เห่ขุทวาลู่ 14
14
คูอับราม เมแลเปล๊หนิ คูโลท
1เบ๊อะเนอเค, ชินาร์เก่ คุ๊ยอาราเฟล, เอลลาสาร์เก่ คุ๊ยอารีโอค, เอลามเก่ คุ๊ยเคโดร์ลาโอเมอร์ เน๊อ โกยิมเก่ คุ๊ยทิดาล ซี เต๊เห่, 2แถ่ช๊า แลแค วีโสโดม อาคุ๊ย เบรา, วีโกโมราห์ อาคุ๊ยบิราชา, วีอัดมาห์ อาคุ๊ยเชเมเบอร์, วีเศโบยิม อาคุ๊ย เชเมเบอร์ เน๊อ วีเบ-ลา อาคุ๊ย เนอ เต๊เห่. วีเบ-ลา เนอหม่า อู เอ๊โค๊ ปา ลูมุย เน๊อ วีโศอาร์. 3เพรเป๊อเต เออ ซิแง ฉู่โนกูหนิ ลูซิปล่อ เร๊อ เมแถ่ จือลู อาปล๊ออาหมู่ ตู๊หมู่แพ๊. เร๊อ เหย่ซี แด่ปล๊อเต่อหนิ ลู เหย่ซี เกลอฮู๊ เต๊เห่ เบ๊อะ สิดดิม เก่ตอกู เนอโต๊โผะ. เหล่โอ่ เนอโต๊โผะหม่า กู๊แหน่เออ อา หม่า เฮ๊อ เทอชือเฮ เทอ อ่อดุ เออเนอ เฮ๊อ. 4เหย่ซี โอ่ แลแค เด๊อ คุ๊ยเคโดร์ลาโอเมอร์ อาเตเป๊อตี๊หรี่ อาเล เช๊อเนอหน่า เจ๊อ เฮ๊อ, เร๊อ เบ๊อะ อา บาแถ่ เฮ๊อ เช๊อโซหน่า เบ๊อะเนอ, เหย่ซี เป๊อแถ่ ช๊าฉือคยาแซ๊ แลแค เฮ๊อ คุ๊ย เนอเตเพร.
5เบ๊อะ อา บาแถ่ เฮ๊อ เช๊อลุยหน่า เบ๊อะเนอ, คุ๊ย เคโดร์ลาโอเมอร์ เน๊อ เพรเป๊อเต เด๊อ อา แบ๊ซว๊า เน๊อ ลู เนอเต๊เห่ แถ่ช๊าเป่แก เรฟาอิม เมวเจ่อ เด๊อ อา โอ่ เบ๊อะ วีอัชทาโรท คารนาอิม อากู เนอเต๊เห่, เน๊อ ศูซิม เมวเจ่อ เด๊อ อา โอ่ เบ๊อะ วีฮาม กู เนอเต๊เห่, เน๊อ เอมิม เมวเจ่อ เด๊อ อา โอ่ แลแค เบ๊อะ คีริยาธาอิม วีชาเวห์ ตอกู เนอเต๊เห่, 6เน๊อ โฮรี เมวเจ่อ เด๊อ อา โอ่ เบ๊อะ เสอีร์โฉ่เกล เนอเต๊เห่, โท๊โต่ อา ช๊าเอ่ จว๊าโต่ เจ๊อ เด๊อ วีเอลปาราน เก่เชเทอแก อาเก่กือทือ เนอเจ๊อ. 7โทเร๊อ เหย่ซี ตีรี๊กาคยา คยาแซ๊ เร๊อ อา จว๊าติ เด๊อ เอนมิสปัท เทอเถ่ขุ เนอตากยา, เร๊อ อา จว๊า ช๊าเอ่ หนิลอ อามาเลขเก่, โท๊โต่ อา จว๊า ช๊าเอ่ หนิ โป่ อาโมไรต์ เมวเจ่อพู๊ เด๊อ อา โอ่ เบ๊อะ วีฮาซาโซนทามาร์ อากู เนอเต๊เห่. เอนมิสปัท เทอเถ่ขุ เนอหมา, กู๊แหน่ เร๊อ อู เอ๊ เน๊อ คาเดช เทอเถ่ขุ เนอเฮ๊อ.
