San Marcos 14

Jirinhakuntaxaptiksï néna Jesusini jupikani

(Mt 26.1-5; Lc 22.1-2; Jn 11.45-53)

1Páskueri k'uínchekua andamutani, enga tsimani jurhiaterku kueratani jápka, enga k'urhinda no xarhipiti jukari anhajka.#14.1 Eks 12.1-27; Dt 16.1-8; Lb 23.5-6. Tátecheri juramuticha ka juramukua jurhentpirichaksï jirinhakuntaxapti nénaksï jupikapirini Jesusini ka sési arhiparinksï atani uándikuni. 2Ka máruksï uandasïrempti:

–K'uínchekuarhu nómbe, jimboka ireta nósesi jámaaka uandakorheni.

Uarhiti ma Jesusini p'untsumekua atarhesti

(Mt 26.6-13; Jn 12.1-8)

3Jesusi Betania niraspti, Simonio, enga xúta jukarikua jimbo mítenhapka. Ka enga t'irekua p'íjtsïtakuarhu uaxakapka, uarhiti ma niáraspti, tsúntsurhu ma p'untsumekua uiniratini enga kánekua jukaparhakuepka. Kakaspti tsúntsuni ka p'untsumekua Jesusini atajtsïkuspti. 4Ka máru enga jima janhapka ikiasptiksï ka ísïksï arhijperaspti:

–¿Andisï p'untsumekua ísku ambendarheia? 5Sáno ma uéxurhini ánchekorhekata jimini nirasti, sánderu sésipirindi enga ataranhantapiringa ka tumina no jatsikorherichani íntsaani.

Ka uarhitinksï arhindikperaparini arhinhchaxapti.

6Ka Jesusi arhiaspti:

–Jurajku je. ¿Nójtsï exesïni eskarini sési ambesï úcheka? 7No jatsikorherichantsï úaka jarhuatani jarhani,#14.7 Dt 15.11. jimbokajtsï méntkisï chánksïni jinguni jatsiauaka, ka na engajtsï jatini uékaaka úakajtsï jarhuataani; ka jíndentsïni no méntkisï chánksïni jinguni jámani jauaka. 8I uarhiti jarhojpestia enga xántku inde úka: P'untsumekuarini atarhentastia engani jatsinhantani jámani atarhenhantapiringa.#14.8 Mt 26.8-12; Jn 19.40. 9Sési jimboksïni arhixaka eska iápuru ísï enga ambakiti aiangperakua aiangperanhani janhaaka eska jima míanhantaaka enga inde uarhiti jámaka.

Júdasï pakatperasti juramutichani jinguni

(Mt 26.14-16; Lc 22.3-6)

10Ka Júdasï Iskarioti, enga témbeni tsimani jurhengorhericha jinguni miiukorhempka, uékaspti Jesusini sïpatani, ka niraspti tátecheri urhejtsïkurichani uandaxekuani. 11Ka imaksï kánekua tsípespti ísï kurhajchatini ka tuminaksï aiakuspti. Ka Júdasï jirinhakuntaxapti néna ch'anakupirini Jesusini ka intsïnharhitpentani.

Páskueri chúrekua anapu t'irekua

(Mt 26.17-29; Lc 22.7-23; Jn 13.21-30; 1~Co 11.23-26)

12Ka ima jurhiatekua enga k'uínchekua Páskueri uénakorhejka, enga k'urhinda no xarhipiti jukari anhajka, ka enga karichi uándikunhajka. Jesusinksï jurhengorheri jémbecha kurhamarhespti:

–¿Naniri uéksïni eskaksïni Páskueri t'irekuani úchentaaka?

13Ka tsimani jurhengorheri jémbechani axaaspti ka arhiaspti:

Ni je Jerusaleni, ka ekajtsï achetini ma kúmaska enga k'amukua jimbo itsï páni jauaka; chúxapa je, 14Ka nani enga inchantka, arhi je jima imani k'umanchekuarhu anapuni eska jurhentpiri kurhangorhexaka: ¿Nani ambandeski engani ji jucheti jurhengorherichani jinguni Páskueri t'ireaka? 15Ka imaksïni páati k'umanchekuarhu miiurani, iótakuarhu enga sési tatsuntskakata ka ambantskakata jaka. Jimajtsï úntaaka juchari t'irekua.

