Matew 8

Jesus tremolfi kiñe tati lepra kutran nielu

(Marku 1.40-45; Luka 5.12-16)

1Fey Jesus nagpatulu tati wingkul mew, rume fentren che inaeyew. 2Feymew fülkontueyew kiñe kutrankülechi wentru nielu lepra kutran,#8.2 lepra kutran: ta kuyfi mew chem rume wesa kutran trawa mew. fey lukunagpay kisu ñi fül mew ka feypieyew:

—Ñidol, pifulmi, tremoltuafen tañi kutran mew.

3Fey Jesus nüfi ti kutran ñi kuwü mew, fey feypifi:

—Feley. ¡Tremotunge!

Pichin mew müten, tati niekelu lepra kutran tremolewetuy ñi kutran mew. 4Feymew Jesus feypikünufi ti wentru:

—Feypiaeyu, iney no rume feypilayafimi tüfachi dungu. Amunge, pewfaluwmenge tati saserdote mew müten, ka yenge ta ofrenda Moyse tañi feypikünuel ñi femael ta che, femngechi tañi kimael kom che tami dew tremolewetun tati kutran mew.

Jesus tremolfi kiñe Roma tuwchi kapitan ñi kona

(Luka 7.1-10; Juan 4.43-54)

5Jesus ta konpulu Kapernaum waria mew, kiñe Roma tuwchi kapitan#8.5 Roma tuwchi kapitan: longkolechi soltaw kiñe pataka soltaw mew. Kisu ngüneniekefuy ti kuartel ti trokiñ mapu chew ñi mülen tati trokiñ soltaw Roma tuwlu. fülkontueyew tañi “füreneen” ñi piaetew. 6Fey feypieyew:

—Ñidol, iñche ñi kona müley ruka mew, rume kutranküley, pepi nengümlay rume.

7Fey Jesus llowdungufi ti kapitan:

—Amuan tañi tremolafiel.

8Fey tati kapitan llowdunguy:

—Ñidol, Ñidol, küpakilnge. Rume yamnieeyu tami konpuael iñche ñi ruka mew. Iñche ta Roma tuwünche. Fey eymi werkülmi müten, iñche tañi kona tremoltuay. 9Iñche ta ka femngechi müley tañi werkünieetew, ka iñche ta nien soltaw tañi werkükeel. Feypifiyüm kiñeke soltaw ñi amuael, amukey. Fey feypifiyüm kangelu ñi küpayael, küpakey. Ka werküfiyüm tañi kona tañi chem chumael rume, fey femkey.

10Jesus allkülu tüfachi dungu afmatulewey, fey feypifi ti pu che ñi inanieetew:

—Rüf dungu feypiwayiñ iney no rume ngelay israelche mew fente feyentulelu tüfachi wentru reke. 11Feypiwayiñ fentren che ñi küpayael tripawe antü püle ka konwe antü püle, ka anüay ñi iyael Abraam, Isaak ka Jakob engün Ngünechen tañi ülmen mülewe mew, 12welu tati pu che mülefalfel tati ülmen mülewe mew, wemünentungeay wekuntu tati fütra dumiñ mew, chew tañi ngümayam ka kütrüram engün tañi foro.

13Feymew müten Jesus feypifi tati kapitan:

—Amutunge tami ruka mew. Felepe kom chumngechi tami feyentun.

Feychi lelen mew müten tañi kona tremolewetuy.

Jesus tremolyey fentren pu kutran

(Marku 1.29-34; Luka 4.38-41)

14Jesus amuy Pedro ñi ruka mew, feymew pepufi Pedro tañi llalla ngütantuluwkülelu, aling kutrankülelu am. 15Jesus nüñmapufi tañi kuwü ti kuse, fey ti kuse mongetuy. Feymew Pedro tañi llalla witratuy, fey eluwi ñi poyeafiel ta Jesus.

16Fey punlu, yelelngey ta Jesus fentren che kontunieetew weküfü, fey kisu ñi dungun mew müten werküfi ñi tripayael tati pu weküfü. Ka femngechi tremolyefi kakelu pu kutran. 17Fey tüfa famngechi femi ñi mupiael tañi kimelkünuel tati pelon wentru Isaia, feychi feypilu:

“Kisu kutrantupiwkey iñchiñ tati pu kutrankawkülelu mew,

fey tremoltueiñmew taiñ kutran mew.”#8.17 Isaia 53.4.