8เบ๊อะ คุ๊ยเนอซิลุย ช๊าเป่ โทเฮ๊อ เออเต๊เห่ อาเคเนอ, วีโสโดม อาคุ๊ย, วีโกโมราห์ อาคุ๊ย, วีอัดมาห์ อาคุ๊ย, วีเศโบยิมอาคุ๊ย เน๊อ วีเบ่หล่า อาคุ๊ย#14:8 วีเบ่หล่า เออเนอ อู เอ๊ ปา ลูมุย เน๊อ วีโศอาร์ เออ ซิแง เถ่จว๊า เร๊อ จุ่ยปล๊อท๊อปล๊อ เกอเร๊อลอ เหย่ซี เกลอฮู๊ เต๊เห่ เด๊อ สิดดิม เก่ตอกู เนอ, 9เร๊อ เหย่ซี จว๊าช๊า เน๊อ เอลามเก่ คุ๊ยเคโดร์ลาโอเมอร์, เน๊อ โกยิม เก่ คุ๊ยทิดาล, เน๊อ ชินาร์ เก่ คุ๊ยอาราเฟล เน๊อ เอลลาสาร์ เก่ คุ๊ยอารีโอค, เร๊อ คุ๊ยเออซิลุย ช๊าฉื่อ เน๊อ คุ๊ยเออ ซิแง. 10เบ๊อะเนอเค, เด๊อ สิดดิมเก่ตอกูเนอ ปาอ๊าอี ลอกีกู เต๊เห่ โอ่บาตีปี๊ ลอเจ๊อ เบ๊อะเนอ เจ๊อ. เร๊อ เบ๊อะ เพรเป๊อ วีโสโดม เน๊อ เพรเป๊อ วีโกโมราห์ เน๊อ อาเกลอฮู๊ เต๊เห่ เถ่แกล่ เฮ๊อ เบ๊อะเนอ, เต๊เห่เห่ เร๊อ อา แลตาโนแก เด๊อ ปาอ๊าอี ลอกีกู, เต๊เห่เห่ เร๊อ อา แกล่แถ่ แก เด๊อ โฉ่ขู่. 11เร๊อ คุ๊ย เนอ ซิลุย แถ่โต่หนิ ลอ วีโสโดม เน๊อ วีโกโมราห์ ตาหมื่อตาเต เต๊เห่ เน๊อ เฉ่เอ่เฉ่โอ เต๊เห่ เร๊อ เหย่ซี เถ่จว๊าแก คยาแซ๊. 12โทเร๊อ เหย่ซี ปื่อจว๊าหนิ คูอับราม อาพู๊ดุ คูโลท เด๊อ อา เถ่จว๊าโอ่ เด๊อ วีโสโดม เนอเตเพร, โท๊โต่ อาตาเต ซีเต๊เห๋ หม่า เหย่ซี พย๊าจว๊าหนิ ลอปลี เจ๊อเจ๊อ, โทเร๊อ เหย่ซี เถ่จว๊าแก.
13เบ๊อะเนอเค, แกแย เด๊อ อา เถ่แกล่ กาเปล๊ หนิ เนอเตเพร กา เฮ๊โฉ่โล เป่ เตหรี่เตแก เนอเต๊เห่ เน๊อ ฮีบรู เมวเจ่อพู๊ คูอับราม. คูอับราม เหล่โอ่โต๊โผะ หม่า อา โอ่ ผื่อ เน๊อ คูอาโมไรต์ เมวเจอะพู๊ คูมัมเร อาส่อเหมาะดุบูโพ๊ เนอโต๊โผะ. เร๊อ คูมัมเร เน๊อ อาโป่แหม่ คูเอชโคล์ เน๊อ คูอาเนอร์ ซีเต๊เห่เนอ อาฉู่โนกู ลอเฮ๊อ ลูซิปล่อ เร๊อ อาเอ่ หม่า หนิ โทลอเฮ๊อ ลูโหง่ เน๊อ คูอับราม. 14เบ๊อะ คูอับราม หนิโฮ เฮ๊อ เน๊อ อู ปื่อจว๊าแก เฮ๊อ อาพู๊ดุ คูโลท อาเบ๊อะเนอ, อา เอ๊ปล๊อหนิ แกแย เด๊อ อาช๊าปาแจ่ เต อาเพร โซเย เน๊อ เชอลุยซว๊า เด๊อ อา โอ่ เป๊เจ่แล เด๊อ อาหี่ด๊อกู เนอเต๊เห่ เร๊อ อา ครวาลือ คยา คุ๊ย เนอ ซิลุย โต่ เด๊อ วีดาน. 15เบ๊อะ เหย่ซี ครวาลือ โต่ แลแค เฮ๊อ เด๊อ วีดาน เบ๊อะเนอ, อา เบ เบ๊หมู่ เบ๊หมู่ เกอเร๊อ อาแกแย เต๊เห่ เร๊อ เบ๊อะ เหมาะคี๊ เบ๊อะเนอ อา โนช๊า แลแค เพรซิเถ่ เหย่ซี เต๊เห่. เร๊อ อา ช๊าเป่ ลอ เพรซิเถ่ เหย่ซี เต๊เห่, เร๊อ อา ครวาลือ โต่ เหย่ซี เด๊อ วีดามัสกัส เบ๊โท วีโฮบาห์ เนอ. 16เร๊อ อา จว๊าพย๊ากาหนิ ลอคยา ตาหมื่อตาเต เด๊อ อู พย๊าจว๊าแกลอ เนอเต๊เห่, โท๊โต่ อา เอ๊กาหนิ คยาแซ๊ อาพู๊ดุ คูโลท เน๊อ เพรเหมาะ เต๊เห่ เน๊อ แกแย อาโร เด๊อ อู ปื่อจว๊าหนิ เต๊เห่ โทเร๊อ อาโต่กา หนิ ตาหมื่อตาเตเนอ เต๊เห่.
