Mateo 13
13
Sema Arig Maypangkep Na Mengipoyaw
(Mark 4:1-9; Luke 8:4-8)
1Nontan a akow, imawas si Jesus chiwa baliy et kimowan cha kilig niwa baybay a timokkong a mantoro. 2Nem chakel i tothoon emo-ngol Jesus, isonga iyankeb-ong si Jesus cha bangken gwared baybay et timokkong iy maramen imakgwat ira ma tothood ma kilig na baybay. 3Et chakel i naintoron Jesus cha si-kara babaen na ari-arig. Sa-kin ma arig, kigwan to i “Idi sa-kin akow, gwariy sa-kin toon kimowan a mengipoyaw na bothil cha payow. 4Idi towan ipoyaw iriy bothil, iya-kas i echom cha chalan et kiyakan na titit. 5Iya-kas ngoy echom cha kabatho-bathoan a kolang i pithek to, et simimit a chakos tep nat echalem i pithek to. 6Nem idi kimayang i akow, iya-josan et iyakpit tep nat iyandamot. 7Iya-kas pay ngoy echom cha kaskasbithan, nem ekibadeg i sebit chiwa tanem, et sinisi tho. 8Nem sema iren echom a bothil, iya-kas ired ma mapteng a pithek et iyandawes. Iyandawes i echom na sandadasos; sema echom, san-a-nem a polo; tan sema ngon echom, santetdon polo. 9Si-kayon manki-ki-ngel, nemnem jon pasiyay inki-ngelan jo.”
10Idi engkay, kimowan iriy disipolos Jesus cha kad-an ton inbaga ra i “Niyana arig i naiyosal mon mantoro na too?”
11Insongbat Jesus i “Si-kayoy inpalobos Afo Chiyos a mengamta na eg aamtaan nontan maypangkep na pantorayan to, nem sema ngo iren echom a too, nat iyaypalobos. 12Tep sema toon mahaawat a pasiya na inki-ngelan to, ma-choman iwa egwathan to, nem sema eg mahaawat a pasiya, angken sema otik a egwathan to, mepokaw. 13Isonga, naengiarigak tep angken chiyan mathaa, eg cha metaen, tan angken chiyan iki-ngeli, eg cha iki-ngelan tan eg cha ngo egwathan. 14Si-kara ngarod i pantongpalan na insolat Isaiah a profita a:
‘Angken jowan iki-ngeli,
eg jo egwathan,
tan angken jowan mathaa,
eg jo peschian.
15Tep seja iren too,
esolpeng ira.
Eg cha piyan a manki-ngel
tan nakinimit chiy matha ra
say nat mahasi-neng ira
tan nat mahaki-ngel ira
et nat mahaawat ira.
Tep no egwathan cha wa,
on-oli ched si-kak
say pemapteng ko ira,
nem eg cha piyan.’ #13:14-15Isaiah 6:9-10
16Nem si-kayo ngo, magesat kayo tep mahasi-neng tan mahaki-ngel kayo. 17Sejay a konen kod si-kayo, podnon chakel i profita tan maronong a tothoo nonta bayag den piyan chen meni-neng na jowan si-nenga, nem eg cha sini-neng, tan piyan cha ngon mengi-ngel na jowan iki-ngeli, nem eg cha inki-ngelan.”
Sema Banag Na Arig Na Mengipoyaw
(Mark 4:13-20; Luke 8:11-15)
18Intoloy Jesus a engowan i “Iki-ngeli yo say iiksplikar koy banag niwa arig na mengipoyaw. 19Sema iren bothil a iya-kas cha chalan, si-kara ira ma toon manki-ngel na esel Afo Chiyos maypangkep na pantorayan to, nem eg cha egwathan. Et onkowan alis Satanas a memingil cha nemnem cha na inki-ngelan cha. 20Sema ngo iren bothil a iya-kas cha kabatho-bathoan, si-kara ira ma toon mematin chakos na esel Afo Chiyos no iki-ngelan cha wa, et on-imdeng ira, 21nem eg ondamot iwa esel cha nemnem cha tan memati ira bengat na sankaatihan. Et no onmothok iriy diga-digat ono mepedigat ira na kagol na esel Afo Chiyos a piyati ra, bebnekan chen chakos i pamati ra. 22Sema iren bothil a iya-kas cha kaskasbithan, si-kara ma toon manki-ngel na esel Afo Chiyos, nem dingdingen cha kagol na chana-chanag cha tan sema kamkam chen onbaknang. Isonga, sema esel a inki-ngelan cha wa, mesisi et eg ma mandawes. 23Nem sema ngo iren bothil a iya-kas cha mapteng a pithek, si-kara ma toon manki-ngel na esel Afo Chiyos a egwathan cha, et gwariy panbanagan niwa esel cha biyag cha. Sema iren too, inges iren ma malemes a tanem. Mandawes i echom na sandadasos; sema echom, san-a-nem a polo; tan sema echom, santetdon polo.”
