मरकुस 8

चोउर हजार केआं ज्यादा मेह्‍णु रौठि खिलाण

मत्ती 15:32-39

1यक रोज, फि सुआ हुसुड़ा किठि भुआ, त तेन्हि केईं कुछ खांजे न थिउ। त यीशु अपु चेले भिए त तेन्हि जे बोलु, 2“मोउं एस हुसुड़े पुठ दाह एण लगो असी, किस कि ए टाई रोज केआं मोउं जोई साते असे, त अन्हि केईं कुछ खांजे बि नेईं। 3अगर अउं अन्हि ढुके गी जे लंघाई छउं, त बथ ढुके पेट चकराठी घेन्ते; किस कि अन्हि अन्तरा कोई कोई दूर केआं ओ असे”। 4तसे चेली तेस जे जवाब दिता, “इठि अरुणि धार असी अति रौठि भला कोढ़िआ अण्हिण की सोब रज्जि घियेल?” 5तेन तेन्हि केआं पुछु, “तुसी केईं कति रौठि असी?” तेन्हि बोलु, “सत”। 6तोउं तेन मेह्‍णु जे भीं बिशुण जे बोलु, त से सत रौठि नी कइ त परमेश्वरे धन्यवाद कर कइ टुकड़ेरी, त अपु चेली कें धे देन्ता रेहा त चेली से तेन्हि मेह्‍णु बुच बांट छइ। 7तेन्हि केईं धिक भइ मठ मठ मछली बि थी; तेन परमेश्वरे धन्यवाद कर कइ तेन्हि मछली बि मेह्‍णु बुच बांटुण जे बोलु। 8त से सोब खाई कइ रज्जि गे त चेली बचो टुकुड़ के सत चाउं भरे। 9तठि कम से कम चोउर हजार मेह्‍णु थिए; तोउं तेन से लंघाई छड़े। 10त से झट अपु चेली जोई साते नाव पुठ चढ़ कइ दलमानुथा इलाके जे घेई गा।

फरीसी यीशु केआं निशाण तोपुण

मत्ती 16:1-4

11तोउं फरीसी एई कइ यीशु जोई बेहसेईण लगे, त तेस परखुण जे स्वर्ग केआं यक चमत्कारी निशाणी हरालण जे बोलु।#मत्ती 12:38; लूका 11:16 12तेन हशाश छइ कइ बोलु, “इस जमाने मेह्‍णु किस निशाण तोपते? अउं तुसी जे बोता कि इस जमाने मेह्‍णु कोई निशाण न हरालीन्‍ता”।#मत्ती 12:39; लूका 11:29

फरीसी त हेरोदेसे शिक्षाई केआं सावधान

मत्ती 16:5-11; लूका 12:1

13तोउं यीशु तेन्हि मेह्‍णु छड़ दी कइ दुबारी नाव पुठ चढ़ कइ तथे पार घेई गा। 14चेले रौठि नेण बिसरी गो थिए, त नाव अन्तर तेन्हि केईं यके रौठि थी। 15तेन तेन्हि जे बोलु, “समोझि घिए! तुस फरीसी त हेरोदेसे टकेणे केआं बच कइ बिशे।”#लूका 12:1 16त से अपफ बुच घुश-घुशात करण लगे “असी केईं रौठि नेईं, तोउं त ए ईं बोलुण लगो असा”। 17ईं बिझ कइ यीशु तेन्हि जे बोलु, “तुस किस अपफ बुच घुश-घुशात करण लगो असे कि असी केईं रौठि नेईं? तुसी त अपल तकर बि अउं पिछाण ना बटा, त समझा ईं नउ। तुं मन की अत नकठर भोई गो असा ना? 18कि तुसी केईं टीर भोई कइ बि ना केतु ना, त कन भोई कइ बि ना शुणतु ना?#मरकुस 4:12 तुसी कि याद नेईं ना, 19जपल मेईं पंज हजार मेह्‍णु लिए पंज रौठि टुकड़ेर कइ दुतो थी त असी तेन्हि टुकुड़ु के कत चाउं भरो थी?” तेन्हि तेस जे बोलु, “बाराह चाउं।” 20“त जपल मेईं चोउर हजार मेह्‍णु लिए सत रौठि टुकड़ेर कइ दुतो थी त तपल तुसी तेन्हि टुकुड़ु के कत चाउं भरो थी?” तेन्हि तेस जे बोलु, “सत चाउं।” 21त तेन तेन्हि जे बोलु, “तुस कि अभेईं बि ना समझते ना?”

