San Mateo 12
12
Discípulotu̶jk trigo tu̶u̶m tujkku̶xy pokxyxyu̶u̶
(Mc 2.23-28; Lc 6.1-5)
1Je̱'e̱ mu̶'it tiempo, pokxyxyu̶u̶ je̱'e̱ Jesús oy ñaxu̶'u̶y ma tu'ug trigo kamu̶ñ. Je̱'e̱ dyiscípulotu̶jk yuu'o'ku̶gu̶xp najty je̱'e̱ ajku̶xy, y chi je̱'e̱ trigo tu̶u̶m tujktu̶gu̶u̶ygyu̶xy y ju̶kxu̶ je̱'e̱ pyajk ajku̶xy. 2Ko je̱'e̱ fariseotu̶jk du'un ijxy ajku̶xy, chi je̱'e̱ Jesús nu̶maay ajku̶xy:
—Ok'ix, ta yu̶'u̶ mdiscípulotu̶jk y'adu̶u̶tzku̶xy mu̶dyiibu̶ ka'p ñigu'udúkyu̶chu̶ñ yajtúnu̶ch pokxyxyu̶u̶.
3Chi je̱'e̱ Jesús y'adzoowu̶ ajku̶xy:
—¿Nej ka'anu̶ miich nidu'uñdyu̶ mgápxku̶xyñu̶ je̱'e̱ Dios ñaky tii je̱'e̱ David tu'ook tyuunu̶ñ ko najty je̱' y mu̶u̶d je̱'e̱ myu̶gu'ugtu̶jk yuu'o'ogaangu̶xnu̶? 4Pues chi je̱'e̱ David tyu̶gu̶u̶y ma je̱'e̱ mu̶jtzajptu̶jku̶ñ y kaay je̱'e̱ tzajkaagy ajku̶xy mu̶dyiibu̶ najty jiiby yoxy ma je̱'e̱ Dios wyinduuyu̶ñ, je̱' ka'p najty je̱'e̱ pyadyii káyu̶ch je̱'e̱ tzajkaagy y ni je̱'e̱ myu̶gu'ugtu̶jk ajku̶xy, je̱'e̱ teedy najty je̱'e̱ je'eyu̶ paattu̶p ajku̶xy kaaygyu̶xu̶ch. 5¿O nej ka'anu̶ mgápxku̶xyñu̶ ma je̱'e̱ Moisés tyu̶y'ajt naky ko je̱'e̱ teedy ajku̶xy oy je̱' kya'apókxku̶xy mu̶jtzajptu̶gooty pokxyxyu̶u̶ ka'p naty je̱'e̱ du'un tuundu̶gooygyu̶xpu̶ch? 6U̶u̶ch miich nnu̶maaygyu̶xypy ko u̶u̶ch ni'igyu̶ u̶u̶ch je̱'e̱ ane̱'e̱mu̶ñ mu̶k nmu̶u̶du̶ch ni'igu̶ ka'p je̱'e̱ mu̶jtzajptu̶jku̶ñu̶ba. 7Miich ajku̶xy ka'p mwinju̶wu̶u̶ygyu̶xyñu̶ neby adaa du'un wyimbu̶dzu̶myu̶ñ adaa Dios ñaky: ‘Je̱'e̱ mu̶dyiibu̶ u̶u̶ch ndzojkypyu̶ñ je̱' je̱' ko je̱'e̱ pa'a''ayo'on mmu̶dajtku̶xu̶ch y ka'p ko je̱'e̱ windzu̶gu̶'u̶ñ mye̱jkku̶xu̶ch ma u̶u̶chu̶ñ.’ Ko u̶xyu̶py adaa ayuuk tu̶ m'okwinju̶wu̶u̶ygyu̶xy, ka'p u̶xyu̶py je̱'e̱ ja'ay mboky'ijxku̶xy mu̶dyiibu̶ ka'p maa tyuundu̶góyñu̶ ajku̶xyu̶ñ. 8Pues u̶u̶ch je̱' je̱'e̱ ja'ay mu̶dyiibu̶ tzon tzajpjooty nmu̶u̶du̶ch je̱'e̱ ane̱'e̱mu̶ñ ma je̱'e̱ pokxyxyu̶u̶ju̶ñ. #12.8 pokxyxyu̶u̶: Adaa Sábado du'un tyijpy
