San Marcos 5
5
Jerasa anapu acheti enga nóambakiti incharhetini jápka
(Mt 8.28-34; Lc 8.26-39)
1Niárasptiksï jiniani japundarhu parhimetini, Jerasa uanondani. 2Enga Jesusi icharhutarhu kétsepkia, kúmaspti acheti ma enga nóambakiti incharhetini jápka, enga uarhiri jatsintskuarhu uéndikupka, 3jimboka jima irekaspka. Ka nónema úsïrempti p'ínguni, náuejki tiámu tepekata jimbo. 4Mémechaniksï tiámu tepekata jimbo jótaspti, ka ima kachundurhiasïrempti tiámuechani, nónema úsïrempti p'ínguni. 5Juátarhu ka uarhiri jatsintskuarhu isï, méntkisï jiuakorheparini jámsïrempti ka tsakapu jimbo atakorheparini. 6Ka enga Jesusini iauani jatini erapka, uiriaspti kúmani ka tinguixurhikuspti, 7ka uinhachaparini arhini:
–¡Jesusi, auandarhu anapu Diósï Uájpa! ¡Ásïrini inchaakuche, kómarhixakakini, ásïrini nósesi p'ikuasta!#5.7 Mk 1.24; 3.11; Lc 4.41. 8Ísï uandakorhesïrempti jimboka Jesusi arhispka:
–¡Nósesi jásï espiritu, uérhentsï íni achetini!
9Ka ístu kurhamarhespti:
–¿Nénari arhinhasïnki?
Ka ima arhispti:
–¿Andi nóri míteski na engani arhinhajka ji? Ji Lejioniska,#5.9 Enga lejioni arhijka imanisï arhijti engaksï Roma anapu p'urhejkuticha engaksï 6,000 ísïpka. ka no jíjkueska jimbokani jucha uáneska. 10Ka Jesusiniksï kánekua kómu arhispti eska no kénditaapiringa. 11Ka no iauani jarharetini, juátarhu jandukutiniksï uánekua kúchicha jámaxapti t'ireni, 12ka nósesi jarhati espirituechaksï kómu arhispti Jesusini arhiparini:
–Kúchiachani jinguntsïni axa ka íntskujtsïni sésekua eskani jucha imechani incharheauaka. 13Jesusi jiáretaaspti, ka nósesi járhati espirituechaksï achetini uérhentaspti, ka iúmu irepeta#5.13 2,000. ísïsptiksï engakï kúchichani incharheapka, ka ísku úndasptiksï nósesi jándu ka kétsemandu isï uiriani. Japundarhuksï inchameraspti ka jimaksï uarhimespti. 14Ka kúchi erangutichaksï uiriaspti sïpakorheni ka iretarhu ka juátecharhu isïksï uandantaspti. Ka uánekua ninhaspti exenhani ambesï úkorheni japi. 15Eka niáranhapka jima enga Jesusi jápka, ima acheti engaksï nósesi járhati espirituecha incharhetini jápka, uaxakatixaptia xukuparhantatini ka míakua jinguni. Ka chérakorhenhatixapti. 16Ka ima engaksï Jesusini exepka, néna enga ambakerantapka imani achetini, engaksï nósesi járhaticha incharhetini jápka, ka engajtuksï exepka nénaksï jámaspki kúchicha, imaksï aianguaspti máteruechani. 17Ka arhisptiksï Jesusini eska uéakuntapiringa imani iretarhu.
18Enga Jesusi jatantani jápka icharhutarhu, ima acheti enga Jesusi ambakerantapka, kómu arhisïrempti eska jiáretapiringa chúxapani. 19Ka Jesusi ménderu arhispti:
–Ni níntani, ka aiangpe eskakini Acha ambakerantaska#5.19 Jn 5.19; 8.28; 14.10. ka eskakini kóndentaska.
20Ima acheti níntaspti, ka uandantaspti eska Jesusi ambakerantaspka; ka ísku pakareranhaspti.
