เห่ขุทวาลู่ 29
29
คูยาโคบ จว๊าโต่ เด๊อ เพลาบัน อาหี่
1โทเร๊อ คูยาโคบ จว๊าเป่แฮ โป่ แกล๊ เด๊อเง เร๊อ อา จว๊าโต่ เด๊อ เก่ซิเถ่ เบ๊อะ อากลุยอาแล เหล่โอ่ เกอเร๊อ เนอเต๊เก่. 2เร๊อ อา แม๊เถอะจว๊า เทอกลื่อ ตื๊อกลื่อ เด๊อ ตอกู เป่ เร๊อ ซิหมิ โซหมู่ แฮโอ่เมอ ตีวิตาวา แลแค เบ๊อะเนอ, เมเตเฮ๊เรอ ซิหมิ เออเต๊เห่ เนอ อู โบ่โอ แลแค อาเทอ เบ๊อะ เทอกลื่อ เออเนอ แพ๊. เทอกลื่อ เออเนอ อู ถู่ลอ บี๊ ลู เน๊อ หล่อบย่าดุ ตื๊อบื่อ. 3เบ๊อะ ล๋อ ซิหมิ เร๊อเป่ เต๊เห่ แฮโอ่ปล๊อโอ่ปลู่ ลอเฮ๊อ ลู เบ๊อะเนอ, เพรเกซิหมิ เต๊เห่ ถู่ลอโมแก หล่อบย่าดุ เด๊อ อู แด่บี๊ เน๊อ เทอกลื่อกู เออตื๊อบื่อ เร๊อ เหย่ซี แด๊โบ่โอ แลแค เน๊อ อาซิหมิ เต๊เห่, โทเร๊อ เหย่ซี ถู่ลอบี๊ กาคยา คยาแซ๊.
4คูยาโคบ แด๊เฮอ เพรเกซิหมิ เนอเต๊เห่ เน๊อ, “เก๋อ โป่แหว่ ซี, ซีดอ โอ่โต เบ๊อะ เต?”
เร๊อ เหย่ซี เฮ๊ฉื่อ ลู เน๊อ, “เป่ โอ่ เด๊อ วีฮาราน.”
5เร๊อ อา แด๊เฮอ โป่ เหย่ซี เน๊อ, “ซี ซิเง โพนาโฮร์ อาเลอ เพลาบัน แอ?”
เร๊อ เหย่ซี เฮ๊ฉื่อ ลู เน๊อ, “เป่ ซิเง ลู ว๊า.” 6เร๊อ คูยาโคบ แด๊เฮอ โป่ เหย่ซี เน๊อ, “อา โอ่โมโอ่แร๊ แพ๊ แอ?”
เร๊อ เหย่ซี เฮ๊ฉื่อ เน๊อ, “อ่อ, อา โอ่โมโอ่แร๊ แพ๊. เอ๋อ เด๊อเนอเล๊! อาพู๊เพรเหมาะ เหมาะราเชล เกหนิ เป่ ลูซิหมิ เร๊อ อา บ่อแฮ เฮ๊อ เด๊อ เนอเล๊!”
7เร๊อ คูยาโคบ เฮ๊ เหย่ซี เน๊อ, “เหมาะโถ่ปา แพ๊, อาค๊าอาขิ โต บ่อกา ซิหมิ เน๊อ เป่ หม่า เน๊อ ล๋ายโต่ จว๊าโบ่โอ มอ ซิหมิ เนอเต๊เห่ เทอ เร๊อ จว๊าเก คยาแซ๊โป่ ลู แต.”
8เหย่ซี เฮ๊ฉื่อ ลู เน๊อ, “ล๋อ ซิหมิ เน๊อ เป่หมู่ เต๊เห่ เก่แฮโอ่ เต่อปวา ลอ ลู ล๋ายโต่ เฮ๊หม่า, เป่ จว๊าแด๊โอ เป่ ซิหมิ เทอ หม่า อา หนิ ล๋ายโต่. เปเพรเกซิหมิ เต๊เห่ เก่ถู่ลอโมแก หล่อบย่าดุ เด๊อ อา โอ่เบ๊อะ เทอกลื่อกู เนอตื๊อบื่อ ตื๊อเร๊อ เป แด๊โบ่โอ หนิเป่ ซิหมิ เต๊เห่ อาเทอ แพ๊.”
