Svun Juan 10
10
Ja' lo'il scuenta jchabichij xchi'uc j'elec'chij
1Ti Jesuse ja' yech iyal chac li'i: «Ta melel chacalbeic, «ti much'u ma'uc ta sti' scorral chij ch-oche, mi chp'it ochel ta xocon corrale, ja' jun j'elec' chij, ja' jun jmacbe ti ch-elc'ajique. 2Yan ti much'u ch-och ta ti' corrale ja' jun jchabichij ti ch-chabi li chijetique. 3Li jchabiej ti' corrale ja' tsjam li ti' corrale, li jchabi chije ta sbiiltas jucot li xchije, li chijetique xa'ibeic ye li yajchabielique; ta sloq'ues ech'el ta scorral. 4Mi laj loc'uc scotol li chijetique, li jchabi chije ja' babe chbat, li chijetique ja' nap'al chbat yu'un xa'ibe ye li yaj chabielique. 5Pero mi ma'uc yaj chabielique mu snap'letaic, ta xjatavic ta stojol, yu'un cha'iic ti ma'uc ye li yajvalique.» ―X'utatic yu'un ti Jesuse.
6Ja' yech li lo'il iyal ti Jesuse, pero muc' xa'ibeic smelol ti c'usi i'albatique.
Ja' li' yaloj ti ja' no'ox lequil jchabichij ti Jesuse
7Iyal noxtoc ti Jesuse: «Ta melel chacalbeic, vo'on li ti'corralon yo' bu ch'och li chijetique. 8Scotol ti much'utic ba'yi xa ono'ox li'ique, naca j'eleq'uetic jmacbeetic ti ch-elc'ajique; pero li chijetique muc' xich'beic ta muc' ti c'usi iyalique. 9Vo'on li ti'corralone: ti much'u ch-och ta jtojole, ta xcol. Co'ol c'u cha'al chij ti jun no'ox yo'on xloc' x'oche, ti tsta sve'ele.
10»Li j'elec'chije ja' no'ox chtal elc'ajuc, chmilvan xchi'uc tsocvan; yan li vo'one tal cac' cuxlejal ti mu xlaj ta sbatel osile. 11Vo'on li lequil jchabichijone. Li lequil jchabichije chac' xcuxlejal ta scoj li xchijtaque; 12yan ti much'u j'abtel no'oxe, ti ja' no'ox tsa' li stojole, ti c'alal chil chtal li oq'uile, tscomtsan li chijetique, li stuque ta xjatav, yu'un ma'uc li jchabichije, yu'un ma'uc yu'un li chijetique. Li oq'uile ta stsac li chijetique, ta stani sba ech'el yu'un. 13Li vinic taje chjatav yu'un ja' no'ox batem ta yo'on li stojole, ja' mu tsotsuc sc'oplal cha'i li chijetique.
14-15»Vo'on li lequil jchabichijone. Ja' c'ucha'al li Jtot ti xiyojtiquine, ja' no'ox yech xcojtiquin li Jtot uque, li vo'on uque, xcojtiquin li jchijtaque, li jchijtaque, xi yojtiquinic uc. Ta xcac' jba ta milel scoj li chijetique. 16Ja' no'ox yech noxtoc oy to yan jchijtac ti mu to bu li'ic ta corrale; persa ta xquiq'uic tal uc. Jun xa no'ox scorral chcomic, jun xa no'ox yajchabivanejic.
17»Sc'anojon ti Jtote yu'un chcac' jba ta milel, yo' ti xi cha'cuxi o noxtoque. 18Muc' much'u xu' chismil, sc'an no'ox co'on jtuc ti chcac' jba ta milele. Xu' cu'un ti chcac' jba ta milele, xu' cu'un ti chicha'cuxi noxtoque, yu'un ja' yech yalojbon ti Jtote.» ―X'utatic yu'un ti Jesuse.
19C'alal laj yal chac taje, li jurioetique ixch'aculan sbaic noxtoc. 20Ep jurioetic xi iyalique:
―¿C'u yu'un chava'ibeic sc'op le'e, ti ochem pucuj ta yo'one, ti chuvaj noxtoque? ―Xiic.
21Pero li yane ja' yech chalic chac li'i:
—Muc'bu xquiltic ti much'u oy pucuj ta yo'one ti yech xc'opoj chac c'u cha'al xc'opoje. ¿Min chjam yu'un sat ma'satetic ti pucuje? ―Xiic.