16Ka jurhengorherichaksï, niraspti iretarhu ka iámendu ambeksï kúntaspti, eska Jesusi na arhiapka, ka jimaksï úntaspti Páskueri t'irekua.#14.16 Dt 16.5-8.

17Ka Jesusi témbeni tsimani jurhengorherichani jinguniksï chúrekua niraspti jima. 18Ka enga t'irenhani jápka, Jesusi arhiaspti:

–Sési jimboksïnisï arhixaka eska jíndeni jinguni t'irexaka,#14.18 Pir 41.9 (10). ima engarini sïpataaka.

19Ka imaksï kómu p'ikuarheraspti enga ima ísï arhiapka ka mándani arhisptiksï kurhamarheni:

–¿Jíski?

20Ka Jesusi arhiaspti:

–Cha ma ísïskajtsï, ima enga jíndeni jinguni atarhutani jaka kurhinda.#14.20 Jn 13.18; Pir 41.9 (10); Mt 26.23. 21Acheti Uájpa jatsisti xanharini andarani eska karakata na jaka; ¡Násï úkorhenchaa ima enga Acheti Uájpani#14.21 Exe 2.10. íntsïnnharhitpeaka! Sánderu sésipirindi eska no kángorhenhapiringa.

22Engaksï t'ireni jápka, Jesusi kurhinda jupikaspti ka újchakuraspti ka k'epekuspti, ka íntsaaspti ka arhiaspti:

–Jupika je, ka a je, i jucheti anhanhatakuesti.#14.22 Jn 6.51-58.

23Tátsekua itsïmatarakuani p'íkuspti, ka Diósïni diósïmaiamukua arhispti ka íntsaani, ka iámendu itsïmanhaspti. 24Ka arhiaspti:

–I jucheti iurhiristi, ka íni iurhiri jimbo pakatajperanhaati#14.24 Eks 24.6-8; Jer 31.31-34; Sak 9.11; Lc 22.20. enga uánekuecheri jimbo sésiuaka. 25Ka sési jimboksïni arhixaka eskani nóteruni méni itsïmaakia úberi itsïrhukua, Diósïri juramukuarhia ménderu, imani jurhia engani úberi itsïrhukua jimbanhe itsïmaaka.#14.25 Mt 8.11; Lc 13.29.

Jesusi aiangpespti eska Pédru no míteni uandapiringa

(Mt 26.30-35; Lc 22.31-34; Jn 13.36-38)

26Ka tátsekua engaksï na jakajkuticheri pirekuechani máru pireapkia,#14.26 T'irekua Páskuarhu anapu méntkisï uénakorhisïrempti arini jakajkuticheri pirekuechani jinguniksï 113–114, ka íniksï k'amarhutasïrempti 115–118. juátarhuksï nirasptia, imani juátarhu enga Olibusï arhinhajka. 27Ka Jesusi arhiaspti:

–Chájtsïni iásï churekua iámeduecha, nóterujtsïni jakajkucheaka. Jimboka ísï karakata jarhaska: Karichichaksï etsapakurhiati ekani ataska karichi erangutini.#14.27 Sac 13.7; Mt 26.31. 28Tátsekua ekani na tsíntaakia, jíksïni urhechepantaaka Galilea.#14.28 Mt 28.7,10,16; Mk 16.7; Jn 21.1.

29Ka Pédru arhispti:

–Jíkini nómeni jurajkuaka, náuejkiksïni iámenduecha jurarkuni.

30Ka Jesusi mókukuspti:

–Sési jimbokini arhixaka, eska t'arhechu nótki tsimani xanhari uerani jauaka, ka t'úrini t'uíni tanimu xanhari no míteni uandaakia.

31Ka Pédru sánderu arhisïrempti:

–No ménikini no míteni uandaaka, náuejkini t'úngeni jinguni uarhini.

Ka máteruechajtuksï májkueni arhisïrempti.

Jesusi Jetsemani kómarhaspti

(Mt 26.36-46; Lc 22.39-46)

32Tátsekuaksï niraspti jima enga Jetsemani arhinhajka.#14.32 Jn 18.1. Ka Jesusi arhiaspti imeri jurhengorherichani:

–Ji nirasïnga uandamukukorheni, ixujkujtsïni erontsï je uaxakatini.

