मरकुस 13

देहेर उजुड़णे भविष्य वाणि

मत्ती 24:1-28; लूका 21:5-24

1पता जपल यीशु देहरा निसुण लगो थिआ, त तसे चेली अन्तरा यक जेईं तेस जे बोलु, “ए गुरु, हेर! देहरे की अब्बल अब्बल घर असे त कीं बोडे बोडे घोड़े बइ बणो असे।” 2यीशु तेस जे बोलु, “कि तु ई अब्बल घर हेरता ना? ए सोब उपीड़ घेन्ते त एठि घोड़ी पुठ घोड़ बि ना रेहन्ते।”

3जपल यीशु देहरे पार सामणि जैतुन फाट पुठ बिशो थिआ, त पतरस, याकूब, यूहन्ना त अन्द्रियास अकेले तेस केआं पुछु, 4“ए गुरु, असी बताण दिए कि ए बोके कपल भुन्ति? त ई सोब बोक पूरी भुणे टेम की की निशाण भुन्ते?” 5यीशु तेन्हि जे बोलु, “खबरदार बिशे कि तुसी कोई ना ठगयाल। 6किस कि में नओं नी कइ सुआ जेईं एन्ते त बोते, ‘अउं सेईंए मसीह भो’ त सुआ जेईं ठगान्ते। 7होर जपल तुस लड़ाई त लड़ाई बारे उफाह शुणियेल त न डरुं; किस कि ईं पेहले भुण जरूरी असु। पर एठिए नेईं मुकुण। 8त जाति जाति बुच, राज्य राज्य बुच लड़ाई भुन्ति। जगाई जगाई भुंजल घेन्ते, त अकाल घेन्ता। ए त सद धिक धिक शुले एणे टेमे ईं भुन्तु। 9जपल ए सोब भुन्तु त तुस खबरदार बिशे; किस कि मेह्‍णु तुसी टजोटे हवाले कते त तुस अराधनालय अन्तर मडेईन्‍ते, त में बझई जोई तुसी अफसर त राजी के सम्हाणि खड़ेरते कि तुस तेन्हि जे में बारे उगाह दियेल।#मत्ती 10:17-20; लूका 12:11,12; 21:12-13 10पर ई जरूरी असु कि सोबी जाति अन्तर खुश खबरी प्रचार भो लौता। 11जपल से तुसी घिन कइ तेन्के हवाले करियेल, त तुसी पेहलाई चिन्ता न करीण कि असी की बोलुण; पर जे कुछ बि तुसी बतेईन्तु, सेईंए बोलुण; किस कि बोलुणे बाड़े तुस न भिन्थ, पर शुची आत्मा भो। 12भाई भाई त बोउ कुआ मरण जे टोवाई छते, होर गभुरु ईये बोउए दुश्माण बण कइ तेन्हि मरवाई छते। 13होर में बझई जोई सम्हाई मेह्‍णु तुसी हेर नफरत कते; पर जे अखिर तकर लाह जोई विश्वास कते रेहाल, सेईंया बचता।”#मत्ती 10:22