9เร๊อ เบ๊อะ คูยาโคบ เฮ๊เบ่ ปาแพ๊ เน๊อ เหย่ซี เบ๊อะเนอ, เหมาะราเชล ย๊อ บ่อแฮโต่ เฮ๊อ อาเพซิหมิ เต๊เห่ เบ๊อะเนอ, เมเตเฮ๊เร๊อ อา หม่า เพรเกซิหมิ เตเพร. 10เร๊อ เบ๊อะ คูยาโคบ แม๊เถอะเฮ๊อ อาเพดุ เพลาบัน หม่าเฮ๊อ อาโหมะ อาแหม่เพรคู อาพู๊เพรเหมาะ เหมาะราเชล เน๊อ เพลาบัน อาซิหมิ เร๊อ เป่ เต๊เห่ เบ๊อะเนอ, อา จว๊าโต เด๊อ เทอกลื่อโอ่ เร๊อ อา จว๊า ถู่ลอโม แก หล่อบย่าดุ เด๊อ อู แด่บี๊ เน๊อ เทอกลื่อกู เนอตื๊อบื่อ เร๊อ อา แด๊ โบ่โอ เป่ เอาเพดุ เพลาบัน ซิหมิ เต๊เห่ อาเทอ. 11โทเร๊อ คูยาโคบ โนมื๊อ#29:11 เหย่ซีเหล่โกล หม่า กลุยแล ด๋า โอ่ยา ลู เร๊อ อา เก่ แม๊เถอะ ตาฉื่อคยา ลู เฮ๊หม่า, อา โนมื๊อหนิ ลู. เหมาะราเชล เร๊อ อา โหง่เซอโหง่โอ่เจ๊อ. 12เร๊อ อา เฮ๊ ลู เน๊อ, “แว หม่า เนเพ อากลุยแล แพ๊, เนเพ อาโป่เพรเหมาะ โหมะเรเบคาห์ อาพู๊เพรคู.” เร๊อ เหมาะราเชล แกล่กา แด๊โฉ่ เป่ เน๊อ อาเพ.
13เร๊อ เบ๊อะ เพลาบัน หนิโฮเฮ๊อ อาโป่ เพรเหมาะ อาพู๊ คูยาโคบ อาหรี่อาแก เบ๊อะเนอ, โต๊โพ๊โต อา แกล่แฮ โต๊โปล่ตาปยา แม๊เถอะฉื่อ ลู เร๊อ อา แฮแพ๊ โนมื๊อ ลู เร๊อ อา เอ๊กา ลู เด๊อ อาหี่. เร๊อ คูยาโคบ แด๊โฉ่ลอ เป่ ลู ล๋อ เตหรี่เตแก เด๊อ อา ทวาแถ่ เนอเต๊เห่. 14เร๊อ เพลาบัน เฮ๊ ลู เน๊อ, “เน หม่า แวสุ่ยแวเทอ หม่าแหน่เจ๊อ.” เร๊อ คูยาโคบ โอ่เกอ เน๊อ ลู เบ๊อะเนอ เตเล.
คูยาโคบ พย๊า เน๊อ เหมาะเลอาห์ เน๊อ เหมาะราเชล
15เออโต๊โพ๊ เร๊อ เอาเพดุ เพลาบัน เฮ๊ คูยาโคบ เน๊อ, “เป่ ย๊อ กลุยแล แพ๊ ลู อาขว่าอาคยา, เน จว๊า เอ่แรครา เปโต่ แว เมเต? เน ซิหยื่อ อาคว๊าอาเก่ บ๊าเต, เฮ๊ มอ?” 16เพลาบัน เร๊อ อาพู๊เพรเหมาะ โอ่ ซิเนอ, อาดุ เตเพร เร๊อ อามุย เน๊อ เหมาะเลอาห์, อาปีตี๊ เตเพร เร๊อ อามุย เน๊อ เหมาะราเชล. 17เหมาะเลอาห์ เร๊อ อาเป๊เส่เหร่เจ่, หม่าแน๊เรอ เหมาะราเชล เร๊อ อาโหมะตว่า โหมะแซแร แหน่เจ๊อ. 18คูยาโคบ ซิหยื่อ หนิ เหมาะราเชล เร๊อ อา เฮ๊ เน๊อ, “เพ เก่ แด่ เป่ แว เน๊อ เพ อาพู๊เพรเหมาะ เหมาะราเชล เฮ๊เร๊อ, แว เก่ เอ่แร เป่ดื่อ เนเง โซซว๊า ต๊าหน่า ปา.”