Jáirueri uátsï ka uarhiti p'amenchati
(Mt 9.18-26; Lc 8.40-56)
21Enga Jesusi icharhutani jatarini ménderu parhimentapka, uanamukutini pakaraspti ka uánekua tángorhenhantaspti. 22Jima andarheraspti Jáiru, enga k'umanchekua tángorhentskuarhu urhejtsïkuripka, ka Jesusini exerini, tinguikuatsekuspti. 23Ka kánekua kómu arhiparini arhispti:
–Jucheti uátsï nanaka uarhixati; ju p'ájtsïkuni#5.23 Ísïksï ambakerantaasïrempti méni isï p'amenchatichani: Mk 6.5; 7.32; 8.23,25. eska ambakentaaka ka eska sánderu irekaaka.
24Jesusi niraspti ima jinguni, ka uánekuaksï chúxapaxapti, katsinhperapanhaxapti. 25Jima niraxapti ma uarhiti enga témbeni tsimani uéxurhinipkia enga p'amenchaparini jámani jápka, iurhiri késkuparini.#5.25 Lb 15.25-27. 26Kánekua ka ióni mískorhesptia, ka uánekua tsinajpirichani maiamuasptia, ka nómbema marhuakuspti, sánderu kánerapaxapti p'amenchakuani. 27Enga kurhajchpepka eska Jesusi jimesï jámaxapka, ima uarhiti tátsepani isï inchaakurhaparini andanguspti Jesusini, ka xukuparhakua jupirhukukuspti. 28Jimboka ísï eratsentaspka: “Xukuparhakuajkuni engani jupirhukukuska, ji ambakentaaka.” 29Ka iurhiri anhakuataspti, ka ambakentani p'ikuarheraspti. 30Ka Jesusi p'irhipakurhispti enga p'ikuarherapka eska uinhapekua uérhespka, ka kurhamarhpespti:
–¿Nérinisï xukuparhakua jupirhukuche?
31Ka imeri jurhengorherichaksï arhispti:
–Exexakari eskajtsïni katsinhaxaka, ka útasteruri kurhangorhesïnga, ¿Nérini xukuparhakua jupirhukucheski?
32Ka Jesusi p'irhip'irhinharhixapti, uékani exeni nésï xukuparhakua jupirhukukupki. 33Ka jimboka ima uarhiti míakorhexapka ambe enga úpka, Jesusini chéparini ka manaraparini andarheraspti ka tinguixurhikuspti, ka aianguntaspti. 34Ka Jesusi arhispti:
–Jucheti uátsï, chéti jakajkukua jimbori ambakentaskia, ni níntani ka Diósïkini urhechepante.
35Enga Jesusi útasï uandani jápka, jimaksï niáraspti máru k'umanchekua tángorhentskua urhejtsïkurio uératini, ka arhisptiksï nanaka sapichueri tátjembani:
–Chéti uátsï uarhistia, ¿Ambeteruri úni ójkutaxaki jurhentpirini?
36Ka Jesusi ísku kurhajchaaspti ka Jáiruni arhini:
–T'u ásï jáma chéni, mintsikarini.
37Pédru ka Santiagu ka Juánuni, taniperantku jiáretaaspti eskaksï pámbetapiringa. 38Ka engaksï niárapka Jáiruo, exejpespti eska mískorhenhaxapka, ka eskaksï máru uinhamendu ueraxapka, 39inchaspti ka arhiani:
–¿Andisï xáni uenhajki ka mískorhenhani? Nanaka sapichu k'uíxati, inde no uarhirixati.#5.39 Mt 9.24.
40Ka Jesusiniksï teresmarhuspti, ka ima iámenduechani petarkorheantaspti, ka inchaspti jima enga nanaka sapichu ka tátjemba jápka, amamba ka imeri pámpirichani jinguntku. 41Ka nanaka sapichuni jupijkuspti ka arhini:
–¡Talita kumi!#5.41 Uandakua arameo jimbo, enga Israeli uandanhempka ióntki. (Enga arhikuekajka: “¡Nanaka sapichu, t'úngenisï arhijka, jauara!”)
42Ka nanaka sapichu jauarapaspti ka xanharantaspti, jimboka témbeni tsimani uéxurhini jatirispkia. Ka kánekua ísku pakareranhaspti ísï exerini. 43Ka Jesusi arhiaspti eskaksï nónemani aiangupiringa ka arhiasptijtu eskaksï nanaka sapichuni t'irerapiringa.
Valgt i Øjeblikket:
San Marcos 5: BI-PURHE
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Biblia en P´urhépecha, Michoacán, México © Sociedad Bíblica de México, A.C.
