San Mateo 10
10
Jesús win'ixy je̱'e̱ nimajmé̱tzkpu̶ apóstolestu̶jk ajku̶xy
(Mc 3.13-19; Lc 6.12-16)
1Mu̶'it je̱'e̱ Jesús dyiscípulotu̶jk mu̶jwooy, y mooygyu̶xy je̱'e̱ ane̱'e̱mu̶ñ neby je̱'e̱ ka'a'óybyu̶ mu̶baad u̶x'ojku̶xy ma je̱'e̱ ja'ay ajku̶xyu̶ñ y neby mu̶baad yajtzookku̶xyu̶ñ ku̶xyu̶ yuu ku̶xyu̶ pa'am y mu̶dyiijáty yaj'ayoobu̶ñ.
2Adaa je̱' je̱'e̱ nimajmé̱tzkpu̶ apóstolestu̶jk ajku̶xy: jayu̶jp je̱'e̱ Simón mu̶dyiibu̶ nandu'un yajtijpu̶ñ Pedro, y mu̶u̶d je̱'e̱ pyuya'ay Andrés; Santiago y mu̶u̶d je̱'e̱ pyuya'ay Juan, je̱'e̱ Zebedeo y'ung ajku̶xy; 3Felipe y Bartolomé; Tomás y Mateo, je̱'e̱ mu̶dyiibu̶ ijty yajkugube̱jtpu̶ñ mu̶dúñ je̱'e̱ gobierno romano; Santiago, je̱'e̱ Alfeo y'ung, y Tadeo; 4Simón je̱'e̱ judío tzipja'ay (je̱'e̱ celote), y Judas Iscariote mu̶dyiibu̶ je̱'e̱ Jesús ku̶'u̶ye̱jk ma je̱'e̱ myu̶dzipu̶ñ.
Jesús dyiscípulotu̶jk ke̱jxku̶xy ayuuk kapxwa'kxpu̶ neby je̱'e̱ Dios y'ane'emyu̶ñ
(Mc 6.7-13; Lc 9.1-6)
5Chi je̱'e̱ Jesús je̱'e̱ nimajmé̱tzkpu̶ kejxy y wingapx ju̶jpkapxu̶u̶ygyu̶xy: “Ka'p mnú̶kxku̶xu̶ch ma je̱'e̱ ka'pu̶ judío ja'ay ñaaxjooty ajku̶xyu̶ñ y nan ka'p mdu̶gu̶u̶ygyu̶xu̶ch ma je̱'e̱ Samaria naax Samaria kajptu̶ñ; 6jim nú̶kxku̶x ma je̱'e̱ Israel ñaax kyajptu̶ñ, je̱'e̱ mu̶dyiibu̶ du'un neby je̱'e̱ borreegu̶ mu̶dyiibu̶ tu̶ tyu̶gooygyu̶xyu̶ñ. 7Nú̶kxku̶x y kapxwa'kxku̶x ko tu̶ je̱'e̱ tiempo wyingoonu̶ mu̶naa je̱'e̱ Dios y'ane̱'e̱mu̶ñ pu̶da'aga'añu̶ñ ya naaxwiiñ. 8Myajtzookku̶xu̶py je̱'e̱ pa'amja'aydyu̶jk, myajjuugypyu̶jkku̶xu̶py je̱'e̱ o'ogyjya'ay ajku̶xy, myajtzookku̶xu̶py je̱'e̱ ju̶bu̶k pu'udzpa'ammu̶u̶dpu̶ ajku̶xy y m'u̶x'ojku̶xu̶py je̱'e̱ ka'a'óybyu̶. Miich ajku̶xy nni'imooygyu̶xypy adaa mu̶k'ajtu̶ñ, nan mni'iye̱jkku̶xu̶py nandu'un; ka'p myajjuuygyu̶xu̶ch ko naty mgapxwa'kxku̶xy.
9“Ka'p ni tii meeñ mmu̶nú̶kxku̶xu̶ch, 10ni mmorral mnidu'uyo'oyu̶u̶k mga'amu̶nú̶kxku̶xu̶ch. Ka'p je̱'e̱ mwit me̱jtzni'kx tu̶gu̶u̶gni'kx mmu̶nú̶kxku̶xu̶ch, ni je̱'e̱ mgu̶'u̶g me̱jtz par mga'amu̶nú̶kxku̶xu̶ch y ni je̱'e̱ mdajt me̱tzk mga'akajpku̶xu̶ch, je̱' ko paattu̶p je̱'e̱ mu̶duumbu̶du̶jk kyaayu̶ñ y'uuku̶ñ ajku̶xy.
