Wəza net Maslənɗe 2
2
Əpel na alabara nenek a Yerusalem
(2:1—8:3)
Əzza na Zeŋgile Salala
1 #
MƏS 23:15-21; ƏMS 16:9-11 Adan pay na Paŋtekot agapə, akkalaŋgək baymet a təki taka. 2Yaŋ geŋgere va ɓaɓəlmet barkataŋ ade sə disiŋ ləŋgə. Aknəh gəla məs assoŋ ɗewɗew addəvən. 3Yaŋ zəga arban zən azet va hərzlum offo ətəray aketi, asan aket taka taka pakə. 4Ndəɗaŋ pak aknahaŋgək də Zeŋgile Salala, atəŋgaŋgək əpel də ma temtemi, va Zeŋgile Salala apsit tive nani.
5Mə Yudeɗi məgeslne'eŋ sənən Maŋgəlva tahəŋ a Yerusalem dəzzoŋ səket dəlveŋge nammba dəlva. 6Adan gogoyo vanəs agəɗə, ɗiy diyɗa akkalaŋka. Agəɗ sitik gərəŋgə, vi naway pak tay əprəmit əpel də ma nani. 7Ndəɗaŋ met hã' kpuɓ, agətaŋgək sawɓa, aɓɗaŋ na: Məzupeleŋgiŋ pak mə Galileɗiŋ ɓa sa? 8Ya mbar agəɗ naway pak sə walaŋgəm əprəmit də ma an awaɗ di? 9Mənam mə Partəɗe, mə Mediɗi, mə Elamɗe, gəm ɗiy na Mesopotami na Yude na Kappados, na Pon gəm na Asiya, 10na Firigiya, na Pamfili, na Eziptə, na Siren kivadələv na Libi gəm mə Romeɗ məs dəssoŋ aŋka. 11Mə Yudeɗi gəm mə Yudeɗ məkkpaŋga, mə Keretɗe gəm Arabɗe, mənam tat əprəmit əpel aket wəzeɗe gugriɗ na Maŋgəlva də ma namə. 12Ndəɗaŋ met hã' kpuɓ, mbagit gərəŋgə, aɓɗaŋ a walaŋ zit na: Aŋ va ənah mbar di? 13Yaŋ ɗiy meɓɓet adawmasaŋ aket aɓɗaŋ na: Mbazla nenek abaŋgə.
Əpel na Piyer
14Piyer kan le ziw dit gewleɗ kəlaw kiyit taka neki, aslan wəlan apel abet na: Mənokum mə Yudeɗi gəm ɗiy na Yerusalem pakə, məpak sləmokum ammba əpel nawa məsən na: 15Ɗiyəŋ mbazla dəbey va kədaɗɗumoŋ ɓa, vi pay dohõy tagay ɓa. 16Ya aŋ yaŋkəŋ zəga an məskəleŋ Yo'el apeli anah na:
17 #
YO' 3:1-5
Maŋgəlva amna əvoŋɗe meddirɓe na:
Wanuksu' Əmpəs naw aket ɗiy pakə.
Kirtukum mezeŋleket dit muguluŋgit waɗɗaŋ kəleŋ.
Gewleɗ nokum warahaŋ ula,
mezzeɗ nokum wassineŋgi.
18Aket belemɗe naw mezeŋleketi dit belemɗe məguluŋgit dayday
wanuksu' Əmpəs naw aketi,
pay nani, waɗɗaŋ kəleŋgi.
19Wanəgəɗ sekeneɗ a disiŋ,
gəm zəgeɗ narba aka dəlvafuŋ ahəŋka,
mbeli, offo gəm enene turliŋturliŋgi.
20Pay wakkpaŋ guzliyo, təla tam ka mbeli
tak əzza na pay na Daya, pay metiŋgin gəm də gagdaka.
21Vasna, ɗəf an dədawya iya na Daya pak na wakõhũ.
22Munokum zel mə Israyelɗe, məprəm əpeləŋka: Yesu mə Nazaret, ɗəf məs Maŋgəlva aslən vikumi yi, də gagdak naɗɗa sekeneɗi, teteleɗe gəm zəgeɗ narba məs Maŋgəlva agəɗ dəndən a walaŋkum va kəsənnən sən kikum. 23#MAT 27:35; MAR 15:24; LUK 23:33; YOH 19:18Ndəni məs Maŋgəlva aynan də əsən nan far nappan avet ɗiy məza mahenziŋ ɓa, kəzanən də əppan sit ɗiy məza maheŋziŋ ɓa akkpa'nən aka məzliwrihe. 24#MAT 28:5,6; MAR 16:6; LUK 24:5Yaŋ Maŋgəlva asilgin də əpələn səka əzəmsãhã na əmta. Vi əmta aɓap na ərman ɓa. 25#GLƊ 16:8-11Vi Davit tay ənəh akan na:
In tat əɗi Daya ɗayɗay ama harawa,
vi tay aka va dəzəŋ nawa, ka nədakker ɓa.
