San Marcos 16
16
Jesusiri tsíntskua
(Mt 28.1-10; Lc 24.1-12; Jn 20.1-10)
1Enga sábadu nitamapkia, Maria Magdalena, ka Maria, Santiagueri amamba, ka Salome, p'untsumekuechanksï piáspti engaksï Jesusini atarhentapiringa. 2Ka pauandekua xarhentku, enga jurhiata andarani jápkia, nirasptiksï jima engaksï uarhiricha jatsinhantajka, 3ka arhijperapaxaptiksï:
–¿Ka andi néjtsïni kénditacheaia tsakapu enga ómutakorheni jaka?
4Ka engaksï na niárapkia, tsakapu t'uíni támu jarhasptia, náuejki ima tsakapu kánekua k'énharhipka. 5Inchanhesptiksï jima nani enga Jesusi pénhantapka, ka jimaksï tumbini ma exespti, t'irerkandani uaxakatini jarhani, t'uput'upusï xukuparhatini, ka chérakorhesptiksï. 6Ka ima tumbi arhiaspti:
–Ásï che je. Chájtsï Jesusi Nasareti anapuni jirinhantaxamka, imani enga krúsirhu cháparhatanhaka. Nóteru ixu jarhastia, tsíntastia. Exetkiru jeia axu enga pénhantapka 7Ni je imeri jurhengorherichani aianguaani, ka ístu Pédruni: Ima Galilea niraxati, jimajtsï exentaaka ménderu, ísï eskaksïni ima na arhirini jápkia.#16.7 Mt 26.32; Mk 14.28; Jn 21.1-22.
8Uarhitichaksï uiriapantaspti, manarapantani, ka nónemaniksï aianguspti, jimbokaksï chérakorhetixapka.
Jesusi Maria Magdalenani xarhakuntaspti
(Jn 20.11-18)
9[Domingu juthiatekua tsípa, jiájkani enga Jesusi na tsíntapkia, Maria Magdalenani uénaspti xarhakuntani, imani Magdalenani enga iúmu tsimani nóambakitichani petarhetantaapka.#16.9 Lc 8.2. 10Ima máteruechani niraspti aianguantaani engaksï Jesusini p'amojkuni mískorheni ka uerani jápka. 11Ka nóksï jakajkukuspti nájkirukaksï kurhani jápka eska ima uarhiti Jesusini tsípiti exentaspka.#16.11 Mt 28.17; Lc 24.11.
Jesusi xarhakuantasti tsimani jurhengorherichani
(Lc 24.13-35)
12Ísï tátsekua, Jesusi ménderueni xarhakuaspti máteru tsimani jurhengorherichani engaksï juátarhu nirani jápka. 13Ka imajtuksï niraspti máteruechani aianguani; ka imajtuksï máteruecha májkueni no jakajkukuaspti.
Jurhengorhericheri ánchperata úkua
(Mt 28.16-20; Lc 24.36-49; Jn 20.19-23)
14Ka tátsekua, k'ámarani jámania, Jesusi témbeni ma jurhengorherichani xarhakuantaaspti, engaksï t'ireni jápka. Ka arhinharhikuaspti jimbokaksï mintsitani chuperaspka ka jimbokaksï no jakajkukuaspka imechani engaksï exepka eska tsíntaspkia. 15Ka arhiaspti: “Iámu parhakpentsï niuaka ambakiti aiangperakuani aiangpentani.#16.15 Mt 28.19; Uk 1.8. 16Ka ne eka jakajkuaka ka itsï atajtsïni, p'ímutantskateuati; ka ne enga no jakajkuaka, tsînchetini pakaraati.#16.16 Jn 3.18; Uk 2.38; 16.31-33. 17Ka jakajkutichaksï íni ambe xarhataati: Jucheti juramukua jimboksï úati nóambakitichani#16.17 Mk 3.15; Uk 8.7; 16.16-18. petarhpeantani; ka úatiksï máteru uandakuechaniksï uandaani;#16.17 Uk 2.4-11; 10.46; 19.6; 1 Ko 12.28. 18ka nómbemaksï úkorhenchaati náuejkiksï akuitsechani jupiani#16.18 Lc 10.19; Uk 28.3-5. ka náuejkiksï uándikpetarakua itsïmani; ka p'amenchatichani p'ájtsïkuauati ka imaksï ambakentaati.”#16.18 Mk 6.13; Uk 3.1-10; 5.12-16; 9.33-34; Stg 5.14-15.
Jesusiri kénchentskua
(Lc 24.50-53)
19Ka enga Jesusi na k'amarapkia ísï uandani, p'íkunhantasptia auandarhu,#16.19 Uk 1.9-11. ka Diósïri t'irerkandani uaxakaspti.#16.19 Pir 110.1; Mt 22.44; 26.64; Uk 2.33-34; Ef 1.20; Eb 1.3; 10.12; 12.2. 20Ka jurhengorherichaksï niraspti iápuru isï ambakiti aiangperakua aiangpeni, ka Acha jarhuatapasïrempti, jimbokaksï uandakuani milagruechani jimbo tsïrimerapasïrempka.]#16.9-20 Exe karandukatarhu 1.1.
Valgt i Øjeblikket:
San Marcos 16: BI-PURHE
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Biblia en P´urhépecha, Michoacán, México © Sociedad Bíblica de México, A.C.
