Mǒhtûlû̌hǎhtûsa 9
9
Cǒmaradû̌ wṳ̂dò ayo̤ ta Nǒa
1Htodě Cǒmaradû̌ howi̤ Nǒa ta aphû̌makhû toǒ dě a hî̌ asî, “Phû̌ǒwo̤li̤ǒphǎ lǒkho dě ǒbebò lǒkho hǎkhû̌bǎo nî̌꤮. #Mǒhtûlû̌hǎhtûsa 1:28 2Ta̤phû̌ta̤li̤ lǒ̤bò htě a ǒ hǎkhû̌ toǒ, htû̌phû̌yṳphû̌ lǒ̤bò htě a wi̤ mǒla̤ toǒ, ta̤phû̌ta̤li̤ lǒ̤bò htě adû̌dû̌ apî̌tî̌tî̌nu toǒ ta tò̤phû̌ lǒ̤bò htě a ǒ shidû̌shite̤we̤kû sî toǒnu, a ǐshabò sîla̤ pě, dě a ǒbò dě sî ta̤pǒ ala̤ pě. 3Ta̤ lǒ̤bò htě asò̌phlǒ htûpwa̤ ǒ dě a gugwè cû̌htocû̌lò̤ toǒnu, na ǎ asî sǒsǒta na ǎ sǒdosǒlǎ htě he ǐlò̤wǐ sînu toǒ mî̌ anî̤ hǒ. Khònò̤dě he ǐ sî pṳ̂̌꤮ tacǎ hǒ.
4“Pò̤̌ta ta̤tacǎ dě sî ǎyǎnî̤ tò̤ numî̌ ta̤yî̌ htě sǐ ǒpa nû̌ûkûnu pwǎ. He hî̌ dǐdò sî ma̤tè̤hî̌dě ta̤htûpwa̤ akòshî̌kòtṳ mî̌ aǒ sǐlo̤. #Ta̤subusaba 7:26-27, 17:10-14, 19:26; Ta̤dǒhtû̌ǐ 12:16,23, 15:23 5Kòyò tapwa̤pwa̤ dè cû̌ma̤si kòyòhǎkhû̌phû̌ hî̌mî̌, he cèrò a pě. Ta̤phû̌ta̤li̤ tadodo dè ma̤si kòyòhǎkhû̌phû̌ tapwa̤pwa̤ hî̌nu ta̤phû̌ta̤li̤ htǒotado bǎ silè̌ ali̤. Kòyò tapwa̤pwa̤ dè ma̤si kòyò ahǔwa̤ tapwa̤pwa̤ dèhî̌mî̌ kò bǎ ma̤silè̌ nû̌û ali̤.
6Kòyòhǎkhû̌phû̌htǒo Cǒmaradû̌ bǒlò̤ sǒsǒta ana̤ akhû̌akhî,
ûpèpè̌꤮ bǎbǎ a ma̤si kòyòhǎkhû̌phû̌htǒo tapwa̤pwa̤nu,
kòyò ahǔwa̤ tapwa̤pwa̤
bǎ ma̤silè̌ nû̌û pě. #Ta̤lû̌htò̌ge 20:13; Mǒhtûlû̌hǎhtûsa 1:26
7“Sî lè̌dě, phû̌ǒwo̤li̤ǒphǎ lǒkho dě ǒplṳ̂ǒphǎ ǒbebò lǒkho ta hǎkhû̌bǎo dě ǒpîshîcû̌bò tû̌ lǒkho gûla̤ pṳ̂̌꤮ tò̤glò nî̌꤮.” #Mǒhtûlû̌hǎhtûsa 1:28
8Htodě Cǒmaradû̌ hî̌ Nǒa ta aphû̌makhû toǒ, 9“He dě, he ǎměǎgle he ta̤wṳ̂dò sî ta sîkhlisîlè hǎte̤gilò̤ nǒkò toǒ, 10Ta ta̤phû̌ta̤li̤ htě a ǒkû̌ta sî sǒkhlidû̌kû dě a hǎhtò̌ kû̌ ta sî numî̌, htû̌phû̌yṳphû̌ toǒ, ta̤phû̌ta̤li̤ htě abî̌ toǒ ta a plò̤ sîtoǒ lǒ̤bò, ta ta̤phû̌ta̤li̤ lǒ̤bò htě kò bǒlò̤ a dě a ǒhtûpwa̤ hǎkhû̌bǎo pṳ̂̌꤮ tacǎ hǒ. 11He ǎměǎgle he ta̤wṳ̂dòhtǒo ta sî htû̌nǒkò pě꤮ mî̌ he nodû̌sipe ta̤bǒlò̤ htě ata̤htûpwa̤ ǒnu toǒ ta shi tò̤ hǒ. Htû̌nǒkò mî̌ he nodû̌pî̌kèpe hǎkhû̌ ta shi tò̤ hǒhǒ.”