Je̱'e̱ ja'ay mu̶dyiibu̶ kyu̶'u̶ najty tu̶'u̶dzu̶ñ
(Mc 3.1-6; Lc 6.6-11)
9Chi je̱'e̱ Jesús jim choñ y chi tyu̶gu̶u̶y ma je̱'e̱ judío ja'ay ñaymyujktaakt ajku̶xyu̶ñ. 10Y jiiby najty ja'ay tu'ug mu̶dyiibu̶ kyu̶'u̶ najty tu'k'adu'um tu̶'u̶dzu̶ñ, y je̱'e̱ fariseotu̶jk janch winma'añ u̶xtaaygyu̶xp je̱'e̱ najty neby je̱'e̱ Jesús mu̶baad xu̶'u̶gu̶xyu̶ñ, y chi yajtu̶u̶gu̶xy:
—¿Nej mu̶baad je̱'e̱ pa'amja'ay pokxyxyu̶u̶ nyajtzooku̶mu̶?
11Chi je̱'e̱ Jesús y'adzoowu̶ ajku̶xy:
—¿Pu̶n ma miich ajku̶xy pu̶n mu̶dajtpu̶ñ tu'ug je̱'e̱ borreegu̶ y ñu̶u̶jutku'uga'awu̶ch pokxyxyu̶u̶, nej ka'p je̱'e̱ da'a ninú̶kxu̶ch y yajpu̶dzú̶mu̶ch? 12Pues ni'igyu̶ je̱'e̱ ja'ay mu̶j chobaady ni'igu̶ ka'p je̱'e̱ borreegu̶ñu̶ba. Y paadyu̶tz, paattu̶p ko je̱'e̱ oybyu̶ nduunu̶mu̶ch pokxyxyu̶u̶.
13Mu̶'it je̱'e̱ pa'amja'ay nu̶maay:
—Xajtu̶w yu̶'u̶ mgu̶'u̶.
Chi je̱'e̱ pa'amja'ay kyu̶'u̶ xajtu̶u̶y, y mu̶'it je̱'e̱ kyu̶'u̶ chooky y'oyu̶u̶y du'un neby je̱'e̱ tu'ukpu̶ju̶ñ. 14Y ko je̱'e̱ fariseotu̶jk pyu̶dzu̶u̶mgu̶xy ma je̱'e̱ naymyujktaaktu̶ñ, chi winma'añ u̶xtaaydyu̶gu̶u̶ygyu̶xy neby mu̶baad yaj'o'kku̶xyu̶ñ je̱'e̱ Jesús.
Je̱'e̱ mu̶dyiibu̶ je̱'e̱ Dios y'ayuuknajtzkapxu̶u̶ybyu̶ Isaías ñigapxu̶ñ mu̶u̶d je̱'e̱ Jesús kyu̶xpu̶
15Ko je̱'e̱ Jesús du'un nejwu̶u̶y neby najty je̱'e̱ ja'ay wyinmaaygyu̶xyu̶ñ, chi jim choñ, y chi je̱'e̱ mayjya'ay pyadu'ubu̶jku̶. Jesús yajtzooktaaby najty je̱'e̱ pa'amja'aydyu̶jk; 16cham yajni'ipu̶jkku̶xy ko ka'p ñigapx ñimu̶dyaaku̶gu̶xu̶ch ma je̱'e̱ mayjya'ayu̶ñ pu̶n je̱'e̱ju̶ñ. 17Adaa paady adaa du'un tyuunu̶ jyajtu̶ wan du'un yajkuydyúnu̶ch neby je̱'e̱ Dios y'ayuuknajtzkapxu̶u̶ybyu̶ Isaías jékyu̶p kujaayu̶ñ ko du'un myu̶naañ:
18“Chaa u̶u̶ch je̱'e̱ nduumbu̶, je̱'e̱ mu̶dyiibu̶ u̶u̶ch tu̶ nwin'ixyu̶ñ,
je̱'e̱ mu̶dyiibu̶ u̶u̶ch ndzojkpy nju̶wu̶u̶ybyu̶ñ, y janch jootkujku̶ch mu̶u̶d yu̶'u̶.
