San Lucas 6

Na engaksï jurhengorhiricha sábadu ma jimbo tríju p'ikuntapka

(Mt 12.1-8; Mc 2.23-28)

1Sábadu ma jimbo, Jesusi tríju jatsiatakatarhu parhiakuxapti. Ka jurhengorheri jémbechaksï tríju kuarhajtsïkuaxapti, piiujkuasïremptiksï ka arhasïremptiksï. 2Jimajkanksï máru fariseouecha kurhamarheaspti:

–¿Andijtsïsï imani ambe újki enga no jiáretperanhajka sábadu úni?

3Ka Jesusi arhiaspti:

–¿Cha no arhintaskia na enga Dabi jámapka ma xanhari engaksï imeri pámbetpiricha jinguni k'arhimani jápka? 4Diósïri k'umanchekuarhu inchaspti ka p'íkuaspti kurhindechani enga Diósï míndakatepka, arhaspti ka pámbetpiri jémbechantu íntsaspti, nájkirukaksï tátechajku jiáretanhempka imeni jásï kurhinda arhani.

5Ka arhiasptiteru:

–Acheti Uájpa sábaduechantu juramusïndi.

Na enga Jesusi k'urhujkurhani ma sábadu ambajkurhatantapka.

(Mt 12.9-14; Mc 3.1-6)

6Máteru sábadu, Jesusi k'umanchekua tángorhentskuarhu inchaspti ka uénaspti jurhentpeni. Acheti ma enga t'irerkandani k'urhujkupka jima jarhaspti; 7ka juramukua jurhentpiricha ka fariseouecha Jesusinksï eranguxapti ka exenksï eska sábadu ambakerantapiringa, ka ísïksï xékuntani ambe arhinharhikuni. 8Ka Jesusi mítetini ambe engaksï eratseni jápka, Jesusi acheti k'urhujkurhani arhispti:

–Jauara ka terujkani niára.

Ka ima acheti jauaraspti ka anhaxurhispti, 9ka Jesusi arhiaspti:

–Ambe máksïni kurhamarheaka: ¿Ambe jiáretperanhasïnki sábadu úni: Sési ambe o nósesi ambe? ¿P'ímutantani nemani o k'amajkuni?

10Tátsekua iámenduechani erateaspti engaksï uirhindatini jápka, ka achetini arhispti:

–Ióxurhantsï.

Ima acheti ióxurhantaspti ka ambaxurhantani. 11Ka kánekuaksï ikiaspti, ka uénasptiksï úskuni ka arhijperani nénaksï Jesusini úpirini ambe ma úkuni.

Jesusi témbeni tsimani uandakua parichani erakuaspti

(Mt 10.1-4; Mc 3.13-19)

12Imani jurhiatekuechani Jesusi juáta ma jimbo niraspti uandamukukorheni, ka erantskutaspti Diósïni kómarhini. 13Ka enga na erandepkia, jurhengorheri jémbechani ióarhiaspti, ka témbeni tsimani erakuaspti, ka uandakua páni axaaspti. 14Arichani: Simoni, engajtu Pédru arhimpka; Andresï, Simoniri erachi jémba ka Santiagu ka Juánu ka Felipe ka Bartolome 15ka Mateo ka Tomasï ka Santiagu Alfeo uájpa; ka Simoni enga Selotepka; 16ka Júdasï Santiagu uájpa; ka Júdasï Iskariote, ima enga Jesusini sïpatapka.

Jesusi uánekua jurhentpespti

(Mt 4.23-25)

17Jesusi juátarhu uératini imecha jinguni kétsemaspti, ka pákua ma jimboksï pakareraspti. Jimaksï tángorhespti uánekua engaksï chúxapempka, Judea anapuecha ka Jerusaleni ka ístu Tíro ka Sidoni anapuecha. 18Jesusinksï kurhajchani niáraspti, ka eska Jesusi ambakerantaapiringa. Ima engaksï nósesi jásï espirituechani jimbo nósesi p'ikuarherani jápka, imajtuksï ambakeranhantaspti. 19Ka iámenduechaksï uéksïrempti Jesusini p'árheni, jimboka uinhapekua uérhexapka enga jimbo ambakerpentani jápka.

Ambe enga Diósïni japarini marhuajka.

(Mt 5.1-12)

20Jesusi jurhengorheri jémbechani erateaspti ka arhiani:

“Cha k'ória engajtsï no jatsikorherika, jimboka cháriska Diósïri irechekua.”

21“Cha k'ória engajtsï k'arhimani jaka, jimbokajtsï niáchatanhantaaka.”

“Cha k'ória engajtsï uerajka, jimbokajtsï tátsekua tsípeaka.”

22“Cha k'ória engajtsï ikiamenhajka, engajtsï petaatanhajka, engajtsï útamenhajka, ka engajtsï Acheti Uájpani jimbo no xénhchanhajka.”

23“Kánekua tsípe je ima jurhiatekua, tsanguarantsï je tsípeni, jimbokajtsï cha auandarhu k'éri ma intsïmperata intsïnhaaka; jimbokaksï ióntki anapu Diósïri uandarichantu májkueni nósesi káaspka.”

24K'óru, “¡Jarhonheni cha jatsikorhericha, jimbokajtsï intsïnhaskia sési p'ikuarherakuani!”

25“¡Jarhonheni cha engajtsï iásï uinirini jaka jimbokajtsï k'arhimaaka!”

“¡Jarhonheni cha engajtsï iásï tsípeni jaka jimbokajtsï ueraska xáni mískorheni!”

26“¡Jarhonheni cha engaksïni iámenduecha k'éri ambe arhijka! Jimbokaksï ióntki anapuecha ísï káasïrempka imechani engaksï Diósïri uandari eratakorhempka.”

