ମାଥିଉ 20
20
ଯୀଶୁ ଅଙ୍ଗୁର୍ ବାଡ଼୍ଦ କାମାୟ୍ କିନାକାର୍ କାତା ୱେଚ୍ଚାନ୍
1“ଈଶ୍ୱର ସାସନ୍ କିନି ରାଜିତାକେ ଇନେସ୍ ଲେକେ, ଇଦାଙ୍ଗ୍ ଆରେ ରଞ୍ଜି କାତା ୱେନାଟ୍। ର ମାନାୟ୍ ଦିନେକ୍ ନାଣାଙ୍ଗେ ତା ଅଙ୍ଗୁର୍ ବାଡ଼୍ଦ କାମାୟ୍ ଲାଗାୟ କିଦେଙ୍ଗ୍ କୁଲିୟାରିଙ୍ଗ୍ ଦାସ୍ତେଙ୍ଗ୍ ହାଚାନ୍। 2ଇମ୍ଣାକାରିଙ୍ଗ୍ ଗାଟାଆତାନ୍ ୱିଜାକାରିଙ୍ଗ୍ ର ଦିନ୍ତିଙ୍ଗ୍ ରଞ୍ଜି ଲାକା ରୁପାଡାବୁ ହିଦ୍ନାଙ୍ଗ୍ ଇଞ୍ଜି ୱେଚ୍ଚି ହେୱାରିଙ୍ଗ୍ ତା ଅଙ୍ଗୁର୍ ବାଡ଼୍ଦ କାମାୟ୍ ପକ୍ତାନ୍।
3ତା ଆର୍କାତ୍ ନାଞ୍ଜିଙ୍ଗ୍ ନାଣାଙ୍ଗେ ନଟା ୱେଡ଼ାଙ୍ଗ୍ ବଜାର୍ତ ହାଲ୍ଜି ହୁଡ଼୍ତାନ୍ ର ଦଳ୍ ଚିମ୍ରା ଆଜି ନିଲ୍ତାର୍ନା। 4ହେୱାରିଙ୍ଗ୍ ହେୱାନ୍ ୱେଚ୍ଚାନ୍, ଏପେଙ୍ଗ୍ ପା ନା ଅଙ୍ଗୁର୍ ବାଡ଼୍ଦ ହାଲ୍ଜି କାମାୟ୍ କିୟାଟ୍। ମିଙ୍ଗେଙ୍ଗ୍ ପା ହାମାନ୍ ଡାବୁଙ୍ଗ୍ ହିଦ୍ନାଙ୍ଗ୍। 5ହେୱାର୍ ହାଲ୍ଜି କାମାୟ୍ କିଦେଙ୍ଗ୍ ଲାଗାତାର୍। ୱେଡ଼ା ବାର୍ଟା ଆରେ ତିନ୍ଟା ୱେଡ଼ାଙ୍ଗ୍ ଟିକ୍ ହେଲେକେ ଆରେ କେତ୍ଜାଣ୍ କୁଲିୟାରିଙ୍ଗ୍ ତାହିୱାଜି କାମାୟ୍ କିଦେଙ୍ଗ୍ ଲାଗାୟ୍ କିତାନ୍। 6ଆରେ ପାଞ୍ଚ୍ଟାୱେଡ଼ାଙ୍ଗ୍ ଆରେରଗ ବଜାର୍ତାକେ ହାଲ୍ଜି ହୁଡ଼୍ତାନ୍। ଆରେ କେତ୍ଜାଣ୍ ନିଲ୍ତାର୍ନା। ହେୱାରିଙ୍ଗ୍ ୱେନ୍ବାତାନ୍, ୱେଡ଼ାବୁଡି କାମାୟ୍ କିୱାଦାଙ୍ଗ୍ ଇନା କିଦେଙ୍ଗ୍ ଇବେ ୱେଡ଼ା ରାତ୍ନାଦେରା?