11“Ko naty mja'tku̶xy ma tu'ug kajptu̶ñ o ma je̱'e̱ ja'ay y'aaychu̶naaygyu̶xy y'ujtzu̶naaygyu̶xyu̶ñ, je̱' m'u̶xtaaygyu̶xu̶py je̱'e̱ ja'ay mu̶dyiibu̶ oy yaj'ixy'ajtpu̶ñ y jim mwu̶'u̶mgu̶xu̶ch ma je̱' tyu̶jku̶ñ, y ka'p wiingtuuy mnú̶kxku̶xu̶ch u̶xtu̶ koonu̶ wiingkajpt mnú̶kxku̶xu̶ch. 12Ko mdu̶jktu̶gu̶u̶ygyu̶xu̶ch, myajpókxku̶xu̶py je̱'e̱ kudu̶jk ajku̶xy. 13Pu̶nu̶ paattu̶gu̶xp je̱'e̱ kudu̶jk myajpókxku̶xu̶ch, miich je̱'e̱ myajpókxu̶ñ ajku̶xy jootkujk'ajtu̶ñ yé̱gu̶p ma je̱'e̱ ja'ay ajku̶xyu̶ñ; peru̶ pu̶nu̶ ka'p pyaattu̶gu̶xy myajpókxku̶xu̶ch, ni'itu̶gu̶'u̶bu̶ je̱'e̱ du'un mu̶dyiibu̶ naty tu̶ mgápxku̶xyu̶ñ. 14Wan ma'eembyu̶ch ma naty je̱'e̱ ja'ay ka'p xykyu'ubu̶gaangu̶xy y ma naty je̱'e̱ m'ayuuk ka'p xy'amdo'idaanu̶ ajku̶xy, tzóngu̶x ma je̱'e̱ jimbu̶ tu̶jk o ma je̱'e̱ jimbu̶ kajptu̶ñ y mwinne̱jp mwinwojpku̶xu̶py je̱'e̱ naaxjók ma je̱'e̱ mdeky ajku̶xyu̶ñ. 15Janch tu̶y'ajtu̶ñ du'un nnu̶maaygyu̶xy ko je̱'e̱ mu̶'it xu̶u̶ ko naty je̱'e̱ Dios tu̶ yajmu̶baad'áty mu̶naa tu̶ydyuna'añu̶ñ je̱'e̱ naaxwiiñjya'ay, jakni'igyu̶ je̱'e̱ ja'ay yajtzaachtyuungu̶xu̶ch mu̶dyiibu̶ naty miich ka'p tu̶ xykyu'ubu̶jkku̶xy, ni'igu̶ ka'p je̱'e̱ ja'ay mu̶dyiibu̶ Sodoma naaxjooty y Gomorra naaxjooty tzu̶naaygyu̶xpu̶ñ.
Je̱'e̱ u̶xwu̶dit pawu̶dittu̶
16“¡Okmu̶doogu̶x! U̶u̶ch miich ngue̱jxku̶xypy du'un neby je̱'e̱ borreegu̶ju̶ñ pa'uk ju̶yujkjooty. Kuwinma'añ ja'ay'ajtku̶x du'un neby je̱'e̱ tza'añdyu̶ñ y yuung naaxypy du'un neby je̱'e̱ muuxyu̶ñ. 17Mnaygyweentu̶'ajtu̶gu̶xu̶p, je̱' ko xykyu̶'u̶ye̱gaangu̶xp je̱'e̱ ja'ay ma je̱'e̱ tuungmu̶u̶dpu̶du̶jk ajku̶xyu̶ñ, y je̱' xychaachtyuungu̶xu̶p ma je̱'e̱ judío ja'ay ñaymyujktaakt ajku̶xyu̶ñ, 18y xyajnú̶kxku̶xu̶p mach ma je̱'e̱ gobernador y ma je̱'e̱ mu̶j'ane̱'e̱mbu̶ winduuy ajku̶xyu̶ñ, je̱' gyu̶xpu̶ ko u̶u̶ch naty xymyu̶bu̶jkku̶xy; y du'unu̶tz je̱'e̱ tiempo mmu̶dajtku̶xu̶ch neby je̱'e̱ tu̶y'ajt mu̶baad mye̱jkku̶xyu̶ñ mu̶u̶d u̶u̶ch kyu̶xpu̶ ma je̱' wyinduuy ajku̶xyu̶ñ y ma je̱'e̱ ka'pu̶ jyudíoja'ayu̶ch wyinduuy ajku̶xyu̶ñ. 19Y ko naty xykyu̶'u̶ye̱jkku̶xy ma je̱'e̱ tuungmu̶u̶dpu̶du̶jk ajku̶xyu̶ñ, ka'p mdajku̶xu̶ch mmáygyu̶xu̶ch neby mmu̶naangu̶xu̶chu̶ñ o neby m'adzoogu̶xu̶chu̶ñ, je̱' ko je̱'e̱ Dios je̱'e̱ ayuuk xymyooygyu̶xu̶p neby m'adzoogu̶xu̶chu̶ñ ko naty timypyaady ma mgápxku̶xu̶chu̶ñ. 20Je̱' ko ka'p naty miich kapxaangu̶xp, je̱'e̱ Dios Teedy naty y'Espíritu xyñi'igapxtu'udaangu̶xp.