12Htodě Cǒmaradû̌ hî̌, “He glè mǎnǎ ta̤wṳ̂dò ata̤ma̤dòǐ tacǎ. Ta̤ma̤dòǐ htǒo a glèhtû bǎ he ta sî ta lǒ̤꤮ bò ata̤htûpwa̤ ǒ sîtoǒ ta nakhlilè hǎte̤gilò̤ dě nǒkò tuhtu toǒ a ta̤khòlṳ ajokû. 13He noǒlṳhtò̌ kǒwǒshibo dě poǒlṳkla. Kǒwǒshibo htǒonumî̌ heta̤wṳ̂dò ata̤ma̤dòǐ ta sî ta hǎkhû̌ htǒonu hǒ. 14He nohtò̌ poǒlṳ mǒla̤ ta kǒwǒshibo dě poǒlṳkla bò̌khòtè꤮ bǎbǎnu, 15He gènè̤htò̌to̤ heta̤wṳ̂dò dě he ta sî aplǎkû ta ta̤phû̌ta̤li̤ khli lǒ̤bòhtǒo nupě. Htû̌nǒkò mî̌ he nodû̌sipe ta̤ lǒ̤bò htě ata̤htûpwa̤ ǒnu toǒ ta shi tò̤ hǒ. 16He kè̌shǐ kǒwǒshibo ǒlṳhtò̌ dě poǒlṳkla bò̌khòtè꤮ bǎbǎ, he gènè̤htò̌to̤sǒ heta̤wṳ̂dò tûjûpwa̤ ta ata̤htûpwa̤ ǒ pṳ̂̌mi̤pṳ̂̌cǎ dě hǎkhû̌ htǒonu toǒ pě.”
17Htodě Cǒmaradû̌ hî̌ Nǒa, “Kǒwǒshibo htǒomî̌ ta̤ma̤dòǐ tacǎ htě he ma̤ ta̤wṳ̂dò ta ata̤htûpwa̤ ǒ pṳ̂̌mi̤pṳ̂̌cǎ dě hǎkhû̌ htǒonu toǒ hǒ.”
1 Nǒa ta aphû̌makhû toǒ
18Nǒa aphû̌makhûtoǒ htě a hǎhtò̌ kû̌ta apha dě sǒkhlidû̌kû toǒ numî̌ Shemǎ, Hamǎ ta Ya̤phè̌ sî htǒonu hǒ, dě Hamǎ mî̌ Khana̤ apha. 19Kòyòhǎkhû̌phû̌ lǒ̤bò htě a ǒpîshîcû̌bò hǎkhû̌ htǒotoǒ mî̌ akhlialè hǎte̤gilò̤bò ta Nǒa aphû̌makhû nusò̌su hǒ.
20Shisǔlò̤ htodě, Nǒa mî̌ pwa̤ma̤ǎhǔkla tapwa̤ dě a mî̌ pwa̤ htě a shǒ wǐgutṳ̌ sobîmṳ tapwa̤. 21Ti̤ni̤kha Nǒa omṳ sobîshisî̌yo̤ dě koyoyo a hǎmoǒ a hǐphû̌kû. 22Khana̤ apha Hamǎ nṳkè̌shǐ ta apha hǎmoǒ koyo dě a hǎhtò̌pwe̤ǐ awè̤ Shemǎ ta Ya̤phè̌. 23Htǒotaplǎ dě Shemǎ ta Ya̤phè̌ kò̌po̤htò̌ hǔgòpwî̌ aplekhû̌ htodě a cètîkhîginṳ hǐphû̌kû dě a nṳhtǔbǐ nû̌ûta apha. Asî kè̌dò̌klû̌ cètîkhîginṳ lǒkho pwǎ akhû̌akhî, a kè̌shǐ lǒkho apha hǎmoǒ koyo tò̤.
24Bǎ Nǒa omṳ shi dě ami̤sǎlî akha, aphû̌kònò Hamǎ ma̤kwè̌ nû̌û hî̌tènu a sî̌ya. 25Dě a ǐshokè Hamǎ aphû̌ Khana̤,
“Khana̤ khòbǎ ta̤ǐsho pě,
a htûtû̌
awè̤ sî ajû toǒ ajû pě nî̌꤮.” 26Htodě ahî̌po̤,
“Kǒ꤮ Cǒmara tûjûpwa̤, Shemǎ acǒmara, kò htû̌sò̌ǐ tû̌ta na nî̌꤮.
Khana̤ htûtû̌ Shemǎ ajû pě nî̌.
27Cǒmaradû̌ ma̤lè̤htò̌ tû̌bǎ Ya̤phè̌ agûla̤ pě nî̌꤮,
dě Ya̤phè̌ akhlialè toǒ ǒplǒ kû̌ta Shemǎ akhlialè toǒ pě nî̌꤮,
dě Khana̤ htûtû̌ Ya̤phè̌ ajû pě nî̌꤮.”
28Sahtò̌ bǎ shi dû̌bǐhto hǎkhû̌ akhanu, Nǒa ǒhtûpwa̤nṳpo̤ aně suya̤ ta yè̤shi. 29Dě Nǒa sikè bǎ aněǒ lǐ̤sǒta̤ya̤ ta yè̤shi akhanu.
Valgt i Øjeblikket:
Mǒhtûlû̌hǎhtûsa 9: KRC
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Wycliffe USA