Génesis 14
14
Abram la scoltay Lot
1Jich ora ochem ta muc' ajwalil yu'un Sinar te Amrafel, soc ochem ta muc' ajwalil yu'un Elasar te Arioc, soc ochem ta muc' ajwalil yu'un Elam te Quedorlaomer, soc ochem ta muc' ajwalil yu'un Goim te Tidal sbiile. 2Te chaneb muc' ajwaliletic la yac'beyic guerra te jo'eb muc' ajwaliletic, ja' te muc' ajwalil yu'un te lum Sodoma te Bera sbiil, soc te muc' ajwalil yu'un te lum Gomorra te Birsa sbiile, soc Sinab te muc' ajwalil yu'un lum Adma, soc Semeber te muc' ajwalil yu'un lum Zeboim soc te muc' ajwalil yu'un lum Bela, ja' te Zoar yan sbiile. 3Te jo'tule la stsob sbaic yu'un guerra ta bay spamlej Sidim, ja' ta bay te Mar Muerto, 4melel lajchayeb ja'wil la yac' spatanic ta stojol te Quedorlaomer, ta yoxlajunebal ja'wil la sjajch'esic c'op yu'un. 5Ta xchanlajunebal ja'wil tal te Quedorlaomer soc jayeb muc' ajwaliletic sjoinej, la stsalic te refaitaetic ta lum Astarot Karnaim, soc te zuzitaetic ta lum Ham, soc te emitaetic ta lum Save-quiriataim, 6soc te horeoetic ta witstiquil Seir. La snutsic bael c'alal ta spamlej q'uinal Parán te nopol yiloj sba soc te muc'ul jochol taquin q'uinale. 7Sujt'ic tel te Quedorlaomer soc te mach'atic sjoinej sba soc, c'otic ta Enmispat, te Cades yan sbiile. La sjinic te c'alal c'axic tel spisil te sq'uinal amalequetic, soc te sq'uinal amorreoetic te nainemic ta lum Hazezón-tamar.
8-9Yan te muc' ajwaliletic yu'un lum Sodoma, yu'un Gomorra, yu'un Adma, yu'un Zeboim soc yu'un lum Bela, te Zoar yan sbiile, bajt'ic ta spamlej Sidim. C'o stsac sbaic soc te chanebic, ja' la yil sbaic soc Quedorlaomer, Tidal, Amrafel soc Arioc. Chaneb muc' ajwaliletic la stsal sbaic soc jo'eb muc' ajwaliletic. 10Ta spamlej Sidim ay bayal ta jsejp lumq'uinal te ay xuch' tey a. Loq'uic ta anel te muc' ajwaliletic yu'un lum Sodoma soc yu'un lum Gomorra, tey ts'ajbajic coel ta xuch'. Te jaytul xan muc' ajwaliletic te jilemique, anic bael ta witstiquil.
11Jich te muc' ajwaliletic te ju' yu'unic tsalawe, la spojbeyic bael spisil sc'ulejal te lum Sodoma soc te lum Gomorra, soc spisil te swe'elique. Jich sujt'ic bael ta slumalic. 12Te bit'il nainem ta Sodoma te Lot te snichun Abram, la yiq'uic bael uuc soc spisil te sbiluque. 13Ja'uc me to, ay jtul loc' ta anel, c'o yalbey yaiy te Abram, te hebreo-winic, te nainem ta jijte'eltic yu'un te amorreo-winic te Mamre sbiil, te yermano sba soc te Escol soc te Aner, te jun yo'tan sbaic soc Abram.
14C'alal la yaiy stojol te Abram te bit'il ic'ot bael ta chuquel te yermano, la xchajbanbey yat'ejib te abatetic yu'un te ainemic ta snae, waxaclajuneb swaclajunwinic (318) ta jtul. La snutsic bael te muc' ajwaliletic, c'alal ta sq'uinal Dan. 15Ta ajc'ubal te Abram soc te swinictac c'o stsac sba soc te muc' ajwaliletique. La yejch'entesic soc la snutsic c'alal ta Hoba te ay ta norte yu'un te lum Damasco. 16La spojbey ta sc'abic te bitic yich'ojic baele. Jich ju' yu'un te Abram te la scoltay loq'uel ta c'abal te Lot, te snichun, soc te sbiluque, soc la nix yic' tel te antsetic yu'unic soc te yantic winiquetique.
Melquisedec la yac'bey bendición Abram
17C'alal sujt' tel te bit'il la stsal jilel te Quedorlaomer soc te jaytul ajwaliletic sjoineje, te Abram loc' ta tael yu'un te muc' ajwalil yu'un Sodoma. Tey taot ta spamlej yu'un Save, ja' te “Spamlej yu'un muc' ajwalil” sbiile. 18Te muc' ajwalil yu'un Salem, te Melquisedec sbiile, ja' te mach'a yich'oj yat'el ta sacerdoteil yu'un te Dios te toyol ay stuquele, la sloq'ues waj soc vino. 19Te Abram c'anbot bendición, jich albot yu'un:
—Ja'at Abram, ac'a yac'bat bendición te Dios te toyol ay stuquele, ja' te mach'a la spas te ch'ulchan balumilal. 20Bin nax yutsil te Dios te toyol ay stuquele, melel la yac'batix ta ac'ab te jayeb awajcontro —xi' sc'oplal.
Ta spisil biluquetic te yich'oj sujt'el tel Abram, jun la yac'bey smajt'anin ta slajunebal te Melquisedec.#Heb 5.6—7.17. 21Te Abram albot yu'un te muc' ajwalil yu'un Sodoma:
—Ac'bon te ants-winiquetic, ja'at ya awich' te biluque —xi' sc'oplal te Abram.
22Te Abram la sujt'esbey sc'op te muc' ajwalil yu'un Sodoma:
—Jc'axel la calix ta stojol Dios te toyol ay stuquele, te la spas te ch'ulchan balumilal, 23te bit'il ni jlijc'uc hilera ni jlijc'uc xchujq'uil xanabil ma xquich'bat, swenta yu'un ma me patiluc ya awal: “Jo'on la cac' ta c'ulej te Abram”, ma me xaucat. 24Ja' nax te bitic la swe'elin te abatetic joineje, ja' nax ya jc'an abi. Yan te Aner, te Escol soc te Mamre, ac'a yich'ic jayeb ya xc'ot ta swentaic stuquelic —xi'.
Valgt i Øjeblikket:
Génesis 14: TZOXCH
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Biblia en Tzeltal de Oxchuc y Tenejapa © Sociedad Bíblica de México, A.C., 2001.