Matta 3
3
Yohanna an tom Baptisma ya yǝ werkǝ ɗǝɗa
1A tǝrma sǝma Yohanna an tom baptisma nya yǝ wo, yǝn nkee mara kwalari ra a sanglo u put Yahudiya wa, 2yǝn nkee me, “Sǝ kon nfaata, me kuɓsutu a liura wa yǝ won ngwang.” 3U nwa ndǝ sase an nawanto Ishaya yǝ nkeesǝ mara a ɗuura ira wa me,
“Kwaro yaa yarma a sanglo yǝn nkee me,
‘Sǝ sǝk ɗǝɗa meen Ankundi,
Sǝ nǝɗkǝ ɗǝta kǝɗ meen sase.’ ”
4Luktu Yohanna yǝ tungsǝ wa werkǝ ma ntaa telǝm wa, ɗǝm yǝ kaa nɗera ira ma ntaa. Mbuseya ɓisa ndǝ mormoraa ma mbraa nsinya ma. 5Pa ɓet Urshalima ɓa ma nsaad ɓaa ɓǝsa a put Yahudiya ɓa, ma nsaad ura ɓisa kal sen Urdun wa ɓa, ɓǝ ko a sanii, 6ɓǝn nkee tentenato ɓoso, yǝɓǝ tom baptisma a sen Urdun wa.
7Pa yǝ wǝrsǝ ɓaa Farisiyawa ɓa ma ɓaa Sadukiyawa ɓa dem ɓǝn wowo a ham yǝn tomsǝ baptisma ɓeta ɓa wa, yǝ ɓǝ nkee me, “Saa hurtaa! Yaa nkeesǝ ni me sǝ mon nfiima ka wo a sani ɓau? 8Sǝ tom tinima u kaa weɗa me sǝ kon nfaatan nwa. 9Ɗǝm sǝ sen me kǝsǝ nkee nkweerase me, ‘Ibrahim ndǝ paate ra.’ Nǝn nkeesǝ me hana a dungate ya Kaa kiya nkaa yǝ hik emba Ibrahim. 10Ɓaa wee ti kate wa a kunda ɓota ran, ɗǝm nsaad ɓot yǝ nsee emba yaɓ ra ɓa, ɓaa ka ɗǝǝ a putu a ti a ara.
11“Nase nǝn tomsǝ baptisma ma mbraa u kon nfaata wa. Pa ndiira nwano atike kiyǝ wo u yǝ faɗ nǝsǝ kwangto wa, u hana taa isa nǝ nkaa nǝ kee ra. Kiyǝ sǝ tom baptisma ma Wis Kaa wa ma ara. 12Yǝma nkoo ree usu a nem isi, ɗǝm kiya ree koma, yǝ kwau nse isi a pindo ɗǝm yǝ kǝɗ sangsangta ma ara u loo ra wa.”
Ɓaa tom Yeso Baptisma
13Pa Yeso yǝ fiɗ Galili yǝ wo Urdun me Yohanna yaa tom baptisma. 14Pa Yohanna yǝn taa me yǝ ɓisi yǝn nkee me, “Nǝn taa me ngǝnǝ tom baptisma ngiinga, pa ngǝ wo a naniu?”
15Pa Yeso yǝ kak me, “A lee a tom maaso, tomon keke me ndǝ tom maaso me a kung mbu yǝsǝ yaɓ a wiiyo a Kaa ni ɓa.” Pa Yohanna yǝ yauwa.
16Ɓaa tomsǝ Yeso baptisma nok wa, yǝ nii yǝ fiɗ a mbraa. Pa a fer siso liura a wili, pa yǝ wǝr Wis Kaa wa ǝn hamham nga tǝlko, yǝ kaɗ a sanii. 17Pa kwarko fiɗaa liura, yǝ nkee me, “U nwa ndǝ auwane, yaa nǝn yausǝsǝ ya, nǝn hur kuɗa ma sase dem.”
Valgt i Øjeblikket:
Matta 3: LLA
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
©2023 Seed Company in collaboration with Language Developers and Bible Translators Association