14“त जपल तुस से ती गन्दी चीज जे परमेश्वरे देहेर जुठा कती, तठि ठेहरान्ते काएल, जेठि से भुओ ना लौती (इसे मतलब पढ़णे बाड़े अपफ समझे), तपल जे यहूदिया इलाके अन्तर असे, से फाट पुठ जे नश घिए। 15त जे लहाड़ि पुठ असे, से अपु गीहा किछ नेण जे बुन्ह न एईए त न अन्तर घिए।#लूका 17:31 16होर जे बग असे, से अपु झिणे नेण जे वापस न एईए। 17तेन्हि दिनि जे गभुरवाल असी या जे गभुर दुध पिआन्ती, तेन्हि सुआ कष्ट भुन्ता। 18तुस प्रार्थना कते रिहे कि ई हियुंत न लौतु भो। 19किस कि तेस रोजे ईं दुख परमेश्वरे भुमण बणुण केआं अपल तकर न कदी भुओ असा होर न भुण असा। 20अगर प्रभु तेन्हि दिनि न घटान्‍ताथ, त यक जीव बि ना बचतेथ; पर परमेश्वरे चुणो तेन्हि मेह्‍णु के बझई जुए, से दन घटे। 21तेन्हि रोजी अगर कोउं तुसी जे बोलियाल, ‘हेरे, मसीह इठि असा’ या ‘हेरे, ओठि असा’ त तेन्के बोकी पुठ विश्वास न करण। 22किस कि तपल झूठे मसीह त भविष्य वक्ते एन्ते। से निशाण हराल कइ त सुआ चमत्कारे कम कर कइ, होर तेन्हि केआं भोई सकियेल त परमेश्वरे चुणो तेन्हि बि विश्वास केआं उलाठ नेणे कोशिश कते। 23पर तुस खबरदार बिशे। हेरे, मेईं सोब बोके तुसी जे पेहला ईं बताई छओ असी।”

अखिरि रोजे बोक

मत्ती 24:29-31; लूका 21:25-28

24तोउं यीशु हउ बि बोलु, “तेन्हि दिनि अन्तर, तेस दुख बुखता केआं पता दिस अन्हारु भोई घेन्तु, त जोसणी टगड़ियार घेई घेन्ति। 25तारे अम्बर केआं झड़ण लगते; त अम्बरे सोब ग्रह इएर त ओवर खिल्हिर घेन्ते। 26तोउं मेह्‍णु मनखे कुआ बोडी ताकत जुए त महिमा जुए बदेई पुठ एन्ता हेरते। 27तेस टेम से स्वर्गेदूती लंघाई कइ, धरती इस पार केआं अम्बरे ओस पार तकर, चोहरो कनारे अपु चुणो मेह्‍णु कठे कता।”

अंजीरे बुटे केआं शिचे त खबरदार बिशे

मत्ती 24:32-44; लूका 21:29-33

28“तुस अंजीरे बुटे केआं शिच नीए: जपल तसे डाई नरम भोई घेन्ति त पन्ने निसुण लगते; त तुसी पता लग घेन्ता कि बरशाड़ एण लग गा। 29तिहांणि जिखेईं तुस से सोब निशाण हेरियेल त बिझ घिए कि अन्त भुणे टेम भोई गो असा, मनखे कुआ दुआर पुठ पुजी गो असा। 30अउं तुसी जे बोता कि जपल तकर ईं न भोल, तपल तकर ई पीढ़ी खतम न भुन्ति। 31अम्बर त धरती खतम भोई घेन्ति, पर में बोक कदी ना मुकती।”

32यीशु हउ बि बोलु, “तेस रोजे या तेस टेमे बारे कोई न जाणता, न स्वर्गेदूत, न कुआ, पर सद बोउ जाणता।#मत्ती 24:36 33हेरे, किस कि तुस न जाणते कि से टेम कपल एन्ता, त खबरदार भोई कइ तेयार बिशे।”

34“में एणे टेम ईं असा जीं यक मेह्‍णु अपु गी छड़ कइ परदेश घेन्ता। से अपु नौखरी कें धे हक दी कइ तेन्हि अन्तरा हर यक जेईं तेस कम बताई देन्ता त पेहरा देणे बाड़े जे खड़ खड़ बिश कइ पेहरा देणे निआंग देन्ता।#लूका 12:36-38 35त तिहांणि तुस तेस नौखरे ईं चौकाने बिशे, किस कि तुस न जाणते कि गीहे मालिक कपल एन्ता, झवादी या बुच रात, या कुकड़े बांग देणे टेम या फि भ्यागे टेम। 36ईं न भो कि से अजगता एई कइ तुसी उंघो हेराल। 37जे अउं तुसी जे बोता, तस अउं सम्हाई जे बि बोता कि : खबरदार बिशे!”

Valgt i Øjeblikket:

मरकुस 13: pgg

Markering

Del

Kopiér