21“Je̱'e̱ tu'kke̱'e̱xkpu̶ ja'ay amíñ u̶xyu̶py je̱'e̱ ñaygyu̶'u̶ye̱gaanu̶gu̶xy ko wan yaj'o'ku̶gu̶xyu̶, je̱'e̱ taj teedy je̱' je̱'e̱ y'ung ku̶'u̶ye̱gaangu̶xp; y je̱'e̱ ung ana'k myu̶dzibu̶'u̶waangu̶xypy je̱'e̱ tyaj tyeedy y yaj'o'ogaangu̶xy. 22Y ku̶xyu̶ je̱'e̱ ja'ay miich xykya'a'ixa'an xykya'atzoga'anu̶ch ajku̶xy, je̱' gyu̶xpu̶ ko u̶u̶ch naty xymyu̶bu̶jkku̶xy, peru̶ pu̶n u̶u̶ch amuumdu'ugjoot xymyu̶bu̶jkpu̶ñ u̶xtu̶ mabaad y'o'ogyu̶ñ, je̱' je̱'e̱ y'aanu̶mu̶ ni'idzo'ogu̶p ajku̶xy. 23Ko naty myaj'u̶xwu̶dijt myajpawu̶dijtku̶xy ma tu'ug kajptu̶ñ, ke̱e̱kku̶x jim nu̶kxy wiing kajpt mgue̱e̱ktzookku̶xy; janch tu̶y'ajtu̶ñ du'un nnu̶maaygyu̶xy ko u̶u̶ch je̱' je̱'e̱ ja'ay mu̶dyiibu̶ tzon tzajpjooty mu̶'it u̶u̶ch nwimbídu̶ch ma naty je̱'e̱ Israel ñaax kyajpt ka'p ku̶xyu̶ m'ayo'oydya'ayñu̶ ajku̶xyu̶ñ.
24“Ka'p u̶xpu̶kyjya'ay jii ni tu'ug mu̶dyiibu̶ ni'igyu̶ u̶xpu̶ky ni'igu̶ ka'p je̱'e̱ wyindzú̶nu̶ñu̶ba, y ka'p je̱'e̱ tuumbu̶ jii ni tu'ug mu̶dyiibu̶ ni'igyu̶ mu̶j ni'igu̶ ka'p je̱'e̱ wyindzú̶nu̶ñu̶ba. 25Je̱'e̱ u̶xpu̶kyjya'ay mu̶baad je̱'e̱ jyootkugu̶'u̶y ko du'un yajpaadu̶ch neby je̱'e̱ wyindzu̶nu̶ñ, y je̱'e̱ tuumbu̶ mu̶baad je̱'e̱ jyootkugu̶'u̶y ko du'un yajpaadu̶ch neby je̱'e̱ wyindzu̶nu̶ñ. Pu̶nu̶ je̱'e̱ kudu̶jk du'un tyijku̶xypy ka'a'óybyu̶ windzú̶n, ¿je̱'e̱ jyuugy myu̶gu'ug dijy da'a du'un kya'a'okjakni'itiju̶py ajku̶xy?