19เร๊อ เพลาบัน เฮ๊ฉื่อ ลู เน๊อ, “แว แด่ เน๊อ เน หม่า อาแร๊ เล๊อ เน๊อ แว แด่ เน๊อ เพรคู เด๊อ อาโร เตเพร เฮ๊อ, เมฮู๊เนอเร๊อ โอ่เกอ เน๊อ แว เบ๊อะเออ เฮ๊อ.” 20คูยาโคบ เก่ พย๊าหนิ เหมาะราเชล อาเงเนอ, อา เอ่แร เจ๊อ โซซว๊าต๊าหน่า เจ๊อ ตื๊อดื่อเร๊อ อา ย๊อ โมหนิ แหน่เจ๊อ ลู อาขว่าอาคยา, อา เตเน แพ๊ เน๊อ เตอเปล๊อฮู๊ แพ๊.
21เร๊อ เบ๊อะ คูยาโคบ เอ่แร บาเฮ๊อ โซซว๊าต๊าหน่า เบ๊อะเนอ, อา เฮ๊ เพลาบัน เน๊อ, “เก๋อ เพ, หน่าเล เด๊อ แว อ๊อแล เพ เนอ อาบา เฮ๊อ, เร๊อ เด๊อ มอ แว เน๊อ เพ อาพู๊เพรเหมาะ, แว ซิหยื่อ พย๊า ลู เน๊อ แวเม เฮ๊อ.”
22ฮู๊เนอเร๊อ เพลาบัน เอ๊แฮ ลอ แกแย โอ่ เบ๊อะเนอ เต๊เห่ เร๊อ อา เมเตกู่เมกู่มา. 23เบ๊อะ เหมาะคี๊โป๊โหล่เฮ๊อ เบ๊อะเนอ, เพลาบัน โต เอ๊แฮ เหมาะราเชล เด๊อ คูยาโคบ อาโอ่ ตื๊อดื่อเร๊อ อา จว๊าเอ๊แฮ เด๊อ อาพู๊เพรเหมาะ เหมาะเลอาห์. เร๊อ คูยาโคบ โอ่เมอเต่อ เน๊อ ลู. 24เด๊อ เหย่ซี กู่เม แต่ล๋ายโต่ เบ๊อะเนอ เพลาบัน เด๊อะเหร่อ เป่ โทเฮ๊อ เหมาะเลอาห์ หลู่โหมะ เหมาะศิลปาห์ เด๊อ อา เก่ เอ่แรจว่า เป่ ลู อาเง.
25เบ๊อะ เหมาะลี เฮ๊อ เบ๊อะเนอ, คูยาโคบ แม๊ เร๊อ อา คย๊าเจ๊อ, เร๊อ อา เฮ๊ เน๊อ, “โอ่ ม๋า เหมาะเลอาห์ แพ๊ ว๊า!” เร๊อ อา จว๊าเฮ๊ เพลาบัน เน๊อ, “เพ, เน จว๊า เมโต่ แว ฮู๊เออ เมเต? แว เก่ พย๊าหนิ เน๊อ เหมาะราเชล อาเงเนอ, แว เอ่แร เป่ เจ๊อเฮ๊อ เน โซซว๊าต๊าหน่า เฮ๊อ, แว เฮ๊ โต่? เพ จว๊า แลโฮ โต่ แว ฮู๊เออ เมเต?”
26เพลาบัน เฮ๊ฉื่อ ลู เน๊อ, “เป่ เหล่โกล โอ่ เน๊อ, แหม่เพรเหมาะ ตาหี่ตาเพร๊ แต่ล๋ายโต่ เนอ, โป่เพรเหมาะ ปีตี๊ ตาหี่ตาเพร๊ เหร่อ ลู หม่า อา หนิ โต่. 27เม โทปลื๊อ แกเหร่อ แวพู๊เพรเหมาะ ดุเล๊อ เออเตเพร อาเตจอกู๊ขุเนอ เออเตเกล๊ กูเนอ, อา เก่ โทเฮ๊อ ปาเร๊อ แว เก่ เด๊อะดื่อ เน เน๊อ เหมาะราเชล ปา, หม่าแน๊เรอ เน เบ่ เอ่แร เป่ โป่ แว โซซว๊าต๊าหน่า ปา.”
