene Nai Maromak nebee ami adora. Tanba Nia hakarak uza ami hodi loke dalan, para salva ema sala nain. 23Bainhira nia tempu too, agora too tiha ona, ema nebee adora loloos ba Aman Maromak iha lalehan, sira adora Nia tuir Nia Espiritu, i tuir buat nebee loos. Tanba Aman iha lalehan hakarak ema nebee adora Nia hanesan nee. 24Tanba Maromak nee, Espiritu. No ema nebee adora Nia tenki adora tuir Nia Espiritu, i tuir buat nebee loos.”
25Feto nee dehan tan, “Hau hatene ona Mesias atu mai, nebee ema bolu Nia dehan ‘Kristu’. Nia nee mak Nai Maromak promete ona atu haruka mai. Bainhira Nia mai, Nia sei foo sai buat hotu-hotu ba ita.”
26Jesus hataan, “Mak Hau duni, ida nebee koalia hela ho o.”
27Sira sei koalia namanas hela, Nia eskolante sira mos too mai hosi sidade. Sira hakfodak loos, tanba sira haree Jesus koalia hela ho feto Samaria ida. Maibee la iha ema ida husu ba feto Samaria nee, “O hakarak saida?” I la iha ema ida husu ba Jesus, “Tanba saa mak Senhor koalia ho feto nee?”
28Tuir mai, feto nee husik hela nia sana rai iha nebaa, fila ba sidade hodi konta ba ema hotu iha nebaa dehan, 29“Mai ita baa haree took Ema ida iha nebaa. Tanba Nia foo sai momoos hau nia hahalok hotu nebee hau halo ona. Keta halo be Ema nee Kristu, nebee Maromak promete ona atu haruka mai.” 30Ema barak sai hosi sidade nee, hodi baa haree Jesus.
31Bainhira feto nee fila fali ba sidade, Jesus nia eskolante sira bolu Nia, “Mestri! Mai haan lai!”
32Maibee Nia hataan, “Hau iha ona hahaan nebee imi la hatene.”
33Nia eskolante sira husu ba malu, “Oinsaa mak nee? See mak mai foo hahaan ba Nia?”
34Maibee Jesus hatete, “Nai Maromak haruka Hau mai hodi halo tuir Nia hakarak, no halao Nia serbisu too remata. Ida nee mak hanesan hahaan ba Hau. 35Baibain imi haree ba toos, i dehan, ‘Sei hela fulan haat tan, foin bele silu batar.’ Maibee Hau hatete ba imi. Se imi haree didiak, toos sira prontu ona baa halibur. Toos sira nee mak hanesan ema barak nebee mai hasoru ita iha nebaa. Tanba sira nee prontu ona fiar mai Hau. 36Laos nee deit, ema sira nebee halibur batar hatama ba armazen, sira komesa simu ona sira nia kolen. Sira nee hanesan ema nebee hatudu dalan para ema fiar ba Nai Maromak, i hetan moris loloos nebee rohan laek. Nunee ema nebee kuda fini, no ema nebee halibur ai haan, bele haksolok hamutuk. 37Ema dehan, ‘Ema ida kuda fini; ema seluk mak halibur nia rezultadu.’ Nee loos duni. 38Hau haruka ona imi baa halibur rezultadu hosi ema seluk nia serbisu. Laos imi mak serbisu, maibee imi mak aproveita hosi sira nia kosar been.”
39Tempu nebaa, ema Samaria barak iha sidade nee mak fiar ba Jesus, tanba feto nee koalia dehan, “Nia foo sai momoos hau nia hahalok hotu.” 40Bainhira sira baa hasoru Jesus, sira husu ba Nia, “Senhor, hela ho ami iha nee deit!” I Nia hela loron rua iha nebaa.
41I ema barak mos fiar ba Nia, tanba Nia liafuan. 42I sira foo hatene ba feto nee dehan, “Horiseik, ami rona o koalia deit. Maibee agora ami fiar ba Nia, tanba ami rasik rona hosi Nia. Ami hatene duni dehan, Ema nee mak salva ita ema sala nain hotu iha mundu nee.”
Jesus kura funsionariu ida nia oan
43Jesus sira hela loron rua iha nebaa, depois sira kontinua lao baa provinsia Galileia. 44(Jesus koalia ona dehan, “Ema la respeita Nai Maromak nia profeta sira iha sira nia rai rasik.”)#Mateus 13:57; Marcos 6:4; Lucas 4:24 45Uluk, molok festa Paskua, ema Galileia barak baa iha sidade Jerusalem hodi selebra loron boot iha nebaa. I sira haree saida mak Jesus halo iha festa nee. Tan nee mak bainhira Nia fila ba Galileia, ema simu Nia ho diak.#João 2:23 46I Jesus sira lao nafatin fila fali ba aldeia Kanaa iha provinsia Galileia, nebee Nia halo bee sai tua.
Iha tempu nee, iha funsionariu ida iha sidade Kafarnaum. Nia oan mane moras.#João 2:1-11 47Bainhira funsionariu nee rona dehan, Jesus fila fali mai iha Galileia hosi provinsia Judeia, nia mos lao sae ba Kanaa buka Jesus. Hasoru tiha, nia husu ho haraik aan ba Jesus para tuun ba kura nia oan. Tanba labarik nee besik atu mate.
48Jesus foo hatene ba funsionariu nee dehan, “Se imi la haree Hau halo milagre oi-oin, imi lakohi fiar Hau.”
49Funsionariu nee hataan, “Senhor, favor ida mai lai. Tanba, se Ita la mai, hau nia oan nee sei mate.”
50I Jesus foo hatene ba nia dehan, “Fila ona ba uma, tanba o nia oan sei moris.”
Nia fila kedas, tanba nia fiar ba Jesus nia liafuan nee. 51Bainhira nia fila, ema sira nebee serbisu iha nia uma baa hasoru nia iha dalan, dehan, “Senhor, lalika laran susar tan, tanba ita nia oan sei moris.”
52Nia husu ba sira, “Nia diak tuku hira?”
Sira hataan, “Nia isin manas tuun kedas hahuu horiseik meiudia, tuku ida.” 53Funsionariu nee hanoin kedas dehan, nia oan diak ona, iha momentu Jesus foo hatene dehan, “Senhor nia oan sei moris.” Entaun nia ho ema hotu iha nia uma laran fiar ba Jesus.
54Ida nee milagre ba dala rua nebee Jesus halo bainhira Nia sai hosi Judeia, hodi baa Galileia.
Valgt i Øjeblikket:
João 4: BTDT
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© 2024 Wycliffe Timor-Leste.