Pu̶n mu̶baad ndzu̶gu̶u̶yu̶m
(Lc 12.2-7)
26“Ka'p je̱'e̱ ja'ay mdzu̶gu̶u̶ygyu̶xy, je̱' ko ka'p ni pu̶n ni tii túnu̶ch amechu̶ y nu̶kxy kya'ani'igu̶xu̶'u̶gy, y nan ka'p ni pu̶n ni tii túnu̶ch ayu'uch y nu̶kxy kya'ayajnejwu̶'u̶y. 27Je̱'e̱ mu̶dyiibu̶ miich ayu'uch nyajmu̶dmu̶dyaakku̶xypyu̶ñ, mu̶dyaakwa'kxku̶x je̱', wan yajmu̶doy'ádu̶ch; y je̱'e̱ mu̶dyiibu̶ miich amechu̶ nyajmu̶dmu̶dyaakku̶xypyu̶ñ, mu̶dyaakwa'kxku̶x mu̶k ma je̱'e̱ mayjya'ay xii yaaju̶ñ. 28Ka'p je̱'e̱ ja'ay mdzu̶gu̶u̶ygyu̶xu̶ch mu̶dyiibu̶ naty je̱'e̱ mnaaxni'kx xyaj'o'ogaanu̶u̶ygyu̶xpu̶ñ, je̱' ko ka'p je̱'e̱ m'aanu̶mu̶ mu̶baad xyaj'o'ku̶ ajku̶xy, je̱' mdzu̶gu̶u̶ygyu̶xu̶py je̱'e̱ Dios mu̶dyiibu̶ je̱'e̱ jugy'ajtu̶ñ pu̶jkpu̶ñ y nan mu̶dyiibu̶ je̱'e̱ aanu̶mu̶ jiiby ayoodaaktuuby pu̶daakpu̶ñ wiinu̶u̶xu̶u̶.
29“¿Nej ka'p je̱'e̱ ja'ay joon muuxy tókku̶xy me̱tzk tyu'kpeexyu̶ch? Peru̶ ka'p je̱'e̱ mu̶baad ni tu'ug kya'ay ya naaxkú̶xy pu̶nu̶ ka'p naty je̱'e̱ mDios Teedy du'un miich myu̶naangu̶xy. 30U̶xtu̶ je̱'e̱ mgu'uwaay ajku̶xy agu̶ mu̶choy je̱'e̱ Dios mu̶u̶du̶ch tu'ugjáty tu'ugjáty. 31Y paadyu̶tz ka'p mdzu̶gu̶u̶ygyu̶xu̶ch: jaktzoowu̶ miich ni'igyu̶ ajku̶xy ma je̱'e̱ Dios winduuyu̶ñ, ni'igu̶ ka'p je̱'e̱ mayjyoon maymyuuxy ajku̶xyñu̶ba.
Pu̶njaty ka'p mu̶dzo'oydyúñ je̱'e̱ Jesús mayjya'ayjyooty
(Lc 12.8-9)
32“Pu̶njaty u̶u̶ch xyñigapxp xyñimu̶dyaakp mayjya'ayjyooty ko u̶u̶ch xymyu̶bu̶ky xymyu̶jpu̶da'agy, u̶u̶ch nnigapxe̱e̱mbyu̶ch je̱'e̱ du'umbu̶ ja'ay nandu'un ma u̶u̶ch je̱'e̱ nDios Teedy wyinduuyu̶ñ, je̱'e̱ mu̶dyiibu̶ jiiby tzajpjooty yajpaatpu̶ñ, ko u̶u̶ch tu̶ ngu'ubú̶ky; 33peru̶ je̱'e̱ mu̶dyiibu̶ u̶u̶ch xykyuyu'tzpu̶ñ mayjya'ayjyooty, u̶u̶ch nguyu'udzu̶byu̶ch je̱'e̱ nandu'un ma u̶u̶ch je̱'e̱ nDios Teedy wyinduuyu̶ñ je̱'e̱ mu̶dyiibu̶ jiiby tzajpjooty yajpaatpu̶ñ.
Jesús kyu̶xpu̶ je̱'e̱ ja'ay ñaymyu̶dzibu̶'u̶yii
(Lc 12.51-53; 14.26-27)
34“Ka'p mmu̶naangu̶xy ko tu̶ nmiiñu̶ch ya naaxwiiñ ko u̶u̶ch je̱'e̱ tzip ma'ad nyajkú̶x nyajnáxu̶ch; ka'p u̶u̶ch tu̶ nmiñ neby u̶u̶ch je̱'e̱ tzip ma'ad nyajkú̶x nyajnáxu̶chu̶ñ, tu̶ nmiiñu̶ch ko u̶u̶ch je̱'e̱ tzip ma'ad nbu̶da'agu̶ch. 35Tu̶ nmiiñu̶ch ko u̶u̶ch je̱'e̱ ja'ay nyajnaymyu̶dzibu̶'u̶wu̶u̶ju̶ch mu̶u̶d je̱'e̱ tyeedy, je̱'e̱ to'oxy'úng mu̶u̶d je̱'e̱ tyaj, y je̱'e̱ ju̶xye̱'e̱b mu̶u̶d je̱'e̱ xyaky; 36tu'kjuugy tu'kmu̶gu'ug je̱'e̱ du'un ñaymyu̶dzibu̶'u̶waanu̶gu̶xy.
