Luka 23
23
E jevrejengere vođe optužinena e Isuse ko Pilat
1Tegani sare kola inele ko sabor uštine hem legarde e Isuse koro Pilat, koro upravniko e rimesoro, 2hem lelje te vaćeren protiv oleste: “Akale manuše arakhljam sar zavodini amare narodo hem vaćeri lenđe te na platinen o porez e carose, a pese vaćeri dai o Hrist, o caro.”
3Tegani o Pilat pučlja e Isuse: “Tu li injan o caro e Jevrejengoro?”
A o Isus phenđa: “Ađahari sar so pheneja.”
4Tegani o Pilat phenđa e šerutne sveštenikonenđe hem e narodose: “Na arakhava nisavi krivica upro akava manuš!”
5Ali on na ačhavde te vičinen: “Ple sikavibnaja vazdela pobuna maškaro manuša ki sa i phuv e Jevrejengiri. Lelja te ćerel adava ani regija Galileja hem alo čak đi akate ani diz Jerusalim!”
O Isus anglo Irod
6A kad o Pilat šunđa adava, pučlja len nane li o Isus Galilejco. 7I kad phende lese dai o Isus Galilejco, o Pilat bičhalđa le koro Irod, kova vladinđa ani Galileja. A baš adala dive o Irod inele ano Jerusalim.
8Kad o Irod dikhlja e Isuse, but inele radosno adalese so pana angleder manglja te dikhel le adalese so but šunđa olestar hem nadinđa pe da o Isus ka ćerel nesavo čudo anglo leste. 9But so pučlja le, ali o Isus ništa na phenđa lese. 10A adari terđona ine o šerutne sveštenici hem o učitelja e Zakonestar vaćerindoj zorale protiv o Isus. 11A o Irod hem lesere vojnici ponizinde e Isuse hem marde muj oleja. Urjavde le ano carikano fostani hem tegani o Irod bičhalđa le palal koro Pilat. 12Angleder o Irod hem o Pilat na inele ano šukar odnosija, a adava dive ule amala.
O Pilat osudini e Isuse ko meriba
13A o Pilat vičinđa kora peste e šerutne sveštenikonen, e vođen hem e narodo, 14i phenđa lenđe: “Anđen kora mande akale manuše vaćerindoj da vazdela pobuna maškaro narodo. Ače, angla tumende pučljum le adalestar, ali na arakhljum nisavi krivica zaki savi tumen optužinena le. 15A ni o Irod na arakhlja upro leste krivica i adalese bičhalđa le palal kora amende. Akava manuš na ćerđa ništa so zaslužini meriba. 16Adalese samo ka naredinav te šibinen le, i ka mukav le.” 17[A valjanđa zako prazniko, palo adeti, te mukel lenđe jekhe phandle manuše.]
18Ko adava sare so inele adari vičinde: “Mudar adale manuše, a muk amenđe e Varava!” 19(O Varava inele phandlo adalese so učestvujinđa ani pobuna savi inele ano Jerusalim hem adalese so mudarđa nekas.)
20A o Pilat, adalese so manglja te mukel e Isuse, palem vaćerđa olencar,
21ali on vičinde: “Čhiv le ko krsto! Čhiv le ko krsto!”
22A o Pilat palo trito puti phenđa lenđe: “A savo bišukaripe ćerđa akava manuš? Na dikhava sose valjani te merel. Ka naredinav te šibinen le, i ka mukav le.”
23Ali on na ačhavde te vičinen oto sa o glaso rodindoj te čhivel e Isuse ko krsto. I lengoro vičiba inele sa po zoralo. 24I adalese o Pilat odlučinđa te del len adava so mangena. 25Muklja okole kole mangle, kova inele phandlo zbog i pobuna hem zbog o mudariba, a e Isuse dinđa ko vojnici te ćeren oleja adava so o narodo manglja.
E Isuse čhivena ko krsto
26Sar o vojnici legarena ine e Isuse, dolinde nesave Simone tari Kirinija sar avela ine taro polje. Čhivde o krsto upro leste hem terinde le te akhari le palo Isus. 27Palo Isus dželo baro narodo maškaro kolende inele hem o đuvlja kola runde hem žalinde le.