28เร๊อ คูยาโคบ อ๊อแล ฮู๊เพลาบัน เฮ๊ ลู เนอ. เร๊อ อา เมโทแก อา เน๊อ เหมาะเลอาห์ อาเตจอกู๊ขุ ต่าเตเกล๊กู เร๊อ เพลาบัน เด๊อะ เป่โป่ ลู เน๊อ อาพู๊เพรเหมาะ เหมาะราเชล. 29โทเร๊อ เพลาบัน เด๊อะ เป่ เหมาะราเชล หลู่โหมะ เหมาะบิลฮาห์ เด๊อ อา เก่ เอ่แรจว่า เป่ ลู อาเง. 30เร๊อ คูยาโคบ โอ่เมอเต่อ เกอโป่ เน๊อ เหมาะราเชล. เร๊อ อา โมเกอเร๊อ เหมาะราเชล เออเนอ, อา เล๊อแหน่ เจ๊อ เน๊อ เหมาะเลอาห์. เร๊อ อา เอ่แร เป่ โป่ เพลาบัน โซซว๊าต๊าหน่า.
เพยาโคบ อาพู๊ เต๊เห่
31เร๊อ เบ๊อะ จอแปแหร่ ตูจูเพร แม๊เถอะ เน๊อ คูยาโคบ โม เกอเร๊อเกอ เหมาะเลอาห์ โต่ เบ๊อะเนอ, อา นอพู๊โอ่ หนิ ลู, หม่าแน๊เรอ เหมาะราเชล เร๊อ อา โชพู๊. 32เหมาะเลอาห์ โหมะดอแถ่ เร๊อ อา พู๊โอ่แล หนิ อาพู๊เพรคู เตเพร เร๊อ อา เอ๊ เกอเร๊อ ลูมุย เน๊อ คูรูเบน, เมเตเฮ๊เร๊อ อา เฮ๊ เน๊อ, “จอแปแหร่ ตูจูเพร แม๊เถอะ เฮ๊อ แวเตแป่เตเช เฮ๊อ, เร๊อ เออโต๊โพ๊หม่า แวเว เกล๊ โมหนิ แหน่ แว ปา เฮ๊อ.” (รูเบน อาโหง่แลช๊า หม่า อา แม๊เถอะเฮ๊อ แวเตแป่เตเช เฮ๊อ.)
33โหมะเลอาห์ โหมะดอแถ่ คยาแซ๊ ตอฮ๊อ เร๊อ อา พู๊โอ่แล หนิ โป่ อาพู๊เพรคู เตเพร เร๊อ อา เฮ๊ เน๊อ, “จอแปแหร่ ตูจูเพร หนิโฮ เน๊อ แวเว โม เกอเร๊อเกอ แว โต่ อาขว่าอาคยา อา เด๊อะ โป่ แว พู๊เพรคู เออเตเพร เฮ๊อ,” เร๊อ อา เอ๊หนิ ลูมุย เน๊อ คูสิเมโอน. (สิเมโอนอาโหง่แลช๊า หม่า อา หนิโฮ.)
34เร๊อ อา โหมะดอแถ่ โป่คยาแซ๊ ตอฮ๊อ เร๊อ อา พู๊โอ่ คยาแซ๊ พู๊เพรคู เตเพร เร๊อ อา เฮ๊ เน๊อ, “เออโต๊โพ๊ เร๊อ แวเว เก่ แม๊ตู่แม๊แร๊ เกอติ แหน่ แว ปา เฮ๊อ, เมเตเฮ๊เร๊อ แว พู๊โอ่ หนิ เป่เจ๊อ ลู พู๊เพรคู ซิโซ เจ๊อ เฮ๊อ.” เร๊อ อา เอ๊ ลู มุย เน๊อ คูเลวี. (เลวี อาโหง่แลช๊า หม่า จิจือเฮ๊อ.)
35โทปาเร๊อ อา โหมะดอแถ่ คยาแซ๊ โป่ ตอฮ๊อ เร๊อ อา พู๊โอ่ หนิโป่ พู๊เพรคู เตเพร เร๊อ อา เฮ๊ เน๊อ, “เออโตโพ๊ เร๊อ แว เก่ ถู่เซ๊แถ่ จอแปแหร่ ตูจูเพร เฮ๊อ.” ฮู๊เนอเร๊อ อา เอ๊ เกอเร๊อ ลูมุย เน๊อ คูยูดาห์ เร๊อ อา พู๊โอ่ ตื๊อดื่อแก เบ๊อะเนอ เฮ๊อ. (ยูดาห์ อาโหง่แลช๊า หม่า ถู่เซ๊แถ่.)
Valgt i Øjeblikket:
เห่ขุทวาลู่ 29: EKTNTGEN
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Wycliffe USA