Génesis 11
11
Muc'ul toyol ts'ajc' ta Babel
1Pajal sc'opic spisil ants-winiquetic ta balumilal, jun nax sc'opic. 2Ja'uc me to, loq'uic tel ta stojol sloq'uib c'aal, c'o staic muc'ul spamlej q'uinal ta Sinar, tey c'otic ta nainel a. 3Jich la yalbey sbaic:
—Ja' lec jpastic ladrillo, ya jchic'tic ta c'ajc' —xiic. Ja' ton c'ot yu'unic te ladrillo, soc ja' mescla c'ot yu'unic te xuch' te stuquel ya xloc' ta lumq'uinale. 4Soc jich la xchajbanic:
—La'ic jpastic muc'ul lum, soc ya me jpastic jun muc'ul toyol ts'ajc' te bayal ta caj moel, c'alal ta ch'ulchan ya xc'ot cu'untic. Ja' lec muc' ac'a c'otuc jc'oplaltic, ma me xpujc'otic bael ta spamal balumilal —xiic.
5Te Cajwaltic coj tel yil te muc'ul lum soc te muc'ul toyol ts'ajc' te yacalic ta spasel te winiquetique. 6Jich la yal te Cajwaltique: “Jun nax te lume, soc jun nax sc'opic ta spisilic. Jajch'iquix ta at'el, ma'yuc mach'a ya xju' ya xcomotic yu'un ta spasel bitic la snopix ta yo'tanic spasel. 7Jich yu'un ja' lec coucotic bael, ya jc'atp'unbeytic sc'opic, swenta yu'un jich ma xyaiybey sbaic sc'opic juju-jtul”, xi' te Cajwaltique.
8Jich la spuc bael te ants-winiquetic ta spamal balumilal te Cajwaltique. Quejch'aj ta pasel yu'unic te muc'ul lum te c'an spasique. 9Ja' swentail te bit'il Babel sbiil c'ot te lume, yu'un Dios la sc'atp'unbey sc'opic spisil ants-winiquetic, soc la spuc bael ta spamal balumilal.
Cajalcaj sts'umbal Sem
(1 Cr 1.24-27)
10Jich ay te lista yu'un sts'umbal Sem: Xchebalix ja'wil xc'axel pulemal a, ay jo'winic (100) ya'wilal te Sem c'alal ayin snich'an te Arfaxad sbiile. 11Jo'winic xcha'bajc' (500) ja'wil cuxin xan te Sem c'alal ayinemix a te Arfaxad, soc ay yantic snich'nab, queremetic soc ach'ixetic.
12Ay jo'lajuneb xcha'winic (35) ya'wilal te Arfaxad c'alal ayin snich'an te Sala sbiile. 13Patil te bit'il ayinemix a te Sala, oxeb xcha'bajc' (403) ja'wil cuxin xan te Arfaxad, soc ay yantic snich'nab, queremetic soc ach'ixetic.
14Ay lajuneb xcha'winic (30) ya'wilal te Sala c'alal ayin snich'an te Heber sbiile. 15Patil te bit'il ayinemix a te Heber, oxeb xcha'bajc' (403) ja'wil cuxin xan te Sala, soc ay yantic snich'nab, queremetic soc ach'ixetic.
16Ay chanlajuneb xcha'winic (34) ya'wilal te Heber c'alal ayin snich'an te Peleg sbiile. 17Patil te bit'il ayinemix a te Peleg, lajuneb xcha'winic xcha'bajc' (430) ja'wil cuxin xan te Heber, soc ay yantic snich'nab, queremetic soc ach'ixetic.
18Ay lajuneb xcha'winic (30) ya'wilal te Peleg c'alal ayin snich'an te Reu sbiile. 19Patil te bit'il ayinemix a te Reu, baluneb sbuluchwinic (209) ja'wil cuxin xan te Peleg, soc ay yantic snich'nab, queremetic soc ach'ixetic.
20Ay lajchayeb xcha'winic (32) ya'wilal te Reu c'alal ayin snich'an te Serug sbiile. 21Patil te bit'il ayinemix a te Serug, juqueb sbuluchwinic (207) ja'wil cuxin xan te Reu, soc ay yantic snich'nab, queremetic soc ach'ixetic.
22Ay lajuneb xcha'winic (30) ya'wilal te Serug c'alal ayin snich'an te Nacor sbiile. 23Patil te bit'il ayinemix a te Nacor, lajunwinic (200) ja'wil cuxin xan te Serug, soc ay yantic snich'nab, queremetic soc ach'ixetic.
24Ay baluneb xcha'winic (29) ya'wilal te Nacor c'alal ayin snich'an te Taré sbiile. 25Patil te bit'il ayinemix a te Taré, balunlajuneb swacwinic (119) ja'wil cuxin xan te Nacor, soc ay yantic snich'nab, queremetic soc ach'ixetic.
26Ay lajuneb xchanwinic (70) ya'wilal te Taré c'alal ayin snich'nab: Abram te jtule, Nacor te yane, soc Harán te yane.
Sts'umbal Taré
27Jich ay te lista yu'un te sts'umbal Taré: ja' snich'nab Taré te Abram, Nacor soc te Harán. Ja' snich'an Harán te Lot sbiile. 28Ja' neel laj bael te Harán, te snich'an Taré, tey nix ta bay ayine, ta bay Ur ta sq'uinal caldeoetic.
29Te Abram nujbin soc te Sarai. Te Nacor nujbin soc te Milca. Ja' yantsil-nich'nab Harán te Milca soc te Isca. 30Ja'uc me to, ma x'alaj te Sarai, ma'yuc jtuluc yal.
31Te Taré la yic' bael te snich'ane, ja' te Abram, soc te xch'in mam, ja' te Lot te snich'an Harán, soc te yalibe, ja' te Sarai te yinam Abram. Loq'uic bael ta Ur te ay ta sq'uinal caldeoetic, c'an bajt'uquic ta sq'uinal Canaán. Ja'uc me to, ja' nax c'otic ta lum Harán, tey c'otic ta nainel a. 32Ay jo'eb sbuluchwinic (205) ya'wilal te Taré c'alal laj, tey laj ta lum Harán.
Valgt i Øjeblikket:
Génesis 11: TZOXCH
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Biblia en Tzeltal de Oxchuc y Tenejapa © Sociedad Bíblica de México, A.C., 2001.