28Ali o Isus irinđa pe nakoro lende hem phenđa lenđe: “Đuvljalen taro Jerusalim, ma roven pala mande, nego roven pala tumende hem tumare čhavende. 29Adalese so, ače, avena o dive kad o manuša ka vaćeren: ‘Bahtalei o đuvlja kolai bizo čhave, kola na bijande hem na dinde čuči.’ 30Tegani
‘ka phenen e planinenđe: Peren upra amende!
hem e bregonenđe: Učharen amen!’
31Adalese so, te ađahar ćerela pe mancar kova injum sar jekh sapano kaš, sigurno po bišukar ka ćerel pe e manušencar kolai sar o šuke kašta.”
32A e Isuseja inele legarde pana duje zločinconen te oven mudarde. 33I kad resle ko than vičime Kokalo e šeresoro, o vojnici čhivde ko krsto e Isuse hem čhivde adale zločinconen ko avera krstija: jekhe oti lesiri desno, a e dujtone oti lesiri levo strana.
34O Isus phenđa: “Dade, oprostin lenđe, adalese so na džanen so ćerena!”
Tegani o vojnici frdinde barbuti hem ađahar delinde maškara pumende e Isusesere šeja.
35O narodo terdino adari te dikhelfse, a e jevrejengere vođe marde muj e Isuseja vaćerindoj: “Averen spasinđa; akana nek spasini korkoro pes tei čače ov o Hrist e Devlesoro, lesoro Izabirime!”
36Hem o vojnici marde muj e Isuseja. Ale uzalo leste hem kaninde le ušli mol, 37vaćerindoj: “Te injan o caro e jevrejengoro, spasin tut!”
38A upreder lesoro šero terdino znako kote inele pisime: Akavai o caro e jevrejengoro .
39Jekh okole zločinconendar vređinđa e Isuse vaćerindoj: “Te injan o Hrist, sose na spasineja tut hem amen?”
40A o dujto zločinco ukorinđa adale so vređinđa e Isuse: “Sar na daraja e Devlestar? Hem tu injan ađahar osudime sar soi ov. 41Amen pravedno injam kaznime zbog amare bišukar buća, a ov na ćerđa nisavo bišukaripe.”
42Tegani phenđa: “Isuse, setin tut mandar kad ka ave ano to carstvo.”
43A o Isus phenđa lese: “Čače vaćerava će, avdive ka ove mancar ano raj!”
E Isusesoro meriba
44A ko ekvaš o dive, i tomina učharđa sa i phuv hem ađahar inele trin saća, 45adalese so o kham kalilo. A e hramesiri zavesa pharavdili ko ekvaš.
46A o Isus vičinđa oto sa o glaso: “Dade, tuće ano vasta mukava o duho mlo!” Kad phenđa adava, muklja pli duša.
47A kad e rimesoro kapetani dikhlja so ulo, lelja te slavini e Devle, vaćerindoj: “Čače akava manuš inele pravedniko!”
48But manuša kola čedinde pe adari te dikhenfse, irindoj čhere khuvena pe ine ko gruđa adalese so ine lenđe žao. 49A sa e Isusesere amala, đi o đuvlja kola phirde palo leste pana tari Galileja, odural terdine hem dikhle sa adava.
E Isusesoro paruniba
50-51A inele jekh manuš palo anav Josif tari Arimateja, diz ani Judeja. Ov inele šukar hem pravedno manuš kova adžićeri ine o carstvo e Devlesoro. Iako inele člano oto e jevrejengoro sabor, na složinđa pe adaleja so inele odlučime te roden o Isus te ovel mudardo. 52Ov dželo koro Pilat hem rodinđa te den le o telo e Isusesoro. 53Tegani huljavđa e Isusesoro telo taro krsto, paćarđa le čaršaveja hem čhivđa le ano grobo savo inele ćerdo ano bar, ano savo pana niko na inele čhivdo. 54Adava dive inele Dive zako pripremiba zako savato savo samo so na ine te avel.
55A o đuvlja, kola ale e Isuseja tari Galileja, džele e Josifeja hem dikhle sar e Isusesoro telo inele čhivdo ano grobo. 56I irinde pe adari kaj bešena ine hem spreminde o mirisija hem o mastija savencar te makhen e Isusesoro telo. Ali ko savato odmorinde pe poštujindoj i naredba oto Zakoni e Mojsijasoro.
Valgt i Øjeblikket:
Luka 23: RAB
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