เพรหลู่แตเต คุ๊ยเมลคีเซเดค เด๊อะบุ๊ยเด๊อะเตอเรอ คูอับราม
17เบ๊อะ คูอับราม จว๊า ช๊าเป่ โทเฮ๊อ คุ๊ยเคโดร์ลาโอเมอร์ เน๊อ คุ๊ยเด๊อ อาแบ๊ซว๊า เน๊อ ลู เนอเต๊เห่ เร๊อ อา กา เบ๊อะเนอ, วีโสโดม อาคุ๊ย เถ่จว๊า แม๊เถอะฉื่อ ลู เด๊อ ชาเวห์ เก่ตอกู เนอ. ชาเวห์ เก่ตอกู เนอหม่า อู เอ๊ ปา ลู เน๊อ คุ๊ยเก่ตอกู.
18โทเร๊อ คุ๊ยเมลคีเซเดค เนอหม่า วีซาเลมอาคุย หม่าอาหม่า หม่า, จอแปแหร่ เด๊อ อาดุอาทูเล๊อ อู เนอเตเพร อาเพรหลู่แตเต หมา เร๊อ อาพย๊า แฮหนิ เฉ่เอ่ เน๊อ แท๊ทือเทอแย เด๊อ คูอับราม โอ่.#ฮีบรู ๗:๑-๑๐ 19เร๊อ เด๊อะบุ๊ยเด๊อะเด๊อเตอเรอ คูอับราม เน๊อ,
“จอแปแหร่ เด๊อ อาดุอาทูเล๊อ อู,
เร๊อ อา แบ๊แล ม๊อขุ เน๊อ เห่ขุ เออเตเพร เก่ เด๊อะบุ๊ยเด๊อะเตอเรอ ดื่อ เน นี๋.
20จอแปแหร่ เด๊อ อาดุอาทูเล๊อ อู, เด๊อ อา นอ ช๊าเป่ แก เน เน๊อ เนกู๊ยากู เต๊เห่ เออเตเพรเนอ,
อู เก่ ถู่เซ๊แถ่ เร๊อดื่อ อา นี๋.”
โทเร๊อ คูอับราม พย๊า ตาหมื่อตาเต เด๊อ ล๋อ อา พย๊าหนิ เนอเต๊เห่ อาปุ๊ยเช๊อ เร๊อ ตีปุ๊ย เร๊อ อา เด๊อะ เน๊อ คุ๊ยเมลคีเซเดค.
21อา เม โทฮู๊เนอเร๊อ วีโสโดม อาคุ๊ย เฮ๊ คูอับราม เน๊อ, “เด๊อะกาคยา แวแกแย เนอเต๊เห่, เด๊อ ตาหมื่อตาเต เนอเต๊เห่ เร๊อ พย๊าลอดื่อ เน๊อ เนเง เนอ นี๋.”
22หม่าแน๊เรอ คูอับราม เฮ๊ฉื่อ ลู เน๊อ, “แว แบ โทเฮ๊อ แวโหง่ เน๊อ จอแปแหร่ ตูจูเพร, หม่าเฮ๊อ จอแปแหร่ เด๊อ อาดุอาทูเล๊อ อู, อา แบ๊แล ม๊อขุ เน๊อ เห่ขุ เออเตเพร เน๊อ, 23แวเบ่ พย๊าหนิ เนตาหมื่อตาเต เตอเจ๋อ โต่. ตี๋ แพ๊ โหล่ โตโบ แพ๊ เบ่เบ่, แข่พ๊าเปลอ โตโบ แพ๊ เบ่เบ่, แว เบ่ พย๊าหนิ โต่. ปาหม่า เน เฮ๊ เน๊อ, ‘แว หม่า แกแย เด๊อ อา เมดุแหย่ คูอับราม,’ เน เฮ๊ ฮู๊เนอ เห่. 24เด๊อ แว เง เนอ แว พย๊า เตอเจ๋อ โต่, หม่าแน๊เรอ แว พย๊า แพ๊ตื๊อ แวแกแย เพรหน่าเจ่พู๊ เต๊เห่ เอ่ โทเฮ๊อ เนอเต๊เห่ แพ๊. หม่าแน๊เรอ คูอาเนอร์, คูเอชโคล์ เน๊อ คูมัมเร เด๊อ อา จว๊าเต่อ เกอ เน๊อ แวเออเต๊เห่ อาเง ติเร๊อ เบ เป่เกอ เหย่ซี ตาหมื่อตาเต เต๊เห่ นี๋.”
Valgt i Øjeblikket:
เห่ขุทวาลู่ 14: EKTNTGEN
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Wycliffe USA