मरकुस 9

1तोउं यीशु तेन्हि जे बोलु, “अउं तुसी जे बोता कि जे इठि असे, अन्हि अन्तर कोई कोई ईं असे, जे कि जपल तकर परमेश्वरे राज्य पूरे ताकत जुए एण न हेरियाल, तपल तकर ना मरते”।

यीशु रूप बदलण

मत्ती 17:1-13; लूका 9:28-36

2छे रोज पता, यीशु पतरस, याकूब त यूहन्ना साते दूर यक उचे फाट पुठ नीए। तठि तेन्के सामणि तसे रूप बदली गा। 3त तसे झिणे ईं चमकुण लगे कि सुआ टगड़ु भोई गोउ, ईं त धरती पुठ कोई धोबि बि झिणे चमकाई न बटता। 4तोउं तेन्हि मूसा जोई एलिय्याह बि काआ; से यीशु जोई बोक करण लगो थिए। 5इस पुठ पतरसे यीशु जे बोलु, “ए गुरुजी#9:5 मूल भाषा अन्तर “रब्बी” लिखो असु।, हें इठि भुण ठीक असु। अस टाई डेरा बणान्ते, यक तोउ जे, यक मूसा जे त यक एलिय्याह जे”। 6पतरसे ए बोक तोउं बोली किस कि से टाहो सुआ डर गओ थिए, त तस समझ ना आउ कि की बोलुण। 7तिखेईंए यक बदेए से घट छड़े, त तेस बदेए अन्तरा यक अवाज निथि, “ए में ट्यारा कुआ भो, असे शुणे!”#मत्ती 3:17; मरकुस 1:11; लूका 3:22 8तपले ईं चेले चोहरो कना हेरण लगे, पर यीशु छड़ कइ अपफ जोई साते होर कोई न काआ।

9फाट पुठा उणिहां एंत-पेंत तेन तेन्हि जे निआंग दी कइ बोलु कि जपल तकर मनखे कुआ मरो मेह्‍णु अन्तरा दुबारी जी न घियाल, तपल तकर जे किछ तुसी हेरु, से केसे जे न बोलुण। 10तेन्हि ए बोक याद रखी; त अपफ बुच बोक विचार करण लगे कि, “मरो मेह्‍णु अन्तरा दुबारी जीणे मतलब की असा?” 11तोउं तेन्हि तेस केआं पुछु, “धर्मशास्त्री किस बोते कि एलिय्याह पेहले एण जरूरी असु?”#मत्ती 11:14 12तेन तेन्हि जे बोलु, “एलिय्याह सच्चे पेहले एई कइ सोब किछ सुसुर कता, पर मनखे कोईये बारे ईं किस लिखो असु कि से सुआ दुख सेहन्ता त मेह्‍णु तस ना मानते? 13पर अउं तुसी जे बोता कि एलिय्याह त एई गो असा, त जीं तसे बारे लिखो असु, मेह्‍णु जीं चहु तीं तेस जोई किउ”।