Nmo'owe̱e̱mbyu̶ch je̱'e̱ n'Espíritu,
y xykyapxwa'kxu̶byu̶ch je̱'e̱ ndu̶y'ajt ma je̱'e̱ naax kajpt kú̶xyu̶ju̶ñ.
19Ka'p je̱'e̱ chiptuna'añ ni kya'aya'ax kya'ajoga'añ,
y ni tu'k'aa je̱'e̱ y'ayuuk kya'ayajmu̶dówu̶ch nu̶u̶gujk tu'ugujk.
20Ka'p je̱'e̱ najtz'ixu̶'u̶wa'añ mu̶dyiibu̶ oy yajxón ka'amu̶bu̶jkpu̶ñ
y ka'p najtz'ixu̶'u̶wa'añ mu̶dyiibu̶ mu̶bu̶jktzómnu̶ju̶ñ,
u̶xtu̶ koonu̶ je̱'e̱ ju̶bu̶kpu̶ ku̶xyu̶ mu̶madaakta'awu̶ch mu̶u̶d je̱'e̱ tyu̶y'ajt.
21Y mu̶bu̶gaanu̶xu̶p je̱'e̱ naax kajpt y'ayuuk tyu̶y'ajt.”
Jesús ni'iwaambe̱jtku̶xy ko je̱'e̱ mu̶jku'u myu̶k'ajt mu̶dajtu̶yu̶
(Mc 3.20-30; Lc 11.14-23; 12.10)
22Chi je̱'e̱ Jesús yajninú̶kxy ajku̶xy tu'ug je̱'e̱ ja'ay mu̶dyiibu̶ wiindzu̶ñ y uumu̶ñ, y ka'a'oybyu̶mu̶u̶d je̱'e̱ najty. Chi je̱'e̱ Jesús yajtzooky, yajwindu̶kxu̶'ky y yajkapxu̶'ky. 23Chi je̱'e̱ ja'ay nigu̶xyu̶ ñayyajtu̶u̶wu̶gu̶xy cham mu̶k yajnú̶kx yajju̶wu̶u̶ygyu̶xy: “¿Nej je̱' adaa da'a je̱'e̱ David y'ok'ung y'ok'ana'k?”
24Ko je̱'e̱ fariseotu̶jk du'un mu̶dooy ajku̶xy, chi myu̶naangu̶xy: “Jesús mu̶jwinma'añ yu̶'u̶ tyuumby mu̶u̶d je̱'e̱ Beelzebú myu̶k'ajt, je̱'e̱ ka'a'óybyu̶ windzú̶n, paady je̱'e̱ ka'a'óybyu̶ yajpu̶dzú̶my.”