Ja' li' yaloj ti muc' xich'ic ta muc' Jesús ti jurioetique
22C'alal ja' o yora q'uin tey ta Jerusalen ti c'alal tsyules ta sjolic ti c'usi ora iyich' pasbel sq'uinal li muc'ta temploe. Ja' o ta yora sictic. 23Ti Jesuse tey xva'et ta templo ta coycoyna yo' Salomón sbie. 24Ti jurioetique tal sjoyletaic ti Jesuse, ja' yech isjac'beic chac li'i:
―¿C'usi to ora chavalboticotic ta jamal mi vo'ot ti Cristoote? Albon xa ca'iticotic ta jmoj. ―Xutic.
25―Itac'av ti Jesuse:
—Lacalbeic xa, pero mu xa ch'unic. Li c'usitic ta jpas ta syu'el ti Jtote ja' chvinaj o ti ta melel ja' stacojon tale; 26Pero li vo'oxuque mu xa ch'unic, yu'un ma'uc jchijoxuc. 27Li jchijtaque xa'iic ti c'u x'elan chic'opoje, li vo'one xcojtiquinic uc, ta xi snap'letaicon. 28Ta xcac' cuxlicuc ta sbatel osil, mu xa bu ch-ch'ayic o, muc' much'u xu' chispojbe ta jc'ob. 29Yu'un ti Jtot li yac'be ta jc'obe, stuc no'ox más oy syu'el, muc' much'u xu' tspojbe ta jc'ob. 30Li vo'one junoticotic xchi'uc ti Jtote ―x'utatic yu'un ti Jesuse.
31Ti jurioetique istamic ton noxtoc, yu'un ta stenbeic ti Jesuse. 32Pero ti Jesuse ja' yech iyal chac li'i:
― Ta syu'el ti Jtote ep c'usitic lec ijpas ta atojolic, ¿C'usi ti chopol ijpas avilic ti avo'onicuc amilicone? ―X'utatic.
33Itac'av ti jurioetique:
—Ma'uc chacac'beticotic o ton ta scuenta ti c'usitic lec apasoje, ja' ta scoj li c'usitic chavale yu'un cha chopol c'opoj ta stojol ti Rioxe, li vo'ote crixchanoot no'ox, pero chap'is aba ta Riox. ―Xutic.
34Itac'av ti Jesuse:
―Mi mu yechuc tsibabil ta smantaltac Riox ti tey avich'ojic chac li'i: “Li vo'one ical, ti rioxoxuque.” Xi ts'ibabil —x'utatic. 35Jna'ojtic ti c'usi chal li sc'op Rioxe, mu xu' ti ma'uc yech xichiotique; ti Rioxe, rioxoxuc xut ti much'utic iyalbe chac taje. 36Ti mi Riox li st'uj ti li stac tal li' ta balamile, ¿c'uyu'un ti chavalic ti chi chopol c'opoj ta stojol Riox ti ical ti ja' Xch'amalone? 37Ti mi ma'uc yabtel Jtot ta jpas chavilique, mu me xa ch'unic ti vo'on Xch'amalone. 38Pero ti mi ja' yabtel ta jpasbe chavilique, ac'u mi mu xa ch'unicon li vo'one, ja' ch'unic o ta scuenta li cabtel ta jpase; yo' ti xava'iic o ta jmoje, ti Jtote li' ta jtojole, li vo'one teyon ta stojol uc. ―X'utatic yu'un ti Jesuse.
39Ta ox stsaquic noxtoc ti Jesuse, pero muc' staic ta tsaquel, icol ech'el yu'unic.
40Isut ech'el ta jech uc'um Jordán yo' bu iyac' to'ox ich'vo' ti Juane, tey ipaj jayib c'ac'al. 41Ep crixchanoetic ba sq'uelic, ja' yech iyalic chac li'i:
—Ta melel, ac'u mi muc' xac' iluc slequilal syu'elal Riox ti Juane, pero yech ti c'u x'elan iyalbe sc'oplal li vinic li'i. ―Xiic.
42Ti yo bu taje, ep much'utic ixch'unic ti ja' tacbil tal yu'un Riox ti Jesuse.
Valgt i Øjeblikket:
Svun Juan 10: LeqAC
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© Sociedad Biblica de Mexico AC