यीशु यक कुआ केआं दुष्ट आत्मा बाहर नशाणी

मत्ती 17:14-21; लूका 9:37-43

14जपल यीशु त से टाई चेले बाकी चेली के भेएड़ आए, त हेरु कि तेन्के चोहरो कना मेह्‍णु के हुसुड़ा लगो असा त धर्मशास्त्री तेन्हि जोई बेहसेईण लगो असे। 15यीशु हेर कइ सोब हैरान भोई गे, त तसे भेएड़ जे दौड़े त तेस जे नमस्कार किउ। 16तेन तेन्हि केआं पुछु, “तुस केस बोक पुठ अस जोई बेहसेईण लगो असे?” 17हुसुड़े अन्तरा यक जेईं तेस जे जवाब दुतु, “ए गुरु, मेईं अपु कुआ तोउ केईं अण्हतो थिआ, किस कि तस अन्तर गुंगी आत्मा असी, 18जेठि कोठि से तेस टान्‍ती त तठि फटाई छती : तोउं तसे आसी अन्तर शोफे भरी घेन्ति। से दन्‍त कुरुड़ खांता, त टटोरा भोई घेन्ता। मेईं तें चेली जे बोलु कि से तेस आत्मा नशाणे, पर तेन्हि से नशाणी ना बटी”। 19ईं शुण कइ तेन तेन्हि जे जवाब दी कइ बोलु, “ए अविश्वासी मेह्‍णुओ! अउं कपल तकर तुसी जोई बिश्ता त कपल तकर तुं सेहन्ता? तेस में भेएड़ घिन एईए”। 20त से तेस यीशु भेएड़ घिन ए। जपल तेन से हेरा, त तेन आत्माई से झट मरोड़ा त भीं फटाई छड़ा। तोउं तसे मुंहे बइ शोफे निसि त से लोटीण देण लगा। 21तेन तसे बोउ केआं पुछु, “असे ईं हालत कपल केआं भो असी?” 22तेन बोलु, “मठड़ियार केआं। तेन से खतम करण जे कपले आग त कपले पुओणि अन्तर फटा। पर अगर तु कुछ कइ सकता, त असी पुठ तरस खाई कइ हें भलु करे।” 23यीशु तेस जे बोलु, “अगर तु कइ सकता? ए कि बोक भुई! विश्वास करणे बाड़ी जे सोब किछ भोई सकतु”। 24कोईया बोउए झट तसे खुर टाइ कइ बोलु, “ए प्रभु, अउं विश्वास कता। छने में मदत कर कि में कमजोर विश्वास ताकतवर बणियाल।” 25जपल यीशु हेरु कि मेह्‍णु दौड़ी दौड़ी हुसुड़ा लाण लगो असे, त से दुष्ट आत्मा जे ईं बोल कइ लेहरिआ, “ए गुंगी त टौणी आत्मा, अउं तोउ जे निआंग देन्ता कि अस अन्तरा बाहर निस त दुबारी असे अन्तर न घेण।” 26त से लियारी दी कइ त तेस मरोड़ कइ बाहर निस गई; त कुआ अधमरा भोई गा। त मेह्‍णु बोलुण लगे, “ए त खतम भोई गा।” 27पर यीशु तसे हतेउ टाइ कइ से खड़ेरा, त से खड़ भोई गा।

28पता, जपल से गी आ, त तसे चेली तेस केआं अकेले अन्तर पुछु, “असी से किस ना निशाण बटी?” 29तेन तेन्हि जे बोलु, “एस किस्मे आत्मा बगैर दुआ प्रार्थनाए केसे होर उपाय बइ न निस्ती”।

अपु मरणे बारे यीशु दोकी भविष्य वाणि

मत्ती 17:22-23; लूका 9:43-45

30पता, यीशु त तसे चेले तठिआ नठे त गलीले इलाके बइ घेण लगो थिए। से न चहन्ताथ कि तसे बारे केसे पता लगे। 31किस कि से अपु चेली शिचालताथ। त तेन्हि शिचालते टेम तेन बोलु, “मनखे कुआ जे अउं असा, मनखे हथे टोवेई घेण असा, त से मोउं मार छते; त मरणे पता टेके रोजे अउं दुबारी जीं घेन्ता”। 32पर ए बोक तेन्के समझ अन्तर न आई, त से तेस पुछुण हेर बि डरतेथ।

स्वर्गराज्य अन्तर बोडा कोउं?

मत्ती 18:1-5; लूका 9:46-48

33फि यीशु त तसे चेले कफरनहुम शेहर ए; त गी एई कइ तेन अपु चेली केआं पुछु, “बथ तुस केस बोक पुठ बेहसेईण लगो थिए?” 34से चुप बिशे, किस कि बथ से इस बोक पुठ बेहसेईण लगो थिए कि असी बुच कोउं बोडा असा?#लूका 22:24 35तोउं यीशु भीं बिशा त से बारोह जेईं भिए, त तेन्हि जे बोलु, “अगर कोउं मुखिया बणुण चहन्ता, त सोबी केआं मठुड़ त सोबी के सेवक बणे।”#मत्ती 20:26,27; 23:11; मरकुस 10:43,44; लूका 22:26 36तोउं तेन यक गभुर टाता त तेन्के बुच खड़ किआ। तेस कल्हाई कर कइ तेन्हि जे बोलु, 37“जे कोउं में नओं जोई ईं गभुर अन्तरा केसे यक जेईं बि अपणान्ता, से मोउं बि अपणान्ता; होर जे कोउं मोउं अपणान्ता, से सद मोउंए न, बल्कि मोउं लंघाणे बाड़े बि अपणान्ता।”#मत्ती 10:40; लूका 10:16; यूहन्ना 13:20

कोउं यीशु मितर त दुश्माण असा?