25Jesús ñejwu̶u̶by najty je̱' tii najty jyanchwinmaaygyu̶xypyu̶ñ, chi nu̶maay ajku̶xy: “Oytyimymyu̶dyii gobierno mu̶dyiibu̶ naymyu̶dzibu̶u̶yu̶gu̶xp, chi chiptuungu̶xy amíñ u̶xyu̶py, y ñayyajkku̶jx ñayyajtu̶gooyu̶gu̶xy; y ko je̱'e̱ kajpt tu'ug o je̱'e̱ ja'ay tu'kjuugy tu'kmu̶gu'ug ñaymyu̶dzibu̶u̶yu̶gu̶xy, ka'p je̱'e̱ oy tu'ugmúky y'idaangu̶xy. 26Y pu̶nu̶ je̱'e̱ mu̶jku'u nandu'un u̶x'ojp je̱'e̱ myu̶mu̶jku'u, ku̶'u̶m naty je̱'e̱ du'un ñaymyu̶dzibu̶u̶yu̶gu̶xy, ¿neby je̱'e̱ myu̶k'ajtu̶ñ da'a du'un okjakmu̶dajtku̶xu̶ch? 27Miich ajku̶xy du'un miich mmu̶naangu̶xy ko u̶u̶ch je̱'e̱ ka'a'óybyu̶ n'u̶x'ojy mu̶u̶d je̱'e̱ Beelzebú myu̶k'ajt, peru̶ pu̶nu̶ jaanch dyu'unu̶ch, ¿pu̶n je̱'e̱ m'u̶xpu̶jkpu̶du̶jk mu̶k'ajtu̶ñ mooyu̶p ajku̶xy ko je̱'e̱ ka'a'óybyu̶ u̶x'ojku̶xu̶ch? Paady yu̶'u̶ ku̶'u̶m yajni'igu̶xu̶'kku̶xp ko miich nigoo mgapxtu̶gooygyu̶xy. 28Peru̶ pu̶nu̶ n'u̶x'ojpyu̶ch je̱'e̱ ka'a'óybyu̶ mu̶u̶d je̱'e̱ Dios y'Espíritu, jaanch je̱'e̱ du'un, y du'un je̱'e̱ du'un wyimbu̶dzu̶my ko je̱'e̱ Dios y'ane̱'e̱mu̶ñ tu̶ jya'ady ma miich ajku̶xyu̶ñ.
29“¿Neby da'a du'un mu̶baad pu̶n y'oktu̶gu̶'u̶y ma tu'ug mu̶kja'ay tyu̶jku̶ñ y pu̶jku̶ch tijaty naty myu̶u̶du̶ñ, pu̶nu̶ ka'p jayu̶jp ku̶'u̶xóch tekyxyoch? Pu̶nu̶ tyuumby du'un, mu̶'íttu̶tz mu̶mada'agu̶ch y pu̶jku̶yu̶ch tijaty naty myu̶u̶du̶ñ.
30“Pu̶n u̶u̶ch xykya'apube̱jtpu̶ñ, xymyu̶dzip'ajtpu̶ch je̱'; y pu̶n u̶u̶ch xykya'amu̶dtuumbu̶ñ, je̱' je̱'e̱ ja'ay yajwinma'añdyu̶gooygyu̶xp.
31“Paady u̶u̶ch miich nnu̶maaygyu̶xy ko je̱'e̱ Dios je̱'e̱ ja'ay pyoky ku̶xyu̶ winme̱kxaanu̶ y ku̶xyu̶ je̱'e̱ ju̶bu̶kpu̶ mu̶dyiibu̶ kyapxypy myu̶dyaakku̶xypyu̶ñ, peru̶ je̱' ka'p pokywyinme̱kxa'añ mu̶dyiibu̶ je̱'e̱ Espíritu Santo mu̶gapxtu̶gooygyu̶xpu̶ñ. 32Dios wyinme̱kxe̱e̱mby je̱'e̱ ja'ay mu̶dyiibu̶ u̶u̶ch du'un u̶u̶ch je̱' je̱'e̱ ja'ay mu̶dyiibu̶ tzon tzajpjooty ju̶bu̶k xyñigapxp xyñimu̶dyaakpu̶ñ; peru̶ je̱'e̱ mu̶dyiibu̶ je̱'e̱ Espíritu Santo mu̶gapxtu̶gooygyu̶xpu̶ñ, ka'p je̱'e̱ pokywyinme̱kxa'añ ni maa adayaaba naaxwiiñu̶ñ y ni maa je̱'e̱ mu̶dyiibu̶ miimb ku̶daakpu̶ñ.
