Svun Juan 2
2
Ja' li' yaloj ti i'ay ta nupunel ta jteclum Caná ti Jesuse
1Ta yoxibal c'ac'ale, ja'o iyu' nupunel ta jteclum caná ta yosilal Galilea. Ti sme' Jesuse tey ox uc. 2Ti Jesuse xchiuc' ti yajchanc'optaque, i'iq'ueic uc yo bu iyu' li nupunele. 3Ti c'alal teyic ta q'uine, ilaj li yuch'bolic ja' li ya'lel uvae, ti Jesuse i'albat yu'un li sme'e: Ilaj xa li yuch'bolique —xut.
4Itac'av ti Jesuse:
—¿Ants, c'u yu'un ti vo'on tal avalbone? Yu'un mu to tsta yora ta jtam li cabtele ―xut li sme'e.
5Li sme'e ja' yech iyalbe ti much'utic scuentainojic li ya'lel uvae:
—Pasic me scotol li c'usitic chayalbeique —xut.
6Tey vuchajtic vacp'ej p'in pasbil ta ton, ja' yav ya'alic ti tey ono'ox chtun yu'unic ta scuenta tslecubtas o sbaic ti c'alal tspoc lec sc'obic chac c'u cha'al stalelic onoxe. Oy nan vo'vinicuc (100) litro sbel juju p'ej li p'ine. 7Ti Jesuse, iyalbe ti much'utic scuentainojic li ya'lel uvae:
—Nojesic ta vo' scotol li p'inetic li'e —xut.
Isnojesic lec scotol.
8Ti c'alal laj snojesique, xi i'albatic yu'un ti Jesuse:
—Lavie pulic loq'uel jts'ujuc, ba ac'beic li much'u scuentainoj li ve'lile, —x'utatic.
Ixch'unic ti c'usi i'albatique. 9Ti much'u scuentainoj li ve'elile, ispas proval li vo' ti c'atajem xa ta ya'lel uvae, pero mu sna' bu ital; ja' no'ox sna'ojic ti much'utic scuentainojic li ya'lel uvae, sna'ojic ti vo' no'ox spulojic loq'uele. Ti much'u scuentainoj li ve'lile, istac ta iq'uel li jnupunel creme 10ja' yech iyalbe chac li'i: Scotol crixchano ja' ba'yi chac' ta uch'el ti bu más lec li ya'lel uvae, c'alal ep xa'ox yuch'ojique, ja' to chaq'uic ta uch'el ti bu siclamane. Pero li vo'ote anac'oj ti bu más leque, ja' to chavac' ta uch'el lavi ta slajeb xae —xut.
11Ti c'usi ispas Jesús ta jteclum caná ta Galileae, ja' sliqueb tey iyac' iluc ti slequilal syu'elale; li yajchanc'optaque, ixch'unic ti ja' ti Cajvaltique.
12Ts'acal to iyalic ech'el ta Capernaúm ti Jesuse, tey xchi'uc ech'el li sme'e xchi'uc li yits'intaque, xchi'uc li yajchanc'optaque; tey ijoc'tsajic jayib c'ac'al.
Ja' li' yaloj ti isnuts loq'uel scotol jchonolajeletic ta ti' muc'ta templo ta Jerusalén ti Jesuse
(Mt 21.12-13; Mc 11.15-18; Lc 19.45-46)
13C'alal po'ot xa'ox xc'ot sc'ac'alil li q'uin coltael yu'un li jurioetique, ti Jesuse ibat ta Jerusalen. 14Tey c'ot sta ta ti' templo jchon vacaxetic, jchon chijetic, xchi'uc jchon palomaetic, tey chotajtic c'ot sta noxtoc jeltaq'uinetic ja ti much'utic ta sjelbe staq'uin li crixchanoetique. 15Ti c'alal iyil ti Jesuse, ists'otilan ch'ojon ispas ta yarsial, ja' isibtas o loq'uel scotol li jchon chijetique, xchi'uc li jchon vacaxetic ti tey ch-chonolajic ta ti' temploe. Isbutq'uinbe smexaic li jeltaq'uinetique, istanibe li staq'uinique. 16Li jchon palomaetique, ja yech iyalbe chac li'i: ¡Loq'uesic scotol li'i! ¡Mu xa pasic ta ch'ivit li sna Jtote! —Xut.
17Li yajchanc'optaque iyul ta sjolic ti yech onox ts'ibabil comel ta sc'op Riox chac li'i: «Ta scoj ti toj tsots sc'oplal chca'i li anae, ja' ta xquich' o crontainel.» —Xi onox ts'ibabil.
18Li jurioetique isjac'beic li Jesuse:
—¿C'usi senya chavac' quilticotic yo' jnaticotic o bu ataojtal orten ti x'elan chapase? —Xutic.
19Itac'av ti Jesuse:
—Lomeso avilic li templo li'i, ta oxib c'ac'al ta jcha'va'an ―x'utatic.
20―Itac'avic ti jurioetique:
—Ta vaquib yoxvinic jabil (46) iva'i o li temploe li'i, ¿C'usi chacha'le ti ta oxib c'ac'al chacha'va'ane? ―Xutic.
21Li templo ti iyal ti Jesuse, ja' isjoy'al sba stuc. 22Yech'o un ti c'alal icha'cuxie, ti yajchanc'optaque iyul ta sjolic ti yech onox yaloje, ixch'unic ti ja' onox yech ts'ibabil ta sc'op Rioxe, xchi'uc ti c'usitic iyal ti Jesuse.
Ja' li' yaloj ti yilojbe c'ux'elan yo'on scotol crixchanoetic ti Jesuse
23Ti c'alal tey ta Jerusalen ti Jesuse, ti c'alal ja'o ta sq'uinal ti c'alal iloq'uic ta mozoil li j'israeletique, ep much'utic ixch'unic ti c'alal iyilic c'u x'elan iyac'ta ilel slequilal syu'elal ti Jesuse. 24Pero ti Jesuse, mu ono'ox bu ixch'un ti ixch'unic ta melele, yu'un yilojbe c'u x'elan yo'onic. 25Mu persauc oy much'u x'albon c'u x'elan yo'onic li crixchanoetique, yu'un yilojbe c'alal to yut yo'on li crixchanoe.
Valgt i Øjeblikket:
Svun Juan 2: LeqAC
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© Sociedad Biblica de Mexico AC
