Jovan 6
6
O Isus parvari više oto pandž hiljade manušen
1Palo adava o Isus irinđa pe ki Galileja hem dželo ki istočno strana oto e Galilejakoro jezero (vičime hem: e Tiberijakoro jezero), 2a palo leste džele but manuša, adalese so dikhle o čudesna znakija save ćerđa sasljarindoj e nambormen. 3O Isus uklinđa ki gora hem bešlo ple učenikonencar. 4(A avela ine paše i Pasha, e jevrejengoro prazniko.)
5I kad o Isus vazdinđa plo šero te dikhel, dikhlja but narodo sar avela nakoro leste, i pučlja e Filipe: “Kaj šaj te čina maro sa akale manušenđe te han?”
6Adava o Isus pučlja e Filipe sar te čhivel le ko test, adalese so već džanđa so ka ćerel.
7A o Filip phenđa lese: “Ni dušel srebrna kovanice naka ovel ine dovoljno te čina sarijenđe te han barem hari.”
8A aver oto lesere učenici – o Andreja, o phral e Simonesoro e Petresoro – phenđa e Isusese: 9“Akatei jekh čhavoro kas isi pandž mare oto ječam hem duj tikore maćhe. Ali adava nane ništa zako sa edobor manuša.”
10O Isus phenđa: “Čhiven e manušen te bešen.”
A ko adava than inele but čar, hem tegani đi ko pandž hiljade murša bešle.
11Tegani o Isus lelja okola mare, zahvalinđa e Devlese, i dinđa len e manušenđe kola bešle, a ađahar ćerđa hem e maćhencar. I sare hale edobor kobor mangle.
12Kad sare čalile, o Isus phenđa ple učenikonenđe: “Čeden sa okolestar so ačhilo oto hajba, te na frdel pe ništa.”
13I on čedinde sa adava so ačhilo oto pandž mare oto ječam save o manuša hale, hem adaleja pherde dešuduj korpe.
14Kad o manuša dikhle o čudesno znako savo o Isus ćerđa, phende: “Akavai čače o Proroko savo valjani te avel ko sveto!”
15A o Isus džanđa so on inele spremna ki zor te čhiven le te ovel lengoro caro, i palem cidinđa pe ki gora, korkoro.
O Isus phirela upro pani
16Kad lelja te raćol, lesere učenici huljile đi ko jezero, 17đerdinde ko čamco hem lelje te džan prekalo jezero, nakori diz Kafarnaum. Već peli i rat, a o Isus pana na alo ine koro lende. 18I lelja te phudel jekh zorali barval hem upro jezero vazdinde pe o talasija. 19Kad veslinde sar pandž đi ko šov kilometarija, dikhle e Isuse sar phirela upro pani hem avela nakoro čamco, hem darandile.
20A o Isus phenđa lenđe: “Me injum! Ma daran!”
21Tegani on lelje le peja ano čamco, i o čamco otojekhvar inele ki phuv nakori savi plovinde.
O Isusi sar o maro savo dela dživdipe
22Tejsato dive o manuša kola ačhile ki aver strana oto jezero setinde pe so adari inele samo jekh čamco hem da o Isus na đerdinđa ano čamco ple učenikonencar, nego da on džele korkore. 23A nesave čamcija tari diz Tiberijada resle paše uzalo than kaj o Gospod zahvalinđa e Devlese zako maro hem dinđa len te han. 24Kad o manuša dikhle da adari nane ni o Isus ni lesere učenici, čhivde pe ano čamcija hem džele ko Kafarnaum te roden le.
25A kad arakhle le ki aver strana oto jezero, pučle le: “Učitelju, kad aljan akari?”
26O Isus phenđa lenđe: “Čače, čače vaćerava tumenđe, tumen na rodena man adalese so haliljen o čudesna znakija, nego adalese so haljen o maro hem čaliljen. 27Ćeren buti, ali na zako hajba savo nakhela, nego zako hajba savo trajini zako večno dživdipe, a adava ka dav tumen me, o Čhavo e manušesoro, adalese so o Devel o Dad dinđa man vlast zako adava.”
28Tegani pučle le: “So valjani te ćera sar te šaj ćera o buća save o Devel rodela amendar?”
29A o Isus phenđa lenđe: “Akavai i buti savi o Devel rodela tumendar te ćeren: te verujinen ano okoleste kole ov bičhalđa.”
30Tegani pučle le: “Savo, onda, čudesno znako tu ka mothove amenđe, te šaj dikha hem te verujina će? So ka ćere? 31Amare pradada ani pustinja hale o maro vičime mana, sar soi pisime ano Sveta lila: ‘Dinđa len maro taro nebo te han.’”
32O Isus phenđa lenđe: “Čače, čače vaćerava tumenđe, na dinđa tumen o Mojsije maro taro nebo, nego mlo Dad. Hem akana dela tumen e čačipnasoro maro taro nebo. 33Adalese so, e Devlesoroi maro okova kova huljela taro nebo hem dela dživdipe e svetose.”
34Tegani phende lese: “Gospode, de amen uvek adava maro.”