Je̱'e̱ kepy je̱'e̱ tyu̶u̶m je̱'e̱ mu̶u̶d yaj'u̶xkápy
(Lc 6.43-45)
33“Kojkku̶x je̱'e̱ oybyu̶ kepy, y oy je̱'e̱ tyu̶u̶m'ádu̶ch; y kojku̶x je̱'e̱ ju̶bu̶kpu̶ kepy, y ju̶bu̶k je̱'e̱ tyu̶u̶m'ádu̶ch, je̱' ko agu̶ yaj'u̶xkajp je̱'e̱ kepy mu̶u̶d je̱'e̱ tyu̶u̶m. 34¡Miich ajku̶xy, tza'añdy m'ajuugy m'amu̶gu'ug'ajtypy ajku̶xy! ¿Nej mu̶baad oy yajxón m'okkapx m'okmu̶dyaakku̶xpu̶, pu̶nu̶ ju̶bu̶k axu̶u̶g naty mja'ay'ajtku̶xy? Je̱' ko je̱'e̱ mu̶dyiibu̶ m'aa'ajtypy mjoot'ajtypy ajku̶xy, je̱' mgapxypy mu̶dyaakypy ajku̶xy. 35Je̱'e̱ oyjya'aybyu̶ ja'ay, oybyu̶ ayuuk je̱'e̱ kyapxypy myu̶dyaakypy, je̱' ko je̱' jootjooty winma'añjyooty myu̶dajtypy je̱'e̱ oybyu̶ y je̱'e̱ ju̶bu̶kja'aybyu̶ ja'ay, nan je̱'e̱ ju̶bu̶kjatypyu̶ ayuuk je̱'e̱ kyapxypy myu̶dyaakypy, je̱' ko je̱' jootjooty winma'añjyooty myu̶dajtypy je̱'e̱ ju̶bu̶kpu̶. 36U̶u̶ch miich nnu̶maaygyu̶xypy ko je̱'e̱ mu̶'it xu̶u̶ ko naty je̱'e̱ Dios tu̶ yajmu̶baad'áty mu̶naa tu̶ydyuna'añu̶ñ je̱'e̱ naaxwiiñjya'ay, mu̶'it je̱'e̱ mdu̶y'ajt nigu̶xyu̶ mye̱jku̶xu̶ch mu̶u̶d je̱'e̱ m'ayuuk ajku̶xy neby naty nigoo tu̶ mdzuugápx tu̶ mbojkápxku̶xyu̶ñ. 37Je̱'e̱ ko mu̶u̶d je̱'e̱ mgu̶'u̶m'ayuuk je̱'e̱ Dios mu̶u̶d xytyu̶ydyuungu̶xu̶ch, je̱' mu̶u̶d m'oybyu̶dzu̶u̶m mwa'adzpu̶dzu̶u̶mgu̶xu̶ch o je̱' mu̶u̶d mnu̶u̶ga'a mbokykya'agu̶xu̶ch.”
Je̱'e̱ ju̶bu̶kja'aydyu̶jk yujkwaangu̶xy je̱'e̱ ijxpe̱jt mu̶jwinma'añbyu̶
(Mc 8.12; Lc 11.29-32)
38Mu̶'it je̱'e̱ fariseotu̶jk y je̱'e̱ Dios y'ane̱'e̱mu̶ñ windzu̶ndu̶jk nije̱' nu̶maaygyu̶xy je̱'e̱ Jesús:
—Windzú̶n, je̱' u̶u̶ch n'ixaangu̶xypy mdúnu̶ch nije̱' je̱'e̱ ijxpe̱jt mu̶jwinma'añbyu̶.