7ହେୱାର୍ ହେୱାନିଙ୍ଗ୍ ୱେଚ୍ଚାର୍, ଇନେର୍ ପା ମାଙ୍ଗେଙ୍ଗ୍ କାମାୟ୍ କିଦେଙ୍ଗ୍ ହିର୍ବା ଆଦ୍ୱାତାର୍ନା। ହେୱାନ୍ ହେୱାରିଙ୍ଗ୍ ଇଚାନ୍, ଟିକ୍ ମାନାତ୍ ଲାଗିଙ୍ଗ୍ ଏପେଙ୍ଗ୍ ୱିଜାକାଦେର୍ ନା ଅଙ୍ଗୁର୍ ବାଡ଼୍ଦ ହାଲ୍ଜି କାମାୟ୍ କିୟାଟ୍।
8ହେନାଞ୍ଜ୍ ମିକାହାରେସ୍ ଅଙ୍ଗୁର୍ ବାଡ଼୍ଦି ହାଉକାର୍ ଗୁମସ୍ତାତାଙ୍ଗ୍ ୱେଚ୍ଚାନ୍, କୁଲିୟାରିଙ୍ଗ୍ ହିର୍ବା। ଇମ୍ଣାକାର୍ ୱିଜାକାର୍ତାଙ୍ଗ୍ ପାଚେ କାମାୟ୍ କିତାକାରିଙ୍ଗ୍, ଆଗେ ହେୱାରିଙ୍ଗ୍ ଡାବୁଙ୍ଗ୍ ହିୟାଟ୍। 9ଆରେ ଇମ୍ଣାକାର୍ ୱିଜାରିଙ୍ଗ୍ ଆଗେ କାମାୟ୍ କିତାର୍ନା ହେୱାର୍ ହାଜ୍ରି ହାରିହାରା ପାଚେ ହିୟାଟ୍। ମିକାହାରେସ୍ ପାଞ୍ଚ୍ଟାୱେଡ଼ାଙ୍ଗ୍ ଇମ୍ଣାକାର୍ କାମାୟ୍ କିଜି ମାଚାର୍ ହେ ୱିଜାର୍ ରଞ୍ଜି ଲାକା ରୁପାଡାବୁ ପାୟାଆତାର୍। 10ଆରେ ଇମ୍ଣାକାର୍ ନାଣାଙ୍ଗେ ହାଲ୍ଜି କାମାୟ୍ କିତାକାର୍, ହେୱାର୍ ବାବିକିତାର୍ ହେୱାରିଙ୍ଗ୍ ଆଦିକ୍ ହାଜ୍ରି ଗାଟାଆନିକ୍। ମାତର୍ ହେୱାର୍ ପା ରଞ୍ଜି ଲାକା ରୁପା ଡାବୁଙ୍ଗ୍ ପାୟାଆତାର୍। 11ମାତର୍ ହେଦାଙ୍ଗ୍ ପାୟାଆଜି ହେୱାର୍ ତା ମାଲିକ୍ ବିରୁଦ୍ତାକେ ନିନ୍ଦାକିଜି ୱେଚ୍ଚେଙ୍ଗ୍ ଲାଗାତାର୍। 12ମିକାହାରେସ୍ ପାଞ୍ଚ୍ଟାୱେଡ଼ାଙ୍ଗ୍ କାମାୟ୍ ଆରମ୍ କିତି ହଲିଆର୍ ମାତର୍ ର ଗଣ୍ଟାନେ କାମାୟ୍ କିତାର୍ନା। ଆରେ ଆପେଙ୍ଗ୍ ୱେଡ଼ାବୁଡି ଖାରାତାକେ କାମାୟ୍ କିତିସ୍ ପା ମାଙ୍ଗେଙ୍ଗ୍ ହିତ୍ତି ଏଚେକ୍ ଏନେଙ୍ଗ୍ ହେୱାରିଙ୍ଗ୍ ହିତାୟ୍।
13ମାତର୍ ମାଲିକ୍ ହେୱାର୍ ବିତ୍ରେତାଙ୍ଗ୍ ରକାନିଙ୍ଗ୍ ୱେଚ୍ଚାନ୍, ଟଣ୍ଡେନ୍! ଆନେଙ୍ଗ୍ ମିଙ୍ଗେଙ୍ଗ୍ ଅନ୍ୟାୟ୍ କିଦୁଙ୍ଗା। ଏପେଙ୍ଗ୍ ରଦିନ୍ତି ହାଜ୍ରି ଡାବୁଙ୍ଗ୍ ଆଜି କାମାୟ୍ କିଦେଙ୍ଗ୍ ଏପେଙ୍ଗ୍ ୱିଜାକାଦେର୍ ପା ତ ରାଜି ଆଜି ମାଚାଦେର୍। 14ଏପେଙ୍ଗ୍ ଏଚେକ୍ନେ ଡାବୁଙ୍ଗ୍ ଆସ୍ତି ହାଲାଟ୍। ମିଙ୍ଗେଙ୍ଗ୍ ଆନେଙ୍ଗ୍ ଏଚେକ୍ ହିତ୍ତାଙ୍ଗ୍ନା ର ଗଣ୍ଟା କାମାୟ୍ କିତାକାରିଙ୍ଗ୍ ପା ହେ ଏଚେକ୍ ହିଦେଙ୍ଗ୍ ନାମାନ୍। 15ନା ଦନ୍ତିଙ୍ଗ୍ ନା ଇଚାରେ କର୍ଚ କିଦେଙ୍ଗ୍ ଇନାକା ନା ଆଦିକାର୍ ଆକାୟ୍? ଆନେଙ୍ଗ୍ ଜେକନିକାରିଙ୍ଗ୍ ଦାନ୍ ହିତିସ୍ ଏପେଙ୍ଗ୍ ଇନାକା ଆକାର୍ ଆନାଦେରା?”