Tati pu che ayülu ñi inayafiel ta Jesus

(Luka 9.57-62)

18Jesus pefilu ti pu che tañi walloñmanieetew, werküy tañi nolngeael ta nome pichi lafken. 19Feymew fülkontueyew kiñe kimeltukelu Moyse tañi ley dungu, fey feypieyew:

—Kimeltufe, ayülen tami inayafiel chew püle rume amulmi.

20Fey Jesus llowdungufi ti wentru:

—Tati pu ngürü niey engün ta lolo ka tati pu üñüm niey engün ñi dañe, welu tati Wentrukünuwpalu#8.20 tati «Wentrukünuwpalu» kam «Wentru ñi Fotüm» Jesus tañi femngechi üytuwkefel. nielay chew tañi küme kansatuam.

21Fey kiñe tati allkütuyawülkefilu, feypirkeeyew ta Jesus:

—Ñidol, wüne üngüman ñi layael ñi fütakeche, fey wüla inayaeyu.

22Feymew Jesus llowdungufi ti wentru:

—Eymi inaen, fey elkünufinge tati pu che la reke felelu ñi rüngalafiel tati pu la.

Jesus tüngümnagümfi tati kürüf ka ti rew lafken

(Marku 4.35-41; Luka 8.22-25)

23Jesus konpuy kiñe farku mew, fey ñi pu disipulu kompañeyew. 24Feymew ti lafken mew triparumey kiñe fütra kürüf, fey rume newentu ingafpüramekey ti rew tati farku mew, welu Jesus umawturkey. 25Feymew tañi pu disipulu amuy ñi trepelmeaetew, fey feypimengey:

—¡Ñidol, montulmuiñ! ¡Petu llañnagiyiñ!

26Fey kisu llowdunguy:

—¿Chumngelu anta fente llükaymün? ¡Müna pichin mupiltun nieymün ta eymün!

Feymew feypikünulu, witrapüray, fey werküfi tati kürüf ka ti rew lafken ñi tüngnagael. Feymew ti kürüf ka ti rew lafken tüngkülewetuy. 27Fey kisu engün, afmatulen welukonkechi ramtuwi engün: “¿Iney ürke am tüfachi wentru, kürüf ka ti rew lafken kütu ta müngeltueyew?”

Gadara wentru kontunieetew fentren weküfü

(Marku 5.1-20; Luka 8.26-39)

28Feymew Jesus puwlu nometu pichi lafken, Gadara mapu mew, epu wentru konweküfülelu tripay engu eltun mew, fey fülkontupueyew ta kisu engu. Rume kuñiwünngerkefuy engu, fey iney rume rupakerkelay fülpüle chew ñi mülemum ta kisu engu. 29Fey eluwi engu ñi wirarün:

—¡Kontumupakeliyiñ, Ngünechen ñi Fotüm! ¿Küpaymi anta faw tami kutrankamuafiel petu tañi puwnon tati medin antü? —pi engu.

30Fülpüle tüfey mew mülerkey fentren sañwe ütayawlu, 31fey llellipueyew ti pu weküfü:

—Wemünentumuliyiñ, elumuiñ taiñ konpuael tüfeychi pu sañwe mew.

32Fey Jesus feypifi ti pu weküfü:

—Amumün.

Fey tati pu weküfü tripatuy tati epu wentru mew, fey konpuy engün tati pu sañwe mew. Fey pichin mew kom tati pu sañwe tuwi ñi lefmawün, fey lefkonpuy engün ti pichi lafken mew. Fey tüfey mew kom ürfipuy engün.

33Tati pu kuydakefilu tati pu sañwe, tripay engün ñi lefmawün, fey puwlu waria mew nütramkapuy engün femngechi dungu ñi rupan, ka ñi küme feletun tati konweküfülekechi epu wentru. 34Feymew kom ti pu che mülelu ti waria mew tripapay engün, fey akuy chew ñi mülemum ta Jesus. Fey pefilu engün, llellipufi ñi tripatuael feychi lof mapu mew.

Valgt i Øjeblikket:

Matew 8: ARN

Markering

Del

Kopiér