38तोउं यूहन्ने तेस जे बोलु, “ए गुरु, असी यक मेह्‍णु का, जे तें नओएं बइ दुष्ट आत्मा नशाणताथ त असी से रोक छड़ा, किस कि से असी बिची ना थिआ”। 39यीशु बोलु, “तेस न रोके; किस कि कोई ईं नेईं जे में नओएं बइ चमत्कारी कम कर कइ तपले ईं में बुराई करियेल। 40किस कि जे हें बैरी नेईं, से हें कना असा।#मत्ती 12:30; लूका 11:23 41जे कोउं तुसी यक गलास ठन्नु पाणि बि इस बझई जोई पियाल कि तुस मसीहे भो त अउं तुसी जे बोता कि तेस तसे ईनाम जरूर मेता।”#मत्ती 10:42

मेह्‍णु पाप कराणे बझह बणणे बारे

मत्ती 18:6-9; लूका 17:1-2

42तोउं यीशु बोलु, “तेन्हि सुआ भयंकर सज्जा मेती जे कोउं ए जे मोउं पुठ विश्वास कते इन्हि मठड़ अन्तरा यक जेईं बि पाप करणे बझह बणियेल त तेन्के लिए त यक बोडे घते पठ कियाड़ी बइ ढनाई कइ दरेउ भरुण बि घट असु। 43अगर तें हतेउ तोउ पाप करणे बझह बणता, त तेस काट छड़। किस कि दुई हतेउ जुए कदी ना हुशणे बाड़ी आगे जगाह नर्क अन्तर घेण केआं टूंटा भोई कइ स्वर्ग अन्तर अमर जीवन जे घेणे तोउ जे खरु असु।#9:43 इठि यीशु अपु हथ, खुर, टीर (वचन 45-47 अन्तर) सच्चे कटुण जे त किढ़ुण जे नेईं बोलुण लगो, बल्कि जे पाप कते त होरी केआं बि करवान्ते तेन्हि कत भयंकर सज्जा मेती, तसे बारे समझाण लगो असा।#मत्ती 5:30 [44किस कि तेस नर्क अन्तर लोलुड़ बि ना मरते त आग बि ना हुशती।] 45अगर तें खुर तोउ पाप करणे बझह बणता त तेस काट छड़। 46दुई खुरे रेहन्ते नर्के आग अन्तर घेणे बदले लटा भोई कइ स्वर्गे जिन्‍दगी जे घेण तोउ जे खरु असु, किस कि तेस नर्क अन्तर लोलुड़ बि ना मरते त आग बि ना हुशती। 47अगर तें टीर तोउ पाप करणे बझह बणते त तेस भीं किढ़ छड़। दुई टीर जुए नर्क अन्तर घेण केआं अन्हा भोई कइ स्वर्गे जीवन जे घेण तोउ जे खरु असु।#मत्ती 5:29 48जेठि लोलुड़ बि ना मरते त आग बि ना हुशती। 49किस कि जीं हर यक चीज लुणे बेलि साफ करिन्‍ती,#पुजारोठि 2:13; यहजे 43:24 तिहांणि हर यक मेह्‍णु बि आगी बइ साफ करिन्‍ते। 50लुण त अब्बल असु। पर अगर लुणे स्वाद खतम भोई घेईयाल त तेस केन बइ लुणकी कते?#मत्ती 5:13; लूका 14:34,35 तोउं त अपु अन्तर लुणे ईं गुण रखे त अपफ बुच उई मी कइ बिशे”।

Valgt i Øjeblikket:

मरकुस 9: pgg

Markering

Del

Kopiér