16ଇ କାତା ୱେଚ୍ନିଲେକେ କିଜି ୱେଚ୍ଚି ୱିସ୍ତି ପାଚେ ଯୀଶୁ ହେୱାରିଙ୍ଗ୍ ୱେଚ୍ଚାନ୍, “ଇମ୍ଣାକାର୍ ନଙ୍ଗୟ୍ ପାଚେ ମାନାର୍ ହେୱାର୍ ଆଗେ ଆନାର୍। ଆରେ ଇମ୍ଣାକାର୍ ଆଗେ ମାନାର୍ ହେୱାର୍ ପାଚେ ଆନାର୍।”
ଯୀଶୁ ଜାର୍ ହାଃନି ବିଷୟରେ ତିନ୍ହଟ୍ ୱେଚ୍ଚାନ୍
(ମାର୍କ. ୧୦:୩୨-୩୪; ଲୁକ. ୧୮:୩୧-୩୪)
17ଯୀଶୁ ତା ଚେଲାର୍ ହୁଦାଙ୍ଗ୍ ଯିରୁଶାଲାମ ସହର୍ତାକେ ହାନିହିଙ୍ଗ୍ ବାରଜାଣ୍ ଚେଲାହିରିଙ୍ଗ୍ କୁକ୍ଚି ହାଜ୍ଦ ହେୱାରିଙ୍ଗ୍ ୱେଚ୍ଚାନ୍। 18“ୱେନାଟ୍, ଆସେଙ୍ଗ୍ ଯିରୁଶାଲାମ ସହର୍ତାକେ ହାନାସ୍। ଆରେ ସରଗ୍ତାଙ୍ଗ୍ ୱାଜିମାଚି ମାନାୟ୍ ହିମ୍ଣା ଈଶ୍ୱର ହେବାକିନି ମୁଡ଼୍ଦି ପୁଜାରିର୍ ଆରେ ଯିହୁଦି ଦରମ୍ନି ପଣ୍ଡିତାର୍ କେଇଦ ଆହିଆନାନ୍। 19ଆରେ ହେୱାର୍ ହେୱାନିଙ୍ଗ୍ ଜିବୁନ୍ ହିଲାଦାଙ୍ଗ୍ ମାଡ୍ହିଜି ଇନସ୍ତାକିଜି କୋରଡା ହୁଦାଙ୍ଗ୍ ଟ୍ରାକ୍ଚି ପାଗ୍ନାର୍। କୃଶକାଟ୍ତାକେ ଦୁପ୍ଚି ଅସ୍ତେଙ୍ଗ୍ ବିନ୍ଜାତିର୍ କେଇଦ ଆହିକିନାର୍। ଆରେ ତିନ୍ଦିନ୍ ହାଚି ପାଚେ ହେୱାନ୍ ଆରେରଗ ଯିବୁନ୍ ପାୟା ଆନାନ୍।”
ର ଆୟାତି ଗୁୱାରି
(ମାର୍କ. ୧୦:୩୫-୪୫)
20ତାପାଚେ ଜେବଦି ଡକ୍ରୁହି ତା ମେହିରିଙ୍ଗ୍ ଆସ୍ତି ଯୀଶୁ ଲାଗାୟ୍ ୱାତାତ୍। ଆରେ ହେଦେଲ୍ ଜୱାର୍କିଜି ଯୀଶୁତାଙ୍ଗ୍ ଇନାକା ଇଚ୍କେ ଏନ୍ତାତ୍। 21ହେବେ ଯୀଶୁ ହେୱାରିଙ୍ଗ୍ ୱେନ୍ବାତାନ୍, “ଏପେଙ୍ଗ୍ ଇନାକା ଇଚା କିନାଦେରା?” ହେୱାର୍ ହେୱାନିଙ୍ଗ୍ ୱେଚ୍ଚାର୍, “ମି ସାସନ୍ କିନି ରାଜିତାକେ ହେଲେକେ ନା ଇ ରିକାର୍ ହିମ୍ଣାଙ୍ଗ୍ ବିତ୍ରେତାଙ୍ଗ୍ ରକାନିଙ୍ଗ୍ ନି ତିନି ବାଗାୟ୍ ଆରେ ରକାନିଙ୍ଗ୍ ଡେବା ବାଗାୟ୍ କୁଚ୍ଚେଙ୍ଗ୍ ଆଦିକାର୍ ମାଙ୍ଗେଙ୍ଗ୍ ହିଦା।”