33Ka Pédruni ka Santiaguni ka Juánuni pájtaaspti, ka uénaspti kómu p'ikuarherani ka uandanheani. 34Ka arhiaspti:

–Uarhintaxaka kómu p'ikuarhenheni, enajkirini uarhikua janocheni jakiia;#14.34 Jn 12.27. ixu pakara je ka ásï jáma je k'uíni.

35Jima sántku urhepani kápatsetini kómarhispti Diósïni eska, enga úpiringa, kénditakupiringa imani ambe enga jurhani jápka. 36Ka arhisïrempti Diósïni: “¡Abba, Táte! Úsïngari iámendu ambe úni, kénditacherini ini nósesi jámarha ambe, k'óru ásï ima úkorhee engani ji uéjka, ima úkorhe eskari na t'u uéjka.”#14.35-36 Eb 5.7-8.

37Tátsekua enga k'uanhatsentapka, jurhengorherichaksï t'uíni k'uíxaptia. Ka Pédruni arhispti:

–Simoni, ¿K'uixakiri? ¿Nórini úski sóndi pámbetani? 38Asï k'uíni ja je, ka uandamukukorheni ja je, nóksïni terungutpiri andani. Jimboka chári espíritu uékani jarhasïnga, enga úka chájtsï sóntku jurajkutakorhesïnga.

39Ka Jesusi niraspti ménderu ka májkueni uandamukukorheni. 40Ka enga ménderu k'uanhatsentapka, ménderuksï t'uíni k'uíxaptia, jimbokaksï uarhixapka k'uínchani. Ka nóksï jánhaskasïrempti ambe arhini Jesusini. 41Tanimu xanhari k'uanhatsentatini arhiaspti:

–¿Andi útasterujtsï k'uíxaki? ¿Andi útasterujtsï mintsikorhexaki? ¡Sésku jarhastia! Iásïsï Acheti Uájpa#14.41 Exe 2.10. k'amanharhintsticheri jájki jimbo íntspenhantaatia. 42Jauara je, iáchka je; janoxatiia inde engarini íntspeaka.

Enga Jesusi jupinhapka

(Mt 26.47-56; Lc 22.47-53; Jn 18.2-11)

43Jesusi útasï ísï uandaxaptiteru enga Júdasï uánekuecha jinguni niárapka, ima Judasï enga imeri jurhengorheripka, chkári ka atajpetarakuechanksï anhajkutini. Ka imajtuksï niraspti engaksï tátecheri urhejtsïkuricha axaapka ka ístu engaksï juramukua jurhentpiricha axaapka ka engaksï achamasïcha axaapka. 44Júdasï arhiarixaptia: “Imeuati engani ji putinharhikuaka, sési jupikatini pa je.” 45Ka enga Judasï niárapka, andarheraspti Jesusini ka arhispti:

–¡Jurhentpiri! Arhini.

Ka putinharhikuspti. 46Ka sájparherasptiksïa Jesusini jupikani.

47K'óru nema tiámu atajpetarakua p'ijpaarhaspti ka kachujpandikuspti k'éri táteri jántspirini. 48Ka Jesusi arhiaspti:

–¿Andijtsïnisï ísï juki jupikani, enajkini ambe ji sïpajkurhe, chkári ka tiámu atajpetarakua jupikatini? 49Pauanipauani cha jinguni jamaxapka tiósïo jurhentpeni,#14.49 Lc 19.47; 21.37; Jn 18.20. ka nójtsïni jupikaska. Enga úka i ambe ísï úkorhexati jimboka ísï karakata jarhaska.

50Ka iámendu jurhengorherichaksï sïpakorhespti, ka Jesusiniksï jandiojku jurarkuni. 51Ka jimaksï jupikaspti tumbini ma, enga Jesusi jinguni jámani jápka ka enga takusï ts'irimbiti májku p'amantkukorhetini jápka. 52Ka ima tumbi takusï ts'irimbiti jurarkuspti ka nómbe ma jukarini uiriaspti sïpakorheni.

Jesusi k'éri tángorhentskuarhu

(Mt 26.57-68; Lc 22.54-55,63-71; Jn 18.12-14,19-24)

53Tátsekuaksï Jesusini k'éri tátani pérakuspti, ka jimaksï tángorhentaspti iámendu tátecheri juramuticha, ka achamasïcha, ka juramukua jurhentpiricha.#14.53 Sanedrini, k'éri tángorhentskua judiouespti (v. 55). Mt 26.57. 54Pédru jima jamberi chúxapaspti, k'éri táteri k'umanchekuarhu ekuarhu jamberi, ka uaxakaspti ka tiósïo anapu kuárichani jinguni jurhentani pakareraspti.