26Sən aski makraw adanneke,
hərzləmu asan talyãktalyãkə.
Gəɓa zu tam adawsan kutuk əffet addəv əɗɗum nawga zəga.
27Vi kəppaw na firik a təki net ɗiy mimtit ɓa,
kəppan na gawla nok salala əŋgəna ɓa.
28Kərbə suwək tiveɗ na zeŋgile,
əssa nok də in waknəhu də ənneke.
29Milmiŋgiɗwa, nəŋgəl kawnah sukum kotak aka wən na dəhəm Davit, amtəka, məndəkni. Ha kakaŋka magamas nan tay a walaŋmə. 30#GLƊ 132:11; 2SA 7:12,13Məskəleŋgi asənək na Maŋgəlva aynanək də əsway ammban nawɗi mazlalwãn aka mazaŋga na məlĩ nani. 31Davit awlak dafsəni, ndəni apel aka əsilye na Kristu səka əmta na:
Dəppan firik a təki net ɗiy mimtit ɓa,
gəɓa zən dəŋgən ɓa.
32Yesu vanəŋka Maŋgəlva asilgənək səka əmta, mənam tat pak miziwe nani. 33Maŋgəlva aslanək kan də va dəzən nani, arahək Zeŋgile Salala səva afən va aynan napsəni. Appasanəka, ndəni kədawlaŋ gəm kədaprəmaŋgə. 34#GLƊ 110:1Vi Davit sən kiyən dəpeŋ a disiŋ ɓa, də as pak amna:
Daya, anah sən Daya naw na:
Asok aka dəzəŋ nawa,
35hã gap an nəvoŋgitik məzuzelɗe nok ammba təlko.
36Vi vaski, mə Israyelɗe pak dəsənən gesiŋ na, Yesu vanəŋ məs kəkkpa'aŋ aka məzliwriheŋka, Maŋgəlva aɗiyək ka Daya gəm ka Kristu.
37Adan ɗiy aprəmən vaska, makret azlahka, yaŋ aɓsənən Piyer dit maslənɗe meɓɓet na: Mi mədaɗɗa kandi milmiŋgiɗmə? 38Piyer azlan sitike: Məɗiy marava, mətaf baptem də iya na Yesu Kristu navvuyon mambray nokum, asna wakərahaŋ Zeŋgile Salala. 39Vi an miynan van sukumi, sit kirtukum gəm sit ɗiy en faraɗa pakə, gba va Daya Maŋgəlva adawyet pakə.
40Piyer apelke, asɓetik də əpel temtem diyɗa, dawnəh na: Məkõhgən kiykum səddəv sayit ɗiy məzlzleɓtiŋki. 41Ndəni ɗiy en dətafən əpel nan arahaŋgək baptem, ɗiy ammba gabal hoku asapaŋgək azet pay dəpaska.
Ənziya net məzutafaŋgə
42Assoŋguk pay pak aba əyak net maslənɗe, addəv əsap a walaŋ ziti, addəv uɗakan waya gəm addəv əkkama. 43Ɗiy pak əggətaŋgə vi maslənɗe adaɗɗaŋ sekeneɗi gəm zəgeɗ narba diyɗa. 44#WNM 4:32-35Ɗiy en də ətaf pak assoŋguk a təki taka, zəgeɗ net pak sapə. 45Ndəɗaŋ əvəlin zəgeɗ net dit aryeɗ neti, ndəɗaŋ uɗaknən naway pak aza wəray nani. 46Pay pak awbeweŋ səddəv gəla na Maŋgəlva ɓa va aslereŋgi, ndəɗaŋ ərɗaŋ way sap anetda, əzəmaŋ də zit neki, mekret taka. 47Tay əgagdakanən Maŋgəlva, tahəŋ də ki nenek avet ɗiy pakə. Pay pak Daya tay əki ɗiy en dərahaŋ əkõh sap azeti.
Valgt i Øjeblikket:
Wəza net Maslənɗe 2: GB
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
All right reserved