Sema Arig Maypangkep Na Do-bet
24Gwariy sa-kin arig a kigwan Jesus a “Sema pantorayan Afo Chiyos, inges toy sa-kin toon engipoyaw na mapteng a bothil na wheat cha payow to. 25Nem nonta sa-kin kalebian, idi maramen manjo-jo-kow iriy too, sema kakontra niwa too, kimowan a engipoyaw na bothil na do-bet chiwa payow a etaneman na wheat et iyamtik. 26Idi simimit ma iwa wheat et iyandawes ma, seman ngoy ingkasi-neng niwa do-bet. #13:26 Sema do-bet a iyaytanem, say itsora tho, singen wheat ingkathod mandawes. Et masi-neng ma i nat wheat, nem do-bet a nat mekan. 27Et sema iren bagaen niwa mahapayow, kimowan ired si-kathon inbaga ra i ‘Afo, wheat bengat i iyaytanem cha payow mo, anya? Nem toy edafoan na do-bet i?’ 28Insongbat niwa mahapayow a kigwan to i ‘Gwariy mahakontred si-kak a engipasing niyay.’ Et inbaga wa iren ma bagaen to i ‘Piyan mon a-chenan mi?’ 29Nem kigwan na mahapayow i ‘Enchi tep nahol ni mekibosbos iwa wheat. 30Iolay jo say mekibadeg iwa do-bet chiwa wheat ingkathod ma-ni. Konen ko wed ma man-eni i a-daen cha nin i do-bet say bedberan cha et poolan cha. No mekcheng ma iwan, anien cha wiy wheat et a-daen cha wa did agong ko.’ ”
Sema Arig Maypangkep Na Bothil Na Mostard
(Mark 4:30-32; Luke 13:18-19)
31Gwariy sa-kin arig a kigwan Jesus a “Sema pantorayan Afo Chiyos, inges toy bothil na mostard a intanem na tood garden to. 32Kaotihan a bothil cha emiin a bothil, nem no onbadeg ma tan ma-tengan, si-kathoy kahejangan cha emiin a tanem. Say banay to, inges toy kejow, et naengamag iriy titit na ogong ched panga tho.” #13:32 Sema mostard cha ili na Hodjos, ba-ba-degan iy say sema iren naiyaytanem chiya Pilipinas. Mebedin a naiyabot toy esolok a tedon mitro.
Sema Arig Maypangkep Na Para Debag Na Tinapay
(Luke 13:20-21)
33Gwara pay i sa-kin arig a kigwan Jesus a “Sema pantorayan Afo Chiyos, inges toy para debag a indaok na biid chakel a arina et say ondebag a emiin.”
34Arig iriy naiyosal Jesus a mantoro iren man a emiin cha tothoo. Nagwariy naiyosal ton mantoro, malaksid na arig. 35Inges niwan i inpasing Jesus a iyantoro say metongpal iwa kigwan na profita a:
“Osalen koy arig a mekitbal cha si-kara.
Konen kod si-kara iwa eg aamtaan
manipod nonta ingkaparsowa na dobong.” #13:35 Psalm 78:2
Sema Banag Na Arig Maypangkep Na Do-bet
36Et inpayas men Jesus iriy too, et simekep chiwa baliy. Kimowan ali chiy disipolos tod kad-an to et kigwan cha i “Pangaasim i iiksplikar mod si-kawi ma arig maypangkep niwa do-bet na payow.”