35A o Isus phenđa lenđe: “Me injum o maro savo dela dživdipe. Ko avela kora mande, naka ovel bokhalo, hem ko verujini ana mande, nikad naka ovel žedno. 36Ali, sar so phenđum tumenđe, dikhljen man, a palem na verujinena. 37Sarijen kolen mlo Dad dela man, ka aven kora mande hem esavken nikad naka ispudinav. 38Adalese so me na huljiljum taro nebo te ćerav mli volja, nego i volja Okolesiri kova bičhalđa man. 39A akajai i volja Okolesiri kova bičhalđa man: te na našalav nijekhe okolendar kolen dinđa man, nego te vazdav len taro mule ko Poslednjo dive. 40Adalese soi akaja i volja mle Dadesiri: đijekh kova dikhela e Čhave hem verujini ano leste, te ovel le večno dživdipe hem me te vazdav le taro mule ko Poslednjo dive.”
41Tegani o Jevreja lelje te gunđinen protiv o Isus adalese so phenđa: “Me injum o maro savo huljilo taro nebo.”
42Hem vaćerena ine: “Nane li akava o Isus, e Josifesoro čhavo? Amen džanaja lesere dade hem e daja. A sar akana vaćeri: ‘Huljiljum taro nebo’?”
43A o Isus phenđa lenđe: “Ma gunđinen maškara tumende! 44Nijekh našti te avel kora mande te o Dad kova bičhalđa man na privucini le, a me ole ka vazdav taro mule ko Poslednjo dive. 45Sar so pisinde o Proroci: ‘Sare ka oven sikavde e Devlestar.’ Đijekh kova šunđa e Dade hem siklilo olestar, avela kora mande. 46Niko na dikhlja e Dade sem okoleste kova alo olestar – ov dikhlja e Dade. 47Čače, čače vaćerava tumenđe: Đijekh kova verujini ana mande, isi le večno dživdipe. 48Me injum o maro savo dela dživdipe. 49Tumare pradada hale mana ki pustinja, ali sare mule. 50Ali akava maro savo huljela taro nebo esavkoi da ko hala lestar na merela. 51Me injum o dživdo maro savo huljilo taro nebo. Ko ka hal akava maro, večno ka živini. Akavai maro mlo telo, savo ka dav te šaj o manuša taro sveto živinen.”
52Tegani o Jevreja lelje zorale te raspravinen pe maškara pumende, pučindoj: “Sar akava manuš šaj te del amen plo telo te ha?”
53A o Isus phenđa lenđe: “Čače, čače vaćerava tumenđe: Te na hana o telo e Manušesere Čhavesoro hem te na pijena lesoro rat, nane tumen dživdipe ana tumende. 54Ko hala mlo telo hem pijela mlo rat, isi le večno dživdipe hem me ka vazdav le taro mule ko Poslednjo dive. 55Adalese soi mlo telo čačikano hajba hem mlo rat čačikano piba. 56Okova kova hala mlo telo hem pijela mlo rat, ačhola ana mande hem me ano leste. 57Sar so man bičhalđa o dživdo Dad, hem me živinava zbog o Dad, ađahar hem okova kova hala man ka živini zbog mande. 58Me injum adava maro savo huljilo taro nebo, a na sar okova savo hale tumare pradada ani pustinja hem mule. Ko hala akava maro, večno ka živini.”
59O Isus sa akava vaćerđa sikavindoj e manušen ani sinagoga ano Kafarnaum.
Zbog e Isusesoro sikaviba, but učenici cidena pe olestar
60But lesere učenici, kad šunde adava, phende: “Adalai but phare lafija. Ko šaj te prihvatini len?”
61A o Isus korkoro pestar džanđa da lesere učenici gunđinena zbog olesere lafija, i phenđa lenđe: “Akava li sikaviba ćerela tumen te odustajinen? 62A so onda ka phenen te dikhljen man, e Čhave e manušesere, sar džava upre ko nebo, adari kaj injumle angleder? 63O Duho dela dživdipe, a o telo ništa na dela. O lafija save me phenđum tumenđe, oni duho hem dživdipe. 64A palem isi nesave maškara tumende kola na verujinena.” O Isus phenđa adava adalese so pana ki početka džanđa kolai adala so naka verujinen ano leste hem kovai adava so ka izdajini le.
65Hem phenđa: “Adalese phenđum tumenđe da nijekh našti te avel kora mande te nane lese dindo e Dadestar.”
66Tegani but lesere učenici cidinde pe olestar hem na džele više palo leste.
67I o Isus pučlja e dešuduje učenikonen: “Na li hem tumen mangena te džan mandar?”
68A o Simon o Petar phenđa lese: “Gospode, kaste te dža? Te lafija dena večno dživdipe, 69hem amen poverujinđam hem džanaja da tu injan o Sveco e Devlesoro.”
70A o Isus phenđa lenđe: “Na li me birinđum tumen e dešudujen? A palem, jekhi tumendar beng!”
71Adava vaćerđa e Judastar, e Simonesere e Iskariotesere čhavestar, jekhestar e dešuduje učenikonendar, kova ka izdajini le.
Valgt i Øjeblikket:
Jovan 6: RAB
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