37“Pu̶n ni'igyu̶ tzojkp je̱'e̱ tyeedy o je̱'e̱ tyaj y ka'p u̶u̶chu̶ñu̶ba, ka'p u̶u̶ch je̱'e̱ du'umbu̶ ja'ay mu̶baad nja'ay'áty; pu̶n ni'igyu̶ tzojkp je̱'e̱ ya'ay'úng o je̱'e̱ tyo'oxy'úng y ka'p u̶u̶chu̶ñu̶ba, ka'p u̶u̶ch je̱'e̱ du'umbu̶ ja'ay mu̶baad nja'ay'áty; 38y pu̶n je̱'e̱ kyruutz ka'p kabu̶ga'añ y xypyamiiñu̶ch, pu̶nu̶ ka'p ñaygyu̶'u̶ye̱ga'añyii ma je̱'e̱ oku̶ñ ke̱e̱ku̶ñ, ka'p u̶u̶ch je̱'e̱ du'umbu̶ ja'ay mu̶baad nja'ay'áty. 39Pu̶n je̱'e̱ jyugy'ajtu̶ñ ka'p ye̱ga'añ ma je̱'e̱ o'ku̶ñ ke̱e̱ku̶ñ, yajtu̶goye̱e̱mby jyugy'ajtu̶ñ je̱'. Peru̶ pu̶n je̱'e̱ jyugy'ajtu̶ñ ye̱jkpu̶ñ ma je̱'e̱ o'ku̶ñ ke̱e̱ku̶ñ mu̶u̶d u̶u̶ch kyu̶xpu̶, pyade̱e̱mby jyugy'ajtu̶ñ je̱'.
Oy'ajtu̶ñ
(Mc 9.41)
40“Je̱'e̱ ja'ay mu̶dyiibu̶ miich xykyu'ubu̶jkpu̶ñ ajku̶xy, nan xykyu'ubu̶jkpu̶ch je̱'e̱ ajku̶xy; y je̱'e̱ mu̶dyiibu̶ u̶u̶ch xykyu'ubu̶jkpu̶ñ ajku̶xy, nan kyu'ubu̶jkypy je̱' ajku̶xy je̱'e̱ mu̶dyiibu̶ u̶u̶ch ya naaxwiiñ tu̶ xykyexyu̶ñ. 41Pu̶n je̱'e̱ Dios y'ayuuknajtzkapxu̶u̶ybyu̶ ku'ubu̶jkpu̶ñ, je̱' ko je̱'e̱ Dios tu̶ kyexyii, tu'knáx oy'ajtu̶ñ je̱'e̱ pada'añ neby je̱'e̱ Dios y'ayuuknajtzkapxu̶u̶ybyu̶ yajmo'oyu̶ñ; y pu̶n je̱'e̱ oyjya'ay ku'ubu̶jkpu̶ñ, je̱' ko y'oyjya'ayu̶ch, tu'knáx oy'ajtu̶ñ je̱'e̱ pada'añ neby je̱'e̱ oyjya'ay yajmo'oyu̶ñ. 42Y wanpú̶nu̶ch pu̶n je̱'e̱ tu̶chñu̶u̶ tu'kvasu̶du̶'ajty je'eyu̶ mooby nidu'ugtu̶ adaa mu̶dyiibu̶ je̱'e̱ y'u̶xpu̶jku̶ñ we̱e̱nu̶ mu̶u̶du̶ñ ajku̶xy ma je̱'e̱ Dios tyu̶y'ajtu̶ñ, je̱' ko u̶u̶ch n'u̶xpu̶jkpu̶du̶jk'adyii, janch tu̶y'ajtu̶ñ du'un nnu̶maaygyu̶xy pyaadu̶py y'oy'ajtu̶ñ je̱'.”
Valgt i Øjeblikket:
San Mateo 10: MIXE
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Nuevo Testamento en Mixe de Mazatlán y Tutla, Oaxaca, México © Sociedad Bíblica de México, A.C. 2005