यक अन्हा सारा करण

22जपल यीशु त तसे चेले बैतसैदा नओएं यक ग्रां जे आए; त मेह्‍णु यक अन्हे मेह्‍णु तेस केईं घिन आए त तसे छनेअरे करण लगे कि तेस छुई कइ सारेरे। 23से तेस अन्हे मेह्‍णु हतेउ टाइ कइ तेस ग्रां केआं बाहर घिन गा, त तसे टीरी पुठ थुक कइ हथ रखे, त तेस केआं पुछु, “तोउ कि कुछ केतु ना?” 24तेन अपु टीर खड़ लाई कइ बोलु, “मोउं मेह्‍णु केण लगो असे; से मोउं हंटते बुटी के ईं केते”। 25तोउं तेन दुबारी तसे टीरी पुठ अपु हतेउ रखे, त अन्हे ध्यान जोई हेरु त तसे टीर पूरे सारी गे, त तेस सोब किछ साफ साफ केण लगु। 26तोउं तेन तेस जे बोलु, “इस ग्रां अन्तर छाड़ बि ना दे, सदे अपु गी जे गा।”

यीशु यरुशलेम शेहर जे घेण त तठि सेवा करण

(8:27—13:37)

यीशु ईं “मसीह” भो

मत्ती 16:13-16; लूका 9:18-21

27तढ़ेया पता, यीशु त तसे चेले कैसरिया फिलिप्पी शेहरे औत-कोती ग्राईं अन्तर घेई गे। बथ तेन अपु चेली केआं पुछु, “मेह्‍णु मोउं जे की बोते?” 28त तेन्हि जवाब दिता, “कोई बोते कि तुस मेह्‍णु चुसुणे बाड़ा यूहन्ना भो; कोई कोई एलिय्याह त कोई कोई भविष्य वक्ता अन्तरा कोई यक जेईं भो बि बोते”।#मरकुस 6:14,15; लूका 9:7,8 29तेन तेन्हि केआं पुछु, “पर तुस मोउं जे की बोते?” पतरसे तेस जे जवाब दिता, “तु मसीह भो”।#यूहन्ना 6:68,69 30तपल तेन तेन्हि सावधान कर कइ बोलु, “में बारे केसे जे न बोलुण।”

अपु मरणे बारे यीशु भविष्य वाणि

मत्ती 16:21-23; लूका 9:22

31तोउं यीशु तेन्हि शिचालुण लगा कि “मनखे कुआ जे अउं भो, ईं जरूरी असु कि अउं सुआ दुख सेहुं, त टजे स्याणे, मुख्य पुजारे त धर्मशास्त्री मोउं ना मानियेल त मोउं मार छड़ियेल, त अउं टाई रोजे बाद दुबारी जीन्ता भोई घिउं।” 32तेन इ बोक तेन्हि जे पूरी खुल कइ बोल छइ। त पतरस तेस बखरे नी कइ जड़काण लगा। 33पर यीशु खिरक कइ अपु चेली कें धे हेरण लगा, त पतरस जे जड़कइ कइ बोलु, “ए शैताना! में सामणि केआं दूर भो; किस कि तु परमेश्वरे इच्छा पुठ न, पर मेह्‍णु के इच्छा पुठ मन लान्ता”।

यीशु चेला बणणे मतलब

मत्ती 16:24-28; लूका 9:23-27

34तोउं यीशु अपु चेले त सम्हाई हुसुड़ा अपु भेएड़ भिआई कइ तेन्हि जे बोलु, “जे कोउं में पता एण चहन्ता, से अपु मने मुताविक जीण छड़ दिए, त अपु दुख त मरुण सेहणे लिए तेयार भोई कइ में पता एईए।#8:34 मूल भाषा अन्तर इठि “क्रूस” लिखो असु।#मत्ती 10:38; लूका 14:27 35किस कि जे कोउं अपु प्राण बचाण चहन्ता से अपु प्राण गवाई छता, पर जे कोउं में त खुश खबरी लिए अपु प्राण देन्ता, से अमर जीवन पान्ता।#मत्ती 10:39; लूका 17:33; यूहन्ना 12:25 36अगर मेह्‍णु पूरा मतोक बि मेई घियाल, पर अपु प्राण ना बचाई सकियाल त तसे की फायदा? 37किस कि अमर जीवन वापस पाणे लिए मेह्‍णु किछ बि दी ना सकता। 38परमेश्वर ना मानणे बाड़ी त पापी मेह्‍णु के बुच जे कोउं मोउं केआं त में वचनी केआं लजिन्ता, त जिखेईं मनखे कुआ शुचे स्वर्गेदूती जोई साते अपु बोउए शान जोई एन्ता तिखेईं से तेस हेर बि लजिन्ता।”

Valgt i Øjeblikket:

मरकुस 8: pgg

Markering

Del

Kopiér