37Insongbat Jesus i “Sema engipoyaw na mapteng a bothil, si-kak a Anak na Too, 38tan sema payow, dobong. Sema mapteng a bothil, si-kara ma iyayka-chom cha pantorayan Afo Chiyos, tan sema iren do-bet, si-kara ma iyayka-chom cha Satanas. 39Sema kakontren engipoyaw na bothil na do-bet, si-kathoy Diablo. Sema timpo na pan-eni, kekcheng niyay a timpo, tan sema iren man-ani, si-kariy anghilis. 40Sema peni-nop niwa do-bet a mepoolan, inges ngo niwan i mepesamak no kekcheng niya timpo. 41Si-kak a Anak na Too, ito-nok iriy anghilis kon meni-nop a mengkal na emiin a naiyanpabasol na too tan sema iren naengamag na ngaaw. 42Ikepil cha ired ma kawad-an na afoy a eg ma-ma-chep. Et sema iren tothoo, onngogngogngog tan kale-kaletketen cha ngoy sangi red man. 43Nem sema iren maronong a tothoon Afo Chiyos, onnihal iren inges toy akow cha pantorayan Awecha. Isonga, si-kayon manki-ki-ngel, nemnem jon pasiyay inki-ngelan jo.”
Sema Iren Arig Na Iyay-emot A Kinabaknang Tan Sema Mapteng A Pirla
44Intoloy Jesus a engowan i “Sema pantorayan Afo Chiyos, inges toy paladon kinabaknang a iyaybeked payow. Idi tiyompongan na toon sipol, kaimdeng a pasiya. Inbeka tho mowan et kimowan a indaho ton emiin i kokowa tho. Et imoli wa et tiyongkal to ma payow.
45“Sema pantorayan Afo Chiyos, inges to ngoy naiyandahon naengana-anap na olay na pirlas a mapteng. 46Idi enafol na ebanol a pasiyen pirla, kimowan a indaho ton emiin i kokowa tho, et tiyongkal to ma pirla.
Sema Arig Maypangkep Na Balchow
47“Sema pantorayan Afo Chiyos, inges to ngoy balchow a iyaychetog cha baybay a iyaknaan na ekila-kilasin paideng. 48Idi iyapno ma balchow, kiyojod iren ma naiyanbalchow cha kilig niwa baybay a timokkong iren mena-nil niwa ninigay cha. Sema mapteng a mekan, in-ejan ched a-janan, nem sema ngaawes, inkepil cha. 49Inges niwan ngo diy mepesamak no kekcheng niya timpo. Sema iren anghilis, onkowan ali chen mengita-nil na tothoon ngaaw cha tothoon maronong. 50Et sema iren ngaaw, ikepil cha wa ired ma kawad-an na afoy a eg ma-ma-chep. Et onngogngogngog ira tan kale-kaletketen cha ngoy sangi red man.”
51Inbagen Jesus i “Igwathan jon emiin ira jay?”
Kigwan na disipolos to i “Ahow.”
52Et kigwan men Jesus i “Isonga, angken siyen maistoro na dinteg a naengachal iren man a podno maypangkep na pantorayan Afo Chiyos, inges to ngoy mahabaliy a naengibo-day na bado tan chaan alid ma naengikamiran to.”
Eg Cha Igwat Si Jesus Cha Nazareth
(Mark 6:1-6; Luke 4:16-30)
53Idi kincheng Jesus a engitoro iren ma arig, imekal chiwan 54et imolid ma sahop a bimadegan to. Idi mimothok chiwan, iyantorod ma synagog cha, et iyasdaaw ira ma engi-ngel a kigwan cha i “To emoy edafoan na daing niyay a too i? Tan toy edafoan na panakabalin ton mengemag na milagro i? 55Anak met na kalpintiro jay. Si Maria met i ineton podno, tan si James, Joseph, Simon, tan si Judas i aahi to. 56Sema iren aahi ton bibii, naiyan-iyan ngo ired jay. To emoy edafoan na daing to i?” 57Et iyasnit ira et eg ira emati.
Nem kigwan Jesus cha si-kara i “Say profita, nachijaw ched emiin a dogad, malaksid cha dogad to tan pamilja tho ngo.” 58Et nat engamag si Jesus na chakel a milagrod man tep eg ira ematid si-katho.
Valgt i Øjeblikket:
Mateo 13: KAR
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© 2023 Wycliffe Bible Translators, Inc. All rights reserved.