22ମାତର୍ ଯୀଶୁ ୱେଚ୍ଚାନ୍, “ଏପେଙ୍ଗ୍ ଇନାକା ଏନ୍ତାନାଦେରା ହେଦାଙ୍ଗ୍ ମିଙ୍ଗେଙ୍ଗ୍ ଜାଣା ଆକାୟ୍। ଆନେଙ୍ଗ୍ ଇନେସ୍ କିଜି ଦୁଃକ୍ ପାୟାଆନାଙ୍ଗ୍ ଏପେଙ୍ଗ୍ ପା ହେ ଏନେଙ୍ଗ୍ ଦୁଃକ୍ ପାୟ୍ଆଦେଙ୍ଗ୍ ଇଚାକି?
23ହେବେ ହେୱାର୍ ହେୱାନିଙ୍ଗ୍ ୱେଚ୍ଚାର୍ ଆପେଙ୍ଗ୍ ଆଡ୍ନାପ୍।” ଯୀଶୁ ହେୱାରିଙ୍ଗ୍ ୱେଚ୍ଚାନ୍, “ଆନେଙ୍ଗ୍ ଇମ୍ଣି ଦୁଃକ୍ ପାୟା ଆଦେଙ୍ଗ୍ ହାନାଙ୍ଗ୍, ଏପେଙ୍ଗ୍ ପା ହେ ଏନେଙ୍ଗ୍ ଦୁଃକ୍ ପାୟ୍ଆନାଦେର୍, ଆରେ ଆନେଙ୍ଗ୍ ଇନେସାଜି ହାଃନାଙ୍ଗ୍ ଏପେଙ୍ଗ୍ ପା ହେ ଏନେଙ୍ଗ୍ ଆଜି ହାଃନାଦେର୍ କି? ମାତର୍ ନା ତିନି କି ଡେବା ବାଗାୟ୍ କୁଚିକିଦେଙ୍ଗ୍ ନା ଆଦିକାର୍ ଆକାୟ୍। ମାତର୍ ଈଶ୍ୱର ଇନେର୍ କାଜିଙ୍ଗ୍ ବାହା ରସ୍ତାର୍ନା ହେୱାର୍ କୁଚ୍ନାର୍।”
24ଜେକନି ଦାସ୍ ଜାଣ୍ ଚେଲାହିର୍ ଇବେଣ୍ ୱେନ୍ଞ୍ଜି ଟଣ୍ଡ୍ରିୟାରିଙ୍ଗ୍ ବେସି ରିସାଆତାର୍। 25ମାତର୍ ଯୀଶୁ ହେୱାରିଙ୍ଗ୍ ଲାଗେ କୁକ୍ଚି ୱେଚ୍ଚାନ୍, “ଇ ଜଗତ୍ନି ବିନ୍ଜାତି ରାଜା ଆରେ ତା ସେନାପତିର୍ ଚଚିୟାଆଜି ମାନାୟାର୍ ଜପି ସାସନ୍ କିଦେଙ୍ଗ୍ ଇଚା କିନାରା। 26ମି ବିତ୍ରେ ହେଲେକେ ଆକାୟ୍। ମାତର୍ ମି ବିତ୍ରେ ଇନେର୍ ଗାଜାକାନ୍ ଆଦେଙ୍ଗ୍ ଇଚାକିନାନ୍। ହେୱାନ୍ ମି ହେବାକିନାକାନ୍ ଆଏନ୍। 27ଆରେ ଇନେର୍ ଗାଜାକାନ୍ ଆଦେଙ୍ଗ୍ ମାନ୍ କିନାନ୍। ହେୱାନ୍ ମି ହଲିଆ ଆଦେଙ୍ଗ୍ ଆନାତ୍। 28ହେଲେକେ ଆନେଙ୍ଗ୍ ସରଗ୍ତାଙ୍ଗ୍ ୱାଜିମାଚି ମାନାୟ୍ ହିମ୍ଣା ପା ହେବା ପାୟା ଆଦେଙ୍ଗ୍ ୱାୱାତାନ୍ନା। ମାତର୍ ୱିଜାକାର୍ କାଜିଙ୍ଗ୍ ହାଃଜି ମୁକ୍ତି ହିଦେଙ୍ଗ୍ ୱାତାନ୍ନା।”