39Chi je̱'e̱ Jesús y'adzoowu̶ ajku̶xy:
—Adayaaba ja'ay oy yu̶'u̶ jyanchju̶bu̶kja'ayu̶ch ajku̶xy y ka'p je̱'e̱ Dios y'ayuuk tyu̶y'ajtu̶ñ mu̶bu̶jku̶ ajku̶xy, yujkwaangu̶xypy ijxpe̱jt mu̶jwinma'añbyu̶ yu̶'u̶ ajku̶xy; peru̶ nimu̶naa wiingpu̶ ijxpe̱jt yu̶'u̶ kya'ayajmooygyu̶xu̶ch, je'eyu̶ je̱'e̱ Dios y'ayuuknajtzkapxu̶u̶ybyu̶ Jonás ijxpe̱jt tu'kpajk yajmo'owu̶ch ajku̶xy. 40Je̱' ko du'un neby je̱'e̱ Jonás y'ijtyu̶ñ tu̶gu̶u̶g xu̶u̶ tu̶gu̶u̶g tzum mu̶j'akxjootjooty, nandu'un u̶u̶ch je̱' je̱'e̱ ja'ay mu̶dyiibu̶ tzon tzajpjooty n'idú̶chu̶ch tu̶gu̶u̶g xu̶u̶ tu̶gu̶u̶g tzum naaxjooty. 41Je̱'e̱ Nínive ja'ay pu̶du̶'u̶gaangu̶xp ko naty je̱'e̱ xu̶u̶ tiempo tu̶ myu̶baad'ajtnu̶, mu̶naa je̱'e̱ Dios tu̶ydyuna'añu̶ñ je̱'e̱ naaxwiiñjya'ay, y je̱' xu̶'u̶da'awaangu̶xp jada'achámbu̶ tiempo ja'ay. Je̱' ko je̱'e̱ Nínive ja'ay jootwimbijt je̱'e̱ ajku̶xy ma je̱'e̱ Diosu̶ñ ko je̱'e̱ Jonás Dios y'ayuuk tyu̶y'ajt oy kapxwa'kxu̶. Y je̱'e̱ mu̶dyiibu̶ yaa naaxwiiñ chamu̶ñ, jakni'igyu̶ je̱'e̱ myu̶ju̶ch ni'igu̶ ka'p je̱'e̱ Jonásu̶ñu̶ba. 42Nan pu̶du̶'u̶gaamb je̱'e̱ to'oxyu̶jk mu̶j'ane̱'e̱mbu̶ mu̶dyiibu̶ jékyu̶p tzu̶naay ma je̱'e̱ cruutzmu̶dza'a pyu̶dzu̶myu̶ñ ko naty je̱'e̱ xu̶u̶ tiempo tu̶ myu̶baad'ajtnu̶, mu̶naa je̱'e̱ Dios tu̶ydyuna'añu̶ñ je̱'e̱ naaxwiiñjya'ay, y je̱' xu̶'u̶da'awaangu̶xp jada'achámbu̶ tiempo ja'ay. Je̱' ko je̱'e̱ to'oxyu̶jk mu̶j'ane̱'e̱mbu̶ jim ju̶gue̱mdu̶goy choñ ma je̱'e̱ naaxwiimbu̶ kyugu̶xu̶'u̶yu̶ñ ko najty je̱'e̱ mu̶j'ane̱'e̱mbu̶ Salomón kyapxwiju̶ñ amdo'idaanu̶. Y je̱'e̱ mu̶dyiibu̶ yaa naaxwiiñ chamu̶ñ, jakni'igyu̶ je̱'e̱ myu̶ju̶ch ni'igu̶ ka'p je̱'e̱ Salomóngu̶ñu̶ba.