55Ka táteri urhejtsïkurichaksï, ka iámendu engaksï tángorhentapka, jirinhakuntaxaptiksï ambe arhimetaparinksï Jesusini uándikupirini, ka nóksï ambe ma xékuntaspti. 56Uánekuaksï arhiparhatasïrempti chkuándiraparini, enga úpka nómbema terukuntasïrempti.#14.56 Nm 35.30; Dt 19.15. 57Máruksï anhaxurhispti ka chkuándiraparinksï Jesusini arhijpekuspti:

58–Jucha ísï kurhajchaska: “Ji íni tiósïoni xerentaaka engaksï parhakpeni anapuecha úka, ka tanimu jurhia jimbo úntaaka máteru enga no parhakpeni anapu úaka.”#14.58 Mk 13.1-2; 15.29; Jn 2.19-22.

59Ka náuejki ísï, nóksï úsïrempti uandakuechani terukutaani. 60Ka k'éri táta jauaraspti, ka kurhamarhespti Jesusini:

–¿Nóri ambe ma uandaa? ¿Ambeski i ambe engaksïni xáni arhini jaka?

61Ka Jesusi nómbe ma mókukuspti, pínasku jarhaspti.#14.60-61 Is 53.7; Mt 27.12-14; Mk 15.5; Lc 23.9. Ka k'éri táta ménderu uéntaspti kurhamarheni:

–¿T'úsï Krístue? ¿T'úsï Diósïri újchakurakata Uájpe?

62Ka Jesusi arhispti:

–Jo Jíska. Ka Acheti Uájpanitsï#14.62 Exe 2.10. Diósïri uinhapekuarhu jurhijkandani xéaka enga uaxakatini jauaka, ka enga janikuarhu junguani jauaka.#14.62 Pir 110.1; Dn 7.13.

63K'éri táta xáni ikiani tsapandurhispti takusïni enga xukuntatini jámani jápka, ka arhiaspti:

–¿Ambeteruchisï úraia sándenderu uandantstichani? 64Kurhajchakorheskajtsïa eska Diósïni uéksïnga tájpanharhikuni. ¿Nénajtsï xésïni?

Ka iámenduechaksï uandaspti eska ísï uandarini uarhikua andakorhespka.#14.64 Lb 24.15-16; Jn 19.7.

65Máruksï t'uánharhikuspti, ka ónharhikusptiksï ka p'iaranksï kanharhikua atakuni, arhipariniksï:

–¿Arhitki nékini ataia?

Ka tiósïo kuárichajtuksï ataspti.#14.65 Is 50.6; 53.5.

Pédru Jesusini no míteni uandaspti

(Mt 26.69-75; Lc 22.56-62; Jn 18.15-18,25-29)

66Enga Pédru ekuarhu kétsekua jápka, uarhiti ma nitamaxapti, k'éri táteri jántspiri ma; 67ka enga na exepka Pédruni eska imajtu jima jurhentaxapka, eratespti ka arhini:

–T'újturi Jesusi Nasareti anapu jinguni jarhaspka.

68Ka Pédru arhispti:

–Ji no míteska, níjtuni kurhangujki amberisï uandani jaki.

Ka enga uéntapka jamukutini, t'arhechu ma ueraspti. 69Ka ima uarhiti ménderu exespti Pédruni ka máteruechani arhiaspti:

–Indejtu imani jinguni jámaxapti.

70Ka Pédru ménderu no míteni uandaspti. Sáni tátsekua, máteruechaksï ménderu arhispti Pédruni:

–Sési jimbo t'újturi imecha jinguni jámka, jimbokari Galilea anapueska.

71Ka Pédru uénaspti uinhamu ka ikiatintku uandani:

–¡No míteska indeni achetini engajtsïni arhini jaka!

72Ka ménderu t'arhechu ueraspti ka Pédru míantaspti eska Jesusi arhispka: “T'arhechu nótki tsimani xanhari uerani jauati engarini t'u t'uini tanimu xanhari no míteni uandaakia.” Ka jurajkutakorhentaspti uerani.

Valgt i Øjeblikket:

San Marcos 14: BI-PURHE

Markering

Del

Kopiér