ଯୀଶୁ ରିକାର୍ କାଣା ମାନାୟାରିଙ୍ଗ୍ ହାର୍କିନାନ୍
(ମାର୍କ. ୧୦:୪୬-୫୨; ଲୁକ. ୧୮:୩୫-୪୩)
29ଚାପାଚେ ଯୀଶୁ ଆରେ ତା ଚେଲାହିର୍ ଯିରିହୋତାଙ୍ଗ୍ ହାନିହିଙ୍ଗ୍ ବେସିହେନି ମାନାୟ୍ ତା ପାଚେ-ପାଚେ ହାଚାର୍। 30ହେବେ ରିକାର୍ କାଣାର୍ ରାସ୍ତା କାଣ୍ଡିତ କୁଚ୍ଚି ମାଚାର୍। ଏଚେପାଦ୍ନା ଯୀଶୁ ହେ ହାଜ୍ଦିଙ୍ଗ୍ ହାନାନା ଇଞ୍ଜି ୱେନ୍ଞ୍ଜି ଗାଜାକାଟ୍ କିଜି ୱେଚ୍ଚାର୍, “ଏ ଦାଉଦ ରାଜା ମେହି ଯୀଶୁ, ମାଙ୍ଗେଙ୍ଗ୍ ଦୟାକିଦା!” 31ମାତର୍ ମାନାୟାର୍ ହେୱାରିଙ୍ଗ୍ ଚିମ୍ରା ଆଦେଙ୍ଗ୍ ଦମ୍କାଇକିଜି ୱେଚ୍ଚାର୍, ମାତର୍ ହେୱାର୍ ଆରେ ଗାଜାକାଟ୍ କିଜି ୱେଚ୍ଚାର୍, ଏ ମାପୃ, ଦାଉଦ ରାଜା ମେହି ଯୀଶୁ, ମାଙ୍ଗେଙ୍ଗ୍ ଦୟାକିଦା।
32ହେବେ ଯୀଶୁ ନିଲ୍ଚି ହେୱାରିଙ୍ଗ୍ କୁକ୍ଚି ୱେନ୍ବାତାନ୍, “ଆନେଙ୍ଗ୍ ମି କାଜିଙ୍ଗ୍ ଇନାକା କିନାଙ୍ଗ୍ ଇଞ୍ଜି ଏପେଙ୍ଗ୍ ଇଚା କିନାଦେରା?”
33ହେୱାର୍ ହେୱାନିଙ୍ଗ୍ ୱେଚ୍ଚାର୍, ଏ ମାପୃ ଇନେସ୍ କିଜି ପା ମା କାଣ୍କୁ ହୁଡ଼ିକିଦା। 34ଆରେ ଯୀଶୁ କାର୍ମାଆଜି ହେୱାର୍ କାଣ୍କୁକାଙ୍ଗ୍ ଆସ୍ପିତି ଦାପ୍ରେ ହେୱାର୍ କାଣ୍କୁ ହୁଡ଼୍ତାର୍ ଆରେ ତା ଲାହାଙ୍ଗ୍ ପାଚେ-ପାଚେ ହାଚାର୍।
Valgt i Øjeblikket:
ମାଥିଉ 20: PEGNT
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