Je̱'e̱ ka'a'óybyu̶ mu̶dyiibu̶ ja'adu'ook wimbijtpu̶ñ
(Lc 11.24-26)
43“Ko je̱'e̱ ka'a'óybyu̶ pyu̶dzu̶my ma je̱'e̱ ja'ayu̶ñ, chi ñu̶kxy tu̶'u̶dznaaxtuum; u̶xta'ay je̱'e̱ pyokxtaakt, y ko je̱'e̱ pyokxtaakt ka'apaady, mu̶'it myu̶na'añ: 44‘Wimbidaambu̶ch ma u̶u̶ch je̱'e̱ ndu̶jku̶ñ, ma u̶u̶ch tu̶ n'oktzómbu̶ju̶ñ.’ Y ko wyimbity ma naty tu̶ y'oktzu̶naaybyu̶ju̶ñ, chi paady je̱'e̱ ja'ay jyoot wyinma'añ du'un neby tu'ug tu̶jk yajwa'adzpu̶, mu̶dyiibu̶ janch'oy pe'edy jaaxy y janch'oy y'awaadzku̶'u̶yu̶ch. 45Mu̶'it chooñ, nu̶kxy je̱'e̱ myu̶gu'ug ja'ajuxtujk jak'u̶xta'ay jakju̶bu̶kjatypyu̶ ka'p je̱'e̱ju̶ñu̶ba, y chi nigu̶xyu̶ kipxy tzu̶naaybyu̶ tyu̶gu̶u̶ygyu̶xy ma je̱'e̱ ja'ay jyoot wyinma'añdyu̶ñ, mu̶'it je̱'e̱ ja'ay nu̶kxy jak'o'ktú̶y ni'igyu̶ jyajtnu̶ ni'igu̶ ka'p jayu̶jp'ajtu̶ñu̶ba. Y du'unu̶tz adayaaba ju̶bu̶kja'ay nandu'un jyadaangu̶xy.”
Jesús tyaj y je̱'e̱ myu̶gue̱'e̱xk ajku̶xy
(Mc 3.31-35; Lc 8.19-21)
46Myu̶dkapxy myu̶dmu̶dyaakyñu̶ najty je̱'e̱ Jesús mayjya'ay ko je̱'e̱ tyaj y je̱'e̱ myu̶gue̱'e̱xk ñija'ttu̶ ajku̶xy, myu̶gapxaanu̶gu̶xyu̶ najty. Je̱' tu̶ba'ay je̱'e̱ wyu̶'u̶mgu̶xy, 47peru̶ nije̱' ja'ay je̱'e̱ Jesús oy awaanu̶yu̶ ajku̶xy:
—Cheeby je̱'e̱ mdaj y je̱'e̱ mmu̶gue̱'e̱xk ajku̶xy tu̶ba'ay, y miich je̱'e̱ xyjya'amu̶gapxaangu̶xp.
48Chi je̱'e̱ Jesús adzooy je̱'e̱ mu̶dyiibu̶ je̱'e̱ ayuuk oy yajnáxy ma je̱'e̱ju̶ñ:
—¿Pu̶n du'un mdijpy ajku̶xy ko u̶u̶ch ndaj'adyii y ko u̶u̶ch nmu̶gue̱'e̱xk'adyii ajku̶xy?
49Mu̶'it je̱'e̱ dyiscípulotu̶jk nidziiwu̶u̶y ajku̶xy; myu̶naañ:
—Adayaaba ja'ay u̶u̶ch ndaj'ajtypy ajku̶xy y nmu̶gue̱'e̱xk'ajtypy ajku̶xy. 50Wanpú̶nu̶ch pu̶n u̶u̶ch je̱'e̱ nDeedy chojku̶ñ kuydyuunu̶byu̶ñ je̱'e̱ mu̶dyiibu̶ jiiby tzajpjooty yajpaatpu̶ñ, je̱' u̶u̶ch nbuya'ay'ajtypy, nbudo'oxy'ajtypy y ndaj'ajtypy.
Valgt i Øjeblikket:
San Mateo 12: MIXE
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Nuevo Testamento en Mixe de Mazatlán y Tutla, Oaxaca, México © Sociedad Bíblica de México, A.C. 2005