Kurhunhpirichani uétarhesïndi xénhchkaani

(Mt 5.38-48; 7.12)

27“K'óru chánksïni engajtsïni kurhajchani jaka arhixakaksïni: Xénhchaa je imechani engaksïni no xénhchajka, jarhuataa je imechani engaksïni no xénhchajka, 28sési arhia je imechani engaksïni nósesi arhijka, ka kómarhijpekua je imechani engaksïni útachejka. 29Engakini nema mápuru páksanharhikujka, jurajkukini tsimapuru atani; ka ekakini nema sununda euakorheaka, jurajkue chéti xukuparhakuajtu páni. 30Ne uéjkikini kurhacheni ambe ma, íntsku, ka imani engakini chéti ambe euakorheaka, ásï arhi euantani. 31Ísï kámpe je eskajtsï na uéjka eskajtsï cha kánhaaka.

32Ekajtsï cha imechanku xénhchkaaska engaksïni chánksïni xénhchkajka, ¿Ambejtsï sáni sési úxaki? K'amanharhintsticha jamberiksï ísï jámsïndi. 33Ka ekajtsï imechantku sési ambe úkuajka ekaksïni chánksïni sési ambe úchejka, ¿Ambe sáni sésiski? K'amanharhintstichajtuksï ísï jámasïndi. 34Ka ekajtsï imechantku kuánetaajka engajtsï ambe ma erarhukukuani jarhajka, ¿Ambejtsï sáni sési úxaki? K'amanharhintstichajtuksï kuánetperasïndi maiamperakua erokorhentaparini. 35Cha xénhchaa je imechani engaksïni chánksïni no xénhchajka, ka sési ambe úni, ka kuánetkorheni nómbema erokorhentaparini. Ísï jámantsï kánekua kúndamenhantaaka, ka chájtsï k'éri Diósï uájpeuaka, enga uarhisechani ka nósesi kámpitichantu p'amojkuajka.”

Ásï jáma máteruni arhinhchani

(Mt 7.1-5)

36“Cha sési kámpe je, ísï eska chári Táte na sési kámpejka. 37Ásï arhinhchpe je, ka nójtsï arhinhchanhaaka. Ásï uandatspe je ka nójtsï uandatsenhaaka. Púatspentsï je ka púamenhantaakajtsï. 38Íntsïmpe je ka íntsïmbenhaakajtsï. Sésiksïni jatsirachentaati, katsikatsinhachentaatiksïni, taianhantskata ka churhuntsïti jamberiksïni jatsirachentaati. Jimboka májkueni eska cha xáni íntspeaka, xántsï intsïnhantaaka.”

39Jesusi íni terukutantskua arhiaspti: “¿Andi pátenharhi ma marhuakusïni máteru pátenharhini urhekupani? ¿Nóksï tsimarheni uekanhea? 40Nóma jurhengorheri jurhentpiri jémba jinguni sánderu ambesïndi: Eka na jurhengorhekuani k'amaraakia, jurhentpiri jémba jinguni méntkueniuati.”

41“¿Andirisï chéti erachini uéjki jarhuatani enga echenharhitini jarhajka, ka nóri eratekorheni kostiasïni engari t'u eskuarhu kámani jaka? 42Ka ekari no exekorhejka kostiasïni engari chéti eskuarhu kámani jaka, ¿Nénari tekaasïni chéti erachini arhini: ‘Erachi, jurajkukini echenharhikua p'ínharhikuntani?’ ¡K'éri chkuándira! T'u uéna kostiasïni p'ínharhintani, ka ísïri sési exeaka, ka úakari chéti erachini echenharhikua p'ínharhikuntani.”

Ambakiti anhatapu, ambakiti ambe jukasïndi#6.43-45 Además de los pasajes paralelos, cf. Stg 3.11-12.

(Mt 7.17-20; 12.34-35)

43“Nóma ambakiti anhatapu úsïndi no áspiti amanhejchakua jukani, níjtu újki ísku jásï anhatapu áspiti amanhejchakua jukani. 44Táchani anhatapu mítenhantasïndi imani jimbo ambe enga jukajka: Karhasïrhu no jígusï p'ikunhantasïndi, níjtu tsïtunirhu uba p'ikunhantajki. 45Nema enga sési arhijpetiuaka, sési jásï ambe uandasïndi, jimboka sési jásï ambe mintsitarhu jatanhetixaka, ka nema enga nósesi arhijpetika, nósesi uandasïndi, jimboka nósesi jásï ambe mintsitarhu jatanhetixaka. Jimboka ambe enga xáni mintsitarhu jatanhetini jaka imani ambe uandasïnga.”

K'umanchikueri pítsekua

(Mt 7.24-27)

46“¿Andijtsïnisï cha arhijki ‘Jucheti Acha, jucheti Acha’ arhini, ka nójtsï úsïnga engaksïni ji arhijka? 47Arhiakaksïni ne engeni jáxeka ima engarini jurhajka andarherani ka kurhani, ka úni ambe engani ji arhiaka: 48Méntkueni jáxesti nema jinguni enga k'umanchekua úni jámani urheta kánekua jarhakupka ka enga pítsekua tsakapurhu kújtsïtapka. Enga iurhentpepka ka uinhamu k'umanchekuani andarherapka ka nósani manatani jimboka sési úkata jarhaspka. 49Ka ima engarini kurhajka ka no ísï úni eskani ji na arhijka, méntkueni jáxesti ima jinguni enga k'umanchekuani no pítsekua jinguni echerindu úpka ka enga iurhentpepka ka enga k'umanchekuani uinhamu andarherapka, xerendurhintaspti, ka iámu purundurhintani.”

Valgt i Øjeblikket:

San Lucas 6: BI-PURHE

Markering

Del

Kopiér